1. Edena nega be nega aukana Iehova oi hesiai henia totona?

EDENA nega be nega aukana Iehova oi hesiai henia totona, hekwakwanai momo negana eiava hekwakwanai lasi negana? Momokani, hekwakwanai idia vara neganai, karaharaga Iehova dekenai ita tabekau. To, hekwakwanai be lasi neganai, dahaka ita karaia? Dirava hesiai henia karana ita laloaboio, a? Iehova ese Israela taudia ia sisiba henia, badina unai idia karaia diba.​—Deu. 6:10-12.

2. King Asa be dahaka ia karaia?

² King Asa be haheitalai namona, badina ia be Iehova ia tabekau henia momokani bona mai aonega ida ia kara. Nega aukadia sibona lasi, to maino negadia danu Iehova ia hesiai henia. Asa ena “mauri dinadia ibounai lalonai ia ese Lohiabada ia badinaia noho momokani.” (1 Kin. 15:14) Asa ese Iehova ia badinaia dalana ta be, ia ese Iuda hanuana amo tomadiho koikoi ia kokia. Baibel ia gwau, “ia ese idau dirava edia boubou patadia bona ataiai idia noho tomadiho gabudia ia kokia ore, bona nadi dekenai idia karaia du helagadia ia hamakohia, bona kaivakuku ia utua bona hadikaia.” (2 Siv. 14:3, 5) Danu, ia ese ena tubuna hahine Maka be ena kwini dagina amo ia kokia. Dahaka dainai? Badina ia ese taunimanima ia veria kaivakuku idia tomadiho henia totona.​—1 Kin. 15:11-13.

3. Inai atikol ai dahaka do ita herevalaia?

³ Asa ese tomadiho koikoi ia kokia sibona lasi, to ia ese tomadiho momokani ia haginia, bona Iuda taudia ia durua Iehova dekenai  idia giroa lou totona. Iehova ese Asa bona Iuda taudia ia hanamoa bona maino * ai idia noho. Asa ena lohia lagani 10 lalonai, ‘tano be maino ai ia noho.’ (2 Siv. 14:1, 4, 6) Inai atikol ai, Asa ese unai maino negana ia gaukaralaia dalana do ita herevalaia. Bena Keristani taudia ginigunadia ese Asa bamona, maino negana idia gaukaralaia dalana do ita herevalaia. Bona dokonai, inai henanadai do ita haerelaia: Bema emu tano ai gavamani ese tomadiho idia taravatu lasi, edena dala ai oi ese unai maino negana oi gaukaralaia namonamo diba?

4. Sivarai Iharuana 14:2, 6, 7 ena hereva bamona, Asa ese maino negana be edena bamona ia gaukaralaia?

⁴ Sivarai Iharuana 14:2, 6, 7 duahia. Asa ese taunimanima ia hamaoroa Iehova ese “tano kahana ibounai dekenai maino [be idia] dekenai ia henia.” To, Asa ia gwau lasi unai maino negana be laga-ani negana. Lasi, to ia ese maoromaoro siti badadia, magu, kohoro bona magu edia iduara ia haginia. Iuda taudia dekenai ia gwau: “Tano be ita dekenai ia do noho.” Asa ena hereva anina be dahaka? Anina be Dirava ese idia dekenai ia henia tanona ai, taunimanima be mai moale ida do idia loaloa bona haginia gaukara idia karaia diba, bona edia inai taudia ese do idia tuari henidia lasi. Asa ese taunimanima ia hagoadaia, namona be unai maino negana idia gaukaralaia namonamo.

5. Dahaka dainai Asa ese ena tuari taudia bona tuari kohudia ia hegaegaelaia?

⁵ Asa ese unai nega ia gaukaralaia danu ena tuari taudia bona tuari kohudia ia hegaegaelaia totona. (2 Siv. 14:8) Anina be ia ese Iehova ia abidadama henia lasi, a? Lasi, to Asa ia diba ia be king dainai iena maduna be  taunimanima do ia hegaegaelaia, vaira negai do idia davaria dika idauidau idia hanaia totona. Asa ia diba, Iuda ai ia noho maino negana be do ia noho daudau lasi, bona unai ia vara momokani.

