1. Edena dala ai moale korikori be Dirava dibaia karana amo ia mai?

 MOALE korikori be nega kwadogina lalonai ita mamia gauna lasi. Ia be ta ena mauri ibounai lalonai ia mamia gauna. Edena dala ai? Iesu be ena Ororo Harorona dekenai ia gwau: “Dirava dibaia totona idia hitolo taudia be idia moale.” (Mat. 5:3) Iesu ia diba taunimanima idia ura edia Havaraia Tauna, Iehova Dirava idia diba bona tomadiho henia. Bona Iehova be “moale Diravana” dainai, ia idia tomadiho henia taudia idia moale danu.​—1 Tim. 1:11.

2-3. (a) Iesu ena hereva hegeregerena, daika ia moale danu? (b) Inai atikol ai dahaka do ita herevalaia, bona dahaka dainai?

² Bema hekwakwanai ita davaria, ita moale diba, a? Oibe. Iesu ena tok lalonai, ia ese gau ma ta ia gwauraia. Ia gwau “idia taitai taudia,” reana idia be edia kara dikadia eiava hekwakwanai badadia idia davaria dainai idia lalohisihisi taudia unai, be idia moale. Danu Iesu ia hahedinaraia, “kara maoromaoro dainai dagedage idia davaria” eiava Keriso ena murinai idia raka dainai, ma haida ese idia “gwauraia dika” taudia be idia moale. (Mat. 5:4, 10, 11) To edena dala ai unai bamona negadiai moale korikori ita davaria?

³ Iesu ese moale ita davaria dalana be ita dekenai ia hadibaia, bona unai be hekwakwanai badadia ita davaria dainai lasi, to Dirava ita dibaia bona ia kahirakahira ita lao karana dainai moale korikori ita davaria. (Iam. 4:8) Edena dala ai unai bamona ita karaia? Inai atikol ai, moale korikori ita davaria daladia toi do ita herevalaia.

4. Moale korikori davaria totona dala ginigunana be dahaka? (Salamo 1:1-3)

⁴ DALA GINIGUNANA: Moale korikori ita davaria totona, Baibel ita duahia bona stadilaia. Moale korikori ita davaria totona, Baibel ita duahia bona stadilaia be namo. Iesu ese Dirava ena Hereva be aniani ida ia hahegeregerea. Taunimanima bona animal idia mauri totona, aniani korikori idia abia be namo. To taunimanima sibona ese Baibel idia duahia diba, bona unai bamona idia karaia be gau badana. Unai dainai Iesu ia gwau: “Taunimanima be paraoa sibona amo idia mauri lasi, to Iehova ena uduna amo idia mai hereva ibounai amo idia mauri.” (Mat. 4:4) Unai dainai, dina ta ta ai Baibel ita duahia be gau badana. Salamo torea tauna ia gwau: ‘Inai bamona ia karaia tauna be ia moale, ia be Iehova ena taravatu dekenai ia moale, bona dina bona hanuaboi ai ia duahia.’​—Salamo 1:1-3 duahia.

5-6. (a) Baibel amo dahaka ita dibaia? (b) Edena dala haida ai Baibel ese ita ia durua?

⁵ Baibel ai, Iehova ese moale korikori ita davaria daladia be ita ia hadibaia. Iena ura iseda mauri totona ita dibaia. Ia kahirakahira ita lao dalana bona iseda kara dikadia ia gwauatao totona do ita karaia gaudia bona vaira nega totona ia karaia gwauhamata namodia ita dibaia. (Ier. 29:11) Baibel ita stadilaia karana amo unai hereva momokanidia ita dibaia dainai ita moale!

⁶ Ita diba Baibel ai sisiba namodia idia noho, dina ta ta lalonai ita badinaia totona. Unai sisiba ita badinaia neganai, ita moale  diba. Mauri ena hekwakwanai idauidau dainai oi lalomanoka negadiai, nega bada oi atoa Iehova ena Hereva oi duahia bona laloa dobu totona. Iesu ia gwau: “Dirava ena hereva idia kamonai bona badinaia taudia be idia moale!”​—Luka 11:28.

