1-2. (a) Dahaka dainai taunimanima dekenai Aramagedono be sivarai namona? (b) Inai atikol ai edena henanadai do ita herevalaia?

NEGA ta oi kamonai taunimanima ese “Aramagedono” be niuklia tuari ta eiava tanobada hadikaia karana ida idia hahegeregerea, a? To, Baibel ese Aramagedono ia herevalaia dalana be idau, ia be moale negana! (Apok. 1:3) Aramagedono tuarina ese taunimanima do ia hadikaia lasi, to ia hamauria! Edena dala ai?

² Baibel ese ia hahedinaraia Aramagedono tuarina ese taunimanima edia lohia dalana do ia hadokoa bona taunimanima do ia hamauria. Unai tuari ese kara dika taudia do ia haorea, bona kara maoromaoro taudia sibona be do idia mauri. Bona tanobada idia hadikaia taudia do ia haorea, unai amo taunimanima do ia gimaia. (Apok. 11:18) Unai hereva momokanidia ita lalopararalaia namonamo totona, mani henanadai foa ita herevalaia: Aramagedono ena anina be dahaka? Aramagedono ia do vara lasi neganai, dahaka gaudia do idia vara? Edena dala ai Aramagedono amo ita roho mauri diba? Edena dala ai Aramagedono ia kahirakahira noho lalonai mai abidadama ida ita gini goada diba?

3. (a) Inai hereva “Aramagedono” ena anina be dahaka? (b) Apokalupo 16:14, 16 ena hereva bamona, dahaka dainai ita gwau diba Aramagedono be gabu korikorina lasi?

³ Apokalupo 16:14, 16 duahia. Inai hereva “Aramagedono” be Baibel ai nega tamona sibona ia hedinarai, bona ia be Heberu gado herevana ta amo idia abia, ena anina be “Megido Ororona.” Guna, Megido be Israela ena siti ta. (Ios. 17:11) To, Aramagedono be tanobada dekenai ia noho gabu korikorina ta lasi. Ia be “tanobada ibounai edia king taudia” ese Iehova tuari henia totona  do idia haboua karana ia herevalaia. (Apok. 16:14) To, inai atikol ai, inai hereva “Aramagedono” be king taudia idia haboua murinai do ia vara tuarina ia herevalaia danu. Edena dala ai ita diba Aramagedono be gabu korikori ta lasi? Ginigunana, Megido be ororo korikorina ta lasi. Iharuana, Megido be gabu maragina bona ia be hegeregere lasi, “tanobada ibounai edia king taudia” edia ami, bona tuari kohudia idia haboua totona. Ihatoina, inai atikol ai do ita itaia, tanobada edia “king taudia” ese Dirava ena taunimanima idia hahisia neganai Aramagedono tuarina do ia matamaia.

4. Dahaka dainai Dirava ese tuari badana ginigabena be Megido ida ia herevalaia?

⁴ Dahaka dainai Iehova ese tuari badana ginigabena be Megido ida ia herevalaia? Baibel negadiai, tuari momo be Megido bona Ieserele Kourana dekenai idia karaia. Nega haida, Iehova ese ena taunimanima ia durua unai tuari lalonai idia kwalimu totona. Hegeregere, “Megido ranu gabuna kahirakahira dekenai,” Dirava ese Israela ena Hahemaoro Tauna Baraki ia durua, Kanana ena tuari oreana, mai ena Lohia tauna ladana Sisera, ia halusia totona. Baraki bona peroveta hahinena Debora ese Iehova idia tanikiu henia badina hoa dalanai ia durudia idia kwalimu totona. Bona inai bamona idia ane: “Hisiu be guba dekena amo . . . Sisera idia tuari henia. Kisona Sinavai ena ranu ese idia ia doria lao.”​—Gun. 5:19-21.

5. Edena dala ai, Aramagedono tuarina bona Baraki ia gunalaia tuari be ia idau?

⁵ Baraki bona Debora be edia ane dokonai idia gwau: “[Iehova] e, oi dekenai idia dagedage taudia ibounai, unai bamona idia mase be namo. To oi dekenai idia ura henia taudia be namo, dina tubua hegeregerena do idia diaridiari noho.” (Gun. 5:31) Aramagedono ai, Dirava ena inai taudia be do idia mase ore, to Ia idia lalokau henia taudia be do idia mauri. Unai tuari ruaosi be idia idau. Aramagedono dekenai, Dirava ena taunimanima be do idia tuari lasi. Idia be tuari kohu ta do idia dogoatao lasi! Idia ese Iehova bona ena guba tuari oreana dekenai do idia abidadama, bona ‘goada do idia davaria.’​—Isa. 30:15; Apok. 19:11-15.

