LAGANI 1935 bamona ai, egu tama sina​—James bona Jessie Sinclair​—be New York Siti ena taoni ta Bronx dekenai idia lao. Edia turana ta be Willie Sneddon, ia be Scotland amo ia mai. Nega ginigunana idia hedavari neganai, idia ta ta be sibona edia famili idia herevalaia. Lau do vara lasi neganai, unai ia vara.

Egu sinana ese Willie ia hamaoroa, Tuari Badana ia do vara lasi neganai, iena tamana bona kakana edia bouti be North Sea dekenai ia noho mine ia bampaia, bona idia ruaosi idia maloa mase. Willie ia gwau, “Emu tamana be hel dekenai ia noho!” Willie be Iehova ena Witnes tauna ta, bona unai be egu sinana ena nega ginigunana Baibel ena hereva momokani ia dibaia.

Willie ese ia gwauraia herevana dainai egu sinana ia badu, badina ia diba iena tamana be tau namona. Willie ma ia gwau: “Bema oi lau hamaoroa Iesu danu be hel dekenai ia lao, do oi moale, a?” Egu sinana be tomadiho ena hahediba herevana ia laloatao, ia gwau Iesu be hel dekenai ia lao bona dina toi murinai ia toreisi lou. Bena ia laloa, ‘Bema hel be lahi gabuna bona unuseniai kara dika taudia idia hahisia, dahaka dainai Iesu danu be unuseni ia lao?’ Unai nega amo egu sinana be hereva momokani ia ura diba. Ia be Bronx Kongrigeisen ena hebou ibounai dekenai ia lao matamaia bona lagani 1940 ai bapatiso ia abia.

Unai nega ai, Keristani tama sina idia hagoadaia lasi edia natudia ida Baibel idia stadilaia totona. Lau maragi neganai, wikeni ai egu sinana be hebou dekenai ia lao bona ia haroro neganai, tamana ese lau ia naria. Egu sinana be sivarai namona harorolaia gaukarana ia goadalaia bona kamonai taudia momo ida Baibel ia stadilaia. To, nega ta iena Baibel stadi haida ia haboua bona edia stadi ia karaia hebou, badina idia be ta ta kahirakahira idia noho. Egu sikuli holidei negadiai haroro gaukara dekenai ia lau bamoa. Unai lau karaia dainai, egu diba Baibel dekenai ia bada bona ma haida lau hadibaia diba.

Lau maragi neganai, hereva momokani lau moalelaia momokani lasi. To, egu mauri lagani be 12 bamona neganai, Basileia  harorolaia gaukarana lau matamaia, unai nega amo haroro gaukara lau rakatania lasi. Egu mauri lagani be 16 neganai, egu mauri be Iehova dekenai lau gwauhamatalaia bona July 24, 1954 ai, Toronto Canada dekenai idia karaia hebouhebouna ai bapatiso lau abia.

Emai kongrigeisen tadikaka haida be guna eiava unai nega ai Betele dekenai idia gaukara. Idia ese lau idia durua bada. Edia hadibaia dalana bona Baibel ena hereva momokani idia herevalaia dalana ese lau ia hagoadaia. Ena be egu tisa taudia idia ura iunivesiti dekenai lau lao, to lau ura bada Betele dekenai lau gaukara. Unai dainai, Toronto ena hebouhebou dekenai Betele ena aplikeisen lau hahonua. Lagani 1955 ai, Yankee Stadium, New York Siti dekenai idia karaia hebouhebou ai Betele ena aplikeisen lau hahonua lou. Daudau lasi murinai, egu mauri lagani be 17 neganai, September 19, 1955 ai, lau idia boiria Brooklyn Betele dekenai lau gaukara totona. Egu dina iharuana Betele, lau be 117 Adams Street dekenai buka karaia gabunai lau gaukara matamaia. Daudau lasi, buka haboua masini dekenai lau gaukara, unai masini ese rau 32 bukadia ia hakapua bona ia abia hegaegae masini ma ta ese ia turia totona.

