1. Iesu ia do mase lasi hanuaboi ginigabena ai ena hahediba taudia ida dahaka mai anina bada gauna ia herevalaia?

IESU ena hanuaboi ginigabena ai ena hahediba taudia ida ia noho neganai, lalokau be nega 30 bamona ia herevalaia. Ia hahedinaraia ena hahediba taudia be do idia “lalokau heheni” be namo. (Ioa. 15:12, 17) Ta ta lalokau henia karana ese do ia hahedinaraia goevagoeva idia be Iesu ena murinai idia raka taudia. (Ioa. 13:34, 35) Iesu ese ia herevalaia lalokau be hemami ta sibona lasi. Iesu ia gwauraia lalokau be sibona ena ura dadaraia lalokauna. Ia gwau “Lalokau karana hereadaena be inai, tau ta ese ena turadia totona ena mauri ia atoa diho. Bema umui dekenai lau gwauraia taravatu umui badinaia, umui be egu turadia.”​—Ioa. 15:13, 14.

2. (a) Dirava ena hesiai taudia huanai dahaka ia noho? (b) Inai stadi ai edena henanadai haida do ita haerelaia?

² Inai bamona lalokau, sibona ena ura dadaraia lalokauna bona maino, be hari Iehova ena hesiai taudia huanai ia noho, unai ese ia hahedinaraia idia be Dirava ena taunimanima. (1 Ioa. 3:10, 11) Ita moale bada badina Keriso ena lalokau karana be hari Iehova ena hesiai taudia ese idia hahedinaraia, herevana edia bese, iduhu, gado, eiava edia noho dalana be idau! Reana do ita laloa: ‘Dahaka  dainai lalokau be mai anina bada iseda nega ai? Edena dala ai Iehova bona Iesu edia lalokau karana ese ita ia hagoadaia? Edena dala ai ita ta ta ese Keriso ena lalokau karana ita hahedinaraia diba haida ita “hagoadaia” totona?’​—1 Kor. 8:1.

3. Edena dala ai inai “nega aukadia” ese taunimanima edia mauri ia hadikaia?

³ Mauri be “hekwarahi bona lalohisihisi” amo ia honu dainai, inai “nega aukadia” ai momo be hisihisi idauidau idia mamia noho. (Sal. 90:10; 2 Tim. 3:1-5) Taunimanima momo be unai hekwakwanai dainai edia mauri idia hesikulaia. Tahua gaukara amo idia davaria, lagani ta ta ai taunimanima 800,000 bamona be sibona idia hamasea​—sekeni 40 lalonai ta ia mase. Madi, Keristani taudia haida be mauri ena hekwakwanai momo dainai, sibona idia hamasea.

4. Baibel negadiai daidia be hekwakwanai momo dainai idia mamia idia ura idia mase?

⁴ Baibel negadiai, Dirava ena abidadama hesiai taudia haida be hekwakwanai momo dainai idia mamia idia ura mase. Hegeregere, Iobu be ia mamia hisihisi dainai ia taitai: “Egu mauri lau ura lasi momokani, bona mauri hanaihanai lau ura lasi.” (Iobu 7:16; 14:13) Iona danu be ena asainmen ai idia vara gaudia dainai ia lalohisihisi bena ia gwau: “[Iehova] e, oi lau noia inai, lauegu mauri do oi haorea. Badina do lau mase be namo, do lau mauri be dika.” (Iona 4:3) Danu, abidadama peroveta tauna Elia be ia dekenai idia vara gaudia dainai Iehova ia noia ia ura ia mase. Ia gwau: “Mani lauegu mauri do oi hadokoa!” (1 Kin. 19:4) To, Iehova be unai abidadama hesiai taudia ia laloa bada bona ia ura idia mauri. Iehova be idia ia gwau henia lasi, to idia ia durua edia lalohekwarahi idia hanaia totona. Bona ia be mai lalokau ida idia ia hagoadaia, unai amo mai abidadama ida ia do idia hesiai henia noho.

5. Dahaka dainai hari iseda tadikaka bona taihu ita lalokau henidia be namo?

⁵ Iseda tadikaka bona taihu be mauri ai idia vara gaudia dainai idia hesiku diba, to hari idia momo be hekwakwanai badadia idia haheaukalaia noho bona namona be mai lalokau ida idia ita hagoadaia. Idia haida be dagedage idia davaria bona haida ese idia kirikirilaia. Haida be ta ese ia hadikaia eiava edia gaukara gabuna ai ia idia gwauraia dika. Eiava gaukara momo hagugurua totona idia ovataim dainai idia hesiku. Idia haida be hekwakwanai badadia idia davaria, reana edia witnes lasi adavana ese idia gwauraia dika. Unai bamona gaudia bona mauri ena lalohekwarahi gaudia ma haida dainai, kongrigeisen lalonai momo be edia tauanina ia goada lasi bona idia lalomanoka. Daika ese idia lalomanoka taudia ia durua diba idia haheauka noho totona?

