1. Lagani 95 C.E. bamona ai, aposetolo Ioane ena noho dalana be edena bamona?

LAGANI 95 C.E. bamona ai, aposetolo Ioane be nega aukadia lalonai ia noho! Ia be ia buruka bona Patamo motumotu ai ia noho sibona, danu ia be aposetolo ginigabena. (Apok. 1:9) Ia diba aposteit taudia be hahediba koikoi herevadia idia gwauraia bona kongrigeisen idia hapararaia noho. Toana be kahirakahira Keristani korikoridia be do idia ore.​—Iuda 4; Apok. 2:15, 20; 3:1, 17.

2. Apokalupo 7:9-14 ena hereva bamona, Ioane ena matahanai lalonai dahaka ia itaia? (Rau 1 ena laulau itaia.)

² Ioane be unai nega aukadia lalonai matahanai ta ia itaia. Unai matahanai lalonai ia itaia, aneru ta ese aneru 4 ia hamaoroa, hisihisi badana ena lai 4 idia dogoatao ela bona Dirava ena hesiai taudia edia orea maragina ese edia maka ginigabena idia abia. (Apok. 7:1-3) Unai orea taudia ibounai be 144,000 bona idia be Iesu ida guba dekenai do idia lohia. (Luka 12:32; Apok. 7:4) Bena Ioane ese orea ma ta ia herevalaia, idia be orea badana dainai ia gwau: “Unai murinai hutuma bada lau itaia, ta ese idia ia duahia diba lasi, idia be bese ibounai, iduhu ibounai, kopina bona gado idauidau amo, idia be terona vairanai bona Mamoe Natuna vairanai idia gini.” (Apokalupo 7:9-14 duahia.) Ioane be ia moale bada badina ia diba vaira negai, taunimanima momo be tomadiho momokani do idia badinaia!

3. (a) Dahaka dainai Ioane ese ia itaia matahanai ese iseda abidadama ia hagoadaia? (b) Inai atikol ai dahaka do ita herevalaia?

³ Momokani, unai matahanai ese Ioane ena abidadama ia hagoadaia. Bona iseda abidadama do ia hagoadaia danu, badina  ita be unai matahanai do ia guguru negana ai ita noho! Hari ita itaia, taunimanima milioni momo be Iehova idia tomadiho henia noho bona idia ura hisihisi badana amo idia roho mauri, bona tanobada ai mauri hanaihanai do idia abia. Inai atikol ai, lagani 80 mai kahana gunanai, Iehova ese ena taunimanima dekenai hutuma bada taudia ia herevalaia dalana do ita dibaia. Bona, hutuma bada taudia ia herevalaia daladia rua do ita itaia: (1) idia be momo herea (2) bona idia be tanobada ena gabu idauidau amo idia mai. Inai dala rua ese unai orea lalonai idia ura vareai taudia ibounai edia abidadama do ia hagoadaia.

4. Tomadiho ma haida be dahaka idia gwau, to Bible Student taudia be dahaka idia abia dae?

⁴ Tomadiho ma haida ese taunimanima dekenai hereva momokani idia hadibaia lasi, hegeregere kara maoromaoro taudia be tanobada ai mauri hanaihanai do idia abia. (2 Kor. 4:3, 4) Hari, tomadiho momo idia gwau kara namo taudia idia mase neganai, idia be guba dekenai do idia lao. To, lagani 1879 lalodiai, Watch Tower pablikeisen idia halasia Bible Student taudia ese unai idia lalopararalaia dalana be idau. Idia abia dae Dirava ese tanobada dekenai Paradaiso do ia havaraia lou bona kara maoromaoro taudia milioni momo be tanobada dekenai do idia noho​—guba dekenai lasi. To, nega sisina daudau murinai idia laloparara unai kara maoromaoro taudia be daidia ia herevalaia.​—Mat. 6:10.

5. Bible Student taudia ese 144,000 taudia be edena bamona idia laloa?

⁵ Oibe, Bible Student taudia be Baibel amo idia laloparara taunimanima haida be “Dirava ese tanobada amo ia hoidia” Iesu ida guba dekenai do idia lohia totona. (Apok. 14:3) Unai orea maragina be 144,000 taudia, idia be tanobada ai idia do noho neganai mai abidadama ida Dirava idia hesiai henia Keristani taudia. To, hutuma bada taudia be edena bamona?

