1-2. Edena dala namona ta ai Baibel oi duahia bona stadilaia diba? Haheitalai gwauraia.

 MANI oi laloa oi ura ruma ta oi hoia. Abia hidi oi do karaia lasi neganai, oi ura dahaka oi itaia guna? Ruma ena vaira kahana ena laulau sibona, a? Lasi, to oi ura ruma korikorina oi itaia, oi raka hegege, oi vareai bona ena daiutu bona ena kahana ibounai oi sekea. Danu, reana do oi ura ruma idia haginia dalana ena palani oi itaia. Oibe, oi ura hoia rumana ena kahana ibounai oi sekea be namo.

² Baibel ita duahia bona stadilaia neganai, unai bamona ita karaia be namo. Baibel torea tauna ta ia gwau, Baibel ena hereva be “ruma badana ta bamona, ia be lata herea bona ena badina be dobu momokani.” Vadaeni, edena dala ai Baibel ena hereva do ita dibaia namonamo? Bema oi duahia haragaharaga, hahediba hereva badadia sibona do oi dibaia, unai be “Dirava ena hereva amo hahediba hereva ginigunadia.” (Heb. 5:12) To, ruma ena kahana ibounai oi sekea namonamo hegeregerena, Baibel oi stadilaia namonamo bona lalopararalaia be namo. Dala namona ta be, oi tahua edena dala ai Baibel ena kahana idauidau be gau tamona idia herevalaia. Danu, oi hekwarahi oi abia dae hereva momokanidia oi lalopararalaia, bona oi tahua dahaka dainai idia be hereva momokani.

3. Aposetolo Paulo ese Keristani tadikaka taihu ia hamaoroa dahaka do idia karaia bona dahaka dainai? (Efeso 3:​14-19)

 ³ Baibel ena kahana ibounai ita lalopararalaia totona, ena hereva momokani dobudia ita diba be namo. Aposetolo Paulo ese Keristani tadikaka taihu ia hamaoroa Dirava ena Hereva do idia stadilaia namonamo, unai amo hereva momokani “ena lababa, ena lata, ena ataiai, bona ena dobu do [idia] lalopararalaia momokani.” Unai amo edia abidadama be “badina aukana latanai do [ia] gini goada.” (Efeso 3:​14-19 duahia.) Ita danu be unai bamona do ita karaia. Mani, Dirava ena Hereva ita stadilaia namonamo unai amo ena anina korikorina do ita lalopararalaia.

4. Dahaka ita karaia Iehova kahirakahira ita lao totona? Haheitalai gwauraia.

⁴ Ita Keristani taudia be Baibel ena hahediba hereva badadia sibona ita lalopararalaia be hegeregere lasi. Dirava ena lauma helaga ena heduru amo, ita ura “Dirava ena dobu gaudia danu” do ita diba. (1 Kor. 2:​9, 10) Iehova kahirakahira oi lao totona, sibona emu stadi projek ta oi karaia diba, a? Hegeregere, ia ese idaunegai iena hesiai taudia dekenai lalokau ia hahedinaraia, bona oi dekenai danu unai lalokau ia hamomokania dalana oi stadilaia. Eiava emu stadi lalonai, Israela taudia ese Iehova idia tomadiho henia dalana be hari Keristani taudia ese idia tomadiho henia dalana ida oi hahegeregerea diba. Eiava tanobada ai Iesu ena mauri bona hesiai gaukara ai ia hagugurua peroveta herevadia oi stadilaia diba.

5. Edena topik ta oi ura stadilaia namonamo?

⁵ Baibel idia stadilaia namonamo taudia haida idia nanadaia Dirava ena Hereva lalonai edena dobu gaudia haida idia ura stadilaia. Idia gwauraia gaudia haida be maua ladana “ Stadi Projek Ena Topik Haida” lalonai idia torea. Watch Tower Publications Index eiava Research Guide for Jehovah’s Witnesses oi gaukaralaia diba mai moale ida unai topik idauidau oi stadilaia totona. Baibel ena dobu gaudia stadilaia karana ese emu abidadama ia hagoadaia diba bona oi ia durua “Dirava do oi  diba.” (Aon. 2:​4, 5) Mani, Baibel ena hereva momokani dobudia haida ita herevalaia.

