1. Dahaka dainai Iehova ita badinaia be namo?

IEHOVA ita badinaia * be namo, badina ia be iseda Havaraia Tauna. Ia be mai ena maoro ita dekenai hakaua herevadia ia henia totona. (Apok. 4:11) To badina namona ma ta dainai ia ita badinaia​—iena lohia dalana sibona be namo herea. Histori lalonai, tanobada ena lohia taudia momo be mai edia siahu taunimanima idia lohiaia totona. To, Iehova sibona be Lohia Tauna hereadaena, badina ia be mai ena aonega, lalokau, hebogahisi bona hariharibada.​—Eso. 34:6; Roma 16:27; 1 Ioa. 4:8.

2. Heberu 12:9-11 ese edena dala ai ita ia durua Iehova ita badinaia totona?

² Iehova ia ura ia ita kamonai henia, badina ia be iseda Tamana lalokauna, to namo lasi gari dainai ia ita kamonai henia. Paulo ese Heberu taudia dekenai ena revareva ia siaia neganai, ia gwau namona be “Tamana ena henunai ita noho” badina ia be “iseda namo totona” treinini ia henia noho.​—Heberu 12:9-11 duahia.

3. (a) Edena dala ai Iehova badinaia karana ita hahedinaraia? (b) Edena henanadai do ita herevalaidia?

³ Gau ibounai lalonai Iehova ita kamonai henia bona iseda diba dekenai ita tabekau lasi neganai, Ia ita badinaia noho. (Aon. 3:5) Iehova ena kara namodia ita dibaia neganai, do ia auka lasi Ia ita badinaia totona. Dahaka dainai? Badina unai kara namodia be ia karaia gaudia ibounai amo idia hedinarai. (Sal. 145:9) Iehova ita dibaia noho neganai, ia do ita lalokau  henia bada. Bona Iehova ita lalokau henia neganai, do ita karaia gaudia bona ita karaia lasi gaudia dekenai taravatu momo do ita atoa lasi. Ita ura Iehova ena laloa dalana ita badinaia, kara namo ita ura henia bona kara dika ita inai henia. (Sal. 97:10) To, nega haida do ia auka Iehova ita kamonai henia totona. Dahaka dainai? Bona elda taudia, tama, bona sina ese Gavana Nehemia; King Davida; bona Iesu ena sinana, Maria, edia haheitalai amo dahaka idia dibaia? Inai atikol ese unai henanadai do ia haerelaia.

4-5. Roma 7:21-23 ena hereva bamona, dahaka dainai nega haida ia auka, Iehova ita badinaia totona?

⁴ Iehova badinaia karana ia koua gauna ta be, ita ibounai be mai eda kara dika bona ita be goevadae lasi taudia. Unai dainai nega haida Dirava do ita kamonai henia lasi. Adamu bona Heva be Dirava idia gwau-edeede henia bona ia taravatua au huahua idia ania neganai, idia be sibona edia taravatu idia atoa. (Gen. 3:22) Hari, taunimanima momo be Iehova idia laloa lasi, bona sibodia ese maoro bona kerere dekenai abia hidi idia karaia.

⁵ Danu, nega haida ia auka, Iehova idia diba bona lalokau henia taudia ese Ia idia badinaia totona. Aposetolo Paulo dekenai unai ia vara. (Roma 7:21-23 duahia.) Paulo bamona, ita ura Iehova ena vairanai kara maorona ita karaia. To, namona be nega ibounai kara dika karaia urana ita dadaraia.

6-7. Iehova badinaia karana ia koua gauna ma ta be dahaka? Haheitalai gwauraia.

⁶ Iehova badinaia karana ia koua gauna ta be, iseda kastom be idau. Taunimanima edia lalohadai be Iehova ena ura amo ia idau, unai dainai nega haida do ia auka edia lalohadai ita dadaraia totona. Mani inai haheitalai oi laloa.

