1. Edena dala ai sibona ena ura laloa bada karana ese iseda manau karana ia hadikaia diba?

DAHAKA dainai Dirava ena Hereva amo ita dibaia gaudia ita badinaia be mai ena hekwarahi? Badina ta be, kara maorona ita karaia totona ita manau be namo, to nega haida ia auka manau karana ita hahedinaraia noho totona. Inai “dina gabediai,” taunimanima be ‘sibodia idia laloa bada, moni idia ura henia bada, sibodia idia abia isi, idia hekokoroku,’ bona ‘sibodia edia ura idia biagua lasi,’ ita be unai bamona taudia huanai ita noho. (2 Tim. 3:1-3) Ita be Dirava ena hesiai taudia dainai ita diba unai bamona kara be dika, to reana nega haida do ita itaia unai bamona kara idia hahedinaraia taudia be idia kwalimu bona edia mauri idia moalelaia noho. (Sal. 37:1; 73:3) Unai dainai reana do ita laloa: ‘Dahaka dainai sibona egu ura lau dadaraia bona ma haida edia namo lau atoa guna? Bema “ia maragi tauna” bamona lau kara, taunimanima be lau do idia matauraia diba, a?’ (Luka 9:48) Bema inai tanobada ese ia hahedinaraia sibona ena ura laloa bada karana ita hahedinaraia, unai ese iseda hetura karana kongrigeisen lalonai bona iseda Keristani kara namodia ia hadikaia diba.  To Baibel lalonai idia noho haheitalai namodia ita stadilaia bona tohotohoa neganai, namo do ita davaria.

2. Edena dala ai Dirava ena abidadama hesiai taudia edia haheitalai ese ita ia durua diba?

² Bema ita ura idaunegai abidadama taudia edia haheitalai ita tohotohoa, idia karaia gaudia ita diba be namo. Hegeregere, edena dala ai Dirava ena turana ai idia lao, ena lalonamo idia abia, bona goada idia abia ena ura idia hagugurua totona? Baibel lalonai unai taudia edia haheitalai ita stadilaia bona laloa dobu neganai, iseda abidadama do ia goada.

3, 4. (a) Edena dala ai Dirava amo sisiba bona hadibaia daladia ita abia? (b) Dirava ena hereva amo diba ita abia sibona be hegeregere lasi, to dahaka ita karaia danu be namo?

³ Ita ese sisiba bona hadibaia dala namodia be Baibel, Baibel bukadia, jw.org, JW Broadcasting, bona iseda hebou maragidia bona badadia amo ita abia. To Ioane 4:34 ai Iesu ia gwau, Dirava ena hereva amo diba ita abia sibona be hegeregere lasi. To dahaka ita karaia danu be namo? Iesu ia gwau: “Lauegu aniani be lau ia siaia tauna ena ura do lau karaia bona iena gaukara do lau karaia haorea.”

⁴ Iesu dekenai Dirava ena ura karaia karana be aniani bamona.Edena dala ai? Aniani namona ta ita ania neganai iseda tauanina ia durua bona hagoadaia, unai hegeregerena Dirava ena ura ita karaia karana ese ita do ia durua bona iseda abidadama mauri hanaihanai helarona dekenai do ia hagoadaia. Nega momo haroro gaukara totona oi lao bona oi mamia emu goada ia hegeregere lasi, to haroro gaukara ia ore murinai oi mamia goada matamata oi abia, ani?

5. Aonega karana ena namo be dahaka?

⁵ Dirava ese ita dekenai ia hadibaia gaudia ita badinaia be aonega karana. (Sal. 107:43) Aonega tauna be namo do ia davaria. “Aonega ia davaria tauna be mai moale danu. Ia ese lalona kehoa ia davaria vadaeni. . . . Aonega ena davana ese, davana bada herahera nadi edia davana ia hereaia. Oi ura henia gaudia ibounai edia huanai, ta ese aonega ia hereaia diba lasi. . . . Aonega idia davaria taudia be idia moale, bona aonega ese mauri namona, idia dekenai do ia henia.” (Aon. 3:13-18) Iesu ia gwau: “Bema unai gaudia umui diba bona bema umui karaia, do umui moale.” (Ioa. 13:17) Iesu ena hahediba taudia be do idia moale bema ena hadibaia hereva idia badinaia. Idia ese Iesu ia gwauraia hadibaia herevadia bona haheitalai be dina tamona sibona ai idia badinaia lasi, to edia dina ta ta maurina ai idia badinaia.