6. Edena dala ai Dirava ese ena inai taudia be Aramagedono tuarina ai do ia halusia?

⁶ Edena dala ai Dirava ese ena inai taudia be Aramagedono tuarina ai do ia halusia? Ia ese dala idauidau ai unai do ia karaia. Hegeregere, tano mareremarere, aisi nadi bamona medu bona kevaru do ia gaukaralaia. (Iobu 38:22, 23; Ese. 38:19-22) Ia ese ena inai taudia edia lalona ia haidaua diba unai amo sibona idia tuari heheni. (2 Siv. 20:17, 22, 23) Danu, ia ese aneru ia gaukaralaia diba kara dika taudia ia hamasea totona. (Isa. 37:36) Herevana Dirava be ena inai taudia halusia totona edena dala do ia gaukaralaia, to do ia kwalimu. Iena inai taudia ibounai do ia haorea bona kara maoromaoro taudia ibounai be do idia mauri.​—Aon. 3:25, 26.

7-8. (a) Tesalonika Ginigunana 5:1-6 ena hereva bamona, politikol taudia be dahaka hadibaia herevana do idia gwauraia? (b) Dahaka dainai unai be hahediba koikoi herevana ta?

⁷ “Maino bona noho namo” herevana idia gwauraia neganai “Iehova ena dina” do ia mai. (1 Tesalonika 5:1-6 duahia.) Tesalonika Ginigunana 5:2 ai, inai hereva “Iehova ena dina” be “hisihisi badana” ia herevalaia. (Apok. 7:14) Edena dala ai ita diba unai hisihisi be kahirakahira do ia matamaia? Baibel ia gwau, hereva ta do idia gwauraia. Unai hereva ese do ia hahedinaraia hisihisi badana be kahirakahira do ia vara.

⁸ Unai be “maino bona noho namo” ena hadibaia herevana. Dahaka dainai politikol taudia ese unai hereva do idia gwauraia? Tomadiho gunalaia taudia danu be unai bamona do  idia hereva, a? Oibe. To, unai hereva be demoni edia hahediba koikoi herevana ta. Unai koikoi herevana be mai ena dika badina taunimanima do idia laloa idia be maino ai idia noho, to unai be hisihisi badana do ia matamaia negana. Oibe, “karaharaga dika bada herea be idia latanai do ia ginidae, rogorogo hahinena ese mara ena hisihisi ia abia bamona.” To, Iehova ena abidadama hesiai taudia dekenai dahaka do ia vara? Reana hisihisi badana do ia matamaia negana idia diba lasi dainai do idia hoa, to do idia noho hegaegae.

9. Edena dala ai Dirava ese Satani ena tanobada do ia hadikaia?

⁹ Iehova ese Satani ena tanobada ibounai do ia haorea haraga lasi, Noa ena negai ia karaia bamona. To, kahana rua ai unai do ia karaia. Ginigunana be, Ia ese Babulonia Badana, tanobada ena tomadiho koikoi ibounai, do ia haorea momokani. Iharuana be, Aramagedono tuarina ai, Ia ese Satani ena tanobada, politikol, tuari bona bisinesi oreadia ibounai do ia haorea. Mani unai kahana rua ita herevalaia.

10. Apokalupo 17:1, 6 bona 18:24 edia hereva bamona, dahaka dainai Iehova ese Babulonia Badana do ia hadikaia ore?

¹⁰ ‘Ariara hahine badana ena panisi.’ (Apokalupo 17:1, 6; 18:24 duahia.) Babulonia Badana ese Dirava ena ladana ia hadikaia noho. Ia ese Dirava dainai koikoi herevadia ia gwauraia. Ariara hahinena bamona, tomadiho koikoi be tanobada ena gavamani taudia ida ia gaukara hebou, unai dainai Iehova ia badinaia lasi. Tomadiho koikoi be ena orea taudia ia hahisia noho bona edia moni ia abia. Bona ia be taunimanima momo ia alaia vadaeni, Dirava ena hesiai taudia haida danu. (Apok. 19:2) Iehova ese Babulonia Badana be edena dala ai do ia hadikaia ore?

