1. Dahaka dainai Iehova idia tomadiho henia taudia be idia moale? (Laulau ginigunana herevalaia.)

IEHOVA ENA WITNES TAUDIA be moale taudia. Edia hebou badadia bona maragidia, bona edia moale hebou negadia ai mai moale ida idia herevahereva bona idia kiri. Dahaka dainai idia moale bada? Ena badina badana be idia be “moale Diravana” idia dibaia, hesiai henia, bona idia hekwarahi ia idia tohotohoa totona. (1 Tim. 1:11; Sal. 16:11) Iehova be moale Diravana dainai, ia ura ita moale bona ita dekenai moale davaria daladia momo ia hahedinaraia.​—Deu. 12:7; Had. 3:12, 13.

2, 3. (a) Moale ena anina be dahaka? (b) Dahaka dainai hari inai negai ia auka ita moale totona?

² To oi be edena bamona? Oi moale, a? Emu moale oi habadaia diba, a? Ta ia moale ena anina be, ena hemami ia namo, ia dekenai ia noho gauna be hegeregere, eiava ena mauri ia moalelaia. Baibel ese ia hahedinaraia Iehova ida idia hetura namonamo taudia be moale korikorina idia davaria diba. Hari inai negai, moale ita davaria totona be mai ena hekwarahi. Dahaka dainai?

³ Lalohisihisi idia havaraia gaudia​—hegeregere lalokau tauna ta ia mase eiava orea murimuri ai idia atoa, eiava headava ia  dika, eiava moni gaukara ita haboioa​—ese iseda moale ia haorea diba. Ruma bese lalonai hepapahuahu bona herevahereva namonamo lasi karana ese iseda noho mauri ia hadikaia diba. Danu gaukara o sikuli turadia ese ita idia kirikirilaia, iseda tomadiho dainai ita idia dagedage henia eiava dibura ruma ai ita idia atoa neganai, unai ese iseda moale ia hamaragia diba. Bona iseda gorere ia bada ia lao, eiava gorere badana ta ita abia eiava ita lalometau, unai danu ese iseda moale ia hamaragia diba. To, Iesu Keriso, “moale bona Siahu Bada Tauna,” be mai moale bada ida ia ura taunimanima ia hagoadaia bona hamoalea. (1 Tim. 6:15; Mat. 11:28-30) Ena be Satani ena tanobada dikana ai hahetoho idauidau ita davaria, to Iesu ese ena Ororo Harorona ai ita moale diba daladia haida ia gwauraia.

4, 5. Edena dala ai ita moale noho diba?

⁴ Iesu ese ia laloa bada gau ginigunana be inai: “Dirava dibaia totona idia hitolo taudia be idia moale, badina guba Basileia be idia edia.” (Mat. 5:3) Edena dala ai ita hahedinaraia ita danu be unai lalohadai tamona ita abia noho? Namona be Dirava ena hereva ita duahia, Keristani kara namodia, bona moale Diravana tomadiho henia karana ita laloa bada. Unai bamona ita karaia neganai, iseda moale do ia bada. Danu, Dirava ese ena gwauhamata do ia hagugurua karana ese iseda abidadama do ia hagoadaia. Bona Baibel ese tomadiho momokani taudia totona ia gwauraia “helaro” ese ita do ia hagoadaia.​—Tito 2:13.

⁵ Ita moale hanaihanai totona, iseda hetura karana Iehova ida ita hagoadaia be mai anina bada. Aposetolo Paulo ia gwau: “Nega ibounai [Iehova] dainai do umui moale. Ma lau gwau lou, umui moale!” (Fili. 4:4) Unai hetura karana namona ita moalelaia totona, namona be Dirava amo ia mai aonega ita abia. Baibel ia gwau: “Aonega ia davaria tauna be mai moale danu. Ia ese lalona kehoa ia davaria vadaeni. Aonega idia davaria taudia be idia moale, bona aonega ese mauri namona, idia dekenai do ia henia.”​—⁠Aon. 3:13, 18.

6. Ita moale hanaihanai totona, dahaka ita karaia be namo?

⁶ To ita moale hanaihanai totona, Dirava ena hereva ita duahia sibona lasi to namona be ita badinaia. Iesu be ita dibaia gaudia ita badinaia karana ena namo ia herevalaia neganai, ia gwau: “Bema unai gaudia umui diba bona bema umui karaia, do umui moale.” (Ioa. 13:17; Iamesi 1:25 duahia.) Unai be mai anina bada bema ita ura iseda abidadama ia goada bona ita moale hanaihanai. Edena dala ai ita moale noho diba, ena be iseda moale idia haorea diba gaudia be momo? Mani Iesu ese ena Ororo Harorona ai ia gwauraia gaudia ita herevalaia.