6. Dahaka dainai ita hekwarahi ita dibaia gaudia ita badinaia totona?

⁶ Hari inai negai, namona be ita hekwarahi ita dibaia gaudia ita badinaia totona. Mani inai haheitalai ita laloa, mekenik ta be mai ena tulu, kohu, bona diba. To bema unai gaudia ia gaukaralaia lasi heduru do ia abia lasi. Danu ena be lagani momo lalonai mekenik gaukara ia karaia bona ekspiriens momo ia davaria, to ia dibaia gaudia ia gaukaralaia noho unai amo ena gaukara do ia karaia namonamo. Unai hegeregerena, reana matamanai Baibel amo ita dibaia gaudia ita badinaia ena namo ita itaia neganai ita moale. To bema mai manau ida dina ta ta ai Iehova ese ia henia hadibaia herevadia ita badinaia, do ita moale hanaihanai.

7. Baibel lalonai idia noho haheitalai amo diba ita abia sibona lasi, to dahaka ita karaia danu be namo?

⁷ Hari iseda manau karana ia tohoa diba daladia haida, bona edena dala ai idaunegai abidadama taudia ese unai bamona hekwakwanai idia hanaia daladia do ita herevalaia.  Iseda abidadama ia goada totona, diba sibona ita abia be hegeregere lasi. Namona be unai point ta ta oi badinaia diba daladia oi laloa, bona oi naria lasi unai oi karaia totona.

8, 9. Kara 14:8-15 ese edena bamona Paulo ena manau karana ia hahedinaraia? (Laulau ginigunana herevalaia.)

⁸ Dirava ena ura be “taunimanima idauidau do ia hamauria bona hereva momokani ena diba maoromaoro do idia abia.” (1 Tim. 2:4) Hereva momokani idia do diba lasi taudia be edena bamona oi laloa? Aposetolo Paulo be sinagoga ai Iuda taudia sibona ia haroro henia lasi, to Dirava idia ura dibaia taudia ia tahua danu. To idau diravadia idia tomadiho henia taudia edia kara ese Paulo ena manau karana ia tohoa.

⁹ Paulo ena misinari laolao ginigunana ai, Lukaonia taudia idia laloa ia bona Banaba be kwalimu taudia badadia bona idia dekenai edia dirava koikoi ladadia idia gwauraia, Dio bona Hereme. Paulo bona Banaba be unai kara dainai idia moale a? Hanua rua idia vadivadi neganai dagedage idia davaria dainai, idia laloa idia abia hanamoa herevadia be hahenamo ta, a? Idia laloa unai ese momo do ia durua sivarai namona idia abia dae totona, a? Lasi momokani! Karaharaga idia ese edia atai dabua idia darea bona hutuma huanai idia heau lao, bona idia boiboi idia gwau: “Dahaka dainai inai gaudia umui karaia? Ai be taunimanima sibona, umui bamona.”​—Kara 14:8-15.

10. Edena dala ai Paulo bona Banaba idia hahedinaraia idia bona Lukaonia taudia be idia hegeregere?

¹⁰ Paulo bona Banaba idia ura hahedinaraia idia danu be goevadae lasi taudia, to idia gwau lasi edia tomadiho dalana be unai dirava koikoi idia tomadiho henia taudia edia tomadiho dalana ida ia hegeregere. Idia ruaosi be Dirava ese ia siaia misinari taudia. (Kara 13:2) Danu idia be lauma helaga amo idia horoa bona guba helarona do idia abia taudia. To Paulo bona Banaba idia diba bema Lukaonia taudia danu be sivarai namona idia abia dae, unai hahenamo do idia moalelaia diba.