11. “Dagedage animal kakakakana” ese dahaka ia laulaulaia, bona edena dala ai Dirava ese do ia gaukaralaia Babulonia Badana ia hadikaia ore totona?

¹¹ Iehova ese “dagedage animal kakakakana” mai ena “doana 10” do ia gaukaralaia, “ariara hahine badana” ia hadikaia ore totona. Unai dagedage animal ese United Nations ia laulaulaia. Danu, doana 10 ese hari unai orea idia durua  gavamani taudia ia laulaulaia. Dirava ese ia abia hidi negana ai, unai politikol oreadia ese Babulonia Badana do idia hadikaia ore. Idia ese “ena gau ibounai do idia kokia bona kopina kavakava do idia rakatania,” anina be ena taga ibounai do idia abia bona ena kara dika do idia hahedinaraia. (Apok. 17:3, 16) Unai be do ia vara haraga​—toana be dina tamona lalonai​—bona ia idia durua taudia be do idia hoa bada. Danu, ia be mai hekokoroku ida ia gwau: “Lau be terona latanai ia helai kwini, bona lau be vabu lasi, bona lau be do lau taitai lasi.”​—Apok. 18:7, 8.

12. Iehova ese ena taunimanima do ia gimaia dainai ma haida be dahaka do idia karaia diba lasi, bona dahaka dainai?

¹² Dirava ese ena taunimanima do ia gimaia bona ma haida ese do idia hadikaia lasi. Idia be mai moale ida ena ladana idia abia, bona Babulonia Badana amo idia raka-lasi ena hahegani idia badinaia noho. (Kara 15:16, 17; Apok. 18:4) Danu, idia gaukara goada noho ma haida idia durua Babulonia Badana amo idia raka-lasi totona. Unai dainai Iehova ena hesiai taudia ese tomadiho koikoi ena ‘panisi do idia abia’ lasi. To, edia abidadama idia hagoadaia be namo.

13. (a) Goga be daika? (b) Esekiela 38:2, 8, 9 ena hereva bamona, dahaka do ia vara dainai Goga ese Dirava ena taunimanima do ia tuari henia?

¹³ Goga ena tuari. (Esekiela 38:2, 8, 9 duahia.) Iehova ese tomadiho koikoi ibounai ia haorea murinai, tanobada dekenai tomadiho tamona sibona do ia noho, unai be Iehova ena hesiai taudia. Satani be do ia badu dikadika, bona ena badu hahedinaraia totona “lauma edia hereva mirodia” amo tanobada besedia do ia haboua, Iehova ena hesiai taudia idia tuari henia totona. (Apok. 16:13, 14) Idia haboua tanobada besedia edia ladana be, “Goga, Magoga tano tauna.” Unai tanobada besedia ese Iehova ena taunimanima idia tuari henia neganai, Aramagedono tuarina do ia matamaia.​—Apok. 16:16.

14. Goga be gabeai dahaka do ia lalopararalaia?

¹⁴ Goga be ena “taunimanima edia siahu”​—tuari oreadia dekenai, do ia tabekau. (2 Siv. 32:8) Ita be iseda Dirava Iehova dekenai do  ita tabekau​—tanobada besedia dekenai unai be lalohadai kavakava. Dahaka dainai? Badina Babulonia Badana be mai ena siahu, to “dagedage animal” bona ena “doana 10” ese idia tuari henia neganai, ena dirava idauidau ese idia hamauria lasi! (Apok. 17:16) Unai dainai Goga do ia laloa Dirava ena taunimanima ia hadikaia ore diba. Ia ese Iehova ena taunimanima do ia tuari henia “ori koremakorema ese tano ia koua bamona.” (Ese. 38:16) To, gabeai Goga do ia laloparara ia be do ia heau mauri diba lasi. Davara Kakakakana ai Farao dekenai ia vara bamona, Goga do ia laloparara ia be Iehova ia tuari henia noho.​—Eso. 14:1-4; Ese. 38:3, 4, 18, 21-23.

