1-2. Edena dala ai Hadibaia Tauna 11:6 be Basileia sivarai namona harorolaia gaukarana ida ita hahegeregerea diba?

TANO haida ai, taunimanima be sivarai namona idia kamonai neganai idia ura diba ma haida idia abia. Badina idia be sivarai namona idia naria noho. To, tano ma haida ai taunimanima ese Dirava ena sivarai eiava Baibel idia laloa bada lasi. Emu gabu ai momo ese sivarai namona be edena bamona idia laloa? Herevana edia lalohadai be dahaka, to Iehova ia ura ita haroro ela bona haroro gaukara ia hadokoa.

² Iehova ena nega korikori ai haroro gaukara do ia hadokoa, bena unai murinai ‘dokona do ia ginidae.’ (Mat. 24:14, 36) To hari edena dala ai inai hereva “emu imana do ia laga-ani lasi” * ita badinaia diba?​—Hadibaia Tauna 11:6, NWT * duahia.

3. Inai atikol ai dahaka do ita stadilaia?

³ Stadi atikol 36 ese “taunimanima haoda henia taudia” namodia ai ita lao daladia foa ia herevalaia. (Mat. 4:19) Inai atikol ese dala toi do ia herevalaia, bona ita do ia durua herevana dahaka hekwakwanai idia vara to haroro gaukara ita goadalaia noho. Danu ita do ia hadibaia dahaka dainai (1) haroro gaukara ita laloa bada, (2) ita haheauka, bona (3) iseda abidadama ita hagoadaia be namo.

4. Dahaka dainai Iehova ese ita dekenai ia henia gaukara ita karaia noho be namo?

⁴ Iesu ese ena aposetolo taudia dekenai nega dokona ai do idia  vara gaudia bona taunimanima edia kara ia herevalaia. Ia diba unai gaudia dainai ena murinai idia raka taudia be haroro gaukara do idia laloa bada lasi. Ena hahediba taudia ia hamaoroa do idia “gima noho.” (Mat. 24:42) Noa ena nega ai, gau momo ese taunimanima edia lalona ia veria dainai, ena hadibaia herevana idia laloa bada lasi. Hari inai negai, ita dekenai unai ia vara diba. (Mat. 24:37-39; 2 Pet. 2:5) Unai dainai, ita ura Iehova ese ita dekenai ia henia gaukara ita karaia noho.

5. Kara 1:6-8 ese haroro gaukara ena bada be edena bamona ia gwauraia?

⁵ Namona be hari Basileia ena sivarai namona harorolaia gaukarana do ita karaia noho. Iesu ia peroveta ia mase murinai, unai gaukara be do ia bada ia lao bona tanobada hegegemadai do idia karaia. (Ioa. 14:12) Iesu ia mase murinai, ena hahediba taudia haida be edia haoda bisinesi dekenai idia giroa lou. Iesu ia toreisi lou murinai, hoa karana ta amo ena hahediba taudia haida ia durua gwarume momo idia veria totona. Unai nega ai, Iesu ese ena hahediba taudia dekenai ia hahedinaraia taunimanima haoda henia gaukarana be gaukara ma haida ia hereaia. (Ioa. 21:15-17) Iesu be kahirakahira guba dekenai do ia daekau neganai, ena hahediba taudia ia hamaoroa ia hamatamaia haroro gaukarana be Israela hanuana dekenai sibona lasi, to daudau gabudia dekenai do idia karaia danu. (Kara 1:6-8 duahia.) Lagani momo murinai, Iesu ese matahanai ta amo aposetolo Ioane dekenai “Lohiabada ena dina lalonai” * do idia vara gaudia ia hahedinaraia. Ioane ese unai matahanai lalonai ia itaia gauna ta be: Aneru ta ese “noho hanaihanai sivarai namona” be “bese ibounai bona iduhu ibounai, gado idauidau, bona kopi idauidau taudia” ibounai dekenai ia harorolaia. (Apok. 1:10; 14:6) Unai ese ia hamomokania, Iehova ia ura hari ita ese haroro gaukara be tanobada hegegemadai do ita karaia ela bona unai gaukara ia doko.