⁷ Gabu haida dekenai, nega momo matamata taudia idia doria edia mauri lalonai moni momo idia haboua totona. Taihu ta ladana Mary * dekenai unai ia vara. Iehova ia do dibaia lasi neganai, ia be ena tano ai sikuli badana ta dekenai ia lao. Mary be ena ruma bese ese idia doria pei bada moni gaukara ta do ia abia, unai amo ma haida ese do idia matauraia. Ia danu be unai ia ura henia. To, Iehova ia dibaia bona ia lalokau henia neganai, ena tahua gaudia ia haidaua. Ia gwau: “Nega haida moni momo karaia daladia lau davaria, to lau diba unai ese Iehova hesiai henia noho karana ia koua diba. Lau tubu daekau mauri dalana dainai, ia auka unai ura lau dadaraia totona. Iehova lau noia lau ia durua, egu hesiai gaukara ena nega bada do ia haorea moni gaukara lau dadaraia totona.”​—Mat. 6:24.

8. Hari, dahaka do ita herevalaia?

⁸ Ita herevalaia vadaeni, Iehova badinaia karana be mai ena namo. To, bema maduna haida idia huaia taudia, hegeregere elda taudia, tama, bona sina ese Dirava ena hakaua dalana idia badinaia, ma haida idia durua diba. Mani, Baibel lalonai maduna huaia karana dekenai Iehova ia moalelaia haheitalai haida ita herevalaia.

9. Nehemia be dahaka hahetoho haida ia davaria?

⁹ Iehova ese elda taudia dekenai mai anina bada maduna ia henia ena taunimanima idia naria totona. (1 Pet. 5:2) Elda taudia ese Nehemia ena haheitalai, Iehova ena taunimanima ia kara henia dalana dekenai, diba idia abia. Nehemia be Iuda ena gavana dainai ia  be mai ena siahu. (Neh. 1:11; 2:7, 8; 5:14) Nehemia ia davaria hahetoho haida mani oi laloa. Ia itaia Iuda taudia be dubu helaga dekenai Iehova matauraia lasi karadia idia karaia, bona Levi taudia dekenai kontribiusen idia henia ena Taravatu idia badinaia lasi. Danu, Sabati taravatuna idia badinaia lasi, bona edia tatau haida be idau bese hahinedia idia adavaia. Gavana Nehemia ese unai hekwakwanai ia hamaoromaoroa be namo.​—Neh. 13:4-30.

10. Edena dala ai Nehemia ese ia davaria hahetoho idauidau ia haheaukalaia?

¹⁰ Nehemia be ena siahu ia gaukaralaia kerere lasi, Dirava ena taunimanima ia doria iena lalohadai idia badinaia totona. To, guriguri amo Iehova ena heduru ia noia, bona taunimanima dekenai Iehova ena Taravatu ia hadibaia. (Neh. 1:4-10; 13:1-3) Danu, Nehemia be ena taunimanima ida ia gaukara hebou, Ierusalema ena magu idia haginia lou totona.​—Neh. 4:15.

11. Tesalonika Ginigunana 2:7, 8 ena hereva bamona, edena dala ai elda taudia ese kongrigeisen taudia do idia kara henia be namo?

¹¹ Reana elda taudia be Nehemia ia davaria hekwakwanai idia davaria lasi, to dala idauidau ai ia idia tohotohoa diba. Hegeregere, idia gaukara goada edia tadikaka taihu idia durua totona. Bona idia laloa lasi edia maduna dainai ma haida idia hereaia. To, mai lalokau ida tadikaka taihu idia kara henidia. (1 Tesalonika 2:7, 8 duahia.) Edia manau bona lalokau karana dainai, mai hebogahisi ida ma haida idia hereva henia. Ekspiriens elda ta, Andrew, ia gwau: “Lau itaia bema elda tauna be ma haida ia laloa bada, tadikaka taihu be do idia ura ia idia kamonai henia. Bona unai ese kongrigeisen taudia ia durua elda taudia ida idia gaukara hebou totona.” Lagani daudau elda maduna ia huaia tadikaka ladana Tony, ia gwau: “Lau ura Filipi 2:3 ena sisiba lau badinaia, bona hanaihanai lau laloa ma  haida ese lau idia hereaia. Unai ese lau ia durua ma haida lau doria lasi lau idia kamonai henia totona.”