15. Aramagedono tuarina ai Iesu be dahaka do ia karaia?

¹⁵ Keriso bona ena guba tuari oreana ese Dirava ena taunimanima do idia gimaia, bona Goga mai ena tuari oreana do idia halusia. (Apok. 19:11, 14, 15) To, Iehova ena inai tauna badana, Satani, be tanobada besedia ia koia dainai Aramagedono tuarina ai Dirava ena taunimanima do idia tuari henia. Ia dekenai dahaka do ia vara? Iesu ese Satani bona ena demoni be guri dobu masemase lalonai do ia negea diho, bona unuseniai lagani 1,000 bamona do idia noho.​—Apok. 20:1-3.

16. (a) Edena dala ai ita hahedinaraia, ‘Dirava ita diba’? (b) Dahaka dainai Iehova ita dibaia karana be mai anina bada Aramagedono amo ita roho mauri totona?

¹⁶ Herevana ita be hari sibona eiava lagani daudau hereva momokani lalonai ita noho, to Aramagedono amo ita roho mauri totona, ‘Dirava ita diba’ bona ‘iseda Lohiabada Iesu ena sivarai namona ita kamonai’ be namo. (2 Tes. 1:7-9) ‘Dirava ita diba’ ena anina be, ia ura henia bona ia ura henia lasi gaudia, bona iena taravatu ita dibaia. Danu, ia ita lalokau henia, ita kamonai henia bona ia sibona ita tomadiho henia. (1 Ioa. 2:3-5; 5:3) Unai bamona ita karaia neganai, Dirava ese ita do “ia diba,” bona Aramagedono amo ita do ia hamauria! (1 Kor. 8:3) Edena dala ai? Dirava ese ita “ia diba” neganai, iena lalonamo ita abia diba.

17. ‘Iseda Lohiabada Iesu ena sivarai namona ita kamonai’ ena anina be dahaka?

¹⁷ “Iseda Lohiabada Iesu ena sivarai namona”  be Iesu ia hadibaia hereva momokani ibounai ia herevalaia, bona idia be Baibel lalonai idia noho. Sivarai namona ita kamonai henia dainai iseda mauri ai ita badinaia. Unai dala haida be iseda mauri ai Basileia ita atoa guna, Dirava ena kara maoromaoro taravatudia ita badinaia, bona Dirava ena Basileia ita harorolaia. (Mat. 6:33; 24:14) Danu, Keriso ena horoa tadikakadia ita durua, badina idia be mai anina bada gaukarana idia karaia.​—Mat. 25:31-40.

18. Edena dala ai Keriso ena horoa tadikaka ese hutuma bada taudia do idia hanamoa?

¹⁸ Kahirakahira, Dirava ena horoa hesiai taudia ese “mamoe ma haida” edia heduru namona dainai do idia hanamodia. (Ioa. 10:16) Edena dala ai? Aramagedono tuarina ia do matamaia lasi neganai, 144,000 taudia oredia be do idia toreisi lou bona guba dekenai mase diba lasi maurina do idia abia. Idia be guba tuari oreana do idia durua bona Goga do idia hadikaia ore, unai amo “hutuma bada” taudia do idia gimaia. (Apok. 2:26, 27; 7:9, 10) Oibe, hutuma bada taudia be do idia moale, badina Iehova ena horoa hesiai taudia be tanobada ai idia do noho neganai idia durua!

19-20. Aramagedono ia kahirakahira noho lalonai, edena dala ai ita haheauka diba, herevana hahetoho idauidau ita davaria?

¹⁹ Inai dina gabedia ai, Iehova ena taunimanima be hahetoho momo idia haheaukalaia noho. Herevana unai ia vara, mai moale ida ita haheauka diba. (Iam. 1:2-4) Ita do ia durua gauna badana be mai kudouna ibounai ida ita guriguri karana. (Luka 21:36) Namo lasi ita guriguri sibona, namona be dina ta ta ai Dirava ena Hereva ita stadilaia bona laloa dobu, bona iseda negai do idia guguru mai anina bada peroveta herevadia ita laloa. (Sal. 77:12) Unai gaudia bona haroro gaukara ita goadalaia neganai, iseda abidadama do ita hagoadaia bona iseda helaro do ita laloa bada!

²⁰ Do oi moale bada badina Babulonia Badana idia hadikaia ore bona Aramagedono tuarina be ia ore! Danu, taunimanima ibounai ese Dirava ena ladana do idia matauraia bona iena lohia siahuna do idia abia isi! (Ese. 38:23) Oibe, Dirava idia dibaia, iena Natuna idia kamonai henia, bona idia haheauka ela bona dokona taudia dekenai Aramagedono be sivarai namona.​—Mat. 24:13.