6. Edena dala ai haroro gaukara ita karaia noho diba?

⁶ Iehova ese ita ia durua  noho daladia ita laloa neganai, haroro gaukara do ita karaia noho. Hegeregere, ia ese idia printaia bona intanet ai idia halasia pablikeisen idauidau, idia rekodia odio bona vidio bona JW Broadcasting be ita dekenai ia henia noho. Mani oi laloa, iseda websait ai pablikeisen be gado 1000 mai kahana ai idia halasia! (Mat. 24:45-47) Tanobada ai taunimanima be idia lalotamona lasi, hegeregere politikol bona tomadiho dalanai edia lalohadai be idauidau, bona haida be idia taga bona haida be idia ogogami. To, Dirava ena hesiai taudia 8 milioni mai kahana be lalotamona ai idia noho. Hegeregere, Friday, April 19, 2019 ai, tanobada hegegemadai Witnes taudia ibounai ese dina ena siri ia herevalaia vidio ta idia itaia. Unai hanuaboi ai Iesu ena mase laloatao totona Memorial idia mai taudia ibounai be 20,919,041. Ita be hari idia vara hahenamo idauidau ita abia bona ita itaia dainai, unai ese ita ia doria Basileia harorolaia gaukarana ita karaia noho.

7. Edena dala ai Iesu ena haheitalai ese ita ia durua haroro gaukara ita karaia noho totona?

⁷ Haroro gaukara ita karaia noho totona, Iesu ena haheitalai ita tohotohoa be namo. Iesu be haroro gaukara ia karaia neganai, ia ura lasi gau ta ese ena lalona ia veria. (Ioa. 18:37) Satani ese ia dekenai “tanobada ena basileia ibounai bona edia hairai” ia hahedinaraia neganai ia abia dae lasi, bona ma haida idia ura king ai idia halaoa neganai, unai hahetoho ia dadaraia. (Mat. 4:8, 9; Ioa. 6:15) Kohu momo tahua urana ia dadaraia bona dagedage karadia dainai ia gari lasi. (Luka 9:58; Ioa. 8:59) Hahetoho ita davaria neganai, bema aposetolo Paulo ena sisiba ita laloatao, haroro gaukara do ita karaia noho. Paulo ese Keristani taudia ia hagoadaia Iesu ena haheitalai do idia tohotohoa, bena do idia ‘hesiku lasi bona do idia lalomanoka lasi’!​—Heb. 12:3.

8. Haheauka karana ena anina be dahaka, bona dahaka dainai hari ita haheauka be namo?

⁸ Haheauka karana ena anina be, mai manau ida do ita naria hekwakwanai ta ia ore totona. Hegeregere, ita ura ia vara kara dika ta ia ore, eiava nega daudau lalonai gau namona ta ita naria noho, to ita haheauka be namo. Peroveta tauna Habakuku danu ia ura dikadika Iuda ai idia vara dagedage karadia ibounai do idia ore. (Hab. 1:2) Iesu ena hahediba taudia idia ura “Basileia be maoromaoro do ia hedinarai” bona Roma gavamani ena igui amo do ia ruhadia. (Luka 19:11) Ita ura Dirava ena Basileia ese kara dika do ia kokia bona kara maoromaoro tanobada matamatana do ia mailaia. (2 Pet. 3:13) To, namona be ita haheauka bona Iehova ena nega korikori ita naria. Iehova ese ita dekenai haheauka karana ia hadibaia daladia haida mani ita herevalaia.

9. Edena Baibel sivaraidia ese Iehova ena haheauka karana idia hahedinaraia?

⁹ Haheauka karana dekenai, Iehova be haheitalai hereadaena. Ia ese Noa dekenai nega bada ia henia lagatoi do ia haginia bona “kara maoromaoro ia harorolaia” totona. (2 Pet. 2:5; 1 Pet. 3:20) Iehova be abia hidi ia karaia Sodoma bona Gomora ai kara dika taudia do ia hadikaia ore neganai, Aberahamo ese Iehova ia nanadaia loulou, bona Iehova be ia kamonai. (Gen. 18:20-33) Iehova be lagani momo lalonai, gwau-edeede Israela taudia edia kara ia haheaukalaia. (Neh. 9:30, 31) Hari, Iehova ena haheauka karana ita itaia, badina nega ia henia iena turana ai do idia lao taudia idia “helalo-kerehai” totona. (2 Pet. 3:9; Ioa. 6:44; 1 Tim. 2:3, 4) Iehova ena haheitalai namona ese ita ia durua haroro  bona hahediba taudia halaoa gaukarana lalonai ita haheauka totona. Danu, ia ese Baibel ena sivarai ta amo ita dekenai haheauka karana ia hadibaia.