7. Nega oi atoa Baibel oi duahia neganai, dahaka namo do oi davaria?

⁷ Baibel oi duahia lalonai, nega oi atoa oi duahia gaudia oi moalelaia totona. Inai haheitalai dekenai ia noho gauna be oi dekenai ia vara danu, a? Ta ese aniani namona ta ia nadua. To reana gau ma haida oi laloa bona oi haraga dainai oi aniani haraga bona ena mamia oi abia lasi. Oi aniani ore murinai, oi laloparara emu aniani be ia ore vadaeni bena oi laloa bema metairametaira oi aniani, unai aniani do oi moalelaia. Baibel duahia karana be unai bamona. Nega haida ita duahia haraga dainai, ena sivarai ita moalelaia momokani lasi. Nega oi atoa Baibel duahia karana oi moalelaia, hegeregere emu lalona ena matana ai idia vara gaudia oi itaia, edia gado regena oi kamonai, bona oi duahia gaudia oi lalohadailaia. Unai bamona oi karaia neganai, do oi moale bada.

8. Edena dala ai, “hesiai tauna mai ena kamonai bona mai ena aonega” be ena gaukara ia hagugurua? (Futnout itaia danu.)

⁸ Iesu ese “hesiai tauna mai ena kamonai bona mai ena aonega” ia abia hidi, nega korikori ai buka, magasin bona vidio idauidau ia halasia, bona unai ese iseda abidadama ia hagoadaia bada. * (Mat. 24:45) Hesiai tauna ese ia hegaegaelaia gaudia ibounai lalonai Toretore Helagadia ia gaukaralaia. (1 Tes. 2:13) Unai gaudia ese ita ia durua Iehova ena lalohadai Baibel dekenai ita diba totona. Unai dainai, Gima Kohorona bona Noga! magasin bona jw.org ai idia noho atikol ita duahia. Ita ese wiki lalonai bona wikeni ena kongrigeisen heboudia totona ita hegaegae. Bona dala ia noho neganai, hua ta ta ena JW Broadcasting^® program ita itaia. Bema dina ta ta ai Baibel ita duahia bona laloa dobu, vadaeni dala iharuana do ita karaia diba unai amo moale korikori do ita abia.

9. Moale korikori ita abia totona, dala iharuana be dahaka?

⁹ DALA IHARUANA: Moale korikori ita davaria totona, Iehova ena taravatu ita badinaia be namo. Salamo torea tauna ia gwau: “Iehova idia gari henia taudia ibounai be idia moale, idia be iena dala ai idia raka.” (Sal. 128:1) Iehova ita gari henia ena anina be ia ita matauraia bada dainai, ia moalelaia lasi karadia ita dadaraia. (Aon. 16:6) Unai dainai, ita gaukara goada Baibel ai Dirava ena taravatu maoro bona kerere dekenai ita badinaia totona. (2 Kor. 7:1) Bema Iehova ese ia ura henia gaudia ita karaia bona ia inai henia gaudia ita dadaraia, do ita moale bada.​—Sal. 37:27; 97:10; Roma 12:9.

10. Roma 12:2 hegeregerena, dahaka ita karaia be namo?

¹⁰ Roma 12:2 duahia. Ta ia diba Iehova ese dahaka be maoro bona dahaka be kerere ia abia hidi diba, to danu Dirava ese ia atoa taravatu ia abia dae be namo. Hegeregere, ta ia diba gavamani be mai ena maoro motuka ena spid limit taravatu idia atoa totona. To reana ia ura lasi unai taravatu ia abia dae. Unai dainai, motuka ia taria neganai ia spid. Iseda kara amo ita hahedinaraia ita abia dae momokani Iehova ena taravatu badinaia karana be mai ena namo. (Aon.  12:28) Davida be unai bamona ia mamia dainai, Iehova be inai bamona ia herevalaia: “Oi ese mauri ena dala  be lau dekenai oi hadibaia vadaeni. Lau oi lalonamo henia neganai, egu moale ia bada herea. Emu imana idibana ai hanaihanai moale ia noho.”​—Sal. 16:11.

