STADI ATIKOL 38
“Lau Dekenai Umui Mai Bona Umui Dekenai Goada Matamata Do Lau Henia”
“Umui hekwarahi bona metau bada umui huaia taudia ibounai e, lau dekenai umui mai bona umui dekenai goada matamata do lau henia.”—MAT. 11:28.
ANE 17 “Lau Ura”
INAI ATIKOL ENA POINT BADANA *
1. Mataio 11:28-30 ai, Iesu be dahaka gwauhamata ia gwauraia?
IESU be ia idia kamonai henia hutuma bada taudia dekenai gwauhamata hereadaena ta ia gwauraia. Ia gwau: “Lau dekenai umui mai bona umui dekenai goada matamata do lau henia.” (Mataio 11:28-30 duahia.) Unai be gwauhamata herevana ta sibona lasi. Hegeregere, Iesu ese gorere badana ta ia davaria hahinena, ia durua dalana mani ita laloa.
2. Iesu ese gorere hahinena ta durua totona dahaka ia karaia?
2 Gorere hahinena be ia ura heduru ia abia dainai doketa momo dekenai ia lao, ena gorere idia hanamoa totona. Lagani 12 lalonai unai gorere ia haheaukalaia bona ta ese ia durua lasi. Mose ena Taravatu hegeregerena, unai hahine be ia miro. (Lev. 15:25) Gabeai, ia kamonai Iesu be gorere taudia ia hanamoa diba, unai dainai Iesu dekenai ia lao. Iesu ia davaria neganai, ena dabua ena dorina ia dogoatao, bona maoromaoro ia namo! Iesu ese unai hahine ia hanamoa sibona lasi, to ia dekenai lalokau bona hemataurai karana ia hahedinaraia danu. Hegeregere, Iesu ese ia hereva henia neganai, inai hereva “natugu e,” ia gaukaralaia. Momokani, unai hahine be goada ia abia!—Luka 8:43-48.
3. Edena henanadai do ita herevalaidia?
3 Ita itaia unai hahine be Iesu dekenai ia lao. Ia be kara ta ia karaia. Hari, ita danu be unai bamona—namona be kara ta ita karaia Iesu dekenai ita lao totona. Hari iseda negai, Iesu be hoa dalanai ia dekenai idia lao gorere taudia ia hanamoa lasi. To, ita ia boiria, ia gwau: “Lau dekenai umui mai bona umui
dekenai goada matamata do lau henia.” Inai atikol ai henanadai faiv do ita herevalaia: Edena dala ai Iesu dekenai do ita lao? Iesu ia gwau: “Lauegu huaia auna do umui huaia” ena anina be dahaka? Iesu ena haheitalai amo dahaka ita dibaia? Dahaka dainai ita dekenai ia henia gaukara amo goada matamata ita abia? Bona edena dala ai Iesu ena huaia auna amo goada matamata do ita abia noho?“LAU DEKENAI UMUI MAI”
4-5. Edena dala ma haida ai Iesu dekenai ita lao?
4 Iesu dekenai ita lao dalana ta be, ia gwauraia bona karaia gaudia dekenai diba ita abia noho. (Luka 1:1-4) Ta ese ita totona unai do ia karaia lasi—ita sibona ese Baibel amo unai sivarai ita stadilaia be namo. Danu, namona be abia hidi ita karaia ita bapatiso bona Keriso ena hahediba tauna ta ai ita lao.
5 Iesu dekenai ita lao dalana ma ta be kongrigeisen ena elda taudia amo heduru ita abia. Iesu ese unai “harihari gaudia,” elda taudia, ia gaukaralaia ena mamoe idia naria totona. (Efe. 4:7, 8, 11; Ioa. 21:16; 1 Pet. 5:1-3) Namona be kara ta ita karaia elda taudia amo heduru ita abia totona, badina idia be iseda ura gaudia bona ita laloa gaudia idia diba lasi. Tadikaka ta ladana, Julian ia gwau: “Lau gorere dainai Betele asainmen do lau rakatania, bona egu turana ta be lau ia hadibaia tadikaka lau noidia lau dekenai mamoe vadivadi idia karaia totona. Matamanai, lau laloa lau idia vadivadi henia be anina lasi. To, gabeai heduru totona lau noinoi, bona unai mamoe vadivadi karana ese lau ia durua bada.” Julian idia vadivadi henia tadikaka rua bona abidadama elda taudia ma haida, ese ita idia durua diba “Keriso ena lalohadai ita abia,” unai amo iena laloa dalana bona kara ita lalopararalaia bona tohotohoa. (1 Kor. 2:16; 1 Pet. 2:21) Unai be elda taudia amo ita abia harihari gauna hereadaena ta.