10. Iamesi 5:7, 8 ai, biru tauna ena haheitalai amo dahaka ita dibaia?

¹⁰ Iamesi 5:7, 8 duahia. Biru tauna ese tubutubu gaudia ia hadoa ena haheitalai ese ita dekenai haheauka karana ia hadibaia. Momokani, tubutubu gaudia haida be idia tubu haraga. To, anina idia havaraia tubutubu gaudia haida be idia tubu haraga lasi. Israela ai, tubutubu gaudia be hua 6 bamona lalonai anina idia havaraia. Biru tauna be October ai medu ia matamaia neganai uhe ia hadoa, bona April ai medu negana ia ore neganai, witi ena anina ia gogoa. (Mar. 4:28) Namona be biru tauna ena haheauka karana ita tohotohoa. To, unai ita karaia totona be mai ena hekwarahi.

11. Edena dala ai haroro gaukara lalonai, haheauka karana ese ita ia durua diba?

¹¹ Ita be goevadae lasi taudia dainai nega momo ita ura iseda gaukara ena anina ia vara haraga. Hegeregere, bema ita ura iseda uma ai tubutubu gaudia ese anina idia havaraia, namona be hanaihanai tano ita geia, uhe ita hadoa, ava ita kokia bona ranu ita henia. Unai hegeregerena, bema ita ura taunimanima be hahediba taudia ai ita halaoa, ita gaukara goada be namo. Namona be nega bada ita atoa bona iseda Baibel stiuden ita durua ma haida inai henia kava lalohadaina idia dadaraia totona. Taunimanima be ita idia kamonai henia lasi neganai, haheauka karana ese ita do ia durua ita lalomanoka lasi totona. To, haida idia kamonai bona idia ura diba ma haida idia abia neganai, ita haheauka danu be namo. Namo lasi Baibel stiuden ta ita doria Dirava ia abidadama henia totona. Nega haida hahediba taudia danu be Iesu ese ia hadibaia gaudia idia lalopararalaia haraga lasi. (Ioa. 14:9) Namona be ita laloatao, taunimanima ita haroro henia bona ita hadibaia, to Dirava sibona ese edia abidadama do ia habadaia.​—1 Kor. 3:6.

12. Iseda witnes lasi varavara ita haroro henidia neganai, edena dala ai haheauka karana ita hahedinaraia diba?

 ¹² Iseda witnes lasi varavara ita haroro henidia neganai, nega haida ia auka ita haheauka totona. Hadibaia Tauna 3:1, 7 ena hakaua herevana ese ita ia durua diba. Ia gwau: “Regerege lasi dekenai ita noho . . . bona do ita herevahereva danu be mai ena nega.” Iseda kara namodia dainai iseda witnes lasi varavara be do idia ura sivarai namona idia kamonai, to namona be ita noho hegaegae idia dekenai Iehova ita herevalaia totona. (1 Pet. 3:1, 2) Mai iseda ura ibounai ida haroro bona hahediba taudia halaoa gaukarana lalonai, namona be taunimanima ibounai bona iseda varavara dekenai danu, haheauka karana ita hahedinaraia.

13-14. Daidia edia haheauka karana ita tohotohoa be namo?

¹³ Baibel ese ia sivarailaia abidadama taudia, bona iseda negai tadikaka taihu edia haheitalai amo haheauka karana ita dibaia diba. Habakuku ia ura Dirava ese kara dika ia haorea, to mai haheauka ida ia gwau: “Egu gima gabuna dekenai do lau gini noho.” (Hab. 2:1, NWT) Aposetolo Paulo ia ura ena hesiai gaukara ia “haorea,” to, mai haheauka ida ‘sivarai namona ia gwauraia guguru.’​—Kara 20:24.

¹⁴ Mani Gilead sikuli idia lao headava tau bona hahine edia sivarai ita laloa. Edia misinari asainmen idia abia bona Witnes momo lasi tanona dekenai idia lao. Unuseniai momo be Keristani lasi taudia bona momo idia ura lasi Baibel idia stadilaia. To, tano haida amo edia Gilead sikuli turadia be idia ruaosi dekenai sivarai idia siaia, bona idia gwau idia be taunimanima momo ida Baibel idia stadilaia bona idia durudia Witnes taudia ai idia lao totona. Herevana edia teritori ai taunimanima idia ura lasi kamonai, unai misinari tau bona hahine be mai haheauka ida idia haroro. Bena lagani eit murinai idia moale, badina edia Baibel stiuden ta be bapatiso ia abia. Habakuku ena haheitalai bona unai misinari tau bona hahine edia sivarai amo dahaka ita dibaia? Unai abidadama taudia be idia hesiku lasi eiava edia imana ia laga-ani lasi, bona edia haheauka karana dainai Iehova ese idia ia hanamoa. Oibe, namona be ‘abidadama bona haheauka karana amo Dirava ese ia gwauhamatalaia gaudia idia abia taudia, do ita tohotohoa.’​—Heb. 6:10-12.

