1. Edena dala ai Dirava ena taunimanima be lalokau karana idia hahedinaraia?

DIRAVA ena taunimanima be Keristani ruma bese badana ta, bona idia huanai lalokau ia noho. (1 Ioa. 4:16, 21) Nega momo unai lalokau karana be edia hereva bona hebogahisi karana amo idia hahedinaraia. Unai dainai mai hebogahisi ida haida ita kara henidia bona idia ita laloa bada neganai, ita be ‘Dirava ita tohotohoa, badina ita be iena lalokau natudia.’​—Efe. 5:1.

2. Edena dala ai Iesu ese Dirava ena lalokau ia hahedinaraia?

² Iesu ese iena Tamana ia tohotohoa goevagoeva. Iesu ia gwau: “Umui hekwarahi bona metau bada umui huaia taudia ibounai e, lau dekenai umui mai bona umui dekenai goada matamata do lau henia . . . , badina lau be manau bona lalomanada tauna.” (Mat. 11:28, 29) Keriso ena haheitalai ita tohotohoa bona “ogogami taudia laloa” bada karana ita hahedinaraia neganai, iseda guba Tamana ena lalonamo do ita abia bona ita moale bada. (Sal. 41:1) Hari ita ese ruma bese lalonai, kongrigeisen lalonai, bona haroro gaukara lalonai haida  laloa bada karana ita hahedinaraia diba daladia do ita herevalaia.

3. Edena dala ai tau ia hahedinaraia ena hahine ia laloa bada? (Laulau ginigunana herevalaia.)

³ Tatau ese ruma bese lalonai haida laloa bada karana idia hahedinaraia be namo. (Efe. 5:25; 6:4) Hegeregere, Baibel ese idia ia hagoadaia edia adavana ida do idia noho hebou “mai laloa namonamo ida.” (1 Pet. 3:7) Laloa namonamo karana bona ma haida laloa bada karana be idia gaukara hebou. Hegeregere, mai ena laloparara tauna ia diba ena hahine​—ena durua tauna​—be dala momo ai ia amo ia idau, to namo lasi tau ese ena hahine ia laloa maragi. (Gen. 2:18) Namona be ia hahedinaraia ena hahine ena hemami ia laloa bada, bona mai hemataurai ida ia kara henia. Canada ai, headava hahine ta be ena tau ia herevalaia neganai, ia gwau: “Hanaihanai egu hemami ia laloa bada eiava ia gwau lasi, ‘Namona be unai bamona oi laloa lasi.’ Danu ia be hereva ia kamonai namonamo tauna. Gau ta dekenai egu lalohadai hamaoromaoroa totona lau ia durua neganai, mai hebogahisi ida ia kara.”

4. Tau be hahine ma haida ida ia herevahereva neganai, edena dala ai ia hahedinaraia ena adavana ena hemami ia laloa?

⁴ Ia laloa namonamo tauna be hahine ma haida ida ia herevahereva neganai, adavana ena hemami ia laloa be namo. Idia dekenai hauraia herevadia ia gwauraia lasi eiava lalohadai kereredia ia abia lasi; danu Intanet ia gaukaralaia neganai unai bamona kara ia dadaraia. (Iobu 31:1) Oibe, namona be ena hahine do ia badinaia, badina ena adavana ia lalokau henia sibona lasi, to Dirava ia lalokau henia bona kara dika ia inai henia.​—Salamo 19:14; Amosa 5:15 duahia.

5. Edena dala ai hahine ese ia hahedinaraia ena tau ia laloa bada?

⁵ Bema tau ese ena kwarana, Iesu Keriso, ena haheitalai ia tohotohoa, unai ese ena hahine do ia durua iena tau ia “matauraia bada” totona. (Efe. 5:22-25, 33) Hegeregere tau be tiokratik maduna idauidau huaia totona nega bada ia gaukaralaia eiava gau ta ia lalohekwarahilaia neganai, unai hemataurai karana ese hahine do ia durua tau ia laloa bada totona. Britain ai, headava tauna ta ia gwau: “Nega haida, egu adavana be egu kara amo do ia diba gau ta lau lalohekwarahilaia noho. Unai bamona negadiai ia ese Aonega Herevadia 20:5 ena hakaua herevana ia badinaia, ia naria ela bona nega maorona ai lau “laloa gaudia” ai herevalaia, bema unai be ai herevalaia diba gaudia.”