6. (a) Dahaka dainai Dirava ena ura be hanaihanai ia guguru? (b) Dahaka dainai ita abia dae Iehova ena ura tanobada bona taunimanima totona be “gunaguna negana amo ia laloa vadaeni gauna”? (Efeso 3:11)

⁶ Baibel ese Dirava ena ura ia gwauraia dalana mani ita laloa. Dirava ena ura be hanaihanai ia guguru. Dahaka dainai? Badina bema Dirava ia ura gau ta ia karaia, ia be dala tamona ia badinaia lasi, to dala idauidau ia badinaia unai ia hagugurua totona. Ita moale badina Baibel ese metairametaira “Dirava ena ura, gunaguna negana amo ia laloa vadaeni gauna” ia hahedinaraia. (Efe. 3:11) Herevana Iehova be edena dala ia abia hidi, to hanaihanai ia kwalimu, badina “gau ibounai ia karaia vadaeni, iena ura ia hagugurua totona.” (Aon. 16:4) Danu ia hagugurua gaudia be do idia noho hanaihanai. Vadaeni, Iehova ena ura be dahaka, bona ia hagugurua totona dahaka gaudia haida ia haidaua?

7. Taunimanima ginigunadia idia gwau-edeede murinai, Iehova be edena dala ai iena ura hagugurua dalana ia haidaua? (Mataio 25:34)

⁷ Dirava ese taunimanima ginigunadia rua dekenai iena ura idia totona ia hadibaia. Ia hamaorodia: “Natudia umui havaraia bona do umui momo herea bona tanobada umui hahonua bona umui biagua, . . . bona tanobada ai idia noho mauri gaudia ibounai umui biagua.” (Gen. 1:28) Adamu bona Heva idia gwau-edeede neganai taunimanima ibounai dekenai kara dika idia mailaia. Unai ese Iehova ena ura ia koua lasi, to ena ura hagugurua dalana ia haidaua. Karaharaga, abia hidi ia karaia guba ai Basileia ta do ia haginia bona unai amo iena ura taunimanima bona tanobada totona do ia hagugurua. (Mataio 25:34 duahia.) Ia abia hidi negana ai, Iehova ese tanobada ai iena natuna Roboana ia siaia mai taunimanima dekenai Basileia do ia hadibaia, bona ena mauri ia henia kara dika bona mase amo ita ia ruhaia totona. Bena Iehova ese Iesu ia hatoreaisi lou bona guba ai Dirava ena Basileia ena King ai ia halaoa. To, ita ese Dirava ena ura dekenai gau momo do ita dibaia.

8. (a) Baibel ena sinado badana be dahaka? (b) Efeso 1:​8-11 hegeregerena, Iehova ena ura badana be dahaka? (Rau 1 ena laulau itaia.)

⁸ Baibel ena sinado badana be, Iehova ese iena ladana do ia abia isi, bona Keriso ese tanobada do ia lohiaia neganai, unai do ia hagugurua. Iehova ena ura do ia haidaua lasi. Ia gwauhamata ia karaia gaudia ibounai be do ia hagugurua. (Isa. 46:​10, 11; Heb. 6:​17, 18) Gabeai, tanobada be paradaiso ai do ia lao bona unuseniai Adamu bona Heva ena tubudia, goevadae bona kara maoromaoro taudia, be ‘mauri do idia moalelaia hanaihanai.’ (Sal. 22:26) To, Iehova be unai sibona do ia karaia lasi. Iehova ena ura badana be guba bona tanobada ai ena hesiai taudia do ia hatamonaia. Bena idia ibounai ese Iehova, edia Lohia Tauna badana, do idia kamonai henia. (Efeso 1:​8-11 duahia.) Iehova ese dala hereadaena ai iena ura ia hagugurua dalana ita hoalaia, ani?

