STADI ATIKOL 40
ANE 30 Egu Tama, Ma Dirava, Bona Tura
Iehova ese “Lalometau Taudia Ia Hagoadaia”
“Ia ese lalometau taudia ia hagoadaia, ia ese edia bero ia kumia.”—SAL. 147:3.
STADI ENA BADINA
Iehova ese lalohisihisi taudia ia laloa bada. Inai atikol ai do ita itaia, ita lalohisihisi neganai Iehova ese ita ia durua bona unai amo ma haida ita hagoadaia.
1. Iehova ese ena hesiai taudia be edena bamona ia laloa?
IEHOVA be ena hesiai taudia ese idia davaria hisihisi ibounai ia itaia. Ita moale bona ita lalohisihisi negadia ia diba danu. (Sal. 37:18) Ena be ia itaia ita lalohisihisi, to bema ia ita hesiai totona ita gaukara goada, do ia moale bada! Danu, ia be mai ura ida ita ia durua bona hagoadaia.
2. Iehova ese lalometau taudia totona dahaka ia karaia bona edena dala ai ena heduru amo namo ita abia?
2 Salamo 147:3 ia gwau: Iehova ese idia lalometau taudia “edia bero ia kumia.” Inai siri ese ia hahedinaraia, Iehova be mai lalokau ida idia lalohisihisi taudia ia durua. Iehova ena heduru amo, namo ita davaria totona dahaka ita karaia be namo? Mani inai haheitalai ita laloa. Diba bada doketa tauna be gau momo ia karaia diba, bero ia abia tauna ia hanamoa totona. Bero ia abia tauna ia namo totona, namona be doketa ese ia henia hakaua herevadia ia badinaia namonamo. Inai atikol ai, Iehova ese Baibel ai idia lalohisihisi taudia totona ia gwauraia herevadia, bona iena hakaua herevadia ita badinaia dalana do ita herevalaia.
IEHOVA ESE ITA IA HADIBAIA ITA IA LALOA BADA
3. Dahaka dainai haida idia mamia idia be anina lasi?
3 Inai tanobada ai lalokau be lasi, bona madi, taunimanima momo idia mamia idia be anina lasi. Taihu ta ladana Helen a ia gwau: “Lau be lalokau lasi ruma besena lalonai lau tubu daekau. Egu tamana be dagedage tauna bona hanaihanai lau ia hamaoroa lau be anina lasi.” Reana oi dekenai unai ia vara danu, ta ese oi ia kara auka henia, ia gwauraia dika eiava ia gwau oi be anina lasi. Unai dainai do oi laloa ta be oi ia laloa bada lasi.
4. Salamo 34:18 ai, Iehova ia gwauhamata dahaka do ia karaia?
4 Ena be ma haida ese oi idia kara auka henia, to namona be oi diba Iehova ese oi ia lalokau henia bona ia laloa bada. Ia be “lalometau taudia kahirakahira ia noho.” (Salamo 34:18 duahia.) Bema oi “daradoko,” laloatao Iehova be emu kudouna ai gau namodia ia itaia bona oi ia veria mai ia kahirakahira. (Ioa. 6:44) Ia be hanaihanai ia noho hegaegae oi ia durua totona, badina oi ia laloa bada.
5. Iesu ese idia laloa maragi taudia ia kara henia dalana amo dahaka ita dibaia?
5 Iesu ena haheitalai ita laloa karana amo, Iehova ena hemami do ita diba. Iesu be tanobada ai ia noho neganai, ma haida ese idia laloa maragi taudia ia kara namo henia. (Mat. 9:9-12) Hahine ta be ia ura ena gorere dikana amo ia namo lou dainai Iesu ena dabua ia dogoatao, unai dainai Iesu ese ia hagoadaia bona ena abidadama dainai hanamoa hereva ia gwauraia. (Mar. 5:25-34) Iesu ese ena Tamana ena kara ia hahedinaraia goevagoeva. (Ioa. 14:9) Unai dainai namona be oi abia dae Iehova be oi ia laloa bada bona emu kara namodia ia itaia, hegeregere emu abidadama bona ia oi lalokau henia karana.