11. Haroro gaukara lalonai, edena dala ai Paulo ena manau karana ita tohotohoa diba?

¹¹ Edena dala ai Paulo ese ia hahedinaraia manau karana ita tohotohoa diba? Ginigunana be, namo lasi Iehova ena goada amo ita hagugurua gaudia dainai ma haida amo hanamoa herevadia ita tahua. Namona be sibona ita nanadaia: ‘Lau haroro henia taudia be edena bamona lau laloa? Lau be egu komiuniti lalonai taunimanima haida sibona lau kara namo henidia, a?’ Tanobada ibounai lalonai Iehova ena Witnes taudia be edia teritori dekenai sivarai namona idia ura kamonai taudia idia tahua noho. Nega haida, tadikaka taihu haida be unai gabu ena gado bona kastom idia dibaia, ena be momo ese unai idia laloa bada lasi. Namo lasi unai bamona dala ai taunimanima idia haroro henia tadikaka taihu idia laloa idia ese ma haida idia hereaia. To, namona be dala idia tahua Basileia ena sivarai namona amo kamonai tauna ena kudouna idia hamarerea totona.

12. Edena dala ai Epafra be ma haida dekenai sibona laloa bada lasi karana ia hahedinaraia?

¹² Mai manau ida Dirava ena hadibaia hereva ita badinaia dalana ma ta be iseda “abidadama” tadikaka taihu totona ita guriguri. (2 Pet. 1:1) Epafra be unai bamona ia karaia. Baibel ai, Paulo ese ia torea revarevadia lalonai, Epafra be nega toi sibona ia herevalaia. Roma dekenai, Paulo be ruma ta ai idia hadiburaia neganai, Kolose ai idia noho Keristani taudia ia tore henidia, bona ia gwau Epafra be “nega ibounai [idia] totona ia  guriguri goadagoada.” (Kol. 4:12) Epafra be ena tadikaka taihu ia diba namonamo, bona idia ia laloa bada. Ena be Paulo ida “dibura ruma lalonai ia noho,” to unai ese Epafra ia koua lasi ena tadikaka bona taihu edia abidadama ia hagoadaia totona. (File. 23) Bona idia totona ia guriguri. Momokani, unai be sibona laloa bada lasi karana, ani? Iseda abidadama tamona taudia totona Iehova ita guriguri henia karana be mai ena siahu, bema iseda guriguri lalonai idia ta ta ita laloa.​—2 Kor. 1:11; Iam. 5:16.

13. Edena dala ai iseda guriguri lalonai Epafra ena haheitalai ita tohotohoa diba?

¹³ Emu guriguri lalonai edia ladana oi gwauraia diba taudia haida oi laloa. Epafra bamona, iseda tadikaka bona taihu momo be edia kongrigeisen bona famili lalonai maduna metaudia idia huaia, o abia hidi badadia haida idia karaia, o hahetoho haida idia davaria noho taudia totona idia guriguri. Momo be jw.org ena atikol ladana “Jehovah’s Witnesses Imprisoned for Their Faith” ai, edia ladana ia noho taudia totona idia guriguri. (NEWSROOM > LEGAL DEVELOPMENTS itaia.) Danu, mase dekenai edia lalokau taudia idia haboioa, disasta bona tuari amo idia roho mauri, bona moni ena hekwakwanai idia haheaukalaia noho taudia ita laloa be namo. Oibe, iseda tadikaka bona taihu totona ita guriguri be mai ena namo. Ma haida totona ita guriguri neganai, ita hahedinaraia sibona iseda namo ita laloa lasi, to ma haida edia namo danu ita laloa. (Fili. 2:4) Iehova ese unai bamona guriguri ia kamonai henia.

14. Edena dala ai Iehova be kamonai karana dekenai haheitalai hereadaena ia hahedinaraia?

¹⁴ Manau karana ita hahedinaraia diba dala ma ta be, mai iseda ura ida taunimanima edia hereva ita kamonai. Iamesi 1:19 ia gwau, do ita “kamonai haraga” be namo. Iehova be unai kara dekenai haheitalai hereadaena ia hahedinaraia. (Gen. 18:32; Ios. 10:14) Hegeregere Esodo 32:11-14 (duahia) ai, Dirava bona Mose edia herevahereva karana amo gau ta ita dibaia. Ena be Mose ese ena lalohadai ia gwauraia be anina lasi, to Iehova ese Mose dekenai nega ia henia ena hemami ia gwauraia totona. Reana do ita ura lasi kerere ia karaia tauna ese ia gwauraia herevana do ita kamonai bona badinaia. To, Iehova be mai haheauka ida ia idia abidadama henia taudia edia guriguri ia kamonai.

