1. Malaki 3:16 hegeregerena, Iehova be edena buka ia torea noho, bona unai buka lalonai dahaka ia noho?

 LAGANI tausen momo lalonai, Iehova be spesel bukana ta ia torea. Inai buka ai ladana haida idia noho, bona unuseniai abidadama tauna ginigunana Abela ena ladana ia noho guna. * (Luka 11:50, 51) Unai nega amo, Iehova be unai buka ai ladana ma haida ia torea, bona hari lada milioni momo idia noho. (Malaki 3:16 duahia.) Baibel ese unai buka ia gwauraia, “mauri bukana.”​—Apok. 3:5; 13:8.

2. Daidia edia ladana be mauri bukana ai ia noho, bona unai mauri bukana ai iseda ladana ia noho totona dahaka ita karaia be namo?

² Inai spesel bukana ai mai hemataurai ida Iehova idia tomadiho henia bona ena ladana idia laloa bada taudia edia ladana ia noho. Idia dekenai dala ia noho mauri hanaihanai idia abia totona. Bema Dirava ena Natuna, Iesu Keriso, ena mauri davana dainai Iehova ida iseda hetura karana ita hagoadaia, Dirava ese mauri bukana ai iseda ladana ia torea diba. (Ioa. 3:16, 36) Ena be iseda helaro be guba ai o tanobada ai, to ita ura Dirava ese iseda ladana be unai buka ai ia torea.

3-4. (a) Bema hari iseda ladana be mauri bukana ai ia noho, mauri hanaihanai do ita abia, a? Herevalaia. (b) Inai atikol bona atikol 40 ai dahaka do ita herevalaia?

³ Mauri bukana ai edia ladana idia noho taudia ibounai be mauri hanaihanai do idia abia, a? Haere be Esodo 32:33 ai Iehova ese Mose dekenai ia henia herevana amo ita diba. Iehova  ia gwau: “Lau dekenai ia kara dika tauna ena ladana be egu buka amo do lau kokia.” Unai dainai, hari mauri bukana ai idia noho ladana be Dirava ese ia kokia diba, unai be hegeregere Iehova ese unai ladana be pensolo amo ia torea. (Apok. 3:5) Namona be ita gaukara goada mauri bukana ai iseda ladana ia noho hanaihanai totona, unai be hegeregere Iehova ese iseda ladana be peni amo ia torea.

⁴ Reana inai henanadai haida ita laloa. Hegeregere, Dirava ese mauri bukana ai edia ladana ia torea taudia bona edia ladana ia torea lasi taudia dekenai Baibel be dahaka ia gwau? Unai buka ai edia ladana ia noho taudia be edena nega ai mauri hanaihanai do idia abia? Iehova idia diba lasi bena idia mase taudia be edena bamona? Dala ia noho mauri bukana ai edia ladana ia noho totona, a? Unai henanadai be inai atikol bona atikol 40 ese do idia haerelaia.

DAIDIA EDIA LADANA BE BUKA LALONAI IA NOHO?

5-6. (a) Filipi 4:3 hegeregerena, daidia edia ladana be mauri bukana ai ia noho? (b) Edena nega ai, edia ladana be mauri bukana ai do ia noho hanaihanai?

⁵ Daidia edia ladana be mauri bukana ai ia noho? Unai henanadai haerelaia totona, ita ese grup ibounai 5 do ita herevalaia. Idia huanai, haida edia ladana be mauri bukana ai ia noho, bona haida be lasi.

⁶ Grup ginigunana be, Iesu ida guba dekenai do idia lohia taudia. Edia ladana be hari mauri bukana ai ia noho, a? Oibe. Aposetolo Paulo ese Filipi ai ena ‘gaukara hebou taudia’ dekenai ia gwauraia herevana hegeregerena, Dirava ese ia boiria horoa taudia edia ladana be hari mauri bukana ai ia noho, idia be Iesu ida guba dekenai do idia lohia. (Filipi 4:3 duahia.) To Dirava ese mauri bukana amo edia ladana ia kokia lasi totona, Ia idia  abidadama henia noho be namo. Bena edia maka ginigabena idia abia murinai, edia ladana be mauri bukana lalonai do ia noho hanaihanai. Unai be idia do mase lasi eiava hisihisi badana ia do matamaia lasi neganai do ia vara.​—Apok. 7:3.