6. Iehova ena lalokau ese edena dala ai iena hesiai taudia ia hagoadaia?

⁶ Iehova be ia idia tomadiho henia taudia ia hagoadaia totona idia dekenai ena lalokau ia hahedinaraia. Israela taudia be Iehova ena hereva idia kamonai neganai goada idia abia: “Umui emui davana be bada herea lau dekenai. Lau ese umui lau matauraia noho, bona umui lau ura henia noho. . . . Do umui gari lasi, badina lau be umui danu lau noho.” (Isa. 43:4, 5) Ita be Iehova ena hesiai taudia dainai, ita abia dae diba Iehova be ita ia lalokau henia. * Tomadiho goevana idia badinaia taudia dekenai Dirava ena gwauhamata be inai: “Lohiabada, emui Dirava be umui dekenai ia noho, bona iena siahu ese kwalimu umui dekenai ia henia noho. Lohiabada ese umui do ia moalelaia bada.”​—Sep. 3:16, 17.

7. Edena dala ai Iehova ena lalokau karana be sina ta ese ena natuna ia lalokau henia karana bamona? (Laulau ginigunana itaia.)

 ⁷ Herevana Iehova ena taunimanima be dahaka hahetoho idia davaria, ia gwauhamata idia do ia durua bona hagoadaia. “Ia ese iena imana dekenai umui do ia huaia lao, bona iena tuina dekenai do umui roho daekau, roho daekau noho. Sinana ese iena mero ia hamoalea bona hagoadaia bamona, lau ese umui do lau hamoalea bona hagoadaia.” (Isa. 66:12, 13) Mani lalokau sinana ta oi laloa, ia be ena beibi ia rosia eiava iena beibi ida ia gadara noho! Unai haheitalai ese Iehova ena lalokau bada bona hebogahisi karana ia idia tomadiho henia taudia dekenai ia hahedinaraia. Namona be oi daradara lasi Iehova be oi ia laloa bada bona oi ia lalokau henia.​—Ier. 31:3.

8, 9. Iesu ena lalokau karana ese edena dala ai ita ia hagoadaia diba?

⁸ Keristani taudia korikoridia be Dirava ena lalokau karana dainai ia kahirakahira idia mai: “Badina be Dirava ese inai tanobada ia lalokau henia bada dainai, iena Natuna tamona sibona ia vara, ia henia vadaeni ita dekenai, do idia abidadama henia taudia ibounai be do idia mase lasi, to mauri hanaihanai do idia abia.” (Ioa. 3:16) Iesu danu be ita ia lalokau henia dainai iena mauri ia henia! Bona unai lalokau ese ita ia hagoadaia bada! Dirava ia gwauhamata “hisihisi, eiava metau” ese ita be “Keriso ena lalokau amo do ia hapararaia” diba lasi.​—Roma 8:35, 38, 39.

⁹ Bema hahetoho idauidau ese eda goada eiava iseda abidadama ena goada ia hamanokaia, Dirava ena lalokau karana ese ita dekenai goada ia henia diba ita haheauka totona. (2 Korinto 5:14, 15 duahia.) Iesu ena lalokau karana be mai ena siahu ita dekenai goada ia henia hahetoho idauidau, hegeregere disasta, dagedage, lalohisihisi, eiava ita lalohekwarahi neganai ita haheauka totona.

10, 11. Daidia ese idia lalomanoka tadikaka idia hagoadaia diba? Gwauraia hedinarai.

¹⁰ Iehova ese Keristani kongrigeisen amo ena lalokau ia hahedinaraia bona ita ia hagoadaia. Ita ta ta ese unai lalokau karana ita hahedinaraia diba bema iseda tadikaka taihu ita lalokau henidia, bona Dirava ena hereva amo idia ita hagoadadia sibona lasi to edia hemami ita laloa danu. (1 Ioa. 4:19-21) Aposetolo Paulo ese Keristani taudia ia hagoadaia: “Do umui durua heheni bona hagoadaia heheni noho, hari umui karaia noho bamona.” (1 Tes. 5:11) Oibe, kongrigeisen taudia ibounai​—elda taudia sibona lasi​—⁠ese  Iehova bona Iesu idia tohotohoa diba tadikaka taihu idia durua bona hagoadadia totona.​—Roma 15:1, 2 duahia.