“LAUEGU HUAIA AUNA DO UMUI HUAIA”
6. Iesu ia gwau: “Lauegu huaia auna do umui huaia” neganai, ena hereva ena anina be dahaka?
6 Iesu ia gwau: “Lauegu huaia auna do umui huaia” neganai, reana ena hereva ena anina be “Lau umui kamonai henia.” Eiava ena anina ma ta be “Lau ida huaia auna ita huaia, bona Iehova totona ita gaukara.” Unai hereva rua amo ita diba, huaia auna be gaukara ia herevalaia.
7. Mataio 28:18-20 ena hereva bamona, edena gaukara ita durua diba, bona dahaka ita abia dae momokani?
7 Iehova dekenai iseda mauri ita gwauhamatalaia bona ita bapatiso neganai, Iesu ena boiboi herevana ita abia dae. Unai boiboi herevana be taunimanima ibounai totona—Iesu ese mai ura ida Dirava idia hesiai henia taudia be do ia dadaraia lasi. (Ioa. 6:37, 38) Keriso ena murinai idia raka taudia ibounai, be Iehova ese Iesu dekenai ia henia gaukarana idia durua diba. Ita abia dae momokani, Iesu be nega ibounai ita do ia durua unai gaukara ita karaia totona.—Mataio 28:18-20 duahia.
“LAU DEKENAI DIBA UMUI TAHUA”
Iesu bamona, ma haida oi hagoadaia (Paragraf 8-11 itaia) *
8-9. Dahaka dainai manau taudia be Iesu dekenai idia lao, bona ita sibona dekenai edena henanadai do ita henia?
8 Manau taudia be Iesu dekenai idia lao. (Mat. 19:13, 14; Luka 7:37, 38) Dahaka dainai? Mani Iesu bona Farisea taudia edia kara ena idau ita laloa. Tomadiho gunalaia taudia be taunimanima idia lalokau henia lasi bona idia hekokoroku. (Mat. 12:9-14) Iesu be taunimanima ia lalokau henia bona ia manau. Farisea taudia be edia dagi dainai idia hekokoroku, bona idia ura ma haida ese do idia lalodia bada. To, Iesu be unai bamona ia karaia lasi, ia ura ena hahediba taudia be do idia manau bona ma haida idia hesiai henia. (Mat. 23:2, 6-11) Farisea taudia ese taunimanima idia hagaria bona dagedage henia dainai, idia biagudia auka. (Ioa. 9:13, 22) Iesu be ena hereva bona kara amo taunimanima ia durua.
9 Iesu ena haheitalai amo dahaka oi dibaia? Sibona oi nanadaia: ‘Lau be badu haraga lasi tauna bona manau tauna, a? Ma haida durua totona, momo ese idia laloa bada lasi gaukara lau karaia, a? Ma haida lau kara namo henidia, a?’
10. Iesu ida idia gaukara hebou taudia edia hemami be edena bamona?
10 Iesu ida idia gaukara hebou taudia be idia moale, bona ia be mai moale ida idia dekenai treinini ia henia. (Luka 10:1, 19-21) Ia ura ena hahediba taudia be henanadai idia henia, unai amo edia lalohadai do ia diba. (Mat. 16:13-16) Tubutubu gaudia be uma namona ta ai ranu momo idia abia hegeregerena, Iesu ena hahediba taudia be idia goada idia lao. Badina idia ese Iesu ia hadibaia gaudia idia laloa bada bona edia gaukara ese anina namona ia havaraia.
Ma haida ese oi idia gari henia lasi bona tura namodia ai oi lao
Hesiai gaukara oi goadalaia
Oi manau bona oi gaukara goada *
11. Oi sibona dekenai edena henanadai haida oi henia be namo?
11 Oi be maduna oi huaia ma haida oi hakaua totona, a? Bema oibe, sibona oi nanadaia: ‘Edena dala ai gaukara gabunai eiava ruma ai ma haida lau kara henia? Maino karana lau hahedinaraia, a? Ma haida lau noia henanadai idia henia totona, a? Mai ura ida edia lalohadai lau kamonai, a?’ Ita ura lasi Farisea taudia ita tohotohoa, idia be henanadai idia henia taudia edia hereva idia ura lasi kamonai, bona edia lalohadai idia abia dae lasi taudia idia dagedage henia.—Mar. 3:1-6; Ioa. 9:29-34.
“GOADA MATAMATA DO UMUI DAVARIA”
12-14. Dahaka dainai Iesu ese ita dekenai ia henia gaukara amo goada matamata ita abia diba?
12 Dahaka dainai Iesu ese ita dekenai ia henia gaukarana amo goada matamata ita abia diba? Badina momo idia noho, to haida sibona do ita herevalaia.