7. Apokalupo 7:16, 17 hegeregerena, edena negai hutuma bada taudia edia ladana be mauri bukana ai do ia noho hanaihanai?

⁷ Grup iharuana be, hutuma bada taudia. Edia ladana be hari mauri bukana ai ia noho, a? Oibe. Aramagedono amo idia roho mauri murinai, edia ladana be mauri bukana ai do ia noho, a? Oibe. (Apok. 7:14) Iesu ia gwau unai mamoe bamona taudia be “mauri hanaihanai do idia abia.” (Mat. 25:46) To, Aramagedono amo idia roho mauri taudia be maoromaoro mauri hanaihanai do idia abia lasi. Edia ladana be mauri bukana ai do ia noho, to unai be hegeregere pensolo amo ia torea. Lagani 1,000 Lohia Negana lalonai, Iesu ese “idia do ia naria bona idia lohilohi mauri ranu dekenai idia do ia hakaua lao.” Keriso ena hakaua dalana idia badinaia bona Iehova idia abidadama henia ela bona dokona taudia edia ladana be mauri bukana ai do ia noho hanaihanai.​—Apokalupo 7:16, 17 duahia.

8. Daidia edia ladana be mauri bukana ai ia noho lasi, bona idia dekenai dahaka do ia vara?

⁸ Grup ihatoina be, nanigosi bamona taudia, idia be Dirava ese Aramagedono ai do ia hadikaia ore. Edia ladana be mauri bukana ai ia noho lasi. Iesu ia gwau idia be “do idia mase ela bona hanaihanai.” (Mat. 25:46) Lauma helaga ena heduru amo, Paulo ia gwau, unai taudia be Dirava ese “do ia hahemaoro henidia. Idia be do idia ore momokani ela bona hanaihanai.” (2 Tes. 1:9; 2 Pet. 2:9) Danu, idaunega amo ema bona hari, mai ura ida lauma helaga idia hahisia taudia be mauri hanaihanai do idia abia lasi, to Dirava ese idia do ia hadikaia ore momokani. Unai ese ia hahedinaraia, idia be do idia toreisi lou lasi. (Mat. 12:32; Mar. 3:28, 29; Heb. 6:4-6) Mani tanobada ai do idia toreisi lou taudia edia grup rua ita herevalaia.

DO IDIA TOREISI LOU TAUDIA

9. Kara 24:15 hegeregerena, tanobada ai edena grup rua do idia toreisi lou, bona unai grup rua edia idau be dahaka?

⁹ Baibel ese grup rua ia herevalaia, unai be “kara maoromaoro taudia” bona “kara maoromaoro lasi taudia,” idia be mauri hanaihanai abia totona tanobada dekenai do idia toreisi lou. (Kara 24:15 duahia.) “Kara maoromaoro taudia” be, idia do mauri noho lalonai Iehova idia hesiai henia taudia ia herevalaia. To, “kara maoromaoro lasi taudia” be, Iehova idia hesiai henia lasi taudia ia herevalaia. Oibe, nega momo edia kara amo idia hahedinaraia idia be kara maoromaoro idia badinaia lasi. Unai grup rua be do idia toreisi lou dainai, ita gwau diba edia ladana be mauri bukana ai ia noho vadaeni, a? Unai henanadai ita haerelaia totona, mani unai grup ta ta ita herevalaia.

10. Dahaka dainai “kara maoromaoro taudia” do idia toreisi lou, bona idia haida be dahaka do idia karaia? (Tanobada ai do ia vara toreisi lou dekenai diba ma haida abia totona, inai magasin lalonai atikol ladana, “Duahia Taudia Edia Henanadai” itaia danu.)

¹⁰ Grup namba 4 be, “kara maoromaoro taudia.” Idia do mase lasi neganai, Dirava ese mauri bukana ai edia ladana ia torea. Idia mase neganai, Dirava ese unai buka amo edia ladana ia kokia, a? Lasi, badina Iehova ese idia be “mauri” noho taudia bamona ia laloa. Iehova “be mase taudia edia Dirava lasi, to mauri taudia edia Dirava, badina ia dekenai idia ibounai be idia mauri noho.”  (Luka 20:38) Unai ena anina be kara maoromaoro taudia be tanobada ai idia toreisi lou neganai, edia ladana be mauri bukana ai do ia noho, to pensolo amo idia torea bamona. (Luka 14:14) Unai toreisi lou taudia haida be “tanobada ibounai ena lohia taudia” ai do idia lao.​—Sal. 45:16.

