1, 2. (a) Sibona biagua lasi karana dainai, dahaka ia vara? (b) Dahaka dainai hari sibona biagua karana ita herevalaia be namo?

SIBONA BIAGUA KARANA be lauma helaga ena huahua ta. (Gal. 5:22, 23) Iehova be goevadae bona hanaihanai sibona ia biagua. To, taunimanima be goevadae lasi dainai, nega haida sibodia idia biagua lasi. Unai dainai, hari hekwakwanai be momo. Bona momo be sibodia idia biagua lasi dainai, mai anina bada gaukaradia idia haorea haraga lasi o sikuli o gaukara gabunai idia gaukara namonamo lasi. Danu, ta hadikaia herevadia idia gwauraia, idia inuinu kekero, dagedage, headava idia hadokoa, idia abitorehai kava, drag idia ania, dibura ruma ai idia noho, idia lalometau, gorere dikadia idia abia, bona idia rogorogo kava.​—Sal. 34:11-14.

² Momokani, sibodia idia biagua lasi taudia be idia sibona bona ma haida dekenai hekwakwanai momo idia havaraia. Oibe, sibona biaguna lasi karana be hari ia bada ia lao. Diba bada taudia ese lagani 1940 lalodiai bona vanegai idia karaia tahua gaukarana ese ia unai ia hamomokania. To namo lasi unai kara dekenai ita hoa, badina Baibel ia peroveta vadaeni “dina gabediai” taunimanima be “sibodia edia ura do idia biagua lasi.”​—2 Tim. 3:1-3.

3. Dahaka dainai Keristani taudia be sibodia idia biagua be namo?

 ³ Dahaka dainai sibona ita biagua be namo? Badina badana be rua. Ginigunana be, sibodia idia biagua diba taudia be hekwakwanai momo idia davaria lasi. Idia be ma haida idia tura henia diba, bona idia badu, lalohekwarahi o lalometau lasi. Iharuana be, Dirava ena lalonamo ita abia totona, namona be hahetoho ita dadaraia bona ura kereredia ita biagua. Adamu bona Heva be unai idia karaia lasi. (Gen. 3:6) Hari taunimanima momo danu be sibodia idia biagua lasi, unai dainai hekwakwanai momo idia davaria.

4. Sibodia idia biagua be auka taudia be dahaka idia laloatao be namo?

⁴ Iehova ia diba ita be goevadae lasi bona sibona ita biagua be auka. Unai dainai ia ura ita ia durua, unai amo iseda ura kereredia ita biagua diba. (1 Kin. 8:46-50) Oibe, ia be iseda lalokau Turana dainai, edia hemami bona ura idia biagua be auka taudia ia durua. Inai stadi ai, ita be Iehova ese sibona ia biagua karana dekenai ia hahedinaraia haheitalai namona do ita herevalaia. Bona Baibel lalonai idia noho haheitalai namodia bona dikadia, bona ita do idia durua daladia haida do ita herevalaia danu.

5, 6. Sibona biagua karana dekenai, edena dala ai Iehova be haheitalai namona?

⁵ Iehova be sibona ia biagua diba, badina iena kara ibounai be goevadae. (Deu. 32:4) To, ita be goevadae lasi. Unai dainai sibona ita biagua totona, namona be Iehova ena kara ita stadilaia, unai amo ia ita tohotohoa diba. Edena dala haida ai Iehova be sibona ia biagua?

⁶ Satani be ia gwau-edeede neganai, Iehova ese ia karaia karana mani ita laloa. Diabolo ena hereva dainai, Dirava idia badinaia anerudia be idia hoa, badu, bona idia heiriheiri heheni. Satani ese ia havaraia hisihisi ibounai oi laloa neganai, reana oi danu be unai hemami oi abia. To, Iehova be ia karaharaga lasi. Ia laloa namonamo guna bena haere maorona ia henia. Ia be badu dekenai ia haraga lasi, bona Satani ena gwau-edeede karana ia laloa maoromaoro. (Eso. 34:6; Iobu 2:2-6) Dahaka dainai Iehova ese nega ia henia? Badina ia ura lasi ta ia mase, to “ia ura taunimanima ibounai idia helalo-kerehai.”​—2 Pet. 3:9.