13 Ita be mai iseda hakaua taudia namodia. Iseda Hakaua Tauna Badana, Iehova, be ena hesiai taudia ia biagua auka lasi. Ia ese ita karaia gaukara ia laloa bada. (Heb. 6:10) Bona ita dekenai goada ia henia, iseda maduna ita huaia namonamo totona. (2 Kor. 4:7; Gal. 6:5) Iseda King, Iesu, ese ma haida ia kara henia dalana ita tohotohoa be namo. (Ioa. 13:15) Bona ita idia naria elda taudia be idia gaukara goada “mamoe naria tauna badana,” Iesu, idia tohotohoa totona. (Heb. 13:20; 1 Pet. 5:2) Idia ese kara namodia idia hahedinaraia, ita idia hagoadaia, bona mai gari lasi ida ita idia gimaia.
14 Ita be mai iseda tura namodia. Haida be mai edia tura namodia lasi, bona ita abia mai anina bada gaukarana idia karaia diba lasi. Mani oi laloa: Ita be kara maoromaoro idia ura henia tadikaka taihu ida ita gaukara hebou, to idia laloa lasi idia ese ma haida idia hereaia. Idia be mai edia diba, to idia hekokoroku lasi bona idia laloa lasi ma haida idia hereaia. Idia ese ita be tura namodia bamona idia laloa. Bona ita idia lalokau henia dainai mai ura bada ida, ita totona edia mauri idia haboioa diba!
15. Ita karaia noho gaukara namona be edena bamona ita laloa?
15 Ita be gaukara namo hereana ita abia. Iehova ena hereva momokani be taunimanima dekenai ita hadibaia, bona ita hahedinaraia Diabolo be koikoi tauna. (Ioa. 8:44) Satani be taunimanima ia koia dainai idia laloa idia be anina lasi. Hegeregere, Satani ia ura ita abia dae Iehova be ita ia lalokau henia lasi bona iseda dika do ia gwauatao lasi. Unai koikoi herevadia ese taunimanima dekenai lalomanoka ia havaraia noho! To, Keriso dekenai ita lao neganai, iseda dika ia gwauatao. Hereva momokani be inai, Iehova ese ita ibounai ia lalokau henia bada. (Roma 8:32, 38, 39) Taunimanima ita durua Iehova dekenai idia tabekau bona edia mauri idia haidaua neganai, ita moale bada!
IESU ENA HUAIA AUNA AMO GOADA MATAMATA OI ABIA NOHO
16. Edena dala ai Iesu ia henia gaukarana be gaukara ma haida amo ia idau?
16 Iesu ia henia gaukarana be gaukara ma haida amo ia idau. Hegeregere, momo be moni gaukara amo idia giroa lou neganai, idia hesiku bona idia moale lasi. To, Iehova bona Keriso edia hesiai gaukara ita karaia neganai, ita moale bada. Reana moni gaukara amo ita giroa mai neganai, hanuaboi ai kongrigeisen hebouna totona ita lao herevana ita hesiku bada. To, nega momo hebou murinai ruma dekenai ita giroa lou neganai, goada matamata ita abia. Unai hegeregerena, haroro gaukara bona sibona iseda Baibel stadilaia karana ita goadalaia neganai, goada matamata do ita abia!
17. Dahaka ita lalopararalaia be namo, bona dahaka dainai ita naria namonamo?
17 Namona be ita laloparara ita ta ta iseda goada be mai ena hetoana. Unai dainai do ita karaia gaukara ita laloa namonamo guna be namo. Hegeregere, iseda nega bona goada do ita haorea kava, moni bona kohu ita haboua totona. Mani, Iesu ese ia hereva henia taga tauna ena henanadai ita laloa, ia gwau: “Mauri hanaihanai abia totona, dahaka lau karaia be namo?” Unai taga tauna be Taravatu ia badinaia noho. Reana ia be tau namona, badina Mareko ena Evanelia bukana dekenai ia hahedinaraia Iesu ese unai tauna “ia lalokau henia.” Bona Iesu ese ia hamaoroa, ia gwau: “Oi lao emu kohu oi hoihoilaia, . . . bona oi mai egu hahediba tauna ai oi lao. Unai tauna be ia lalohisihisi bada, badina ena “kohu be momo” bona ia rakatania diba lasi. (Mar. 10:17-22) Unai dainai, Iesu ese ia henia gaukarana ia dadaraia bona “Taga” ena hesiai gaukara ia karaia noho. (Mat. 6:24) Bema unai be oi, dahaka abia hidi do oi karaia?