6. Dahaka do oi karaia bema oi mamia oi be anina lasi?
6 Dahaka do oi karaia bema oi mamia oi be anina lasi? Baibel ai Iehova ese oi ia laloa bada siridia oi duahia bona oi laloa dobu. b (Sal. 94:19) Ma haida ida sibona oi hahegeregerea lasi bona oi karaia diba lasi gauna oi laloa momo lasi. Iehova ese oi do ia doria lasi oi karaia diba lasi gaudia oi karaia totona. (Sal. 103:13, 14) Bema guna ta ese oi ia kara dika henia, namo lasi unai kara dainai sibona oi bleim. Laloatao, Iehova be kara dika taudia do ia hahemaoro henia, to hisihisi idia abia taudia do ia durua. (1 Pet. 3:12) Sandra be ia maragi neganai, idia kara auka henia, ia gwau: “Hanaihanai Iehova lau noia lau ia durua sibona dekenai lalohadai maorona lau abia totona, ia ese lau ia itaia hegeregerena.”
7. Edena dala ai guna oi davaria hekwakwanai ese oi ia durua diba ma haida oi hagoadaia totona?
7 Namona be oi diba Iehova ese oi do ia gaukaralaia ma haida oi durua totona. Iehova ida ena hesiai gaukara oi karaia be hahenamo badana. (1 Kor. 3:9) Guna, oi davaria hekwakwanai dainai, do ia auka lasi ma haida ese idia davaria hisihisi oi lalopararalaia totona. Gau momo oi karaia diba idia oi durua totona. Matamanai ita herevalaia taihu Helen, be heduru ia abia bona hari ia hegeregere ma haida ia durua totona. Ia gwau: “Guna lau mamia lau be anina lasi. To lau diba Iehova be lau ia lalokau henia bona lau ia gaukaralaia ma haida lau durua totona.” Helen be mai moale ida regula painia gaukara ia karaia noho.
IEHOVA IA URA ENA GWAUATAO KARANA ITA ABIA DAE
8. Isaia 1:18 ai, Iehova be ita dekenai dahaka ia gwau?
8 Iehova ena hesiai taudia haida be edia kara dika gunadia dainai idia lalohisihisi bada, reana unai be idia do bapatiso lasi eiava idia bapatiso murinai idia karaia. To namona be ita laloatao, Iehova be ita ia lalokau henia bada dainai iseda kara dika gwauatao totona mauri davana ia henia. Momokani, ia ura unai harihari gauna ita abia dae. Iehova ia gwau, ia ida “hereva ita hamaoromaoroa” c murinai, iseda kara dika do ia gwauatao momokani. (Isaia 1:18 duahia.) Ita moale bada badina iseda lalokau Tamana, Iehova, be iseda kara dika gunadia ia laloatao lasi! Danu, iseda kara namodia ia laloaboio lasi.—Sal. 103:9, 12; Heb. 6:10.
9. Dahaka dainai iseda kara dika gunadia ita laloa lasi be namo?
9 Bema emu kara dika gunadia dainai oi lalohisihisi, oi gaukara goada hari oi karaia gaudia bona vaira negai do oi karaia gaudia oi laloa totona. Mani aposetolo Paulo ena haheitalai oi laloa. Ia be ia lalohisihisi bada badina guna, Keristani taudia ia dagedage henia, to ia diba Iehova ese ena kara dika ia gwauatao. (1 Tim. 1:12-15) To unai murinai, ena kara dika gunadia ia laloa noho, a? Guna, Iuda tomadiho lalonai ia abia dagi ia laloa lasi hegeregerena, ena kara dika gunadia danu ia laloa lasi. (Fili. 3:4-8, 13-15) To, Paulo be mai ura bada ida ena hesiai gaukara ia karaia bona vaira negana ia laloa. Paulo bamona, guna idia vara gaudia oi haidaua diba lasi. To hari, emu noho dalana hegeregerena, Iehova oi hanamoa bona oi totona ia gwauhamatalaia vaira nega namona oi laloa.
10. Bema guna iseda kara ese ma haida ia hahisia, dahaka ita karaia diba?
10 Reana guna emu kara amo ma haida oi hahisia dainai oi lalometau. Dahaka ese oi ia durua diba? Gau haida oi karaia ia vara gauna oi hamaoromaoroa totona. Danu, sori herevana oi gwauraia. (2 Kor. 7:11) Iehova oi noia oi emu kara ese ia hahisia taudia ia durua totona. Ia ese umui ruaosi ia durua diba, umui haheauka bona maino ai umui noho totona.