6. Bible Student taudia ese hutuma bada taudia be edena bamona idia laloa?

⁶ Ioane ena matahanai ai ia itaia hutuma bada oreana, be “terona vairanai bona Mamoe Natuna vairanai idia gini.” (Apok. 7:9) Unai hereva dainai Bible Student taudia idia laloa, 144,000 taudia hegeregerena, hutuma bada taudia be guba dekenai do idia noho. Bema 144,000 taudia bona hutuma bada taudia be guba dekenai do idia noho, edena dala ai unai orea rua be idia idau? Bible Student taudia idia laloa hutuma bada taudia be reana tanobada ai idia do noho neganai Dirava idia badinaia momokani lasi Keristani taudia. Ena be Baibel ena kara maoromaoro taravatudia idia badinaia, to idia haida be Kerisendom ena dubu haida dekenai idia lao. Bible Student taudia idia laloa, unai bamona taudia ese Dirava lalokau henia karana idia hahedinaraia, to idia be hegeregere lasi Iesu ida idia lohia totona. Danu, edia lalokau Dirava dekenai be ia goada lasi dainai, idia be guba dekenai terona vairanai do idia gini to terona latanai do idia helai lasi.

7. Bible Student taudia idia laloa daidia be Keriso ena Lohia Negana lalonai tanobada ai do idia mauri, bona idia ese idaunegai idia noho abidadama taudia be edena bamona idia laloa?

⁷ So, daidia be tanobada dekenai do idia noho? Bible Student taudia idia laloa, 144,000 taudia bona hutuma bada taudia be guba dekenai idia haboua murinai, taunimanima milioni ma haida be tanobada dekenai mauri do idia abia bona Keriso ena Lagani 1,000 Lohia Negana lalonai hahenamo momo do idia moalelaia. Bible Student taudia idia laloa lasi unai  taunimanima milioni be Keriso ena Lohia Negana ia do matamaia lasi lalonai, Iehova do idia hesiai henia. To, idia laloa unai taudia be Keriso ena Lohia Negana lalonai, Iehova do idia dibaia. Unai murinai, Iehova ena taravatu idia badinaia taudia be tanobada dekenai mauri hanaihanai do idia abia, bona gwau-edeede taudia be do idia hadikaia ore. Danu, Bible Student taudia idia laloa reana haida be unai negai, tanobada dekenai “king taudia” ai do idia lao​—idia haida be Keriso ia do mase lasi neganai idia mase abidadama taudia, bona Keriso ena Lohia Negana ena dokona ai, guba helarona do idia abia.​—Sal. 45:16.

8. Bible Student taudia be dahaka idia laloa?

⁸ Unai dainai Bible Student taudia idia laloa, orea ibounai be toi: (1) 144,000 taudia be Keriso ida guba dekenai do idia lohia; (2) Idia goada momokani lasi Keristani taudia, be guba dekenai Iesu ena terona vairanai do idia gini; bona (3) Keriso ena Lohia Negana lalonai, tanobada dekenai Iehova do idia dibaia taudia milioni momo. * To, gabeai Iehova ese idia ia durua unai idia lalopararalaia namonamo totona.​—Aon. 4:18.

9. (a) Edena dala ai tanobada dekenai hutuma bada taudia be “terona vairanai bona Mamoe Natuna vairanai” do idia gini? (b) Dahaka dainai Apokalupo 7:9 ai ia noho lalohadai be maoro?

⁹ Lagani 1935 ai, Iehova ena Witnes taudia be Ioane ena matahanai lalonai ia itaia hutuma bada taudia ena anina idia lalopararalaia. Danu, idia laloparara hutuma bada taudia be guba dekenai “terona vairanai bona Mamoe Natuna vairanai” do idia gini lasi. To, unai be laulau herevana sibona. Herevana hutuma bada taudia be tanobada dekenai do idia noho, to laulau dalanai “terona vairanai” idia gini diba, bema Iehova ena siahu bona ena lohia dalana idia badinaia. (Isa. 66:1) Idia be “Mamoe Natuna vairanai” idia gini diba bema Iesu ena mauri davalaia boubouna idia abidadama henia. Unai hegeregerena, Mataio 25:31, 32 ese ia hahedinaraia, “bese iboudiai”​—kara dika taudia danu​—be Iesu ena terona vairanai “do idia hebou.” Ia hahedinaraia goevagoeva unai bese ibounai be tanobada dekenai idia noho, to guba dekenai lasi. Unai laloparara matamatana be maoro. Badina ia hahedinaraia Baibel ia gwau lasi hutuma bada taudia be guba dekenai do idia lao. Orea tamona sibona be guba dekenai mauri hanaihanai do idia abia​—idia be 144,000 taudia, king ai do idia lao bona Iesu ida “tanobada do idia lohiaia.”​—Apok. 5:10.