15. Edena dala ai ma haida matauraia karana amo Iehova ita tohotohoa diba?

¹⁵ Sibona ita nanadaia: ‘Iehova be Aberahamo, Rahela, Mose, Iosua, Manoa, Elia bona Hesekaia dekenai kamonai karana ia hahedinaraia hegeregerena, lau be egu tadikaka taihu lau matauraia, idia lau hanamoa, edia lalohadai lau kamonai, bona edia lalohadai namodia lau badinaia, a? Egu kongrigeisen o famili lalonai ta be egu heduru ia ura, a? Dahaka do lau karaia? Edena dala ai unai do lau karaia?’​—Gen. 30:6; Gun. 13:9; 1 Kin. 17:22; 2 Siv. 30:20.

16. King Davida be Simei ese ia gwauraia dika neganai edena bamona ia kara?

¹⁶ Manau karana ese ita ia durua diba, ta ese ita ia gwauraia dika neganai sibona biagua karana ita hahedinaraia totona. (Efe. 4:2) Unai bamona haheitalai namona ta be 2 Samuela 16:5-13 ai ita davaria diba. (Duahia.) Davida bona ena hesiai taudia be King Saulo ena varavara, Simei, ena hadikaia herevadia bona dagedage karadia idia haheaukalaia. Ena be Davida be mai ena siahu unai ia koua diba, to ia haheauka. Dahaka ese Davida ia durua sibona ia biagua totona? Salamo karoa 3 ita stadilaia karana amo haere do ita abia.

17. Dahaka ese Davida ia durua sibona ia biagua totona, bona edena dala ai ia ita tohotohoa diba?

 ¹⁷ Davida be ena natuna Abesaloma ese ia ura hamasea gwauraia negana ai Salamo karoa 3 ia torea. Siri 1 bona 2 be Samuela iharuana karoa 16 ese ia gwauraia sivarai ida idia hegeregere. Bona Salamo 3:4 ese Davida ena abidadama karana ia hahedinaraia, ia gwau: “[Iehova] dekenai durua totona lau boiboi noho, bona iena ororo helagana dekena amo, lau dekenai ia haere henia.” Ita danu be hekwakwanai ita davaria neganai ita guriguri diba. Bena, Iehova ese ena lauma helaga amo ita do ia durua ita haheauka totona. Bema ta ese oi ia kara auka henia, sibona oi biagua eiava mai badu lasi ida ena dika oi gwauatao diba, a? Oi abia dae Iehova be emu hisihisi ia itaia bona oi do ia hanamoa diba, a?

18. Edena dala ai Dirava ena hadibaia herevadia ita badinaia noho karana ese ita ia durua diba?

¹⁸ Kara maorona ita karaia neganai, hahenamo momo do ita abia. Unai dainai Aonega Herevadia 4:7 ia gwau: “gau badana momokani be aonega.” Ena be diba amo aonega ita abia, to ita abia dae herevadia ita lalopararalaia sibona be hegeregere lasi. To ita karaia abia hidi amo aonega karana ita hahedinaraia. Dimairi ese aonega karana idia hahedinaraia danu. Dimairi be mai edia aonega ida siahu negana ai edia aniani idia haboua. (Aon. 30:24, 25) Keriso, “Dirava ena aonega,” be hanaihanai ena Tamana hamoalea karadia ia karaia. (1 Kor. 1:24; Ioa. 8:29) Dirava be abia hidi maorodia ita karaia bona ita badinaia karana ia diba. Bona ia ese mai haheauka ida manau karana idia hahedinaraia bona idia diba dahaka be maoro idia badinaia taudia ia hanamoa. (Mataio 7:21-23 duahia.) Unai dainai, ita gaukara goada kongrigeisen lalonai manau karana ita hahedinaraia totona. Ita diba kara maorona ita badinaia be mai ena hekwarahi bona ita haheauka be namo, to manau karana ita hahedinaraia neganai do ita moale hanaihanai.