11-12. (a) Ita lalohekwarahi eiava lalomanoka neganai, dahaka dainai ita naria namonamo? (b) Moale karadia ita abia hidi neganai, edena dala ai Filipi 4:8 ai idia noho herevadia ese ita ia durua?

¹¹ Ita lalohekwarahi eiava lalomanoka neganai, reana do ita ura gau ta ita karaia iseda hekwakwanai ita laloa momo lasi totona. Unai ita lalopararalaia, to ita naria namonamo badina ita ura lasi Iehova ese ia inai henia gauna ta ita karaia.​—Efe. 5:10-12, 15-17.

¹² Aposetolo Paulo ese Filipi Keristani taudia dekenai ia torea revareva lalonai, idia ia hagoadaia “kara maoromaoro gaudia, kara goeva gaudia, lalokau gaudia, . . . [bona] namo gaudia” idia laloa noho totona. (Filipi 4:8 duahia.) Ena be Paulo ena revareva lalonai moale karadia ia gwauraia hedinarai lasi, to ia torea gaudia ese ita ia durua diba moale karadia ita abia hidi namonamo totona. Mani inai oi tohoa: Siri lalonai inai hereva “gaudia” ia hedinarai neganai, ena gabu ai inai hereva oi atoa “ane,” “muvi,” “buka,” eiava “vidio gadara.” Unai bamona oi karaia neganai, oi do ia durua Dirava ese ia abia dae gaudia bona ia abia dae lasi gaudia edia idau do oi dibaia. Ita ura iseda mauri lalonai Iehova ena kara maoromaoro taravatudia ita badinaia. (Sal. 119:1-3) Bena lalomamina goevana ida dala ihatoina do ita badinaia unai amo moale korikori ita abia diba.​—Kara 23:1.

13. Moale korikori ita abia totona, dala ihatoina be dahaka? (Ioane 4:23, 24)

¹³ DALA IHATOINA: Iehova tomadiho henia karana ita atoa guna. Iehova ese ita ia havaraia, bona Ia ita tomadiho henia be namo. (Apok. 4:11; 14:6, 7) Unai dainai, gau badana be Iehova ese ia abia dae dalana ai ia ita tomadiho henia, anina be “lauma ai bona momokani ai.” (Ioane 4:23, 24 duahia.) Iseda tomadiho karana lalonai ita ura Dirava ena lauma ese ita ia hakaua, unai amo iseda tomadiho karana be Baibel ai idia noho hereva momokanidia ida ia hegeregere. Ena be iseda gaukara idia taravatua tanona ai ita noho, to iseda tomadiho karana ita atoa guna be namo. Hari, iseda tadikaka taihu handred mai kahana be dibura ruma ai idia atoa, badina idia be Iehova ena Witnes taudia. * To, idia be mai moale ida dala idia tahua idia guriguri, idia stadi, bona ma haida dekenai Dirava bona ena Basileia idia herevalaia. Ita idia gwauraia dika eiava dagedage henia neganai, ita moale badina Iehova ese ita ia durua ita haheauka totona, bona ita do ia hanamoa.​—Iam. 1:12; 1 Pet. 4:14.