6. Keristani ginigunadia ese maino negana be edena bamona idia gaukaralaia?

⁶ Ena be Keristani ginigunadia be nega momo dagedage idia davaria, to idia be maino negadia idia moalelaia danu. Unai negadia ai dahaka idia karaia? Unai abidadama tatau bona hahine be sivarai namona harorolaia gaukarana idia hadokoa lasi. Kara bukana ia gwau, idia be ‘Iehova gari henia dalanai idia raka.’ Idia ese sivarai namona idia harorolaia noho, unai dainai “kongrigeisen be ia bada ia lao.” Unai ese ia hahedinaraia maino negana ai idia haroro goadagoada karana be Iehova ese ia hanamoa.​—Kara 9:26-31.

7-8. Dala ia kehoa neganai Paulo bona ma haida be dahaka idia karaia?

⁷ Keristani ginigunadia be nega idauidau ai sivarai namona idia harorolaia. Hegeregere, aposetolo Paulo ia laloparara Efeso ai gaukara ena iduara badana ia kehoa neganai, unai nega ia gaukaralaia unai siti ai taunimanima ia haroro henia bona hahediba taudia ai ia halaodia.​—1 Kor. 16:8, 9.

⁸ Lagani 49 C.E. ai, aposetolo taudia bona elda taudia be kopina utua ena hepapahuahu idia hamaoromaoroa neganai, Paulo bona Keristani taudia ma haida ese unai nega namona idia gaukaralaia idia haroro totona. (Kara 15:23-29) Unai hepapahuahu ena disisen be kongrigeisen dekenai idia hadibaia murinai, hahediba taudia idia hekwarahi bada “Iehova ena hereva ena sivarai namona idia harorolaia” totona. (Kara 15:30-35) Dahaka ia vara? Baibel ia gwau, “kongrigeisen taudia edia abidadama ia goada ia lao bona dina ta ta ai edia namba ia bada daekau.”​—Kara 16:4, 5.

9. Tano momo ai dahaka ia vara noho, bona edena henanadai ita laloa be namo?

⁹ Hari tano momo ai, gau ta ese iseda haroro gaukara ia koua lasi. Oi be unai bamona tano ta ai oi noho, a? Bema oibe, sibona oi nanadaia, ‘Edena dala ai lau ese inai maino negana lau gaukaralaia noho?’ Iehova ena taunimanima dekenai inai nega dokona be nega idauna, badina tanobada hegegemadai haroro bona hahediba gaukarana dekenai idia bisi bada herea, guna bamona lasi. (Mar. 13:10) Unai gaukara lalonai gau momo ita karaia diba!

10. Timoteo Iharuana 4:2 ese ita ia hagoadaia dahaka ita karaia totona?

¹⁰ Maino negana be edena dala ai oi gaukaralaia namonamo diba? (2 Timoteo 4:2 duahia.) Mani oi laloa, oi eiava emu ruma bese tauna ta be gau haida umui haidaua unai amo haroro gaukara umui habadaia, eiava umui painia diba, a? Hari be moni eiava kohu momo haboua negana lasi, badina hisihisi badana amo ita roho mauri neganai, unai kohu do ita abidia lao lasi.​—Aon. 11:4; Mat. 6:31-33; 1 Ioa. 2:15-17.

11. Pablisa haida be dahaka idia karaia taunimanima momo dekenai sivarai namona idia harorolaia totona?

¹¹ Pablisa momo be gado matamata idia dibaia, unai amo haroro bona hadibaia gaukarana dekenai idia gaukaralaia diba. Edia haroro gaukara durua totona Dirava ena orea ese Baibel pablikeisen be gado momo ai ia halasia. Hegeregere, lagani 2010 ai, gado 500 bamona ai idia hahanaia pablikeisen idia noho. To hari, unai namba ia daekau lao gado 1,000 ia hanaia!