9. Edena dala ai Baibel ita duahia karana ese ita ia durua vaira nega ai idia vara gaudia ita lalopararalaia totona?

⁹ Genese 3:15 ai Iehova ese Eden umana ai ia gwauraia peroveta herevana mani ita herevalaia. b Unai siri ese Dirava ena ura do ia hagugurua karadia ia hahedinaraia. To unai be idia guguru lasi ela bona lagani tausen momo murinai. Hegeregere, Dirava ese Aberahamo  ia hamaoroa, uru momo murinai, iena bese amo Keriso do ia vara. (Gen. 22:​15-18) Bena lagani 33 C.E. ai, peroveta herevadia hegeregerena, Iesu ena aena geduna ai bero ia abia. (Kara 3:​13-15) Unai peroveta herevana ena dokonai “hahine ena natuna” ese Satani ena kwarana do ia moia patapata, unai be lagani 1,000 murinai do ia guguru. (Apok. 20:​7-10) Bona Baibel ese Satani ena orea bona Iehova ena orea huanai ia noho inai heheni karana dainai do idia vara gaudia momo ia herevalaia danu.

10. (a) Kahirakahira dahaka gaudia do idia vara? (b) Edena dala ai iseda lalona bona kudouna do ita hegaegaelaia? (Futnout itaia.)

¹⁰ Baibel ia peroveta tanobada ai gau badadia haida do idia vara. Gau ginigunana be, tanobada besedia ese “Maino bona noho namo!” do idia boiboilaia. (1 Tes. 5:​2, 3) Bena, tanobada besedia ese tomadiho koikoidia do idia hadikaia neganai, “karaharaga” hisihisi badana do ia vara. Unai murinai, hoa gauna ta do ia vara, “taunimanima ena Natuna be mai ena siahu bona hairai bada ida guba ena ori lalonai do ia mai.” (Mat. 24:30) Iesu ese taunimanima do ia hahemaoro henidia, bona mamoe be nanigosi amo do ia hapararaia. (Mat. 25:​31-33, 46) Unai nega ai, Satani be Iehova do ia tuari henia noho. Ia ese Iehova ena taunimanima ia inai henidia dikadika dainai, tanobada besedia eiava Baibel ese ia gwauraia Goga, Magoga tanona tauna, ena lalona do ia veria Iehova ena hesiai taudia ia tuari henia totona. (Ese. 38:​2, 10, 11) Unai ia vara noho lalonai, horoa taudia be guba ai do idia daekau bona Keriso bona guba tuari oreana do idia bamoa Aramagedono tuari lalonai idia tuari totona. Unai be hisihisi badana ena dokona. c (Mat. 24:31; Apok. 16:​14, 16) Bena Keriso be tanobada ena King ai do ia lao, bona ena Lagani 1,000 Lohia Negana do ia hamatamaia.—Apok. 20:6.

11. Mauri hanaihanai ena anina be dahaka oi dekenai? (Laulau itaia danu.)

¹¹ Mani, lagani 1,000 murinai oi sibona emu  mauri oi piksaia. Baibel ia gwau iseda Havaraia Tauna “ese [iseda] kudouna ai noho hanaihanai urana ia atoa.” (Had. 3:11) Iehova Kahirakahira Oi Lao bukana, rau 319 ena hereva ese iseda lalona ia veria, ia gwau: “Lagani handred, tausen, milioni bona bilioni ita mauri murinai, iseda diba Iehova Dirava dekenai be do ia dobu, hari bamona lasi. To do ita mamia gau namodia momo herea idia do noho, ita dibaia totona. . . . Mauri hanaihanai be mai anina bada bona gau idauidau amo do ia honu—bona Iehova kahirakahira ita lao karana be hanaihanai do ita moalelaia bada gauna.” Dirava ena Hereva ita stadilaia noho lalonai, dahaka gaudia ma haida ita tahua diba?

