Oi ura taim oi dibaia neganai, dahaka do oi karaia? Reana emu hora gauna o klok do oi itaia. Bema turana ta be taim totona ia henanadai, edena bamona do oi haere? Taim gwauraia daladia be idauidau. Edena dala ai?

Bema ita gwau dina tubua murinai taim be hora tamona bona miniti 30. Reana do oi gwau taim be 1:30pm. Oi noho gabuna bona taim umui gwauraia dalana hegeregerena, reana do oi gwau taim be 13:30pm. Unai bamona taim gwauraia dalana be 24-hour klok dekenai idia gaukaralaia. Gabu ma haida dekenai, unai taim be inai bamona do idia gwauraia, “half two,” anina be miniti 30 murinai 2 o’klok do ia abia.

Baibel oi duahia neganai, reana do oi laloa, Baibel negadiai edena dala ai taim idia gwauraia? Gwauraia daladia be momo. Baibel lalonai Heberu toretoredia ai “daba,” “dina tubua,” bona “adorahi” idia gaukaralaia. (Gen. 8:11; 19:27; 43:16; 1 Kin. 18:26) Nega ma haida ai, taim korikori idia gwauraia.

Baibel negadiai, taim idia diba totona gima taudia idia gaukaralaia. Idia be nega momo hanuaboi ai idia gaukara. Lagani handred gunanai, Iesu ia do vara lasi neganai, Israela taudia ese taim idia dibaia totona, hanuaboi be kahana toi dekenai idia haria, idia gwauraia hanuaboi ena gima negana. Gunalaia Taudia 7:19 be “hanuaboi momokani” ia herevalaia. Iesu ena negai, Iuda taudia ese Grik bona Roma taudia edia taim gwauraia dalana idia gaukaralaia, hanuaboi be kahana foa dekenai idia haria.

Nega momo Evanelia toretoredia ai unai bamona taim idia gaukaralaia. Hegeregere, “hanuaboi ena gima negana ihahanina ai,” Iesu be davara latanai ia raka bona ena hahediba taudia idia noho bouti dekenai ia lao. (Mat. 14:25, NWT) Iesu be ena haheitalai ta lalonai, ia gwau: “Emui rami umui kwatua bona umui hegaegae, bona emui lamepa do idia araia noho. Bona bema biaguna be gima negana iharuana eiava ihatoina ai ia ginidae bona ia davaria unai bamona idia karaia, do idia moale!”​—Luka 12:35, 38.

Iesu be ena hahediba taudia ia hereva henidia neganai, hanuaboi ena kahana ibounai foa ia gwauraia: “Unai dainai do umui gima noho, badina umui diba lasi negana ai ruma Biaguna do ia mai. Ia be reana adorahi momokani ai eiava malokihi ai eiava kokoroku ia tai negana ai eiava daba maragi ai do ia mai.” (Mar. 13:35; ftn.) Hanuaboi ena gima negana ginigunana, “adorahi momokani ai,” be dina ia diho negana amo ela bona hanuaboi 9 oklok. Hanuaboi ena gima negana iharuana, “malokihi ai,” be hanuaboi 9 oklok amo ela bona malokihi. Hanuaboi ena gima negana ihatoina, “kokoroku ia tai negana ai,” be malokihi amo ela bona daba 3 oklok. Reana unai taim lalonai, Iesu idia dogoatao neganai, kokoroku ia tai. (Mar. 14:72) Hanuaboi ena gima negana ihahanina, “daba maragi ai,” be daba 3 oklok amo ela bona dina ia daekau.

Momokani, ena be hari taim ita gwauraia daladia be Baibel negadiai idia noho taudia ese idia gwauraia hegeregerena lasi, to dala ma haida amo idia ese dina bona hanuaboi ena taim idia gwauraia.