11. Peroveta tauna Iona amo dahaka ita dibaia? (ena laulau itaia danu.)
11 Emu kerere gunadia amo diba oi abia, bona oi noho hegaegae, Iehova ese ia abia hidi dalana ai, oi ia gaukaralaia totona. Peroveta tauna Iona ena haheitalai oi laloa. Dirava ese Iona be Nineva dekenai ia siaia, to ia be gabu ma ta dekenai ia lao. Iehova ese Iona ia matahakani henia, bona ena kerere amo diba ia abia. (Iona 1:1-4, 15-17; 2:7-10) Iehova be Iona dekenai ia hesiku lasi. Ia ese Iona be Nineva dekenai ia siaia lou, bona ia ese Iehova ena hereva ia badinaia. Ena be ena kerere gunadia dainai ia lalohisihisi, to unai ese ia koua lasi, Iehova ese ia henia gaukarana ia karaia totona.—Iona 3:1-3.
Peroveta tauna Iona be gwarume ena bogana amo ia roho mauri murinai, Iehova ese Nineva dekenai ia siaia lou bona ena hadibaia hereva ia gwauraia (Paragraf 11 itaia)
IEHOVA BE LAUMA HELAGA AMO ITA IA HAGOADAIA
12. Hekwakwanai badana ta ita davaria neganai, edena dala ai Iehova ese maino ia henia? (Filipi 4:6, 7)
12 Hekwakwanai badana ta ita davaria neganai, Iehova be ena lauma helaga amo ita ia hagoadaia. Mani Ron bona Carol edia ekspiriens ita laloa. Edia natuna mero be sibona ia hamasea. Idia gwau: “Guna hekwakwanai badadia haida ai davaria, to hari ia vara gauna be dika momokani. Hanuaboi momo ai mahuta diba lasi neganai, ai guriguri, bona Filipi 4:6, 7 ese ia herevalaia maino ai mamia momokani.” (Duahia.) Bema hekwakwanai badana ta oi haheaukalaia noho, guriguri amo Iehova dekenai emu lalona ai idia noho gaudia ibounai oi gwauraia. Bona nega momo unai oi karaia diba. (Sal. 86:3; 88:1) Iehova oi noia loulou, ena lauma helaga do ia henia totona. Ia ese hanaihanai oi do ia durua.—Luka 11:9-13.
13. Edena dala ai lauma helaga ese ita ia durua diba mai abidadama ida Iehova ita tomadiho henia noho totona? (Efeso 3:16)
13 Guna, hekwakwanai badana ta oi davaria bona oi manoka dainai, gau momo oi karaia diba lasi, a? Lauma helaga ese oi ia durua diba, mai abidadama ida Iehova oi tomadiho henia noho totona. (Efeso 3:16 duahia.) Mani taihu ta ladana Flora ena ekspiriens ita laloa. Ia bona ena adavana be misinari gaukara idia karaia lalonai, ena tau be hahine ma ta ida idia heudahanai, unai dainai idia divos. Ia gwau: “Ia karaia karana dainai, lau lalohisihisi bada. Guriguri amo Iehova ena lauma helaga lau noia, lau haheauka totona. Matamanai ia auka, to Iehova ese lau ia durua dainai lau goada bona lau haheauka diba.” Flora ia mamia Dirava ese ia durua dainai ena abidadama ia goada. Bona ia diba ena hekwakwanai ibounai lalonai Dirava ese do ia durua. Ma ia gwau: “Salamo 119:32 ena hereva be lau dekenai ia guguru: ‘Lau be mai ura bada ida emu taravatu hegeregerena do lau raka, badina oi ese egu lalona oi kehoa.’”
14. Edena dala ai Dirava ena lauma helaga ese ita ia durua diba?
14 Iehova ena lauma helaga totona oi noinoi murinai, dahaka oi karaia be namo? Dirava ena lauma helaga ese oi ia durua totona, inai bamona gaudia oi karaia. Hegeregere, hebou oi lao bona ma haida oi haroro henia. Nega ibounai Iehova ena Hereva oi duahia, unai ese oi do ia durua ena lalohadai oi laloa dobu totona. (Fili. 4:8, 9) Oi duahiduahi lalonai, Baibel ese ia herevalaia taudia oi laloa, bona idia davaria hekwakwanai lalonai Iehova ese idia ia durua dalana oi laloa dobu. Matamanai ita herevalaia taihu, Sandra, be hekwakwanai badadia haida ia davaria. Ia gwau: “Iosepa ena sivarai ese lau ia hagoadaia bada. Ia davaria hekwakwanai bona dagedage karana ese Iehova ida ena hetura karana ia hamanokaia lasi.”—Gen. 39:21-23.