10. Dahaka dainai hutuma bada taudia be Keriso ena Lohia Negana ia do matamaia lasi lalonai Iehova idia dibaia be namo?

¹⁰ Lagani 1935 amo, Iehova ena Witnes taudia idia laloparara Ioane ese ia itaia hutuma bada taudia, be tanobada dekenai mauri hanaihanai do idia abia abidadama Keristani taudia. Hutuma bada taudia be hisihisi badana amo idia roho mauri totona, Keriso ena Lohia Negana ia do matamaia lasi lalonai Iehova idia dibaia be namo. Danu, edia abidadama idia hagoadaia be namo, unai amo Keriso ena Lohia Negana ia do matamaia lasi lalonai ‘do idia vara gaudia amo idia heau mauri’ diba.​—Luka 21:34-36.

11. Dahaka dainai Bible Student taudia idia laloa Keriso ena Lohia Negana murinai haida be guba dekenai do idia lao?

¹¹ To, Keriso ena Lohia Negana murinai haida be guba dekenai do idia lao ena lalohadai be edena bamona? Unai lalohadai be The Watch Tower February 15, 1913 gauna ese ia herevalaia. Reana ta do ia laloa, ‘Dahaka dainai abidadama taudia ginigunadia be tanobada helarona do idia abia, to edia abidadama  idia goada momokani lasi Keristani taudia be guba helarona do idia abia?’ Momokani, Bible Student taudia be lalohadai kereredia rua dainai unai bamona idia laloa: (1) hutuma bada taudia be guba dekenai do idia noho bona (2) hutuma bada taudia be idia goada momokani lasi Keristani taudia.

12-13. Horoa taudia bona hutuma bada taudia be dahaka idia lalopararalaia?

¹² To, ita itaia vadaeni, lagani 1935 amo, Iehova ena Witnes taudia idia laloparara Aramagedono amo idia roho mauri taudia be Ioane ena matahanai dekenai ia itaia hutuma bada taudia. Idia be inai tanobada dekenai “hisihisi badana amo idia hanaia mai taudia,” bona do idia “boiboi badabada noho, idia gwau: ‘Emai hahemauri be emai Dirava, terona ai ia helai tauna amo bona Mamoe Natuna amo.’” (Apok. 7:10, 14) Danu, Baibel ia hahedinaraia, guba helarona idia abia taudia be “gau hereana ta” idia abia, bona unai helaro ese idaunegai abidadama taudia edia helaro ia hereaia. (Heb. 11:40) Iseda tadikaka be lagani 1935 ai idia abia diba matamata ese idia durua dainai, taunimanima idia boiria mai Iehova idia hesiai henia, bona tanobada dekenai mauri hanaihanai idia abia totona.

¹³ Hutuma bada taudia be edia helaro dainai idia moale bada. Idia laloparara Iehova sibona ese ia idia tomadiho henia taudia do ia abia hidi, guba dekenai eiava tanobada dekenai ia do idia hesiai henia totona. Horoa taudia bona hutuma bada taudia idia laloparara, Iehova ese Iesu Keriso ena mauri davalaia boubouna amo ia hahedinaraia hebogahisi hereadaena dainai unai hahenamo idia abia diba.​—Roma 3:24.

14. Lagani 1935 ai, dahaka dainai momo be hutuma bada taudia ena peroveta herevana idia do laloa noho?

¹⁴ Lagani 1935 ai, Iehova ena Witnes taudia be diba matamata idia abia, to momo idia do laloa noho edena dala ai tanobada ai do idia noho hutuma bada taudia be orea badana ai do ia lao. Hegeregere, Ronald Parkin ena mauri lagani be 12 neganai, hutuma bada taudia idia gwauraia hedinarai. Ia gwau: “Unai negai, tanobada hegegemadai ai pablisa ibounai be 56,000 bamona, bona idia momo be horoa taudia. Unai dainai toana be hutuma bada taudia be orea badana lasi.”

