TANOBADA hegegemadai, elda taudia ese Dirava ena taunimanima huanai edia asainmen idia laloa bada. Ita ibounai dekenai idia be hahenamo ta! To vanegai sibona senisi haida idia karaia. Buruka elda taudia ese idia huaia maduna badadia haida be elda matamatadia dekenai idia henia. Edena dala ai?

Unai senisi matamatana ai idia gwau, bema tadikaka ta ena mauri be lagani 70, sekit gaukara bona tiokratik sikuli idauidau naria gaukarana do ia karaia lasi. Danu, bema elda tadikaka ta ena mauri lagani be 80, elda taudia ese idia huaia maduna haida hegeregere, Brens Komiti ena kodineita eiava kongrigeisen lalonai elda orea ena kodineita gaukara be elda matamata dekenai do ia henia. Unai buruka elda taudia be dahaka idia karaia? Idia hahedinaraia Iehova bona ena orea idia badinaia noho!

Lagani 49 bamona Brens Komiti ena kodineita gaukarana ia karaia tadikaka ta ladana, Ken ia gwau: “Unai senisi lau abia dae momokani. Badina unai dabai, guriguri amo Iehova lau noia tadikaka matamata ta ese kodineita gaukara ia karaia totona.” Ken ena hemami be tanobada ibounai dekenai abidadama buruka taudia edia hemami hegeregerena. Momokani, matamanai unai tadikaka idia lalohisihisi badina edia hesiai gaukara idia moalelaia.

Esperandio, guna ena kongrigeisen ai elda orea ena kodineita gaukara ia karaia, ia gwau, “Unai senisi dainai lau lalohisihisi sisina.” To ia  gwau, “Egu gorere ia bada ia lao dainai sibona egu helt lau naria be namo.” To Esperandio be mai abidadama ida Iehova ia hesiai henia noho bona ena kongrigeisen dekenai ia be hahenamo ta.

To lagani momo loaloa naria gaukara idia karaia taudia ese idia abia asainmen dekenai dahaka idia laloa? Lagani 38 lalonai loaloa naria gaukara ia karaia tadikaka ta ladana, Allan ia gwau, “Lau kamonai neganai, lau hoa bada.” To, ia diba tadikaka matamatadia dekenai unai gaukara ia hadibaia be mai ena namo, bona mai abidadama ida Dirava ia hesiai henia noho.

Lagani 40 lalonai loaloa naria gaukara bona tiokratik sikuli idauidau naria gaukarana ia karaia tadikaka ta ladana, Russell ia gwau matamanai ia bona ena adavana idia lalohisihisi. “Unai hahenamo ai moalelaia bada bona ai mamia emai goada ia hegeregere unai gaukara ai karaia noho totona.” Hari Russell bona ena adavana be lagani momo lalonai idia dibaia gaudia be edia kongrigeisen lalonai idia gaukaralaia noho, bona idia be mai moale ida edia tadikaka bona taihu ida hesiai gaukara idia karaia.

Ena be matamanai ita herevalaia taudia idia abia hemami oi abia lasi, to 2 Samuela bukana ai ia noho sivarai ese oi do ia durua unai bamona taudia edia hemami oi lalopararalaia totona.

Abesaloma ese ena tamana King Davida ia inai henia negana mani oi laloa. Davida be Ierusalema amo ia heau bona Ioridane Sinavai ena ist kahana ai ia noho hanuana, Mahanaimi dekenai ia lao. Unuseniai Davida bona ia idia bamoa taudia be durua gaudia idia tahua. Oi diba dahaka ia vara?

Unuseniai idia noho tatau toi be mai harihari bada ida idia dekenai mahuta geda, aniani idauidau, bona kohu ma haida idia henia. Unai tatau huanai idia ta be Barasilai. (2 Sam. 17:27-29) Abesaloma ena gwau-edeede karana ia ore neganai, Davida be Ierusalema dekenai ia giroa lou diba, bona Barasilai ese ia bamoa Ioridane dekenai idia lao totona. King ese ia hamaoroa Ierusalema dekenai ia lao totona, bona aniani do ia henia ia dekenai ena be Barasilai be “kohu momo tauna.” (2 Sam. 19:31-33) To Davida be unai ia karaia badina Barasilai ena kara namodia ia laloa bada bona ia amo sisiba namodia ia abia diba. King ena ruma ai do ia noho bona gaukara be hahenamo badana!

To Barasilai be Davida dekenai mai manau bona momokani ida ia hahedinaraia ena mauri lagani be 80. Ia gwau: “Namo bona dika edia idau be lau gwauraia diba, a?” Ena hereva ena anina be dahaka? Barasilai be lagani momo lalonai gau momo ia dibaia. Bona sisiba namodia ia henia diba, “tau badadia” ese King Rehoboama dekenai idia karaia bamona. (1 Kin. 12:6, 7; Sal. 92:12-14; Aon. 16:31) Unai dainai Barasilai be namo bona dika edia idau ia gwauraia neganai, ia be ena tauanina ena goada ia ore karana ia herevalaia badina  ia buruka vadaeni. Danu ia gwau ena mauri lagani ia bada dainai aniani edia mamina ia ore bona ia kamonai namonamo lasi. (Had. 12:4, 5) To Barasilai ese Davida ia hamaoroa tau matamata ta ladana Kimuhamu, reana Barasilai ena natuna, be Ierusalema dekenai do ia abia lao.​—2 Sam. 19:35-40.