18. Dina ta ta ai dahaka ita karaia be namo, bona dahaka dainai?
18 Namona be dina ta ta, iseda mauri ai ita atoa guna gaudia ita laloa namonamo. Dahaka dainai? Badina unai amo iseda nega bona goada do ita gaukaralaia namonamo. Mani, matamata tauna ta ladana, Mark, ena hereva ita laloa, ia gwau: “Lagani momo lalonai, lau laloa lau be kohu momo lasi maurina lau noholaia. Painia gaukara lau karaia, to nega momo moni bona taga maurina lau laloa. Lau laloa dahaka dainai egu mauri lau moalelaia lasi. Gabeai lau laloparara, egu nega bona goada be sibona egu ura gaudia dekenai lau haorea noho, to Iehova lau laloa lasi.” Mark be ena laloa dalana bona kara ia haidaua, unai amo Iehova hesiai henia gaukarana ia goadalaia. Mark ia gwau: “Nega haida moni dainai lau lalohekwarahi, to Iehova bona Iesu edia heduru dainai, egu hesiai gaukara lau laloa bada.”
19. Dahaka dainai lalohadai maorona ita abia be namo?
19 Iesu ia henia gaukara ita karaia neganai goada matamata do ita abia, bema inai gaudia toi ita karaia. Ginigunana be, lalohadai maorona ita abia. Ita be Iehova ena gaukara ita karaia noho dainai, namona be iena dala hegeregerena ita karaia. Ita be gaukara taudia bona Iehova be gaukara ena Biaguna. (Luka 17:10) Bema iseda ura dalana hegeregerena Iehova ena gaukara ita karaia, do ita kwalimu lasi. Goada herea boromakau be sibona ia haberoa bona ia hesiku diba, bema sibona ena dala ia badinaia bona ena biaguna ena hakaua dalana ia badinaia lasi. Unai hegeregerena, bema Iehova ena hakaua dalana ita badinaia, ita karaia diba lasi gaukaradia ita karaia diba bona koua gaudia ita hanaia diba. Laloatao, gau ta ese iena ura hagugurua karana ia koua diba lasi!—Roma 8:31; 1 Ioa. 4:4.
20. Iesu ia henia gaukarana ita karaia ena badina be dahaka?
20 Iharuana be, badina maorona ida gaukara ita karaia. Ita ura iseda lalokau Tamana, Iehova ena ladana ita hanamoa. Iesu ena negai idia noho mataganigani bona sibona idia laloa bada taudia be gabeai idia lalohisihisi bona Iesu ia henia gaukarana idia rakatania. (Ioa. 6:25-27, 51, 60, 66; Fili. 3:18, 19) To, Dirava bona dekena taudia idia lalokau henia taudia be tanobada ai Iesu ia henia gaukarana idia karaia, badina edia helaro be guba dekenai Keriso ida do idia lohia. Idia bamona, do ita moale noho bema badina maorona ida Iesu ia henia gaukarana ita karaia.
21. Mataio 6:31-33 ena hereva bamona, Iehova be ita totona dahaka do ia karaia?
21 Ihatoina be, oi haheauka. Ita abia hidi mauri dalana ese ia hahedinaraia ita be sibona iseda ura ita dadaraia bona ita gaukara goada. Iesu ia gwau, ita be dagedage do ita davaria. To, ita diba Iehova ese ita dekenai goada do ia henia, hahetoho idauidau ita haheaukalaia totona. Bema ita haheauka noho, iseda abidadama do ia goada ia lao. (Iam. 1:2-4) Danu, ita abia dae Iehova ese iseda dabu gaudia do ia henia, Iesu ese ita do ia hakaua, bona iseda tadikaka taihu ese ita do idia hagoadaia. (Mataio 6:31-33 duahia; Ioa. 10:14; 1 Tes. 5:11) Unai gaudia ibounai ese ita do ia durua ita haheauka noho totona.
22. Dahaka dainai ita moale?
22 Iesu ese ia hanamoa gorere hahinena, be unai dina amo goada matamata ia abia. To, ia be unai goada matamata do ia abia hanaihanai bema mai abidadama ida Keriso ena murinai ia raka. Oi laloa ia be dahaka ia karaia? Bema Iesu ena murinai ia raka, ia be inai hahenamo do ia abia—guba dekenai Iesu ida do ia gaukara hebou! Unai hahenamo ese Keriso ena murinai ia raka totona ia dadaraia gaudia do ia hereaia. Herevana iseda helaro be tanobada eiava guba dekenai mauri hanaihanai do ita abia, to ita moale badina ita ese Iesu ena boiboi herevana: “Lau dekenai umui mai,” ita abia dae.
ANE 13 Keriso be Eda Haheitalai Namona
^ par. 5 Iesu be ita ia boiria ia dekenai ita lao totona. Dahaka ita karaia diba, iena boiboi ita abia dae totona? Inai atikol ese unai henanadai do ia haerelaia, bona Keriso ida ita gaukara hebou neganai, goada ita abia dalana do ita dibaia.