7. Iehova ena kara amo dahaka ita dibaia?

⁷ Iehova ena kara amo inai ita dibaia, ita do hereva lasi neganai, ita laloa namonamo guna be namo bona ita karaharaga lasi. Mai anina bada abia hidi ta oi ura karaia neganai, namona be nega oi henia oi laloa namonamo totona. Bona aonega totona oi guriguri, unai amo mai laloa maoromaoro ida oi hereva o kara diba. (Sal. 141:3) Ita badu o lalohisihisi neganai, hereva kererena ita gwauraia diba. Bena gabeai ita gwauraia herevana o karaia karana dainai do ita lalohisihisi!​—Aon. 14:29; 15:28; 19:2.

8. (a) Sibona idia biagua taudia edia sivarai be edeseni do ita davaria? (b) Potifara ena adavana ia ura Iosepa ida ia mahuta hebou neganai, dahaka ese Iosepa ia durua? (Laulau ginigunana herevalaia.)

⁸ Baibel lalonai edena sivarai ese idia hahedinaraia sibona biagua karana be mai anina bada? Reana oi laloa gauna ta be Iakobo ena natuna Iosepa ena sivarai. Ia be Potifara ena ruma ai gadi taudia naria gaukarana ia karaia neganai, ia dekenai ia vara hahetoho ia dadaraia. Potifara ena adavana ese Iosepa ia ura henia, badina ena “tauanina ia goada, bona iena vairana ena toana,  be . . . namo herea momokani,” bona ena lalona ia veria toho ia ida ia mahuta hebou totona. Ena be unai ia karaia loulou, to dahaka ese Iosepa ia durua dainai unai hahetoho ia dadaraia? Reana Iosepa be nega sisina lalonai do ia vara dika ia lalohadailaia guna. Bena, Potifara ena adavana ese Iosepa ena dabua ia dogoatao neganai, Iosepa be ia amo ia heau. Ia gwau: “Inai kerere badana do lau karaia, bona Dirava ena vairana dekenai inai bamona do lau kara dika be edena bamona?”​—Gen. 39:6, 9; Aonega Herevadia 1:10 duahia.

9. Hahetoho dadaraia totona, edena bamona sibona oi hahegaegaea diba?

⁹ Iosepa ena haheitalai amo dahaka ita dibaia? Bema ita davaria hahetoho be Dirava ena taravatu utua karana ta, namona be unai hahetoho ita dadaraia. Haida be Iehova ena Witnes taudia ai idia do lao lasi neganai, idia aniani momo, idia inuinu kekero, kuku idia veria, drag idia abia, matabodaga karadia idia karaia, o hekwakwanai ma haida lalonai idia vareai. To idia bapatiso murinai, reana nega haida do idia ura edia kara gunadia idia karaia. Bema oi be unai bamona, namona be oi laloatao do oi karaia karana ese emu hetura karana Iehova ida do ia hadikaia. Nega ta ta ai oi davaria diba hahetoho ta oi laloa bona unai hahetoho oi dadaraia diba dalana danu oi laloa. (Sal. 26:4, 5; Aon. 22:3) Bema hahetoho ta oi davaria, Iehova oi noia oi dekenai aonega do ia henia bona oi ia durua sibona oi biagua totona.

10, 11. (a) Sikuli ai, matamata taudia momo dekenai dahaka ia vara? (b) Dahaka ese matamata taudia ia durua diba, kara kererena idia dadaraia totona?

¹⁰ Iosepa dekenai ia vara gauna be hari matamata taudia momo dekenai ia vara danu. Mani Kim ita laloa. Iena sikuli turadia be wikeni ai ma ta ida idia mahuta hebou neganai, nega momo sikuli ai unai idia heagilaia. To, Kim be unai bamona sivaraidia ia gwauraia lasi. Ia be ena turadia amo ia idau dainai, nega haida ia mamia ia be turadia lasi bamona, bona ena sikuli turadia idia laloa ia be kavakava, badina mero ta ida ia do loa hebou lasi. To, Kim be ia aonega bona ia diba ita matamata neganai, mahuta hebou urana be ia goada momokani. (2 Tim. 2:22) Nega momo stiuden taudia ese idia nanadaia bema ia be do rami hebou kekenina. Unai ese dala ia kehoa idia dekenai ta ida mahuta hebou karana ia dadaraia ena badina ia hahedinaraia totona. Ita moale badina Keristani matamata momo be matabodaga karadia idia dadaraia, bona Iehova be idia dekenai ia moale danu!

