1-2. Iesu ena hahediba taudia rua be Emausa dekenai idia lao noho lalonai dahaka ia vara?

 Nisan 16, 33 C.E. ai, Iesu ena hahediba taudia be idia lalohisihisi bona idia gari dikadika. Bona hahediba taudia rua be Ierusalema idia rakatania bona Emausa dekenai idia lao, unai hanua ena daudau Ierusalema amo be kilomita 11 bamona. Unai tatau idia abia dae, Mesia be Iuda taudia totona gau namodia do ia karaia, to hari idia lalohisihisi, badina edia gunalaia tauna, Iesu, be haida ese idia hamasea. To, idia laloa lasi gauna ta do ia vara.

² Tau ta be unai hahediba taudia ia hedavari henia bona idia ida ia raka hebou. Bena idia ese idia lalohisihisi ena badina be unai tauna dekenai idia gwauraia. Bona ia ese gau haida ia herevalaia, unai ese edia mauri do ia haidaua. Ia ese toretore helagadia bona peroveta herevadia ia gaukaralaia, Mesia ia hisihisi bona ia mase ena badina ia herevalaia totona. Idia toi be Emausa dekenai idia ginidae neganai, unai tauna be sibona ia gwauraia hedinarai, ia be Iesu, ia toreisi lou vadaeni! Unai hahediba taudia be idia moale bada, badina idia diba Mesia be ia mauri lou!—Luka 24:13-35.

3-4. Iesu ena hahediba taudia dekenai dahaka ia vara, bona inai atikol ai dahaka do ita dibaia? (Kara 1:3)

³ Iesu be ena dina gabedia 40 lalonai, ena hahediba taudia dekenai nega momo ia hedinarai. (Kara 1:3 duahia.) Iesu ena hahediba taudia be idia lalohisihisi bona gari dainai, idia ia hagoadaia. Bona idia moale bada bona mai gari lasi ida Basileia  ena sivarai namona idia harorolaia bona hadibaia. a

⁴ Unai nega ai Iesu ena mauri lalonai idia vara gaudia ita stadilaia neganai, ita do ia durua bada. Inai atikol ai do ita itaia, Iesu ese unai nega ia gaukaralaia (1) ena hahediba taudia ia hagoadaia, (2) idia ia durua Toretore Helagadia idia lalopararalaia, bona (3) idia ia treinia maduna badadia idia huaia totona. Unai point ta ta lalonai, Iesu ena haheitalai ita tohotohoa dalana do ita dibaia.

MA HAIDA HAGOADAIA

5. Dahaka dainai Iesu ena hahediba taudia be hagoadaia herevadia idia abia be namo?

⁵ Iesu ena hahediba taudia be hagoadaia herevadia idia abia be namo. Dahaka dainai? Haida be edia ruma, famili, bona bisinesi idia rakatania, Iesu ena murinai idia raka totona. (Mat. 19:27) Haida be ena hahediba taudia ai idia lao dainai idia kara auka henidia. (Ioa. 9:22) Unai bamona abia hidi idia karaia, badina idia abia dae Iesu be gwauhamata Mesiana. (Mat. 16:16) To, Iesu ia mase neganai, idia lalohisihisi bona idia lalomanoka, badina idia laloa idia naria gauna ia vara lasi.

6. Iesu ia toreisi lou murinai dahaka ia karaia?

⁶ Iesu ia mase neganai, ena hahediba taudia idia lalohisihisi bona unai ia lalopararalaia. Bona ia diba idia lalohisihisi karana ese ia hahedinaraia lasi, edia abidadama be ia manoka. Unai dainai, ia toreisi lou dinana ai ena turadia ia hagoadaia matamaia. Hegeregere, Maria Magadala be Iesu ena guria gabuna ai ia taitai noho lalonai, ia dekenai ia hedinarai. (Ioa. 20:11, 16) Danu, inai atikol ena matamanai ita herevalaia hahediba taudia rua dekenai ia hedinarai. Bona aposetolo Petero dekenai ia hedinarai. (Luka 24:34) Iesu ena haheitalai amo dahaka ita dibaia? Iesu be nega ginigunana ia hahedinarai neganai, ia vara gauna mani ita laloa.

7. Iesu ia itaia Maria be dahaka ia karaia noho, bona Iesu be ia totona dahaka ia karaia? (Ioane 20:11-16) (Laulau itaia danu.)