7. Edena dala ai idia taitai taudia idia moale diba?

⁷ “Idia taitai taudia be idia moale, badina ma haida ese do idia hagoadadia.” (Mat. 5:4) Reana haida do idia henanadai, ‘Edena dala ai idia taitai taudia idia moale diba?’ Iesu be taitai taudia ibounai ia herevalaia lasi. Badina kara dika taudia danu be inai “nega aukadia” ai idia vara hekwakwanai dainai idia taitai. (2 Tim. 3:1) To unai taudia be sibona edia namo idia laloa dainai, Iehova amo idia daudau bona idia moale lasi. Unai dainai Iesu be Dirava tura henia karana idia laloa bada taudia ia herevalaia; idia taitai badina taunimanima momo be Dirava ena ura idia dadaraia. Idia abia dae idia be goevadae lasi, bona idia itaia taunimanima momo edia kara dika dainai hekwakwanai idia vara noho. Iehova ese mai  momokani ida idia taitai taudia ia laloa bada; ia ese Baibel amo idia ia hagoadaia, bona idia dekenai moale bona mauri hanaihanai ena helaro ia henia.​—Esekiela 5:11; 9:4 duahia.

8. Edena dala ai manau karana ese ita ia durua ita moale totona?

⁸ “Manau taudia be idia moale, badina idia ese tanobada do idia abia.” (Mat. 5:5) Edena dala ai manau karana ese ita ia durua ita moale totona? Ta be hereva momokani ena diba maoromaoro ia dibaia murinai, ena mauri ia haidaua. Guna idia haida be badu, heai momo, bona dagedage taudia. To hari idia ese “mauri matamata” be dabua bamona idia hahedokilaia bona “hebogahisi mai lalokauna, hariharibada, lalomanau, manau, bona boga-auka” karadia idia hahedinaraia. (Kol. 3:9-12) Unai dainai hari idia be maino, lalokau, bona mauri namona idia moalelaia noho. Danu, Dirava ena hereva ia gwau unai bamona taudia be “tanobada do idia abia.”​—Sal. 37:8-10, 29, NWT.

9. (a) Edena dala ai manau taudia ese “tanobada do idia abia”? (b) Dahaka dainai “kara maoromaoro totona idia hitolo bona ranu mase” taudia be do idia moale?

⁹ Iesu ena hereva, manau taudia ese “tanobada do idia abia,” ena anina be dahaka? Iesu ena hahediba taudia, lauma helaga amo ia horoa taudia unai, be king bona hahelaga taudia ai idia lao bona tanobada idia lohiaia neganai, unai be hegeregere tanobada idia abia bamona. (Apok. 20:6) To guba helarona idia abia lasi taudia milioni momo be tanobada do idia abia, anina be do idia goevadae, mai maino bona moale ida tanobada ai do idia noho ela bona hanaihanai. Unai taudia be idia moale badina “kara maoromaoro totona idia hitolo bona ranu mase.” (Mat. 5:6) Tanobada matamatana ai Dirava badinaia totona idia hitolo bona kara maoromaoro idia ura henia taudia be do idia moale. (2 Pet. 3:13) Dirava ese kara dika ibounai ia kokia neganai, kara maoromaoro taudia be do idia moale bona taitai lasi, badina taravatu utua karadia be do idia ore.​—Sal. 37:17.

10. Hebogahisi karana ena anina be dahaka?

¹⁰ “Hebogahisi taudia be idia moale, badina ma haida ese do idia hebogahisi henidia.” (Mat. 5:7) Inai hereva hebogahisi be Heberu gado amo idia hahanaia neganai, ena anina be “mai lalokau bona kara namo ida ta ita kara henia.” Unai hegeregerena, Grik gado ai unai hereva idia hahanaia neganai, ena anina be ta ita hebogahisi henia bona ena hemami ita lalopararalaia. To hebogahisi be hemami sibona amo ita hahedinaraia lasi. Baibel ese ia hahedinaraia hebogahisi be kara ta oi karaia ta durua totona.

