1. Edena dala ai Iehova ese Mose dekenai sibona ia hahedinaraia, bona dahaka dainai unai be mai anina bada?

NEGA ta, Iehova be Mose dekenai sibona ia hahedinaraia totona, Iena ladana bona Iena kara ia gwauraia hedinarai. Ia gwauraia karadia ginigunana be hebogahisi bona hariharibada. (Esodo 34:5-7 duahia.) To, Iena siahu bona aonega ia herevalaia lasi. Mose ia ura diba bema Dirava ese ia do ia durua, unai dainai Iehova ese ia sibona ena kara ia herevalaia, unai amo ia hahedinaraia ia ura bada iena hesiai taudia ia durua. (Eso. 33:13) Ita moale badina Iehova ese ena kara namodia ma haida amo unai kara rua ia gwauraia guna, ani? Inai stadi ese hebogahisi karana do ia herevalaia. Hebogahisi ena anina be ma haida edia hisihisi oi laloa, bona oi ura idia oi durua.

2, 3. (a) Dahaka ese ia hahedinaraia taunimanima be hebogahisi idia hahedinaraia diba? (b) Dahaka dainai Baibel ese hebogahisi karana ia herevalaia dalana ita laloa be namo?

² Iehova be hebogahisi Diravana, bona taunimanima be iena toana hegeregerena ia karaia. Unai dainai taunimanima ibounai, herevana idia be Iehova idia diba o lasi, be vaia ma haida idia hebogahisi henia bona durua diba. (Gen. 1:27) Baibel lalonai, hebogahisi  idia hahedinaraia taudia edia sivarai momo idia noho. Hegeregere, nega ta ariara hahine rua be natuna ta totona Solomona vairanai idia hepapahuahu. Solomona ia ura diba edena be sinana korikorina, unai dainai idia tohoa totona, oda ia henia natuna be kahana rua dekenai do idia utua. Sinana korikorina be ena natuna ia hebogahisi henia bada dainai, king ia noia goadagoada unai natuna be hahine ma ta dekenai do ia henia. (1 Kin. 3:23-27) Haheitalai ma ta be Farao ena natuna kekeni. Mose ia beibi neganai, ia ese ia hamauria. Ena be ia diba ia davaria natuna be Heberu taudia edia, bona idia hamasea be namo, to “ia bogahisihisi henia” bona ena lalona ia hadaia unai natuna do ia naria.​—Eso. 2:5, 6.

³ Dahaka dainai hebogahisi karana ita herevalaia be namo? Badina Baibel ese ita ia hagoadaia Iehova ita tohotohoa totona. (Efe. 5:1) Ena be Dirava ese taunimanima ia havaraia neganai, idia be hebogahisi idia hahedinaraia diba, to ita be goevadae lasi dainai, sibona iseda namo ita tahua diba. Bona nega haida ia auka ita abia hidi bema ma haida do ita durua eiava sibona do ita laloa. To, dahaka ese ita do ia durua hebogahisi karana ita hahedinaraia totona? Gau ginigunana be, Iehova bona ma haida ese hebogahisi idia hahedinaraia dalana do ita laloa. Bona iharuana be, Dirava ena haheitalai ita tohotohoa dalana bona unai bamona ita karaia ena namo ita laloa.

4. (a) Dahaka dainai Iehova ese Sodoma dekenai aneru ia siaidia? (b) Lota bona ena natuna kekenidia edia sivarai amo dahaka ita dibaia?

⁴ Baibel lalonai, Iehova ena hebogahisi karadia ena sivarai be momo. Hegeregere, Dirava ese Lota totona ia karaia karana mani ita laloa. Lota be kara maoromaoro tauna; ia be Sodoma bona Gomora taudia edia gwau-edeede hemarai karadia dainai, “ia lalometau bada.” Momokani, Dirava ese ena lalona ia hadaia unai matabodaga taudia do ia hamasea. (2 Pet. 2:7, 8) Unai dainai Lota hamauria totona aneru ia siaidia. Idia ese ia bona ena ruma bese idia hamaoroa Sodoma bona Gomora be do idia hadikaia dainai, idia heau mauri be namo. Baibel ia gwau: “To Lota be ia haraga lasi, unai dainai inai tatau ruaosi ese ia bona ena adavana bona ena natudia kekeni edia imadia idia abia, bona hanua ena murimuri kahana dekenai idia hakaua, badina be Lohiabada ese idia dekenai ia bogahisihisi.” (Gen. 19:16) Unai sivarai ese ia hahedinaraia, Iehova be ena abidadama taudia ese idia davaria hekwakwanai ia diba.​—Isa. 63:7-9; Iam. 5:11; 2 Pet. 2:9.