⁷ Ioane 20:11-16 duahia. Nisan 16 ena daba kahana ai, abidadama hahinedia haida be  Iesu ena guria gabuna dekenai idia lao. (Luka 24:1, 10) Idia ta be, Maria Magadala. Ia be guria gabuna dekenai ia ginidae neganai, Iesu ena tauanina be ia noho lasi. Unai dainai ia lao bona Petero bona Ioane ia hamaoroa bena idia ida guria gabuna dekenai idia heau lao. Tatau rua be unai idia hamomokania murinai, edia ruma dekenai idia giroa lou. To Maria be ia giroa lou lasi, bona unuseniai ia taitai noho. To Iesu be unuseniai ia noho bona Maria ia itaia noho. Ia itaia unai abidadama hahinena ia taitai noho bona ia hebogahisi henia. Unai dainai, Maria dekenai ia hedinarai bona ia hamaoroa do ia lao bona Iesu ena tadikakadia dekenai mai anina bada sivaraina ta do ia gwauraia. Unai be, Iesu ia toreisi lou vadaeni. Unai ese Maria ia hagoadaia bada.—Ioa. 20:17, 18.

8. Edena dala ai Iesu ita tohotohoa diba?

⁸ Edena dala ai Iesu ita tohotohoa diba? Iseda tadikaka taihu ita hagoadaia Iehova idia hesiai henia noho totona. Iesu bamona, edia hekwakwanai ita diba, edia hemami ita lalopararalaia bona idia ita hagoadaia. Mani taihu ta ladana Jocelyn, ita laloa, aksiden ta ai ena sista ia mase, ia gwau: “Hua momo lalonai, lau lalohisihisi bada.” To, tadikaka ta bona ena adavana ese edia ruma dekenai ia idia boiria, ena hereva idia kamonai namonamo bona ia idia hamaoroa Dirava dekenai ia be mai anina bada. Jocelyn ia gwau: “Lau mamia lau be hurehure badana ta lalonai lau maloa noho. To Iehova ese unai tadikaka bona taihu ia gaukaralaia, lau ia hamauria totona. Idia ese lau idia durua Iehova hesiai henia urana lau hagoadaia lou totona.” Ita danu ma haida ita hagoadaia diba, bema edia hemami idia gwauraia neganai ita kamonai namonamo, unai amo idia ita durua Iehova idia hesiai henia noho totona.—Roma 12:15.

BAIBEL AMO MA HAIDA DURUA

9. Iesu ena hahediba taudia be dahaka hekwakwanai idia davaria, bona edena dala ai idia ia durua?

⁹ Iesu ena hahediba taudia be Dirava ena hereva idia abia dae bona idia gaukara goada idia badinaia totona. (Ioa. 17:6) To idia daradara, badina Iesu be haida ese raskol taudia bamona idia hamasea. Iesu ia diba ena hahediba taudia be mai edia abidadama bona Iehova idia lalokau henia. To ia itaia Dirava ena hereva idia lalopararalaia namonamo lasi. (Luka 9:44, 45; Ioa. 20:9) Unai dainai idia ia durua, Toretore Helagadia amo idia duahia gaudia idia lalopararalaia totona. Emausa ia lao henia dalanai ai, ena hahediba taudia rua dekenai ia hedinarai neganai, unai ia karaia dalana mani ita herevalaia.

10. Edena dala ai Iesu ese ena hahediba taudia dekenai ia hahedinaraia ia be Mesia? (Luka 24:18-27)

¹⁰ Luka 24:18-27 duahia. Ita itaia Iesu be unai tatau dekenai, sibona ia gwauraia hedinarai haraga lasi. To idia dekenai henanadai haida ia henia. Dahaka dainai? Reana ia ura edia lalohadai do idia gwauraia. Bona unai idia karaia. Ia idia hamaoroa idia laloa Iesu be Roma taudia amo Israela do ia ruhaia. Edia lalohadai idia gwauraia murinai, Iesu ese Toretore Helagadia amo unai tatau ia durua, ia vara gauna idia lalopararalaia totona. b Unai adorahi ai, Iesu ese nega ia atoa ena hahediba taudia ma haida dekenai unai hereva momokani edia anina ia gwauraia. (Luka 24:33-48) Unai sivarai amo dahaka ita dibaia?