11. “Kara maoromaoro lasi taudia” be dahaka heduru do idia abia guna, unai amo Dirava ese mauri bukana ai edia ladana ia torea?

¹¹ Grup namba 5 be, “kara maoromaoro lasi taudia.” Reana idia be Iehova ena taravatu idia diba lasi dainai, idia do mase lasi neganai kara maoromaoro idia badinaia lasi. Unai dainai Dirava ese mauri bukana ai edia ladana ia torea lasi. To Dirava ese idia do ia hatoreaisi lou, unai amo idia dekenai dala do ia noho mauri bukana ai edia ladana ia torea totona. Unai “kara maoromaoro lasi taudia” be ta ese idia ia durua be namo. Idia do mase lasi neganai, idia haida be kara dika badadia idia karaia. Unai dainai, Iehova ena taravatu idia badinaia dalana dekenai diba idia abia be namo. Unai ia vara totona, Dirava ena Basileia ese tanobada ai hadibaia gaukara badana do ia hakaua.

12. (a) Daidia ese kara maoromaoro lasi taudia do idia hadibaia? (b) Idia dibaia gaudia idia badinaia lasi taudia dekenai dahaka do ia vara?

¹² Daidia ese kara maoromaoro lasi taudia do idia hadibaia? Hutuma bada bona idia toreisi lou kara maoromaoro taudia ese hadibaia gaukarana do idia karaia. Dirava ese mauri bukana ai kara maoromaoro lasi taudia edia ladana ia torea totona, Iehova idia tura henia bona badinaia be namo. Iesu Keriso bona horoa taudia ese do idia itaia bema kara maoromaoro lasi taudia be idia dibaia gaudia idia badinaia noho eiava lasi. (Apok. 20:4) Unai heduru idia abia dae lasi taudia be do idia hamasea, ena be edia mauri lagani be 100 ia abia. (Isa. 65:20) Iehova bona Iesu be kudouna idia itaia diba, unai dainai ta be hegeregere lasi tanobada matamatana ai dika ia havaraia totona.​—Isa. 11:9; 60:18; 65:25; Ioa. 2:25.

 MAURI BONA HAHEMAORO ENA TOREISI LOU

13-14. (a) Guna, Iesu ena hereva Ioane 5:29 dekenai be edena bamona ita lalopararalaia? (b) Unai siri amo dahaka ita dibaia?

¹³ Iesu ese tanobada ai do idia toreisi lou taudia ia herevalaia danu. Hegeregere, ia gwau: “Nega ta ia mai noho, gara gabudia ai idia noho taudia ibounai ese ena gadona do idia kamonai bona do idia raka-lasi. Kara namo idia karaia taudia be do idia toreisi lou mauri abia totona, to kara dika idia karaia taudia be do idia toreisi lou hahemaoro abia totona.” (Ioa. 5:28, 29) Iesu ena hereva ena anina be dahaka?

¹⁴ Guna unai siri ita lalopararalaia dalana be, Iesu ese mase taudia idia toreisi lou murinai do idia karaia gaudia ia herevalaia. Anina be, haida be do idia toreisi lou bona kara namo do idia karaia, to ma haida be do idia toreisi lou bona kara dika do idia karaia. To Iesu ia gwau lasi gara gabuna amo idia raka-lasi taudia be kara namodia do idia karaia eiava kara dikadia do idia karaia. Iesu be idia karaia vadaeni karadia ia herevalaia. Ia gwau haida be “kara namo idia karaia” bona haida be “kara dika idia karaia.” Unai be idia do mase lasi neganai idia karaia karadia ia herevalaia. Bona unai be maoro, badina tanobada matamatana ai ta be kara dikadia do ia karaia lasi. Unai dainai, kara maoromaoro lasi taudia ese kara dikadia be idia do mase lasi neganai idia karaia. Vadaeni edena dala ai, Iesu ena hereva “toreisi lou mauri abia totona” bona “toreisi lou hahemaoro abia totona” ita lalopararalaia?

