Israela taudia be lagani 40 lalonai tano gagaena ai idia noho neganai, mana be edia aniani badana. (Eso. 16:35) Danu, nega rua Iehova ese kibi manudia ia henia idia ania totona. (Eso. 16:​12, 13; Num. 11:31) To, Israela taudia ese aniani idaudia ma haida idia ania danu.

Hegeregere, nega haida Iehova ese ena taunimanima ia hakaudia lao “laga-ani gabuna” dekenai bona unuseniai ranu bona aniani ia henidia. (Num. 10:33) Unai laga-ani gabuna ta be Elima dekenai. “Unuseniai ranu guri 12 bona pama au 70 idia noho,” unai be reana be deit audia. (Eso. 15:27) Buka ta ladana Plants of the Bible ia gwau, deit auna be “gabu momo ai idia tubu, bona tano gagaena ai idia be aniani badana, bona unai au dekena amo taunimanima milioni momo ese aniani bona oela idia abia, bona ena ikerukeru henunai idia laga-ani.”

Reana Israela taudia be hari idia gwauraia Feiran ena ranu gabuna dekenai idia noho danu, unai be koura kahana ta. a Buka ta ladana Discovering the World of the Bible ia gwau, unai koura o sinavai “ena lata be kilomita 130 bamona bona Sinai dekenai ia be momo ese idia diba sinavai badana ta mai ena hairai.” Unai buka ma ia gwau: “Bema tau ta be unai koura ia matamaia gabuna amo kilomita 45 ia raka daekau neganai, Feiran ena ranu gabuna dekenai do ia ginidae. Unai ranu gabuna ena lata be kilomita 4.8 bamona, bona ia be ataiai momokani, davara amo mita 610 bamona. Unai gabu be pama au amo ia honu bona mai ena hairai dainai, idia gwauraia Sinai ena Eden umana. Lagani tausen momo lalonai unai gabu ai deit audia momo herea idia tubu dainai, taunimanima momo be unuseniai idia lao.”

Israela taudia ese Aigupito idia rakatania neganai, idia mikisia paraoa, disi, bona reana witi bona oela danu idia abia lao. To, unai aniani be idia noho daudau lasi. Danu idia be edia “mamoe bona nanigosi bona boromakau” momo herea idia abia lao. (Eso. 12:​34-39) To, Israela taudia ese haida idia ania. Animal haida be idia bouboulaia, kaivakuku dekenai idia bouboulaia danu. b (Kara 7:​39-43) Bona tano gagaena be siahu bada herea dainai, reana unai animal momo idia mase. To, Israela taudia ese mamoe bona boromakau haida idia ubua. Unai ita diba  badina edia abidadama lasi karana dainai, Iehova ese ia hamaorodia: “Lagani 40 lalonai emui natudia be taunimanima lasi gabuna ai edia mamoe do idia hakaua loaloa.” (Num. 14:33) Unai dainai, reana edia mamoe amo milika idia abia bona nega haida vamu idia ania danu, to unai be hegeregere lasi lagani 40 lalonai taunimanima 3 milioni bamona ubudia totona. c

Animal be edeseniai aniani bona ranu idia davaria? d Reana unai nega ai medu bada ia diho dainai, tubutubu gaudia momo idia tubu. Insight on the Scriptures, Volium 1 ia gwau, lagani 3,500 gunanai, “Israela taudia be Arabia tanona dekenai idia noho lalonai, ranu be bada, hari bamona lasi. Hari idia kaukau koura badadia momo idia noho, guna unuseniai sinavai idia aru, unai ese ia hamomokania guna medu bada ia diho bona sinavai momo idia noho.” To, unai tano ai taunimanima idia noho lasi bona ia be gari gabuna. (Deu. 8:​14-16) Bema Iehova ese hoa dalanai Israela taudia bona animal dekenai ranu ia henia lasi, idia ibounai be do idia mase.—Eso. 15:​22-25; 17:​1-6; Num. 20:​2, 11.

Mose ese Israela taudia ia hamaoroa, Iehova ese mana amo idia ia ubua, badina “unai amo ia ura [idia] diba, taunimanima be paraoa sibona amo idia mauri lasi, to Iehova ena uduna amo idia mai hereva ibounai amo idia mauri.”—Deu. 8:3.