¹¹ Baibel lalonai matabodaga karadia ena hahetoho lalonai idia moru taudia edia sivarai ia noho. Bona sibona biagua lasi karana dainai ia vara dika ia hahedinaraia danu. Bema Kim dekenai ia vara gauna be oi dekenai ia vara, namona be Aonega Herevadia karoa 7 ese ia herevalaia kavakava tauna ena sivarai oi laloa. Aminona danu oi laloa bona ena kara dainai ia vara dika oi laloa. (2 Sam. 13:1, 2, 10-15, 28-32) Namona be ruma bese tomadihona ai, tama sina ese unai haheitalai idia herevalaia, unai amo edia natudia idia durua sibodia idia biagua totona bona do idia aonega.

12. (a) Edena dala ai Iosepa ese iena tadikaka amo sibona ena hemami ia biagua? (b) Edena bamona negadiai iseda hemami ita biagua diba?

¹² Nega ma ta ai, Iosepa be sibona biaguna karana dekenai haheitalai namona ia hahedinaraia. Iena tadikaka be aniani hoia totona Aigupito dekenai idia mai neganai, Iosepa be sibona ia gwauraia hedinarai lasi, badina ia ura edia lalohadai ia diba. To,  iena lalona ia manoka neganai, daiutu ta dekenai ia lao, bona ia tai. (Gen. 43:30, 31; 45:1) Bema tadikaka o taihu ta ena kara dainai oi lalohisihisi, namona be Iosepa ena kara oi tohotohoa bona sibona oi biagua, unai amo hereva o kara kererena do oi karaia lasi. (Aon. 16:32; 17:27) Bema emu varavara ta be orea amo idia atoa siri, sibona emu hemami oi biagua be namo bona ia oi bamoa lasi. Momokani, do ia auka unai oi karaia totona, to do oi moale bema oi diba oi be Iehova ena kara oi tohotohoa, bona ena hahegani oi badinaia.

13. King Davida ena sivarai amo dahaka ita dibaia?

¹³ King Davida ena haheitalai amo gau haida ita dibaia. Ena be iena siahu be bada, to Saulo bona Simei edia kara dainai ia badu lasi bona ena siahu ia gaukaralaia lasi idia ia hadikaia totona. (1 Sam. 26:9-11; 2 Sam. 16:5-10) To, nega haida Davida be sibona ia biagua lasi. Baibel ese ia hahedinaraia ia be Bataseba ida ia kara dika bona Nabala ena mataganigani karana dainai ia badu. (1 Sam. 25:10-13; 2 Sam. 11:2-4) To, Davida ena kara amo mai anina bada gauna ita dibaia. Ginigunana be, Dirava ena taunimanima idia hakaua taudia ese sibona idia biaguna be namo, unai amo edia siahu be dala kererena ai do idia gaukaralaia lasi. Bona iharuana be, namo lasi ta ia laloa ia be hedibagani lalonai do ia moru lasi.​—1 Kor. 10:12.

14. Tadikaka ta dekenai dahaka ia vara, bona dahaka dainai unai bamona negadiai sibona biagua karana be mai anina bada?

¹⁴ Sibona oi biagua totona, dahaka oi karaia diba? Ia vara momokani gauna mani ita laloa. Motuka ta ese Luigi ena motuka ia bampaia. Ena be unai draiva ma ta be ia kerere, to Luigi ia gwauraia dika bona ia ura heatu. Luigi ia badu lasi totona, guriguri amo Iehova ena heduru ia noia, bona unai draiva ena lalona ia hanamoa toho, to ia do badu noho. Ena be unai ia vara, to Luigi be ia badu lasi. Wiki ta murinai, Luigi be hahine ta ia lou henia bona ia davaria unai hahine ena adavana be unai motuka ia taria tauna! Unai tauna ia hemarai bona ia karaia karana dainai sori herevana ia gwauraia. Bona Baibel idia herevalaia neganai, unai tauna ia helai vareai, bona ia kamonai herevadia ia ura henia. Unai ia vara neganai, Luigi ia laloparara aksiden ia vara negana ai ia badu haraga lasi dainai, hari anina namona ia vara. To bema unai nega ai ia badu, reana hari unai tauna be do ia kamonai lasi.​—2 Korinto 6:3, 4 duahia.