6. Edena dala ai ita ibounai ese natudia ita durua diba ma haida idia laloa bada totona, bona edena dala ai unai ese natudia ia durua diba?

⁶ Bema tama sina be ta ta idia laloa bada, idia be edia natudia dekenai haheitalai namona idia hahedinaraia. Oibe, tama sina edia maduna badana be edia natudia do idia hadibaia ma haida laloa bada karana idia hahedinaraia totona. Hegeregere, tama sina ese edia natudia do idia hadibaia Kingdom Hall lalonai idia heau loaloa lasi. Moale negadiai, tama sina ese edia natudia idia hadibaia aniani abia totona laini ai idia gini neganai, buruka taudia idia lao guna be namo. Kongrigeisen taudia ibounai ese tama sina idia durudia diba. Hegeregere, bema natuna ta be ita dekenai kara namona ta ia karaia​—iduara ia kehoa​—ia ita hanamoa be namo. Unai bamona ita karaia neganai, natuna do ia moale bona do ia diba “henia kara ena moale be bada, to abia kara ena moale be maragi.”​—Kara 20:35.

7. Edena dala ai Iesu ia hahedinaraia taia kudima tauna ia laloa bada, bona ena haheitalai amo dahaka ita dibaia?

⁷ Nega ta Iesu be Dekapoli ena taoni ai ia noho neganai, taunimanima ese “ia dekenai taia kudima bona hereva namonamo lasi tauna idia mailaia.” (Mar. 7:31-35) To, Iesu ese hutuma amo “unai tauna ia abia siri” bona ia  hanamoa. Dahaka dainai? Reana unai tauna be ena gorere dainai hutuma vairanai ia hemarai diba. Iesu be unai ia diba dainai, hutuma amo ia abia siri bona ia hanamoa. Momokani, ita be hoa dalanai gorere taudia ita hanamoa diba lasi. To, iseda tadikaka taihu edia ura gaudia bona hemami ita laloa diba. Aposetolo Paulo ia gwau: “Namona be ta ta ibounai do ita laloa bona do ita hagoadaia, ita lalokau heheni bona kara namodia ita karaia totona.” (Heb. 10:24) Iesu be unai taia kudima tauna ena hemami ia lalopararalaia bona mai laloa maoromaoro ida ia kara henia. Ita dekenai ia be haheitalai namona!

8, 9. Edena dala haida ai ita hahedinaraia diba buruka bona gorere taudia ita laloa bada? (Haheitalai haida gwauraia.)

⁸ Buruka bona gorere taudia ita laloa bada be namo. Keristani kongrigeisen be lalokau ese ia hatamonaia. (Ioa. 13:34, 35) Unai lalokau karana ese ita ia hagoadaia buruka taudia bona gorere taudia ita durua, Keristani heboudia idia lao bona sivarai namona idia harorolaia totona. Ena be gau momo idia karaia diba lasi. (Mat. 13:23) Michael, be ena gorere dainai wilsea sibona ai ia helai, ia be ena ruma bese bona iena haroro gaukara grup lalonai tadikaka taihu amo ia abia heduru dainai ia moale bada. Ia gwau: “Idia ibounai edia heduru dainai, lau be nega momo hebou dekenai lau lao bona lau haroro diba. Lau be pablik gabudiai haroro karana lau moalelaia.”

⁹ Betele momo dekenai buruka taudia bona gorere taudia idia noho. Betele ovasia ese inai abidadama hesiai taudia idia laloa bada dainai, dala idia karaia unai amo revareva bona fon amo idia haroro diba. Bill, ena mauri lagani 86, be pablisa idia noho lasi gabudia ai idia noho taudia totona revareva ia siaia, bona ia gwau: “Ai moale badina revareva amo ai haroro diba.” Nancy, ena mauri lagani be 90, ia gwau: “Lau dekenai revareva torea bona envelope ai udaia karana be mai anina bada. Inai be haroro gaukara. Taunimanima ese hereva momokani idia dibaia be namo!” Lagani 1921 ai ia vara taihu ta ladana, Ethel, ia gwau: “Hisihisi be egu mauri ena kahana ta. Nega haida dabua lau ura hahedokilaia neganai lau hekwarahi bada.” To, ia be fon amo haroro karana ia moalelaia bona mai ena lou henia namodia haida. Barbara, ena mauri lagani be 85, ia gwau: “Egu gorere dainai, hanaihanai haroro gaukara lau karaia be auka. To fon amo haroro karana ese dala ia kehoa ma haida lau hereva henidia totona. Tanikiu Iehova!” Hua haida murinai, buruka taudia haida ese haroro gaukara totona hora 1,228 idia gaukaralaia, revareva 6,265 idia torea, fon amo taunimanima 2,000 idia rini henidia, bona pablikeisen idauidau 6,315 idia hariharilaia! Momokani, edia hekwarahi dainai Iehova ena kudouna idia hamoalea!​—Aon. 27:11.