¹¹ Kongrigeisen lalonai haida be idia lalohadai momo dainai idia gorere bona doketa ena heduru idia abia be namo. (Luka 5:31) Elda taudia idia diba idia be doketa taudia lasi bona unai bamona taudia idia durua diba lasi. To, elda taudia bona Kongrigeisen taudia ma haida be inai dala ai heduru idia henia​—idia ese ‘lalometau taudia do idia hagoadaia, manoka taudia do idia durua bona taunimanima ibounai dekenai do idia haheauka.’ (1 Tes. 5:14) Keristani taudia ibounai ese hebogahisi mai lalokauna bona haheauka idia hahedinaraia be namo lalometau taudia idia hagoadaia totona. Oi be haida oi durua bona hagoadaia, a? Heduru henia daladia oi diba karana ese oi do ia durua ma haida oi hagoadaia totona.

12. Kongrigeisen taudia edia lalokau ese ta be edena dala ai ia hagoadaia? Haheitalai gwauraia.

¹² Edena dala ai ita hahedinaraia lalokauna ese lalohisihisi bada taudia ia hagoadaia diba? Europe ai Keristani taihu ta ia gwau: “Nega haida sibona hamasea lalohadai lau abia. To unai lau karaia lasi totona lau be ma haida amo heduru lau abia. Egu kongrigeisen ese lau idia durua. Tadikaka taihu be hanaihanai edia lalokau idia hahedinaraia bona lau idia hagoadaia. Ena be haida sibona be egu hekwakwanai idia diba, to kongrigeisen taudia be hanaihanai lau idia durua. Headava tau bona hahine ta be egu Keristani tama sina bamona. Idia be lau idia naria namonamo, bona heduru lau ura negadiai idia be lau ida idia noho.” Momokani, ita ibounai be unai bamona heduru ita henia diba lasi. To, bema mai iseda ura ida haida ita durua unai ese lalohisihisi bada taudia ia durua diba. *

13. Dahaka be mai anina bada bema ita ura iseda tadikaka ita hagoadaia?

¹³ Hereva do oi kamonai namonamo. (Iam. 1:19) Mai hebogahisi ida hereva oi kamonai be lalokau karana. Ia lalohisihisi tauna ena hemami oi diba totona mai aonega bona hebogahisi ida henanadai maorodia oi henia. Unai amo hebogahisi oi hahedinaraia diba bona emu tadikaka do oi hagoadaia. Namona be emu vairana ena toana amo oi hahedinaraia, ia oi laloa bada. Bema unai tadikaka ia ura ena hemami bona gau ma haida ia herevalaia, namona be oi haheauka bona ena hereva karana oi hadikaia lasi. Mai haheauka ida ena hereva oi kamonai dainai, ena hemami oi lalopararalaia namonamo diba. Unai ese lalohisihisi tadikaka o taihu ia durua, oi dekenai ia gari lasi bona ia oi hagoadaia totona oi gwauraia herevadia do ia kamonai. Bema oi hahedinaraia idia oi laloa bada, emu lalokau karana ese idia ia hagoadaia diba.

14. Dahaka dainai ma haida edia kerere laloa karana ita dadaraia be namo?

¹⁴ Ma haida edia kerere laloa karana dadaraia. Lalohisihisi tauna ena kerere ita laloa karana ese ena hisihisi ia habadaia diba bona mai lalokau ida ia ita hagoadaia karana do ia laloa bada lasi. “Ia hereva haraga tauna ena hereva, be tuari kaia ia gwadaia noho bamona, to aonega tauna ena hereva ese, taunimanima idia hamauria diba.” (Aon. 12:18) Momokani, ita ura lasi lalohisihisi tauna be iseda hahisia herevadia amo ita “gwadaia.” To, bema ita laloa namonamo lasi bona hahisia herevadia amo ta ita gwadaia, ena hisihisi be bada herea. Mai lalokau ida haida ita hagoadaia totona hebogahisi karana ita hahedinaraia, namona be ita hahedinaraia edia hemami ita laloa bada.​—Mat. 7:12.