11. Samaria tauna ena haheitalai amo hebogahisi karana dekenai dahaka ita dibaia?

¹¹ Luka 10:30-37 duahia. Iesu ena haheitalai lalonai ia gwauraia Samaria tauna namona ese hebogahisi karana ia hahedinaraia. Unai Samaria tauna be hisihisi tauna ia hebogahisi henia dainai dala ia karaia heduru ia henia totona. Iesu be unai haheitalai ia gwauraia murinai, ia gwau: “Oi lao bona unai bamona do oi karaia.” Unai dainai, reana sibona do ita nanadaia: ‘Lau danu be unai bamona lau karaia, a? Unai Samaria tauna ese ia hahedinaraia hebogahisi karana lau hahedinaraia noho, a? Dala lau tahua idia hisihisi taudia dekenai hebogahisi bona kara namo lau hahedinaraia totona, a? Hegeregere, buruka Keristani taudia, vabu, bona edia tamana be orea lalonai idia noho lasi natudia lau durua, a? Dala lau tahua “lalometau taudia” lau “hagoadaia” totona, a?’​—1 Tes. 5:14; Iam. 1:27.

12. Edena dala ai hebogahisi karana ese ita ia durua ita moale totona?

¹² Edena dala ai hebogahisi karana ese moale ia havaraia? Bema haida dekenai  hebogahisi karana ita hahedinaraia, henia karana ena namo do ita moalelaia. Bona unai ita karaia neganai, Iehova be ita dekenai do ia moale. (Kara 20:35; Heberu 13:16 duahia.) King Davida ese ma haida laloa bada karana ia hahedinaraia tauna ia herevalaia neganai, ia gwau: “Lohiabada ese unai tau do ia gimaia, bona iena mauri do ia naria. Lohiabada ese iena tano dekenai unai tau do ia hamoalea.” (Sal. 41:1, 2) Bema taunimanima dekenai hebogahisi bona lalokau karana ita hahedinaraia, Iehova ese ita do ia hebogahisi henia bona do ita moale hanaihanai.​—Iam. 2:13.

13, 14. Edena dala ai kudouna ia goeva karana ese moale ia havaraia?

¹³ “Kudouna idia goeva taudia be idia moale,” Iesu ia gwau, “badina idia ese Dirava do idia itaia.” (Mat. 5:8) Iseda kudouna ia goeva totona, iseda lalohadai, kara bona ura idia goeva be namo. Danu Iehova ita badinaia totona namona be iseda kara bona lalohadai ia goeva be namo.​—2 Korinto 4:2 duahia; 1 Tim. 1:5.

¹⁴ Edia kudouna idia goeva taudia be mai moale ida Iehova idia hesiai henia diba. Ia gwau: “Edia dabua latadia idia huria taudia be idia moale.” (Apok. 22:14) Edena dala ai “edia dabua latadia idia huria”? Horoa Keristani taudia ese “edia dabua latadia idia huria” ena anina be, Iehova vairanai idia goeva bona guba dekenai mase diba lasi maurina do idia abia bona do idia moale hanaihanai. Tanobada helarona idia abia hutuma bada taudia be Dirava ena vairanai idia goeva bona iena turana ai do idia lao. Idia be hari “Mamoe Natuna ena rarana lalonai edia dabua idia huria bona idia hakurokuroa” noho.​—Apok. 7:9, 13, 14.

15, 16. Edena dala ai edia kudouna idia goeva taudia ese “Dirava idia itaia” diba?

¹⁵ Momokani ta be “[Dirava] vairana ia itaia neganai, unai tau be do ia mase.” To edena dala ai edia kudouna idia goeva taudia ese “Dirava idia itaia”? (Eso. 33:20) Grik gado ai idia hahanaia herevana “itaia” ena anina be “emu lalona ena matana amo oi itaia, oi lalopararalaia bona dibaia.” Edia “kudouna ena matana” amo Dirava idia itaia taudia be Ia idia diba namonamo, bona ena kara namodia idia moalelaia. (Efe. 1:18) Iesu ese Dirava ena kara namodia ia hahedinaraia goevagoeva dainai, ia gwau diba: “Lau ia itaia tauna be Tamana danu ia itaia vadaeni.”​—Ioa. 14:7-9.