11-12. (a) Iesu ese Baibel ena hereva momokani ia hadibaia dalana amo dahaka ita dibaia? (Laulau itaia danu.) (b) Edena dala ai Nortey be ia stadi henia tadikaka ese ia durua?

¹¹ Edena dala ai Iesu ita tohotohoa diba? Ginigunana be, oi stadi henia taudia oi hadibaia  neganai, henanadai namodia oi gaukaralaia unai amo edia lalohadai do idia gwauraia. (Aon. 20:5) Edia hemami idia gwauraia murinai, idia do ia durua Baibel siridia davaria dalana oi hahedinaraia. Namo lasi idia oi hamaoroa dahaka do idia karaia totona. To, idia oi durua Baibel ena hereva idia lalopararalaia bona edia mauri ai idia badinaia dalana idia laloa totona. Ghana dekenai tadikaka ta ladana Nortey, ena ekspiriens oi laloa.

¹² Nortey ena mauri lagani be 16 neganai, Baibel ia stadilaia matamaia. To, daudau lasi murinai, ena famili be ia idia dagedage henia. Dahaka ese ia durua, ia stadi noho totona? Ia stadi henia tadikaka ese Mataio karoa 10 amo ia hahedinaraia, Keristani momokani taudia be dagedage do idia davaria. Nortey ia gwau: “Dagedage karana lau davaria neganai, lau abia dae hereva momokani lau davaria.” Danu ia stadi henia tadikaka ese Mataio 10:16 ena anina ia herevalaia, unai amo do ia gima bona ia abia dae gaudia be mai hemataurai ida ena ruma bese dekenai do ia herevalaia. Nortey ia bapatiso murinai, ia ura painia gaukara do ia karaia, to ena tamana ia ura iunivesiti dekenai do ia lao. Tadikaka ese Nortey ia hamaoroa lasi dahaka do ia karaia, to henanadai ia henia Baibel siri ia laloa totona, unai amo abia hidi maorodia do ia karaia. Dahaka ia vara? Nortey be painia gaukara ia matamaia. Unai dainai ena tamana ese ia hamaoroa ruma do ia rakatania. Idia vara gaudia dainai Nortey ena hemami be edena bamona? Ia gwau: “Lau abia dae momokani abia hidi maorona lau karaia.” Ita danu bema nega ita atoa ma haida ita durua Baibel ena hereva idia lalopararalaia totona, edia abidadama do ia goada bona Iehova idia hesiai henia noho diba.—Efe. 3:16-19.

TADIKAKA DURUA “HARIHARI GAUDIA” BAMONA AI IDIA LAO

13. Iesu be dahaka ia karaia, unai amo ma haida ese ena Tamana ena gaukara do idia karaia noho? (Efeso 4:8)

¹³ Iesu be tanobada ai ia noho neganai, ena Tamana ese ia henia gaukarana ia karaia namonamo. (Ioa. 17:4) To Iesu ia laloa lasi ia sibona be hegeregere Iehova ena ura ia karaia totona. Tanobada ai lagani toi mai kahana hesiai gaukara ia karaia lalonai, ma haida dekenai treinini ia henia danu. Iesu be guba dekenai ia do giroa lasi neganai, ena hahediba taudia dekenai maduna ia henia, Iehova ena taunimanima do idia naria bona haroro  bona hadibaia gaukarana idia gunalaia totona. (Efeso 4:8 duahia.) Idia haida edia mauri lagani be 20 lalodiai bona unai maduna idia abia, unai tatau be Iesu idia badinaia bona idia gaukara goada. To ena giroa lou dinana ia kahirakahira lalonai, idia dekenai treinini ma haida ia henia, unai amo ma haida dekenai harihari gaudia bamona do idia lao.

14. Iesu ena dina gabedia 40 lalonai ena hahediba taudia dekenai dahaka ia hadibaia? (Laulau itaia danu.)

¹⁴ Iesu ese ena hahediba taudia ia sisiba henia, to mai lalokau ida unai ia karaia. Hegeregere, ia itaia haida be idia abia dae lasi ia be ia mase bona ia toreisi lou, unai dainai idia ia sisiba henia. (Luka 24:25-27; Ioa. 20:27) Iesu ese ia hahedinaraia Iehova ena taunimanima naria gaukara be mai anina bada, to edia moni gaukara eiava edia bisinesi lasi. (Ioa. 21:15) Bona idia ia hadibaia, Iehova ena hesiai gaukara lalonai idia karaia gaudia be ma haida ida idia hahegeregerea lasi. (Ioa. 21:20-22) Danu Basileia totona idia abia lalohadai kereredia ia hamaoromaoroa. (Kara 1:6-8) Elda taudia be Iesu amo dahaka idia dibaia?