12. Taunimanima be edia gado korikori ai Basileia ena sivarai idia kamonai neganai, dahaka namo idia davaria? Haheitalai gwauraia.

 ¹² Taunimanima be edia gado korikori ai Dirava ena Hereva momokani idia kamonai neganai, dahaka namo idia davaria? U.S.A ai, taihu ta ese rijinol hebouhebouna ta amo ia abia heduru mani ita laloa. Unai hebouhebou be Kinyarwanda gado ai idia karaia, bona ia be Rwanda, Congo (Kinshasa), bona Uganda tanodia ai idia gaukaralaia. Hebouhebou murinai, Kinyarwanda gado ia hereva taihu ia gwau: “Ena be lagani 17 idia hanaia vadaeni United States dekenai lau mai, to inai be egu nega ginigunana hebouhebou ena tok ibounai lau lalopararalaia.” Momokani, unai taihu be ena gado korikori ai program ia kamonai neganai, ena kudouna ia hamarerea momokani. Bema dala ia kehoa, oi ura gado ma ta oi dibaia bona emu teritori ai ma haida oi durua, a? Emu teritori ai ta be ena gado korikori ai oi haroro henia neganai do ia ura kamonai, ani? Emu hekwarahi ese anina namona do ia havaraia.

13. Russia ai iseda tadikaka ese edena dala ai maino negana idia gaukaralaia?

¹³ Iseda tadikaka taihu momo be gavamani ese taravatu aukadia idia atoa dainai idia haroro be auka. Hegeregere, mani iseda tadikaka Russia ai ita laloa. Lagani momo ai dagedage idia davaria, to March 1991 ai gavamani ese gwaumaoro idia henia edia tomadiho gaukara idia karaia totona. Unai negai, Russia ai Basileia idia harorolaia taudia be 16,000 bamona. Lagani 20 murinai, unai namba be ia bada daekau 160,000 ia hanaia! Unai ese ia hahedinaraia, dala ia kehoa neganai iseda tadikaka be mai aonega ida idia haroro. To, unai maino negana be ia noho daudau lasi. Ena be unai tano ai gau haida idia idau, to idia be mai ura bada ida Iehova idia hesiai henia noho. Dala idauidau idia gaukaralaia noho Iehova idia hesiai henia totona.

14-15. Edena dala ai Iehova ese ena siahu ia gaukaralaia Asa ia durua totona?

¹⁴ Asa ena negai, maino negana be ia noho daudau lasi. Etiopia amo tuari  taudia 1 milioni bamona, idia mai. Edia tuari gunalaia tauna, Sera, ia laloa ia bona ena tuari oreana ese Iuda do idia halusia. King Asa ia laloa lasi ena tuari oreana ia habadaia be namo, to ia be Iehova Dirava dekenai ia tabekau. Asa ia guriguri: “[Iehova], aiemai Dirava e, mani ai do oi durua, badina oi dekenai ai abidadama henia noho inai, bona oiemu ladana dekenai inai tuari orea badana do ai tuari henia.”​—2 Siv. 14:11.

¹⁵ Ena be Etiopia ena tuari taudia edia namba be nega rua amo Asa ena tuari taudia ia hanaia, to Asa ia diba Iehova be mai ena siahu bona Iena taunimanima ia durua diba. Oibe, Iehova ese ena taunimanima ia durudia bona Etiopia taudia idia halusia.​—2 Siv. 14:8-13.