IEHOVA ESE ISEDA TADIKAKA TAIHU AMO ITA IA HAGOADAIA
15. Daika ese ita idia hagoadaia diba, bona edena dala ai ita idia durua? (Laulau itaia danu.)
15 Hisihisi ita davaria neganai, iseda tadikaka bona taihu ‘ese ita idia durua bona hagoadaia bada.’ (Kol. 4:11) Iehova ese iseda tadikaka taihu amo ita dekenai ena lalokau ia hahedinaraia. Iseda tadikaka taihu be ita idia hagoadaia diba bema, nega idia atoa ita idia bamoa bona iseda hemami ita gwauraia neganai ita idia kamonai henia. Danu, idia ese hagoadaia Baibel siri ta idia duahia eiava ita ida idia guriguri. d (Roma 15:4) Nega haida, tadikaka eiava taihu ta ese ita do ia durua Iehova ena lalohadai ita abia totona, unai amo lalohadai maorona ita abia diba. Danu, iseda tadikaka taihu ese dala ma haida ai ita idia durua diba, hegeregere ita dekenai aniani idia henia.
Iehova idia lalokau henia tura namodia be mai momokani ida, oi do idia hagoadaia bona durua (Paragraf 15 itaia)
16. Ma haida dekenai heduru ita abia totona, dahaka ita karaia be namo?
16 Nega haida ma haida ita noia diba ita idia durua totona. Iseda tadikaka bona taihu be ita idia lalokau henia bona idia ura ita idia durua. (Aon. 17:17) To, reana iseda hemami eiava iseda ura gaudia idia diba lasi. (Aon. 14:10) Bema oi lalometau noho, lo turadia dekenai emu hemami oi gwauraia diba. Bona oi do ia durua gaudia be idia dekenai oi herevalaia. Bona oi manada elda ta eiava rua dekenai emu hemami oi gwauraia hedinarai. Taihu haida be lo taihu ta idia hereva henia neganai goada idia abia.
17. Dahaka gaudia haida ese ita idia koua diba heduru ita abia totona, bona edena dala ai unai ita hanaia diba?
17 Sibona oi noho karana oi dadaraia. Reana oi lalohisihisi dainai, oi ura lasi ma haida oi bamoa. Nega haida reana emu tadikaka bona taihu be emu hemami do idia lalopararalaia lasi eiava hahisia herevadia idia gwauraia diba. (Iam. 3:2) To namo lasi emu tadikaka bona taihu oi dadaraia, Iehova ese idia ia gaukaralaia diba oi idia hagoadaia totona. Elda ta ladana Gavin, be lalohekwarahi gorerena ia abia, ia gwau: “Nega momo lau ura lasi egu turadia lau hereva henia eiava idia lau bamoa.” To, Gavin ese unai hemami ia dadaraia bona ma haida bamoa karana amo namo ia abia. Taihu ta ladana, Amy ia gwau: “Guna lau dekenai idia vara hekwakwanai dainai lau hekwarahi taunimanima lau trast totona. To Iehova hegeregerena, lau ura egu tadikaka bona taihu lau lalokau henia bona trast henia. Lau diba unai ese Iehova ia hamoalea bona lau moale danu.”
IEHOVA ENA GWAUHAMATA NAMODIA ESE ITA IDIA HAGOADAIA DIBA
18. Vaira nega ai dahaka do ia vara bona hari dahaka ita karaia diba?
18 Mai ura ida vaira nega ita naria noho, badina ita diba kahirakahira Iehova ese iseda hisihisi ibounai do ia kokia. (Apok. 21:3, 4) Unai nega ai, ita idia hahisia gaudia ibounai do ita “laloaboio momokani.” (Isa. 65:17) To hari danu, ita hisihisi neganai, Iehova be ita ia naria. Danu, Iehova ese ita do ia hagoadaia gaudia momo ia henia bona ena heduru ita abia dae be namo. Namona be ita diba momokani ita “ia laloa bada.”—1 Pet. 5:7.
ANE 7 Iehova be Iseda Goada
a Ladana ai haidaua.
b Maua itaia, “ Iehova be Oi Ia Laloa Bada.”
c Iehova ida “hereva ita hamaoromaoroa” totona, namona be ita hamomokania ita helalo-kerehai, unai ita karaia dalana be Iehova ita noia iseda kara dika ia gwauatao bona iseda kara ita haidaua. Bona kara dika badana ita karaia neganai, kongrigeisen ai elda taudia edia heduru ita abia.—Iam. 5:14, 15.
d Hegeregere, buka ladana Keristani Mauri Totona Baibel Siri Idauidau lalonai inai hereva “Lalohekwarahi” bona “Hagoadaia Hereva” henunai idia noho siridia oi laloa dobu.