15. Dahaka ese ita ia hagoadaia ita haroro noho totona?

¹⁵ Ita harorolaia sivaraina ita abidadama henia, unai dainai ita ura taunimanima ibounai dekenai ita harorolaia. Oibe, Baibel lalonai idia noho gwauhamata ibounai ita abidadama henia. (Sal. 119:42; Isa. 40:8) Ita itaia Baibel ena peroveta herevadia be hari idia guguru noho. Bona ita itaia taunimanima be Baibel ena sisiba idia badinaia matamaia neganai, edia mauri ia namo ia lao. Unai gaudia dainai ita abia dae momokani, taunimanima ibounai ese Basileia ena sivarai namona idia kamonai be mai anina bada.

16. Salamo 46:1-3 ena hereva bamona, Iehova bona Iesu abidadama henia karana ese edena dala ai ita ia hagoadaia ita haroro noho totona?

¹⁶ Ita be Iehova, ita harorolaia sivaraina ena Badina ita abidadama henia, bona danu ena Basileia ena King ai ia halaoa Tauna, Iesu, ita abidadama henia. (Ioa. 14:1) Herevana dahaka ia vara, to ita diba hanaihanai Iehova be iseda heau mauri gabuna bona ita do ia hagoadaia. (Salamo 46:1-3 duahia.) Danu Iehova ese Iesu dekenai siahu ia henia, unai dainai ita abia dae momokani Iesu be guba amo haroro gaukara ia gunalaia noho.​—Mat. 28:18-20.

17. Dahaka dainai ita haroro noho be mai anina bada. Haheitalai gwauraia.

¹⁷ Iseda abidadama dainai ita abia dae momokani Iehova ese iseda gaukara do ia hanamoa,  bona nega haida ita laloa lasi dalanai unai ia karaia. (Had. 11:6) Hegeregere, dina ta ta taunimanima tausen momo be iseda haroro troli bona teibolo badinai idia hanaia. Unai be haroro dala namona, a? Oibe! Lagani 2014 ena Iseda Basileia Gaukara pepana ta ese iunivesiti stiuden kekeni ta ena sivarai ia hahedinaraia, ia ura Iehova ena Witnes taudia edia histori ia torea. Ia be Kingdom Hall ta ia davaria lasi, to nega ta ena sikuli gabuna ai iseda haroro troli ta ia itaia bona ia ura henia pablikeisen ia abia. Daudau lasi murinai unai kekeni be ia bapatiso bona hari ia be regula painia ta. Unai bamona ekspiriens ese ita ia hagoadaia haroro gaukara ita karaia noho, badina ia hahedinaraia taunimanima be Basileia ena sivarai namona idia tahua noho.

18. Dahaka dainai ita abia dae Basileia harorolaia gaukarana be Iehova ena ura negana ai do ia doko?

¹⁸ Ita abia dae Basileia harorolaia gaukarana be nega korikori ai do ia doko. Mani Noa ena negai ia vara gauna ita laloa. Iehova ia hamomokania Ia be nega maorona ai gaudia ia karaia Tauna. Lagani 120 gunanai Iehova ese Abata do ia mai negana ia makaia. Lagani momo murinai, Iehova ese Noa ia hamaoroa bouti ta do ia haginia. Abata ia do mai lasi neganai, Noa be reana lagani 40 eiava 50 lalonai ia gaukara goada. Herevana taunimanima idia kamonai lasi, to Noa ia haroro ela bona Iehova ese ia hamaoroa bouti lalonai animal ibounai do ia hakaua vareai. Bena, nega korikori ai Iehova ese bouti ena “iduara ia koua.”​—Gen. 6:3; 7:1, 2, 16.

19. Bema iseda imana idia laga-ani lasi, dahaka hahenamo do ita davaria?

¹⁹ Kahirakahira, Iehova ese Basileia ena sivarai namona harorolaia gaukarana do ia hadokoa. Bena ia ese Satani ena tanobada do ia hadikaia ore bona tanobada matamatana do ia mailaia, unuseniai Dirava idia badinaia taudia sibona do idia noho. Unai ia do vara lasi lalonai, namona be Noa, Habakuku, bona edia imana idia laga-ani lasi taudia ma haida edia haheitalai ita tohotohoa. Namona be haroro gaukara ita karaia noho, ita haheauka, bona Iehova bona iena gwauhamata ita abidadama henidia.