Hua ta murinai, buka hakapua gabuna amo lau idia siaia lao Magasin Dipatmen dekenai, badina taipi gaukarana lau diba. Unai nega ai, tadikaka taihu be adres torea totona stencils idia gaukaralaia (auri bamona gauna), bona Gima Kohorona bona Awake! matamatadia be idia ura taudia dekenai idia siaia. Hua haida murinai Buka Siaia Dipatmen dekenai lau gaukara. Klaus Jensen, dipatmen naria tauna, ese lau ia noia motuka amo buka bona magasin be wofu dekenai do ia abia lao tadikakana do  lau bamoa. Bona magasin haida be post ofesi dekenai ai abia lao danu, unai amo United States ena kongrigeisen ibounai dekenai idia siaia lao diba. Tadikaka Jensen ia gwau unai bamona gaukara ese egu tauanina do ia hagoadaia. Egu metau be kilogram 57 bamona bona egu tauanina be bada lasi. Wofu bona post ofesi dekenai buka abidia lao karana ese egu tauanina ia hagoadaia. Tadikaka Jensen ia diba dahaka ese lau do ia durua!

Magasin Dipatmen ese kongrigeisen totona magasin oda ia karaia danu. Bona lau itaia Brooklyn ai iseda magasin be gado idauidau ai idia printaia bona tano idauidau dekenai idia siaia. Ena be unai gado momo lau diba lasi, to lau moale badina magasin tausen momo be daudau momokani gabudia dekenai idia siaia. Unai nega ai lau diba lasi, gabeai do lau abia hahenamo be unai tano momo do lau vadivadi henia.

Lagani 1961 ai, lau idia abia hidi Akaun Ofesi dekenai lau gaukara totona bona Grant Suiter be egu ovasia. Lagani haida murinai, Nathan Knorr ena ofesi dekenai lau gaukara, unai nega ai ia be tanobada hegegemadai ena haroro gaukara ia naria. Lau ia hamaoroa, ena ofesi ai ia gaukara tadikaka ta be hua tamona lalonai Basileia Hesiai Gaukara Sikuli dekenai do ia lao, unai murinai Haroro Naria Dipatmen dekenai do ia gaukara. Unai dainai lau be iena gabu lau abia bona Don Adams ida lau gaukara. Gabeai lau laloparara, lagani 1955 ena hebouhebou ai, egu Betele ena aplikeisen be tadikaka Don dekenai lau henia. Tadikaka Robert Wallen bona Charles Molohan be unai ofesi ai idia gaukara danu. Ai 4 be lagani 50 mai kahana lalonai ai gaukara hebou. Unai bamona abidadama goada taudia ida lau gaukara dainai lau moale bada!​—Sal. 133:1.

 Lagani 1970 amo, lau idia hamaoroa lagani ta o rua lalonai wiki haida Watch Tower Society ena brens ofesi ma haida do lau vadivadi henia, unai nega ai idia gwauraia soun vadivadi. Unai vadivadi lalonai tanobada hegegemadai idia noho Betele famili bona misinari taudia lau hagoadaia bona brens ena ripoti lau sekea. Lau moale badina Gilead sikuli idia haorea bona idau tano ai edia asainmen idia do karaia noho taudia haida lau hedavari henia! Soun vadivadi gaukarana be hahenamo ta bona lau moalelaia badina tano 90 mai kahana lau vadivadi henia.

Brooklyn Betele famili ibounai be New York Siti ai idia noho kongrigeisen dekenai idia siaia. Bona lau be Bronx kongrigeisen dekenai lau lao. Unai taoni ai ia noho kongrigeisen ginigunana be ia bada dainai idia hapararaia. Ginigunana be idia gwauraia Upper Bronx Kongrigeisen bona lau be unuseni lau lao.