16. Edena bamona ita diba maino negana be do ia noho daudau lasi?

¹⁶ Ena be vaira nega ai ita ta ta dekenai do ia vara gauna ita diba lasi, to ita diba Dirava ena taunimanima ese idia moalelaia maino be do ia noho daudau lasi. Laloatao, Iesu ia gwau dina gabediai, ena hahediba taudia be “bese ibounai ese . . . do idia inai henia.” (Mat. 24:9) Unai hegeregerena, Paulo ia gwau, “Keriso ida idia hakapua bona idia ura Dirava badinaia karana idia hahedinaraia taudia ibounai be dagedage do idia davaria danu.” (2 Tim. 3:12) Satani be ia “badu dikadika,” bona bema ita laloa ita be ena badu karana ita dadaraia diba, ita be sibona ita koia noho.​—Apok. 12:12.

17. Dahaka gaudia ese iseda abidadama idia tohoa diba?

¹⁷ Kahirakahira, ita ibounai ese iseda abidadama dekenai hahetoho do ita davaria. Kahirakahira, tanobada ai “hisihisi badana do ia vara, tanobada ena matamaia negana amo ema bona hari, unai bamona hisihisi ta ia vara lasi.” (Mat. 24:21) Unai nega ai, reana iseda famili taudia be ita do idia dagedage henia, bona gavamani ese iseda haroro gaukara do idia taravatua. (Mat. 10:35, 36) Ita be Asa bamona, Iehova ena heduru bona gimaia karana do ita abidadama henia, a?

18. Heberu 10:38, 39 ena hereva bamona, vaira nega ai do idia vara gaudia ita haheaukalaia totona, dahaka ese ita do idia durua?

¹⁸ Hari, Iehova ese ita ia hegaegaelaia noho  vaira negai idia vara gaudia ita haheaukalaia totona. Ia ese “igui hesiai tauna mai ena kamonai bona mai ena kara maoromaoro” ia hakaua noho, unai amo “nega korikori ai” ita dekenai aniani idia henia. Unai ese ita ia durua iseda abidadama dekenai ita gini goada totona. (Mat. 24:45) To, namona be ita ta ta ita gaukara goada iseda abidadama Iehova dekenai ita hagoadaia totona.​—Heberu 10:38, 39 duahia.

19-20. Sivarai Ginigunana 28:9 ena hereva hegeregerena, ita ta ta ese dahaka henanadai ita laloa dobu be namo, bona dahaka dainai?

¹⁹ King Asa bamona, namona be ‘Iehova do ita tahua.’ (2 Siv. 14:4; 15:1, 2) Iehova ita tahua matamaia totona, namona be ia ita dibaia bona bapatiso ita abia. Namona be gau ibounai ita karaia iseda lalokau Iehova dekenai ita hagoadaia totona. Unai ita karaia eiava lasi ita diba totona, namona be sibona ita nanadaia, ‘Lau be nega ibounai kongrigeisen hebou dekenai lau lao, a?’ Iehova ena orea ese ia hegaegaelaia heboudia dekenai ita lao neganai, hagoadaia herevadia bona tadikaka taihu edia hebamo karana amo goada ita abia. (Mat. 11:28) Sibona ita nanadaia danu, ‘Lau be hanaihanai Baibel lau stadilaia, a?’ Bema oi be emu famili ida oi noho, wiki ta ta ai nega oi atoa emui ruma bese tomadiho umui karaia totona, a? Eiava sibona oi noho neganai, nega oi atoa sibona emu stadi oi karaia totona, a? Danu, oi be haroro bona hadibaia gaukarana oi goadalaia, a?

²⁰ Dahaka dainai ita ta ta ese unai henanadai ita lalodia dobu be namo? Baibel ia gwau, Iehova be iseda lalona bona kudouna ia tahua, unai dainai ita danu be unai ita karaia be namo. (1 Sivarai 28:9 duahia.) Bema ita itaia iseda tahua gauna, kara, eiava lalohadai dekenai senisi haida ita karaia be namo, namona be Iehova ena heduru ita noia unai ita karaia totona. Hari be nega namona vaira nega ai do idia vara hahetoho totona ita hegaegae. Namona be inai maino negana oi gaukaralaia namonamo!