10. Edena dala ai iseda tadikaka taihu ita durua diba Keristani heboudia amo heduru idia abia totona?

¹⁰ Keristani heboudia ai haida laloa bada karana hahedinaraia. Ita ura iseda tadikaka taihu be hebou amo heduru idia abia. Idia ita laloa bada karana amo idia ita durua diba. Edena dala ai? Dala ta be nega korikori ai ita ginidae unai amo haida edia kamonai karana ita hadikaia lasi. Oibe, nega haida idia vara kava gaudia dainai ita leiti diba. To bema ita leiti momo, namona be ma haida laloa bada karadia ita hahedinaraia daladia ita laloa. Danu ita laloatao Iehova bona ena Natuna be ita idia boiria. (Mat. 18:20) Unai dainai idia ita matauraia bada!

11. Dahaka dainai hebou lalonai mai edia kahana taudia ese 1 Korinto 14:40 ena hakaua herevana idia badinaia be namo?

¹¹ Iseda tadikaka taihu ita laloa bada karana ena anina ta be inai hakaua herevana ita badinaia: “Namona be gau ibounai do umui karaia namonamo bona dala maorona ai do umui karaia.” (1 Kor. 14:40) Hebou lalonai mai edia kahana tadikakadia be unai hakaua hereva idia badinaia totona, nega korikori ai edia kahana idia haorea be namo. Unai bamona idia karaia neganai idia hahedinaraia ma haida  idia laloa bada, gabeai tok do ia henia tauna sibona lasi to kongrigeisen taudia ibounai dekenai danu. Badina tadikaka haida be gabu daudau ai idia noho, haida be PMV idia abia, bona ma haida edia adavana be Witnes lasi tau o hahine bona mai haheauka lasi ida idia naria.

12. Dahaka dainai mai ura bada ida idia gaukara elda taudia ‘do ita lalokau henia bona do ita lalodia bada’? (Maua ladana, “Umui Idia Gunalaia Taudia Umui Laloa Bada” itaia.)

¹² Kongrigeisen ai mamoe naria taudia be mai ura bada ida haroro gaukara ai ita idia hakaua dainai idia do ita matauraia bona laloa bada be namo. (1 Tesalonika 5:12, 13 duahia.) Namona be elda taudia ese ita totona idia karaia gaudia ita laloa bada. Bona mai ura bada ida idia ita kamonai henia bona ita durudia. Badina idia ese ‘ita idia naria noho, gabeai Dirava ena vairanai edia gaukara ena anina do idia gwauraia hedinarai.’​—Heb. 13:7, 17.

13. Iesu ese taunimanima ia kara henidia dalana amo dahaka ita dibaia?

¹³ Isaia ena peroveta herevana lalonai, Iesu be inai bamona ia herevalaia, ia gwau: “Siriho manokana do ia makohia lasi, bona lamepa ena diari ia maragi neganai, ia ese do ia habodoa lasi.” (Isa. 42:3) Iesu ese taunimanima ia lalokau henia bona edia hemami ia laloa bada. Ia ese laulau dalanai siriho manokana o lamepa ena wiki ia maragi ia lao bamona taudia edia hemami ia lalopararalaia. Unai dainai, ia be idia ia laloa bada, ia hebogahisi henidia, bona ia haheauka. Danu natu maragidia be ia idia ura henia. (Mar. 10:14) Oibe, iseda aonega bona hadibaia dalana be Iesu ena aonega bona hadibaia dalana hegeregerena lasi! To, iseda teritori ia idia noho taudia dekenai ita hahedinaraia diba idia ita laloa bada. Hegeregere idia ita hereva henia dalana, edena  bamona negadiai idia ita vadivadi henia, bona hora o miniti hida idia ita hereva henia.