14. Tajikistan ai tadikaka matamata ta dekenai dahaka ia vara, bona dahaka dainai?

¹⁴ Iseda tadikaka bona taihu haida be hekwakwanai badadia idia davaria, to moale korikori idia abia badina idia be ita herevalaia vadaeni daladia toi idia badinaia. Tajikistan ai ia noho tadikaka ta ladana, Jovidon Bobojonov, ena mauri lagani be 19, ia be tuari lalonai ia vareai lasi dainai, ia dekenai ia vara gauna mani oi laloa. Lagani 2019, October 4 ai, ena ruma amo ia idia abia bona hua momo lalonai dibura ruma dekenai raskol tauna bamona idia kara henia. Ia dekenai ia vara gauna ena sivarai be tano momo ena nius dekenai idia halasia. Unai nius dekenai idia hahedinaraia ia idia botaia badina idia ura tuari ia lao totona gwauhamata metauna ia karaia bona  tuari iunifom do ia hahedokilaia. Unai murinai, kota dekenai idia gwau ia be kerere ia karaia bona gaukara aukadia idia karaia gabuna dekenai idia siaia lao, unuseniai ia noho ela bona tano ena presiden ese maoro ia henia idia ruhaia totona. Unai negadia lalonai, Jovidon be Dirava ia badinaia noho bona ia moale noho. Edena dala ai? Ia be hanaihanai ena abidadama hagoadaia gaudia ia karaia.

15. Jovidon be dibura ruma ai ia noho neganai, edena dala ai Iehova dibaia karaia ia goadalaia?

¹⁵ Jovidon be dibura ruma ai ia noho neganai, Iehova dibaia karana ia goadalaia, ena be ia dekenai Baibel eiava pablikeisen ta ia noho lasi. Edena dala ai unai ia karaia? Tadikaka taihu ese ia dekenai aniani idia abia lao, bona aniani idia udaia baege dekenai dina ena siri idia torea. Unai dala amo, ia be dina ta ta ai Baibel ia duahia bona laloa dobu. Dibura ruma amo idia ruhaia murinai, ia ese hekwakwanai badadia idia do davaria lasi taudia dekenai inai sisiba ia henia: “Oi dekenai hekwakwanai badana ta ia do vara lasi neganai, hari be nega namona Baibel bona iseda pablikeisen oi duahia, unai amo Iehova dekenai emu diba oi habadaia.”

16. Jovidon be dahaka gaudia ia laloa bada?

¹⁶ Iseda tadikaka be Iehova ena taravatu ia  badinaia. Ia be ura dikadia ia laloa loulou lasi bona kara dikadia ia karaia lasi. To ia ese Iehova bona Ia laloa bada gaudia ia atoa guna. Jovidon ese Dirava ena havaraia gaudia ia ura henia bada. Daba ta ta ai ia noga neganai manu edia tai regena ia kamonai. Hanuaboi ai hua bona hisiu ia raraia. Ia gwau: “Unai harihari gaudia be Iehova amo idia mai, bona unai ese lau ia hamoalea bona hagoadaia.” Iehova ese ita dekenai tauanina durua gaudia bona Baibel ena hakaua daladia ia henia, bema unai gaudia ita laloa bada, do ita moale bona unai ese ita do ia durua ita haheauka noho totona.

17. Jovidon dekenai ia vara hegeregerena, edena dala ai 1 Petero 1:6, 7 ena hereva ese ta ia durua diba?

¹⁷ Danu Jovidon be Iehova tomadiho henia karana ia atoa guna. Ia diba Dirava momokani badinaia karana be mai anina bada. Iesu ia gwau: “Iehova oiemu Dirava oi tomadiho henia be namo, bona ia sibona do oi hesiai henia.” (Luka 4:8) Tuari biagudia bona soldia idia ura Jovidon be ena tomadiho ia rakatania. To, dina bona hanuaboi ta ta ai ia guriguri goadagoada, Iehova ia noia unai amo do ia durua ena abidadama dekenai ia gini goada noho totona. Ena be Jovidon idia kara auka henia, to Dirava ia abidadama henia noho. Unai dainai, Jovidon be ia moale bada, badina guna bamona lasi, hari iena abidadama be ia goada momokani.​—1 Petero 1:6, 7 duahia.

18. Edena dala ai ita moale noho diba?

¹⁸ Iehova ia diba dahaka ita karaia be namo moale korikori ita abia totona. Ena be hekwakwanai badadia idia vara, to bema moale korikori oi abia daladia toi oi badinaia, do oi moale noho. Bena oi danu do oi gwau: “Iehova be edia Dirava ai idia halaoa taudia be idia moale!”​—Sal. 144:15.