¹⁶ Danu tomadiho momokani taudia be Dirava ese idia ia durua dalana idia dibaia neganai, unai be hegeregere “Dirava idia itaia” bamona. (Iobu 42:5) Bona edia “kudouna ena matana” amo Dirava ese do ia henia hahenamo namodia idia itaia bona mai momokani ida Dirava sibona do idia hesiai henia. Oibe, idia toreisi lou horoa taudia be edia guba ahuna do idia abia neganai,  edia matana amo Iehova do idia itaia momokani.​—1 Ioa. 3:2.

17. Dahaka dainai maino karana ese moale ia havaraia?

¹⁷ Iesu ma ia gwau: “Maino idia karaia taudia be idia moale.” (Mat. 5:9) Mai edia ura ida maino idia karaia taudia be idia moale. Hahediba tauna Iamesi ia gwau: “Maino idia karaia taudia be maino negana lalonai, kara maoromaoro huahua ena uhe idia hadoa.” (Iam. 3:18) Bema kongrigeisen eiava famili lalonai ta ida oi hepapahuahu, namona be Dirava ena heduru oi noia maino umui karaia totona. Bena Iehova ese ena lauma helaga do ia henia, kara namodia oi hahedinaraia bona oi moale totona. Iesu ia hahedinaraia mai iseda ura ida maino ita karaia be mai anina bada, ia gwau: “Bema emu harihari gauna oi abia lao pata helagana dekenai bona oi laloatao emu tadikaka be oi dekenai ia lalohisihisi, namona be emu harihari gauna be pata helagana vairanai oi rakatania bona oi lao. Emu tadikaka ida maino oi karaia guna, bena oi giroa lou neganai, emu harihari gauna oi bouboulaia.”​—Mat. 5:23, 24.

18, 19. Dahaka dainai Keristani taudia idia moale diba ena be dagedage idia davaria?

¹⁸ “Lau dainai taunimanima ese umui idia gwauraia dika, idia dagedage henia bona mai koikoi ida hereva dikadia idauidau idia gwauraia neganai, do umui moale.” Iesu ena hereva ena anina be dahaka? Ia gwau: “Do umui moale bada badina emui davana guba dekenai be bada. Guna idia noho peroveta taudia be unai bamona idia dagedage henidia danu.” (Mat. 5:11, 12) Aposetolo taudia be edia inai taudia ese idia botaia bona edia haroro gaukara idia koua neganai, mai moale ida “Sanhedrin idia rakatania bena idia lao.” Momokani, idia mamia hisihisi idia laloa bada lasi. To idia moale badina “Iesu ena ladana dainai hemarai idia abia.”​—Kara 5:41.

¹⁹ Hari inai negai, Iehova ena taunimanima be Iesu ena ladana dainai hisihisi o hahetoho badadia idia davaria, to mai moale ida unai idia haheaukalaia. (Iamesi 1:2-4 duahia.) Aposetolo taudia bamona, ita davaria hisihisi idauidau be moale gauna lasi. To bema hahetoho lalonai iseda Dirava badinaia karana ita dogoatao, Iehova ese ita dekenai goada do ia henia ita haheauka totona. Hegeregere, August 1944 ai, gavamani ese Henryk Dornik bona ena kakana be dibura kamepa dekenai idia siaia lao. To edia inai taudia idia gwau: “Ia auka edia lalona ai veria gau ta idia karaia totona. Herevana do idia mase diba, to idia moale.” Tadikaka Dornik ia gwau: “Ena be egu abidadama dainai lau idia hahisia, to Iehova abidadama henia karana ese lau ia hagoadaia dainai lau moale. . . . Guriguri hanaihanai karana ese lau ia durua Iehova kahirakahira lau lao totona, bona lau abia dae ia be Durua tauna namona.”

20. Dahaka dainai ita ura “moale Diravana” ita hesiai henia?

²⁰ Ita moale diba bema “moale Diravana” ese ita ia lalonamo henia, ena be tomadiho koikoi bona ruma bese ai dagedage ita davaria, eiava ita gorere o buruka. (1 Tim. 1:11) Danu Dirava ena gwauhamata namodia dainai ita moale, badina “Ia koikoi diba lasi.” (Tito 1:2) Iehova ese ia gwauhamatalaia gaudia idia guguru neganai, hari ita davaria hekwakwanai bona hahetoho be do ita laloa bada lasi. Paradaiso lalonai Iehova ese do ia havaraia hahenamo idauidau ese ita laloa gaudia do ia hereaia. Bona do ita abia moalena be bada herea. Oibe, ita ibounai be ‘do ita moale bada bona maino ai do ita noho.’​—Sal. 37:11, NWT.