5. Dirava ena Hereva ese edena dala ai ita ia durua hebogahisi ita hahedinaraia totona?

⁵ Iehova ese hebogahisi ia hahedinaraia sibona lasi, to ena taunimanima ia hadibaia unai kara do idia hahedinaraia danu. Israela taudia dekenai ia henia taravatuna mani ita laloa. Ia gwau bema ta be ena abitorehai davana ia henia lou diba lasi, moni ia henitorehai tauna ese iena dabua do ia abia, to dina ia do diho lasi neganai, unai dabua do ia henia lou. (Esodo 22:26, 27 duahia.) Hebogahisi lasi tauna be reana do ia ura lasi unai dabua ia henia lou. To, Iehova ese ena taunimanima ia hadibaia unai bamona kara do idia dadaraia. Iena taunimanima be hebogahisi idia hahedinaraia be namo. Vadaeni, unai taravatu amo dahaka ita dibaia? Bema ita itaia iseda Keristani tadikaka ta be hisihisi ia davaria, namona be ia ita durua, bema ita hegeregere.​—Kol. 3:12; Iam. 2:15, 16; 1 Ioane 3:17 duahia.

6. Iehova ese idia kara dika Israela taudia dekenai ia hahedinaraia hebogahisina amo dahaka ita dibaia?

⁶ Ena be Iehova ena taunimanima be idia kara dika, to ia ese ia hebogahisi henidia.  Baibel ia gwau: “Lohiabada, edia sene taudia edia Dirava ese iena hereva gwauraia taudia, peroveta taudia ia siaia lao, ma ia siaia lao, iena bese taudia do ia sisiba henia totona, badina ia ese iena bese bona iena noho gabuna ia bogahisihisi henia.” (2 Siv. 36:15) Unai hegeregerena, bema ita itaia ta be ena kara dika amo ia helalo-kerehai diba bona Dirava ena lalonamo ia abia, ia ita hebogahisi henia be namo. Iehova ese taunimanima ia hahemaoro henia negana ai, ia ura lasi tau ta ia mase. (2 Pet. 3:9) Unai dainai nega ia do noho lalonai, namona be taunimanima ibounai ita hadibaia Dirava ese kara dika taudia do ia hadikaia ore.

7, 8. Dahaka dainai famili ta idia abia dae Iehova ese idia ia hebogahisi henia?

⁷ Hari inai negai danu, Iehova ena hesiai taudia momo be Dirava ena hebogahisi karana idia mamia. Hegeregere, mauri lagani 12 merona, Milan, ena famili dekenai ia vara gauna mani ita laloa. Lagani 1990 lalodiai, idau bese inai henia karana be bada. Nega ta, Milan, ena tadina mero, edia tama sina, bona Witnes taudia ma haida be basi ta idia abia bona Bosnia amo idia lao Serbia. Idia be hebouhebou ta idia lao henia, bona unai hebouhebou ai Milan ena tama sina be do idia bapatiso. To boda ai, soldia taudia ese Milan bona ena famili idia hamaoroa basi amo do idia diho, badina edia bese be idau; to tadikaka ma haida idia siaidia lao. Dina rua lalonai, soldia taudia ese Milan bona ena famili idia dogoatao, gabeai ofesa tauna ese edia ofesa badana ia rini henia bona ia nanadaia idia dekenai dahaka do ia karaia. Ofesa be unai famili vairanai ia gini dainai, ibounai ese ofesa badana ena haere idia kamonai, ia gwau, “Idia umui abia lao bona umui pididia!”

⁸ Ofesa tauna be ena tatau ia hereva henia noho lalonai, tatau rua be Milan bona ena famili dekenai idia lao, bona mai gado maragina ida idia hamaorodia idia be Witnes taudia. Bona edia sivarai be basi dekenai idia lao tadikaka amo idia kamonai. Unai Witnes taudia rua ese Milan bona ena tadina idia hamaoroa motuka dekenai do idia guia bona boda do idia hanaia hebou, badina soldia taudia ese natudia edia pepa idia sekea lasi. Bena edia tama sina idia hamaoroa boda ena murina kahana amo do idia lao bona kahana ma ta dekenai do idia hedavari. Milan be ia gari bada dainai, ia daradara ia be do ia kiri eiava do ia tai. Iena tama sina idia henanadai, “Bema ai raka oho, oi laloa idia ese ai do idia koua lasi, a?” To, idia raka oho matamaia neganai, toana be soldia taudia ese idia itadia lasi. Boda ena kahana ma ta ai Milan bona ena tadina be edia tama sina ida idia hedavari. Bena hebouhebou dekenai idia lao, bona idia abia dae momokani Iehova ese edia guriguri ia haerelaia. To Baibel lalonai idia noho sivaraidia amo ita diba, nega haida Iehova ese ena hesiai taudia be unai dala amo do ia gimaia lasi. (Kara 7:58-60) Milan ia gwau: “Lau abia dae momokani aneru ese soldia taudia edia matana idia hakepulua bona Iehova ese ai ia ruhaia.”​—Sal. 97:10.