12. Dahaka dainai elda taudia idia manau be namo?

¹² Iehova ia manau bamona, elda taudia idia manau be namo. Iehova be unives ibounai ena Lohia Badana, to “iena kwarana ia atoa diho” bona “ogogami taudia, be tano ena kahu dekena amo ia abia isi noho.” (Sal. 18:35; 113:6, 7) Danu, Iehova ese hekokoroku taudia ia inai henia.​—Aon. 16:5.

13. Dahaka dainai elda tauna ese “ena uduna ia biagua” be namo?

¹³ Iehova ia badinaia elda tauna ese “ena uduna ia biagua” be namo. Bema unai bamona ia karaia lasi, ta ese ia matauraia lasi neganai do ia hereva auka diba. (Iam. 1:26; Gal. 5:14, 15) Matamanai ita herevalaia tadikaka Andrew, ia gwau: “Nega haida, lau ura lau ia matauraia lasi tadikaka eiava taihu lau hereva auka henia. To, Baibel ai idia noho abidadama taudia edia haheitalai lau laloa, bona unai ese lau ia durua manau karana ena namo lau dibaia totona.” Elda taudia be mai lalokau bona hebogahisi ida kongrigeisen taudia bona elda ma haida idia hereva henia neganai, idia be Iehova idia badinaia.​—Kol. 4:6.

14. Iehova be tamadia dekenai dahaka maduna ia henia, bona ia ura dahaka idia karaia?

¹⁴ Iehova ese tama dekenai ruma bese kwarana ena maduna ia henia, bona Dirava ia ura tama ese ena natudia do ia hadibaia bona sisiba henia. (1 Kor. 11:3; Efe. 6:4) To tama ena siahu be mai ena hetoana, unai dainai edia natudia idia kara henia hegeregerena, ruma bese ia havaraia tauna, Iehova ese idia do ia hahemaoro henia. (Efe. 3:14, 15) Tamadia be Iehova idia badinaia bema Dirava ia moalelaia dalanai edia siahu idia gaukaralaia. Bona King Davida ena mauri idia stadilaia karana amo gau momo do idia dibaia.

15. Dahaka dainai Tamadia ese King Davida ena haheitalai idia tohotohoa be namo?

¹⁵ Iehova ese Davida dekenai maduna ia henia iena ruma bese do ia naria sibona lasi, to Israela besena danu. Davida be king ta dainai, ia be mai ena siahu. Nega haida, unai siahu ia gaukaralaia kerere bona kerere badadia ia karaia. (2 Sam. 11:14, 15) To, sisiba ia abia dae karana amo Iehova ia badinaia. Bona guriguri amo Iehova dekenai ena lalohekwarahi ibounai ia gwauraia hedinarai. (Sal. 51:1-4) Danu, ia manau bona sisiba namodia ia abia dae, tatau sibona amo lasi to hahine amo danu. (1 Sam. 19:11, 12; 25:32, 33)  Davida be ena kerere badadia amo ia helalo-kerehai, bona ena mauri lalonai Iehova hesiai henia gaukarana ia atoa guna.

16. Tamadia ese Davida ena haheitalai amo dahaka idia dibaia?

¹⁶ Mani Tamadia ese King Davida ena haheitalai amo idia dibaia gaudia haida ita laloa: Iehova ese ia henia siahu oi gaukaralaia kerere lasi. Emu kerere oi gwauraia hedinarai, bona ma haida ese Baibel amo idia henia sisiba oi abia dae. Bema unai bamona oi karaia, emu manau karana dainai emu ruma bese ese oi do idia matauraia. Emu ruma bese ida oi guriguri neganai, Iehova dekenai emu hemami ibounai oi gwauraia hedinarai, namona be emu ruma bese idia diba oi be Ia dekenai oi tabekau. Bona, mai anina bada gauna be, emu mauri lalonai Iehova ena hesiai gaukara oi atoa guna. (Deu. 6:6-9) Emu ruma bese taudia dekenai, emu haheitalai namona be dava bada harihari gauna ta.