14. Dahaka dainai ma haida ita hereva henia karana ita laloa namonamo?

¹⁴ Edena dala ai taunimanima ita hereva henidia be namo? Hari inai negai, taunimanima milioni be tanobada ena bisinesi koikoi taudia, politikol, bona tomadiho gunalaia taudia “ese idia haberoa bona idia dadaraia.” (Mat. 9:36) Unai dainai, taunimanima momo be haida edia hereva idia abia dae lasi bona idia laloa helaro be lasi. To mai anina bada gauna be, iseda hereva bona iseda gado regena amo hebogahisi ita hahedinaraia! Momokani, momo be ita harorolaia herevana idia abia dae badina Baibel ita gaukaralaia namonamo sibona lasi, to idia ita laloa bada bona ita matauraia.

15. Edena dala idauidau ai ita hahedinaraia diba ita haroro henia taudia ita laloa bada?

¹⁵ Dala idauidau ai ita haroro henia taudia dekenai ita hahedinaraia diba idia ita laloa bada. Hegeregere, henanadai gaukaralaia karana be hadibaia dalana namona ta. Namona be mai hebogahisi bona hemataurai ida henanadai ita gaukaralaia. Painia tadikaka ta ia davaria ena teritori ai idia noho taudia momo be idia herevahereva momo lasi bona idia hemarai, unai dainai idia do ia hahemaraia henanadaidia ia gaukaralaia lasi. Bona kamonai tauna ese do ia haerelaia diba lasi henanadai ia gaukaralaia lasi. Hegeregere, ‘Dirava ena ladana oi diba, a?’ eiava ‘Dirava ena Basileia ena anina oi diba, a?’ To, tadikaka be inai bamona do ia gwau, “Baibel amo lau diba Dirava be mai ena ladana. Ia namo oi dekenai unai ladana lau hahedinaraia?” Momokani, ita gwau lasi unai bamona dala sibona ita badinaia diba, badina mauri daladia bona taunimanima be idauidau. To, namona be hanaihanai ma haida ita laloa bada bona matauraia, hegeregere teritori ai idia noho taudia ita diba namonamo.

16, 17. Edena dala ai iseda dekena taudia dekenai hebogahisi karana ita hahedinaraia (a) bema nega maorona ai idia ita vadivadi henia? (b) hora o miniti hida idia ita hereva henia neganai?

¹⁶ Edena bamona negadiai iseda dekena taudia ita vadivadi henia? Ruma ta ruma ta ai ita haroro neganai, ita be edia vadivadi taudia lasi. Unai dainai gau badana be, taunimanima do idia ura kamonai negadiai ita vadivadi be namo! (Mat. 7:12) Hegeregere, emu teritori ai idia noho taudia be idia ura wikeni ai idia laga-ani, a? Bema oibe, emu haroro gaukara oi hamatamaia diba magasin gaukara, pablik gabudia dekenai, eiava lou henia oi karaia unai amo do idia kamonai diba taudia oi davaria diba.

¹⁷ Hora o miniti hida ita hereva be namo? Taunimanima momo be idia bisi dainai, emu vadivadi ginigunana ai miniti haida sibona oi hereva be namo bona oi hereva daudau lasi. (1 Kor. 9:20-23) Bema taunimanima idia itaia edia noho dalana eiava edia sediual ita laloa bada, reana do idia ura ita vadivadi henidia lou. Unai dainai, iseda haroro gaukara ai namona be Dirava ena lauma helaga ena huahua ita hahedinaraia. Unai bamona ita karaia neganai, ‘ita be Dirava ida ita gaukara hebou taudia’ ai do ita lao. Bona Iehova ese ita ia gaukaralaia diba hereva momokani dekenai ta ita veria mai totona.​—1 Kor. 3:6, 7, 9.

18. Bema ma haida laloa bada karana ita hahedinaraia, dahaka hahenamo do ita abia?

¹⁸ Unai dainai namona be ita hekwarahi ruma bese lalonai, kongrigeisen lalonai, bona haroro gaukara lalonai ma haida laloa bada karana ita hahedinaraia. Bema unai bamona ita karaia, hari bona nega vaira ai hahenamo momo do ita abia. Salamo 41:1, 2 ia gwau: “Ogogami taudia ia laloa tauna be namo. Lohiabada ese ia do ia durua, bema hisihisi ia davaria neganai. . . . Lohiabada ese iena tano dekenai unai tau do ia hamoalea.”