9. Iesu ese ia murinai idia raka hutuma be edena bamona ia laloa? (Laulau ginigunana herevalaia.)

⁹ Iesu ena kara amo gau ta ita dibaia danu. Ia ese hutuma ia hebogahisi henia, badina “idia be mamoe naria tauna ese ia naria lasi mamoe bamona, haida ese idia haberoa bona idia dadaraia.” Unai dainai dahaka ia karaia? “Idia dekenai gau momo ia hadibaia matamaia.” (Mat. 9:36; Mareko 6:34 duahia.) To Farisea taudia edia kara be idau, idia be idia ura lasi taunimanima idia durua. (Mat. 12:9-14; 23:4; Ioa. 7:49) Iesu hegeregerena, oi ura dikadika taunimanima oi durua, unai amo idia danu be Iehova do idia diba, a?

10, 11. Nega ibounai hebogahisi do ita hahedinaraia, a? Herevalaia.

¹⁰ To namo lasi ita laloa ita ese nega ibounai  hebogahisi ita hahedinaraia be namo. Atai ita herevalaia Baibel sivaraidia ai Dirava ese hebogahisi ia hahedinaraia be maoro. To King Saulo be ia gwau-edeede, ena be ia laloa ia ese hebogahisi karana ia hahedinaraia. Ia ese Dirava ena taunimanima edia inai tauna, Agaga, ia hamauria, bona edia animal namodia ia alaia lasi. Unai dainai Iehova ese Saulo ia dadaraia, bona Israela ia lohiaia noho lasi. (1 Sam. 15:3, 9, 15) Momokani, Iehova be kara maoromaoro Diadi. Ia be taunimanima edia kudouna ia itaia, bona ia diba edena negai hebogahisi ia hahedinaraia be maoro. (Lal. 2:17; Ese. 5:11) Kahirakahira ia ese ia idia kamonai henia lasi taudia ibounai do ia hahemaoro henia. (2 Tes. 1:6-10) Unai nega ai ia ese kara dika taudia do ia hebogahisi henia lasi. To idia ibounai do ia hadikaia ore, unai amo ia ese kara maoromaoro taudia dekenai hebogahisi do ia hahedinaraia, bona idia do ia hamauria.

¹¹ Momokani, daidia do idia mase eiava mauri be ita ese do ita abia hidi lasi. To, namona be ita gaukara goada taunimanima ita durua totona. Vadaeni edena dala haida ai ma haida dekenai hebogahisi ita hahedinaraia diba? Dala haida mani ita herevalaia.

12. Heduru henia karana dekenai edena dala ai hebogahisi ita hahedinaraia diba?

¹² Dina ta ta ai heduru ita henia. Iesu idia tohotohoa taudia ibounai ese edia dekena taudia bona edia Keristani tadikaka taihu dekenai hebogahisi idia hahedinaraia be namo. (Ioa. 13:34, 35; 1 Pet. 3:8) Hebogahisi ena anina ta be “ita hisihisi hebou.” Hebogahisi tauna be do ia ura idia hisihisi noho taudia ia durua. Unai dainai ma haida ita durua totona dala ita tahua be namo! Hegeregere, ma ta ena gaukara ita karaia diba, eiava sitoa dekenai ita lao diba ena ura gaudia ita hoia totona.​—Mat. 7:12.

13. Disasta murinai, Dirava ena taunimanima be dahaka idia karaia?

¹³ Disasta negana ai heduru henia. Disasta ta dainai taunimanima edia hisihisi ita itaia neganai, ita hebogahisi henidia bona ita ura durua. Unai bamona negadiai, Iehova ena taunimanima be vaia heduru bada idia henia. (1 Pet. 2:17) Hegeregere, lagani 2011 ai, Japan dekenai ia vara tano mareremarere bona sunami ese gabu momo ia hadikaia. Taihu ta ia gwau Japan bona tano ma haida amo idia mai volantia taudia ese edia ruma bona Kingdom Hall idia hanamoa lou ia itaia neganai,  “iena abidadama ia goada momokani.” Ma ia gwau: “Lau itaia gauna ese ia hamomokania Iehova be ita ta ta ia laloa bada. Bona egu Witnes turadia danu be hebogahisi idia hahedinaraia. Bona tanobada hegegemadai, tadikaka taihu momo be ai totona idia guriguri.”