15-16. (a) Edena dala ai elda taudia ese Iesu idia tohotohoa diba? Herevalaia. (b) Patrick be sisiba ia abia dae dainai, dahaka namo ia davaria?

¹⁵ Edena dala ai elda taudia ese Iesu idia tohotohoa diba? Namona be tadikaka dekenai treinini idia henia, ena be idia be matamata, unai amo kongrigeisen lalonai maduna haida idia abia diba. c Elda taudia idia laloparara, unai tadikaka be gau momo idia diba be namo. Unai dainai mai lalokau ida treinini idia henia, unai amo do idia manau, edia abidadama ia goada bona mai ura ida ma haida idia durua diba.—1 Tim. 3:1; 2 Tim. 2:2; 1 Pet. 5:5.

¹⁶ Mani tadikaka ta ladana Patrick ita laloa, ia be sisiba ia abia bona unai ese ia durua. Ia matamata neganai, ena hereva bona kara amo ma haida ia hahisia, bona taihu haida dekenai unai bamona ia karaia danu. Elda ta ese Patrick ena manoka gauna ia itaia dainai, ia dekenai sisiba maorona ia henia, to mai lalokau ida unai ia karaia. Patrick ia gwau: “Lau moale,  unai ia karaia. Nega momo tadikaka haida be lau ura henia maduna haida idia abia neganai, lau lalohisihisi. To unai elda ena sisiba ese lau ia durua mai manau ida egu tadikaka bona taihu lau hesiai henia totona. Unai amo maduna abia karana lau laloa momo lasi.” Unai dainai, Patrick ena mauri lagani be 23 neganai, elda maduna ia abia.—Aon. 27:9.

17. Edena dala ai Iesu ia hahedinaraia ena hahediba taudia ia abidadama henia?

¹⁷ Iesu ese ena hahediba taudia dekenai haroro bona hadibaia gaukarana ena maduna ia henia. Hahediba taudia idia mamia idia hegeregere lasi unai asainmen idia karaia totona. To, Iesu ia abia dae unai gaukara idia karaia diba, bona idia dekenai unai ia gwauraia. Idia ia abidadama henia dainai, ia gwau: “Tamana ese lau ia siaia hegeregerena, lau danu be umui lau siaia.”—Ioa. 20:21.

18. Edena dala ai elda taudia ese Iesu idia tohotohoa diba?

¹⁸ Edena dala ai elda taudia ese Iesu idia tohotohoa diba? Mai edia ekspiriens elda taudia be ma haida dekenai gaukara idia henia. (Fili. 2:19-22) Hegeregere, elda taudia ese Kingdom Hall hagoevaia bona hanamoa totona, matamata taudia idia gaukaralaia diba. Danu, tadikaka ma haida dekenai gaukara idia henia murinai, treinini idia henia bona idia abia dae unai gaukara do idia karaia. Elda matamata ta ladana Matthew ia gwau, ia moale bada, badina ekspiriens elda taudia ese asainmen idia henia bona karaia dalana idia hadibaia namonamo bona idia diba unai gaukara do ia hagugurua. Ia gwau: “Gaukara ta lau karaia namonamo lasi neganai, lau idia durua lau karaia gauna lau hanamoa totona.” d

19. Namona be iseda lalona ita hadaia dahaka ita karaia totona?

¹⁹ Iesu be tanobada ai ia noho neganai, ena dina gabedia 40 ia gaukaralaia, ma haida ia hagoadaia, hadibaia bona treinini ia henia. Namona be iseda lalona ita hadaia ena haheitalai ita tohotohoa totona. (1 Pet. 2:21) Bona ita do ia durua unai ita karaia totona. Badina ita dekenai ia gwauhamata, ia gwau: “Lau be dina iboudiai umui ida do lau noho ela bona inai nega oromana ena dokona.”—Mat. 28:20.