12. Edena dala ai guba ena lalona oi itaia diba? Haheitalai ta gwauraia.

¹² Dirava ena Hereva ese ita dekenai Iehova ena noho gabuna ia hahedinaraia, ia be “atai momokani.” (Isa. 33:5) Baibel ese Iehova bona ena guba oreana edia hoa gaudia ia hahedinaraia. (Isa. 6:​1-4; Dan. 7:​9, 10; Apok. 4:​1-6) Hegeregere, Esekiela ese matahanai amo ia itaia, guba ia kehoa bona Dirava bona hoa gaudia ma haida ia itaia ena sivarai ita duahia diba.—Ese. 1:1.

13. Heberu 4:​14-16 hegeregerena, guba ai Iesu ena gaukara dekenai dahaka oi moalelaia?

¹³ Danu mani ita laloa, guba ai Iesu be King bona Hahelaga Tauna bamona mai ena hebogahisi ida ena gaukara ia karaia noho. Ia amo Dirava ita guriguri henia bona ena “hebogahisi hereadaena ena terona kahirakahira ita lao” diba, bona ia ita noia Dirava ena hebogahisi bona heduru be “nega maorona ai” ita do ia henia. (Heberu 4:​14-16 duahia.) Namona be dina ta ta ai, Iehova bona Iesu ese guba amo ita totona idia karaia vadaeni gaudia bona idia karaia noho gaudia do ita laloa.  Edia lalokau ita dekenai ese ita ia hagoadaia Iehova ita tomadiho henia goadagoada totona.—2 Kor. 5:​14, 15.

14. Edena dala ai ita hahedinaraia Iehova bona Iesu edia kara ita laloa bada? (Laulau itaia danu.)

¹⁴ Iseda tanikiu karana Dirava bona ena Natuna dekenai ita hahedinaraia dalana badana be, ma haida ita durua Iehova ena Witnes taudia bona Iesu ena hahediba taudia ai do idia lao. (Mat. 28:​19, 20) Aposetolo Paulo be unai bamona ia karaia. Ia diba Iehova ena “ura be taunimanima idauidau do ia hamauria bona hereva momokani ena diba maoromaoro do idia abia.” (1 Tim. 2:​3, 4) Ia haroro goadagoada taunimanima momo ia durua totona, unai amo “dala idauidau ai haida [ia] hamauria” diba.—1 Kor. 9:​22, 23.

15. Salamo 1:2 hegeregerena, dahaka ese ita do ia hamoalea?

¹⁵ Salamo torea tauna ese moale bona kwalimu tauna ia herevalaia, ia gwau “ia be Iehova ena taravatu dekenai ia moale, bona dina bona hanuaboi ai Dirava ena taravatu ia laloa dobu.” (Sal. 1:​1-3 ftn.) Baibel hahanaia tauna ta ese unai siri ia herevalaia, ia gwau tau ta ese “Dirava ena hakaua dalana do ia ura henia dikadika dainai, do ia duahia, diba ia abia bona ia laloa dobu.” Ma ia gwau, “bema dina ta ai tau ta be Baibel ia duahia lasi, unai dina be ia ore kava.” Baibel stadilaia karana oi moalelaia diba bema ena hereva badadia oi dibaia bona idia ta ta be gau tamona idia herevalaia dalana oi lalopararalaia. Oibe, Baibel ena kahana ibounai oi stadilaia karana do oi moalelaia!

16. Atikol 45 ai dahaka do ita herevalaia?

¹⁶ Iehova ese Baibel amo ita dekenai ia hadibaia hereva momokanidia ita lalopararalaia diba. Atikol 45 ai, hereva momokani dobuna ta do ita stadilaia. Unai be Iehova ena dubu helaga badana. Paulo ese Heberu Keristani taudia dekenai ia torea revareva lalonai unai ia herevalaia. Unai topik oi stadilaia karana do oi moalelaia bada.