15. Edena dala ai hutuma bada taudia edia namba be ia bada ia lao noho?

¹⁵ To, lagani momo murinai, misinari taudia be tano momo dekenai idia siaia bona Iehova ena Witnes taudia edia namba be ia bada ia lao. Bena lagani 1968 ai, buka ladana Mauri Ia lao Henia Hereva Momokanina amo  Baibel stadi program idia hamatamaia. Unai buka be auka lasi dalanai Baibel ena hereva momokani ia hahedinaraia bona kudou maoro taudia momo ia durua. Lagani foa lalonai, taunimanima milioni ta mai kahana be hahediba taudia matamatadia ai idia lao bona bapatiso idia abia. Latin America bona tano ma haida dekenai Katolik Dubu be ia goada lasi, bona Eastern Europe bona Africa ena kahana haida dekenai iseda gaukara ena taravatu idia kokia neganai, taunimanima milioni momo be bapatiso idia abia. (Isa. 60:22) Hari inai negai, Iehova ena orea be tulu namodia momo idia halasia, unai amo taunimanima idia durua Baibel ena hadibaia herevadia idia dibaia totona. Ia hedinarai goevagoeva, hari hutuma bada taudia edia namba be eit milioni mai kahana.

16. Hutuma bada taudia be edeseni amo idia mai?

¹⁶ Ioane ese ena matahanai ia torea neganai, ia gwau hutuma bada taudia be “bese ibounai, iduhu ibounai, kopina bona gado idauidau amo.” Peroveta tauna Sekaraia ese unai ia herevalaia danu. Ia gwau: “Unai dinadia lalonai tau ibounai 10, gado idauidau ibounai besedia dekena amo, ese Iuda tauna ta dekenai do idia mai, iena dabua do idia dogoatao, do idia noia, do idia gwau, ‘Mani emu kara, oi danu do ita lao, badina be ai be  ai kamonai vadaeni, Dirava be oi dekenai ia noho.’”​—Sek. 8:23.

17. Edena dala ai bese bona gado idauidau taudia be heduru idia abia noho?

¹⁷ Iehova ena Witnes taudia idia laloparara, taunimanima idauidau idia haboua totona, gado idauidau dekenai sivarai namona idia harorolaia be namo. Ita be lagani 130 mai kahana lalonai Baibel idia herevalaia pablikeisen ita hahanaia, to hari gado momo ai trensleisen gaukara badana ita karaia noho. Unai ese ia hahedinaraia, Iehova be hari iseda negai hoa karana ta ia karaia, badina bese idauidau amo hutuma bada taudia ia haboua noho. Baibel bona pablikeisen idauidau be gado momo dekenai idia noho dainai, unai bese idauidau taudia be mai lalotamona ida Iehova idia tomadiho henia diba. Bona Iehova ena taunimanima be edia haroro goadagoada bona lalokau karana dainai taunimanima momo ese idia dibaia. Unai ese iseda abidadama ia hagoadaia, ani?​—Mat. 24:14; Ioa. 13:35.

18. (a) Isaia 46:10, 11 ena hereva bamona, dahaka dainai Iehova ese hutuma bada taudia ena peroveta herevana ia hagugurua karana dekenai ita hoa lasi? (b) Tanobada helarona do idia abia taudia edia hemami be edena bamona?

¹⁸ Hutuma bada taudia ena peroveta herevana dainai ita moale bada! Ita hoa lasi, badina Iehova be dala hereadaena ai unai peroveta herevana ia hagugurua noho. (Isaia 46:10, 11 duahia.) Hutuma bada taudia be Iehova ese idia dekenai ia henia helaro dainai idia moale bada. Idia be Dirava ese ia abia hidi lasi Iesu ida guba dekenai do idia lohia, to unai idia laloa lasi. Toretore Helagadia lalonai, lauma helaga ese ia hakaua abidadama tatau bona hahine edia sivarai ita duahia; to idia be 144,000 taudia lasi. Idia ta be Ioane Bapatiso. (Mat. 11:11) Ma ta be Davida. (Kara 2:34) Idia ruaosi bona ma haida be tanobada paradaisona ai mauri hanaihanai do idia abia. Idia ibounai​—⁠hutuma bada taudia danu​—be Iehova bona ena lohia siahuna do idia badinaia.

19. Bema Ioane ena matahanai ena anina ita lalopararalaia, dahaka do ita karaia?

¹⁹ Inai be nega ginigunana Dirava ese bese idauidau taudia milioni ia haboua ia idia tomadiho henia totona. Herevana iseda helaro be guba eiava tanobada dekenai do ita noho, namona be ita gaukara goada momo ita durua hutuma bada taudia ena “mamoe ma haida” ai idia lao totona. (Ioa. 10:16) Kahirakahira, Iehova ese ia perovetalaia hisihisi badana do ia mailaia, bona unai ese taunimanima idia hahisia gavamani bona tomadiho ibounai do ia hadikaia ore. Momokani, hutuma bada taudia ibounai dekenai unai be hahenamo badana, badina idia ese tanobada dekenai Iehova do idia hesiai henia ela bona hanaihanai!​—Apok. 7:14.