14. Edena dala ai idia gorere bona buruka taudia oi durua diba?

¹⁴ Idia gorere bona buruka taudia durua. Ita itaia taunimanima idia gorere bona buruka neganai, ita hebogahisi henidia. Ita ura dikadika gorere bona buruka lao karana ia ore momokani. Unai dainai ita guriguri Dirava ena Basileia ia mai totona. To hari, namona be idia gorere bona buruka taudia ita durua. Toretore tauna ta ese ena sinana burukana ia herevalaia. Ia gwau dina ta ena sinana burukana, ia be mai ena Alzheimer gorerena, ese ena dabua ia hamiroa. Ia ura sibona ia hagoevaia neganai, ena iduara dekenai pidipidi regena ia kamonai. Nega ibounai ia idia vadivadi henia Witnes taudia rua be ia itaia totona idia mai. Taihu idia nanadaia bema ia idia durua diba. Hahine ia haere: “Inai be hemarai gauna, to oibe.” Bena unai taihu ese ia idia durua ia hegoeva totona. Bena ia totona ti idia karaia murinai, idia herevahereva sisina. Unai hahine ena natuna mero be idia ia tanikiu henia bada. Ia gwau: “Witnes taudia lau hanamoa bada. Badina idia harorolaia sivaraina be edia kara amo idia hahedinaraia.” Idia gorere bona buruka taudia oi hebogahisi henia dainai, oi ura bada idia oi durua, a?​—Fili. 2:3, 4.

15. Iseda haroro gaukara ese edena dala ai ma haida ia durua diba?

¹⁵ Taunimanima durua Dirava idia diba totona. Taunimanima edia hekwakwanai bona lalohekwarahi gaudia be momo, unai dainai ita ura idia ita durua Dirava idia dibaia totona. Idia ita durua diba dala hereadaena be Dirava bona iena Basileia ese taunimanima totona do idia karaia gaudia ita herevalaia. Dala ma ta be, idia dekenai ita hahedinaraia iseda mauri ai Dirava ena taravatu ita badinaia be aonega dalana. (Isa. 48:17, 18) Emu haroro gaukara oi habadadia diba, a? Inai gaukara amo Iehova ita hanamoa bona ita hahedinaraia ma haida ita hebogahisi henia.​—1 Tim. 2:3, 4.

16. Hebogahisi ia hahedinaraia tauna be dahaka namo do ia davaria?

¹⁶ Doketa taudia idia gwau, bema hebogahisi ita hahedinaraia, do ita gorere momo lasi, bona tura namodia ita davaria diba. Hisihisi negadiai ma haida oi durua neganai, do oi moale, goada mamina oi abia, sibona oi noho hemamina bona lalohadai kereredia do oi abia lasi. Oibe, hebogahisi oi hahedinaraia neganai, namo do oi davaria. (Efe. 4:31, 32) Keristani taudia be ma haida idia durua neganai, edia lalomamina be ia namo, badina idia diba idia be Baibel ena hakaua herevadia idia badinaia. Ta be unai bamona ia karaia neganai, ia be tama eiava sina namona, adavana namona, bona tura namona ai do ia lao. Hebogahisi idia hahedinaraia haraga taudia be hekwakwanai idia davaria neganai, ma haida ese do idia durudia.​—Mataio 5:7; Luka 6:38 duahia.

17. Dahaka dainai oi ura hebogahisi karana oi hahedinaraia?

¹⁷ Momokani, hebogahisi ita hahedinaraia neganai, namo do ita davaria, to namo lasi unai badina sibona dainai hebogahisi ita hahedinaraia. To unai ita karaia ena badina badana be ita ura Iehova Dirava​—lalokau bona hebogahisi ena Badina​—ita tohotohoa bona matauraia. (Aon. 14:31) Ita dekenai ia be haheitalai hereadaena. Unai dainai namona be ita hekwarahi iena kara ita tohotohoa totona. Oibe, bema hebogahisi ita hahedinaraia, iseda tadikaka huanai lalokau do ia noho bona iseda dekena taudia ita tura henia diba.​—Gal. 6:10; 1 Ioa. 4:16.