15. Edena dava bada tulu ita gaukaralaia diba ma haida ita hagoadaia totona?

¹⁵ Dirava ena hereva amo haida hagoadaia. (Roma 15:4, 5 duahia.) Baibel be  harihari gauna namona, bona ia lalonai hagoadaia herevadia idia noho. Baibel be “haheauka bona goada ia henia Diravana” amo. Baibel ai hagoadaia siridia sibona ita davaria lasi, to ita be mai iseda Baibel bukadia momo danu. Hegeregere Watch Tower Publications Index bona Iehova Ena Witnes Taudia Edia Stadi Indeks ita gaukaralaia diba. Unai bukadia amo hagoadaia siri namodia ita abia diba hekwakwanai idauidau ita haheaukalaia totona. Danu ita do idia durua haida dekenai hebogahisi bona lalokau karana ita hahedinaraia totona.

16. Edena bamona karadia ita hahedinaraia, lalohisihisi Keristani tauna ta ita hagoadaia totona?

¹⁶ Hebogahisi bona manau karana hahedinaraia. Unai ese ita ia durua diba sibona ena ura dadaraia lalokauna ita hahedinaraia bona ta ita hagoadaia totona. Iehova sibona “be hebogahisi Tamana bona lalogoada ibounai ia henia Diravana,” bona iena hesiai taudia totona ena “bogahisihisi” be bada. (2 Korinto 1:3-6 duahia; Luka 1:78; Roma 15:13) Paulo be unai kara dekenai haheitalai namona ia hahedinaraia, ia gwau: “Ai be umui huanai ai noho neganai, ai kara auka lasi, ai be ena natudia ia ubua bona naria sinana ta bamona ai kara. Vadaeni, umui ai lalokau henia dainai, ai moale umui dekenai sivarai namona ai harorolaia, to unai sibona lasi, ai be mai moale ida emai mauri danu ai henia umui ai durua totona, badina umui be emai lalokau taudia.” (1 Tes. 2:7, 8) Bema Dirava ena hebogahisi karana ita tohotohoa, ita be ia lalohisihisi tauna ena guriguri ita haerelaia bamona.

17. Edena dala ai iseda tadikaka totona lalohadai maorona ita abia karana ese idia ia durua bona hagoadaia diba?

¹⁷ Namona be ita laloatao iseda tadikaka taihu be goevadae lasi. Emu tadikaka bona taihu dekenai lalohadai maorona oi abia be namo. To, emu tadikaka ena kerere oi tahua karana be lalohadai kererena bona unai ese lalohisihisi sibona do ia havaraia. (Had. 7:21, 22) Laloatao, Iehova ia ura ena hesiai taudia be kara namo idia hahedinaraia. Bema iena haheitalai ita tohotohoa, haida edia kara kereredia do ita haheaukalaia diba. (Efe. 4:2, 32) Namo lasi iseda kara o hereva amo ita hahedinaraia idia be Iehova hesiai henia gaukarana idia goadalaia lasi, to namona be edia goada hegeregerena idia karaia noho gaudia dainai idia ita hanamoa. Unai ese idia ia hagoadaia diba. Mai momokani bona lalokau ida idia ita hanamoa karana ese idia ia hagoadaia bona durua diba edia hesiai gaukara helagana dekenai idia “moale” totona. Namo lasi eda tadikaka taihu be ma haida ida ita hahegeregerea.​—Gal. 6:4.

18. Dahaka badina namona dainai mai lalokau ida haida ita hagoadaia be namo?

¹⁸ Iehova dekenai ita be dava bada gauna bamona bona Iesu, mauri davalaia boubou ia henia tauna, dekenai danu. (Gal. 2:20) Ita be iseda tadikaka bona taihu ita lalokau henidia bada. Bona ita ura mai hebogahisi bona lalokau ida idia ita durua. Edia lalona ita hagoadaia totona, “namona be maino idia havaraia gaudia bona ma haida idia hagoadaia gaudia ita tahua noho.” (Roma 14:19) Ita ibounai be vaira nega namona ita naria noho, badina Paradaiso lalonai, gau ta dainai do ita lalomanoka lasi! Unai negai gorere, tuari, mase, dagedage, ruma bese ena hekwakwanai, bona lalohisihisi idauidau be do idia ore. Lagani 1,000 murinai, taunimanima ibounai be do idia goevadae. Hahetoho ginigabena do idia hanaia taudia be Iehova Dirava ena tanobada natudia ai do idia lao bona “Dirava ena natudia edia ura kwalimu hereadaena do idia abia.” (Roma 8:21) Unai hahenamo namona ita abia totona, namona be ita ibounai ta ta ita lalokau, hagoadaia bona durua heheni.