15, 16. Sibona biagua karana hahedinaraia totona, edena dala ai Baibel duahia karana ese oi bona emu famili ia durua diba?

¹⁵ Nega ibounai Baibel stadilaia karana ese Keristani taudia ia durua diba sibona idia biagua totona. Dirava ese Iosua dekenai ia gwauraia herevana laloatao, ia gwau: “Inai Taravatu Buka be nega ibounai emui guriguri heboudia lalonai do umui duahia. Dina bona hanuaboi do oi tahua, bona iena torea herevadia ibounai do oi kamonai henia. Unai neganai oiemu raka do ia namo, bona oiemu kara ena anina do ia vara momokani.” (Ios. 1:8) Baibel stadilaia karana ese edena dala ai oi ia durua diba sibona oi biaguna totona?

¹⁶ Momokani, Baibel lalonai idia noho sivaraidia ese sibona biagua karana ena namo, bona sibona biagua lasi karana ena dika idia hahedinaraia. Badina namona dainai, Iehova ese unai sivarai be Baibel lalonai ia toredia. (Roma 15:4) Aonega karana be unai sivarai ita duahidia, laloa dobu, bona stadilaia! Bona oi bona emu famili ese do umui badinaia dalana oi laloa. Iehova oi  noia oi do ia durua iena Hereva oi badinaia totona. Bema oi laloa gau haida dekenai oi be sibona oi biagua lasi, unai oi gwauraia hedinarai. Bena oi gurigurilaia, bona oi hekwarahi unai oi hanamoa totona. (Iam. 1:5) Danu, iseda pablikeisen idauidau lalonai oi do idia durua gaudia oi tahua.

17. Edena dala ai tama sina ese edia natudia do idia durua sibodia idia biagua totona?

¹⁷ Edena dala ai emui natudia umui durua diba sibona idia biagua totona? Tama sina e, laloatao emui natudia idia vara neganai, idia be unai kara idia diba lasi. Unai dainai, sibona emui kara amo emui natudia dekenai kara namodia umui hadibaia. (Efe. 6:4) Bema oi itaia emu natudia be sibodia idia biagua lasi, namona be sibona oi nanadaia, bema oi be haheitalai namona oi hahedinaraia. Unai oi karaia diba, bema nega ibounai oi haroro, hebou dekenai oi lao, bona ruma bese ena tomadiho oi karaia. Danu, oi gari lasi emu natudia dekenai lasi oi gwauraia totona! Iehova ese Adamu bona Heva dekenai maka ia atoa​—unai amo iena siahu idia matauraia diba. Unai hegeregerena, bema tama sina ese edia natudia idia matahakani henia bona idia dekenai haheitalai namona idia hahedinaraia, edia natudia ese edia siahu do idia matauraia bona sibodia do idia biagua. Emu natudia dekenai Dirava ena siahu matauraia bona ena taravatu badinaia karana oi hadibaia be mai anina bada.​—Aonega Herevadia 1:5, 7, 8 duahia.

18. Dahaka dainai iseda bamodia ita abia hidi namonamo be namo?

¹⁸ Herevana ita be tama sina o lasi, to ita ibounai ese iseda bamodia ita abia hidi namonamo be namo. Bema emu turadia be Iehova idia lalokau henia, idia ese oi do idia hagoadaia tahua gaudia namodia oi atoa totona, bona kerere amo oi do idia gimaia. (Aon. 13:20) Edia haheitalai namona ese oi do ia hagoadaia sibona oi biagua totona. Bona emu kara namodia ese idia do ia hagoadaia danu. Momokani, sibona oi biagua neganai, Dirava ese oi do ia lalonamo henia, emu mauri do oi moalelaia, bona oi lalokau henia taudia edia hetura karana do oi moalelaia.