Barasilai ese unai hahenamo ia abia dae diba lasi badina ia buruka vadaeni. Unai dainai atai ai idia herevalaia senisi be unai badina tamona ia hahedinaraia. Barasilai be ia sibona ena hemami ia herevalaia, to iseda negai orea ese tau tamona ena noho dalana bona ia karaia diba gaudia dainai senisi idia karaia lasi, to tanobada ibounai dekenai abidadama elda taudia durua totona.

Unai manau Keristani tadikaka burukadia idia itaia Iehova ena orea be do ia goada, bona vaira nega ai do ia tubu bema lagani momo lalonai idia huaia maduna be tadikaka matamatadia dekenai idia henia. Nega momo tadikaka burukadia ese tadikaka matamatadia dekenai treinini idia henia, Barasilai ese ena natuna ia treinia bona Paulo ese Timoteo ia treinia bamona. (1 Kor. 4:17; Fili. 2:20-22) Hari unai tadikaka matamatadia be “harihari gaudia” bamona, bona heduru idia henia “Keriso ena tauanina” eiava kongrigeisen idia haginia totona.​—Efe. 4:8-12; Num. 11:16, 17, 29 hahegeregerea.

Tanobada ibounai dekenai kongrigeisen lalonai Dirava ena taunimanima momo be tadikaka ma haida dekenai edia maduna idia henia, bona dala ia kehoa Iehova ena hesiai gaukara ma haida idia karaia totona.

Lagani 19 lalonai loaloa naria gaukara ia karaia tadikaka ta ladana, Marco ia gwau, “Ma haida dekenai egu maduna lau henia neganai, dala ia kehoa emai kongrigeisen lalonai idia noho taihu, edia witnes lasi tatau lau durua totona.”

Lagani 28 lalonai loaloa naria gaukara ia karaia tadikaka ta ladana, Geraldo ia gwau, “Emai tahua gauna matamata be idia manoka taudia ai durua bona Baibel stadi momo ai karaia.” Ia bona ena adavana be Baibel stadi 15 idia karaia bona manoka taudia momo be hebou dekenai idia lao noho.

Allan, matamanai ita herevalaia tadikaka, ia gwau: “Hari, nega bada ai gaukaralaia diba daladia idauidau ai haroro gaukara ai karaia totona. Danu pablik gabudia bona bisinesi teritori ai emai haroro gaukara ai moalelaia noho, bona ai haroro henia dekena taudia rua be hari Kingdom Hall dekenai idia mai.”

Bema oi be Dirava ena ura oi badinaia tadikaka ta bona emu goada ia hegeregere bona asainmen matamatana ta oi abia, heduru oi henia diba dala namona ta ia noho. Iehova ena gaukara oi durua totona lagani momo lalonai oi dibaia gaudia be kongrigeisen lalonai idia noho tadikaka matamatadia dekenai oi hadibaia. Russell, matamanai ita herevalaia tadikaka, ia gwau: “Iehova be tadikaka matamatadia ia treinia bona idia ia gaukaralaia noho. Tadikaka oreana be unai bamona hadibaia bona mamoe naria dalana amo heduru idia abia noho!”​—Maua ladana “ Tadikaka Matamatadia Durua Edia Diba Bona Goada Idia Gaukaralaia Totona” itaia.

Bema vanegai sibona hesiai gaukara ma ta oi abia, lalohadai maorona oi abia be namo. Mai lalokau ida oi karaia gaukaradia amo momo oi durua vadaeni, bona unai oi karaia noho be namo. Unai dainai tadikaka taihu ese oi idia lalokau henia bona oi do idia lalokau henia noho.

Mai anina bada gauna be, Iehova ena kudouna oi hamoalea. Ia ese ‘emu gaukara bona iena ladana totona oi hahedinaraia lalokauna, do ia laloaboio lasi. Inai lalokau dainai oi ese helaga taudia oi hesiai henia bona do oi hesiai henidia noho.’ (Heb. 6:10) Unai siri ese  ita ia hagoadaia, Dirava ia gwauhamata guna ita karaia gaudia bona ita karaia noho gaudia dainai ita do ia hanamoa. Iehova be oi ia laloa bada bona oi ia laloaboio diba lasi, badina oi gaukara goada noho ia oi hamoalea totona!

Bema emu asainmen idia haidaua lasi, atai ai ita herevalaia tadikakadia bamona, be edena bamona? Namona be ita diba ita danu be unai senisi lalonai ita noho. Edena dala ai?

Bema lo tadikaka ta be ena asainmen ia haidaua bona hari ia ida oi gaukara hebou, lagani momo lalonai ia dibaia gaudia ese oi ia durua diba. Iena sisiba oi abia dae bona ena heduru oi noia. Danu ia dibaia gaudia amo ena asainmen matamatana ia karaia dalana oi stadilaia namonamo.

Bema oi be tadikaka burukana ta bona hesiai gaukara matamatana ta oi karaia noho eiava unai bamona tadikaka danu umui gaukara hebou noho, namona be oi laloatao Iehova ese lagani momo lalonai ia idia badinaia bona ena hesiai gaukara idia karaia noho taudia ia laloa bada.