Lagani 1965 bamona ai, Witnes famili ta, Latvia amo, be Bronx ena saut kahanai idia noho neganai hereva momokani idia abia, bona unai kongrigeisen idia bamoa. Edia natuna kekeni badana, Livija, be haisikuli ia haorea murinai regula painia gaukarana ia karaia. Hua haida murinai, Massachusetts dekenai ia lao, pablisa momo lasi gabunai heduru ia henia totona. Ia dekenai revareva amo kongrigeisen ai idia vara gaudia lau sivarailaia, bona ia danu be Boston ai ia karaia haroro gaukarana ia sivarailaia.

Lagani haida murinai, Livija be spesel painia gaukara totona idia abia hidi. Ia ura iena hesiai gaukara ia habadaia dainai, Betele gaukara totona aplikeisen ia hahonua bona lagani 1971 ai ia idia boiria. Reana unai be toa ta Iehova amo! Lagani 1973, October 27 dekenai, ai headava bona Tadikaka Knorr ese emai headava tok ia henia, ai dekenai unai be hahenamo badana. Aonega Herevadia 18:22 ia gwau: “Hahine do ia adavaia tauna ese, gau namona ia davaria inai. Lohiabada ese unai tau do ia hanamoa.” Lau bona Livija be lagani 40 lalonai emai Betele gaukara ai moalelaia. Bona Bronx ai ia noho kongrigeisen ai do durua noho.

Tadikaka Knorr ida gaukara karana lau moalelaia bada. Ia be gaukara goadagoada tauna bona tanobada hegegemadai idia noho misinari taudia ia laloa bada. Idia momo idia lao tanodia ai idia be Witnes taudia ginigunadia. To madi, Tadikaka Knorr be lagani 1976 ai kensa gorerena ia abia. Nega ta bedi dekenai ia hekure noho neganai, lau ia noia do idia printaia gaudia haida be ia dekenai do lau duahia. Bona lau ia hamaoroa Frederick Franz do lau boiria, unai amo do lau duahia gauna be ia ese do ia kamonai danu. Gabeai lau laloparara Tadikaka Franz ena matana be ia dika sisina dainai, nega momo Tadikaka Knorr ese ia dekenai do idia printaia gaudia ia duahia.

Tadikaka Knorr be lagani 1977 dekenai ia  mase, to ia idia diba bona lalokau henia taudia be goada idia abia, badina iena abidadama be ia goada ela bona ena tanobada maurina ia haorea. (Apok. 2:10) Unai murinai, Tadikaka Franz ese emai gaukara ia naria.

Unai nega ai, lau be Milton Henschel ena seketere gaukara lau karaia, ia be lagani momo lalonai Tadikaka Knorr ida ia gaukara. Tadikaka Henschel be lau ia hamaoroa Betele ai do lau karaia gaukara badana be dala idauidau ai Tadikaka Franz do lau durua. Idia do printaia lasi gaudia be hanaihanai ia dekenai do lau duahia guna. Tadikaka Franz be ia kamonai gaudia ia laloatao diba bona ia laloa dobu. Lau moale badina unai dala ai ia lau durua ela bona December 1992 ai, ena tanobada maurina ia haorea!

Betele ai lau gaukara ena lagani ibounai 61 be idia hanaia haraga. Egu tama sina be Iehova idia badinaia ela bona idia mase, bona tanobada matamata dekenai idia lau welkam henia negana lau naria noho. (Ioa. 5:28, 29) Tanobada hegegemadai idia noho Witnes taudia durua totona, abidadama tatau bona hahine ida lau gaukara be hahenamo badana, inai tanobada gauna ta ese unai ia hereaia diba lasi. Lau bona Livija ai gwau diba emai ful-taim hesiai gaukara lalonai “Iehova ese ia henia moalena be [emai] heau mauri gabuna.”​—Neh. 8:10, NWT.

Gau ta ese Basileia ena hereva momokani halasia karana ia koua diba lasi, bona Iehova ena orea tauna ta dainai unai gaukara do ia doko lasi danu. Lau moale bada badina lagani momo lalona abidadama goada tadikaka bona taihu momo ida lau gaukara. Lau bamoa horoa taudia momo be hari tanobada ai idia noho lasi. To, lau moale badina unai abidadama goada taudia ida Iehova lau hesiai henia.