17. Iehova ese sinadia dekenai dahaka maduna ia henia?

¹⁷ Iehova ese ruma bese lalonai sina dekenai mai anina bada maduna ta ia henia, bona maoro ia henia natudia ia hadibaia totona. (Aon. 6:20) Momokani, sina ena hereva bona kara ese natudia edia mauri dalana ia haidaua diba. (Aon. 22:6) Mani sina ese Maria, Iesu ena sinana amo diba idia abia dalana ita herevalaia.

18-19. Sinadia ese Maria ena haheitalai amo dahaka idia dibaia?

¹⁸ Maria be Toretore Helagadia ia diba namonamo. Ia ese Iehova ia matauraia bada bona ena hetura karana Ia ida ia hagoadaia. Danu, ia be mai ena ura ida Iehova ena hakaua dalana ia badinaia, ena be ena mauri lalonai gau momo do idia idau.​—Luka 1:35-38, 46-55.

¹⁹ Sinadia e, umui ese dala idauidau ai Maria ena haheitalai umui tohotohoa diba. Edena dala ai? Ginigunana be, Baibel stadilaia karana bona guriguri amo emui hetura karana Iehova ida umui hagoadaia. Iharuana be, emui mauri ai gau haida umui haidaua unai amo Iehova umui hamoalea diba. Hegeregere, reana oi tubu daekau ruma besena ai, emu tama sina be nega momo idia badu bona natudia idia hereva auka henia. Unai dainai reana do oi laloa unai dala ai emu natudia oi kara henidia be kerere lasi. Danu, ena be gabeai Iehova ena taravatu oi dibaia, to emu natudia be idia kamonai lasi neganai, reana do ia auka oi manau bona haheauka totona. (Efe. 4:31) Unai bamona negadiai, gau badana be Iehova ena heduru totona oi noinoi.  Sina ta ena ladana, Lydia ia gwau: “Nega haida, lau guriguri goadagoada unai amo egu natuna merona be lau ia kamonai henia lasi neganai, do lau hereva auka lasi. Danu, nega haida egu hereva lau do haorea lasi lalonai, heduru totona egu lalona dekenai Iehova lau guriguri henia. Guriguri karana ese lau dekenai lalomaino ia henia.”​—Sal. 37:5.

20. Sina haida be dahaka hekwakwanai idia davaria, bona edena dala ai unai idia hanaia diba?

²⁰ Sina haida dekenai, nega haida ia auka edia natudia idia lalokau henia totona. (Tito 2:3, 4) Badina idia haida idia tubu daekau ruma besena ai, edia tama sina ese lalokau idia hahedinaraia lasi. Bema oi be unai bamona ruma bese ta ai oi tubu daekau, namo lasi emu tama sina idia badinaia dala kererena oi badinaia. Iehova ena ura ia badinaia sina ese ena natudia ia lalokau henia be namo. Reana do ia auka ena laloa dalana, hemami, bona kara ia haidaua totona. To, unai gaudia ia haidaua diba, bona ena ruma bese ida do idia moale.

21-22. Isaia 65:13, 14 ena hereva bamona, Iehova badinaia karana amo dahaka namo do ita abia?

²¹ King Davida ia diba Iehova badinaia karana be mai ena namo. Ia gwau: “Lohiabada ena Taravatu be idia maoromaoro vadaeni. Unai Taravatu idia badinaia taudia ese, moale idia davaria noho. Lohiabada ena oda be diari hegeregerena. Idia ese taunimanima edia laloa idia hadiaria. Lohiabada e, oiemu Taravatu ese, lau, oiemu hesiai tauna dekenai, sisiba namona idia henia. Lau ese idia lau badinaia neganai, noho mauri namona momokani lau davaria.” (Sal. 19:8, 11) Hari inai negai, Iehova idia badinaia taudia, bona iena sisiba namodia idia badinaia lasi taudia edia kara ena idau ita itaia. Iehova idia badinaia taudia be “ane do idia abia, edia moale be bada dainai.”​—Isaia 65:13, 14 duahia.

²² Elda taudia, tama, bona sina be mai edia ura ida Iehova idia badinaia neganai, edia mauri do idia moalelaia, edia ruma bese idia moale, bona kongrigeisen ibounai be lalotamona ai do ia noho. Mai anina bada gauna be idia ese Iehova ena kudouna idia hamoalea. (Aon. 27:11) Unai be moale gauna!