15. Daidia “do idia toreisi lou mauri abia totona,” bona dahaka dainai?

¹⁵ Kara maoromaoro taudia be idia do mase lasi neganai kara namo idia karaia taudia. Idia be “do idia toreisi lou mauri abia totona,” badina Dirava ese mauri bukana ai edia ladana ia torea vadaeni. Unai ena anina be Ioane 5:29 ese ia herevalaia “kara namo idia karaia taudia,” bona Kara 24:15 ese ia herevalaia “kara maoromaoro taudia” be idia hegeregere. Unai siri ruaosi edia hereva ese Roma 6:7 ena hereva ia hamomokania, ia gwau: “Ia mase vadaeni tauna be ena kara dika amo ia ruhaia.” Unai dainai, kara maoromaoro taudia idia mase neganai, Iehova ese edia dika ia gwauatao, to idia do mauri lalonai idia hahedinaraia abidadama karana ia laloatao. (Heb. 6:10) Oibe, Dirava ese mauri bukana ai unai kara maoromaoro taudia edia ladana ia kokia lasi totona, ia idia badinaia noho be namo.

16. Inai hereva, “do idia toreisi lou hahemaoro abia totona” ena anina be dahaka?

¹⁶ Idia do mase lasi neganai kara dika idia karaia taudia be edena bamona? Ena be idia mase neganai Dirava ese edia dika ia gwauatao, to idia do mauri lalonai idia be Iehova idia hesiai henia lasi. Edia ladana be mauri bukana ai ia noho lasi. Unai dainai, “kara dika idia karaia taudia” be Kara 24:15 ese ia herevalaia “kara maoromaoro lasi taudia.” Idia be “do idia toreisi lou hahemaoro abia totona.” * Anina be, Iesu ese kara maoromaoro lasi taudia edia kara do ia tahua namonamo. (Luka 22:30) Bona nega ia hanaia lalonai, Iesu do ia diba bema idia be hegeregere Dirava ese mauri bukana ai edia ladana ia torea eiava lasi. Bema unai kara maoromaoro lasi taudia be edia kara dikadia idia dadaraia bona Iehova idia badinaia noho, Ia ese mauri bukana ai edia ladana do ia torea.

17-18. Tanobada ai idia toreisi lou taudia ibounai be dahaka do idia karaia, bona Apokalupo 20:12, 13 ese edena “kara” ia herevalaia?

 ¹⁷ Ena be do idia toreisi lou taudia be guna kara maoromaoro idia karaia eiava lasi, to idia ese lagani 1,000 lalonai lokua toretore matamatadia ai idia noho taravatu do idia badinaia be namo. Aposetolo Ioane ese matahanai dekenai ia itaia gauna ia herevalaia, ia gwau: “Mase taudia lau itaia, ladana bada bona ladana maragi taudia, idia be terona vairanai idia gini bona Dirava ese lokua toretoredia ia kehoa. To lokua toretore ma ta ia kehoa danu, unai be mauri bukana. Bena mase taudia edia kara, mauri bukana lalonai idia torea gaudia hegeregerena, ia hahemaoro henia.”​—Apok. 20:12, 13.

¹⁸ Toreisi lou taudia be edena “kara” dainai Dirava ese do ia hahemaoro henia? Idia do mase lasi neganai idia karaia karadia dainai do ia hahemaoro henia, a? Lasi! Laloatao, idia mase neganai Dirava ese edia kara dika gunadia ia gwauatao. Unai dainai inai hereva, “edia kara” be guna idia karaia karadia ia herevalaia lasi. To, tanobada matamana ai diba idia abia noho lalonai idia karaia karadia ia herevalaia. Danu abidadama taudia Noa, Samuela, Davida, bona Daniela ese Iesu Keriso do idia dibaia bona ena boubou gauna idia abidadama henia be namo. Bema unai taudia ese diba do idia abia noho, vadaeni kara maoromaoro lasi taudia ese gau momo idia dibaia noho be namo!

19. Mauri bukana ai edia ladana ia noho lasi taudia dekenai dahaka do ia vara?

¹⁹ Mauri bukana ai edia ladana ia noho lasi taudia dekenai dahaka do ia vara? Apokalupo 20:15 ia gwau: “Mauri bukana lalonai edia ladana idia torea lasi taudia be lahi gohuna lalonai ia negea diho.” Oibe, Dirava ese idia do ia hadikaia ore momokani. Unai dainai, gau badana be ita gaukara goada mauri bukana ai iseda ladana ia noho bona do ia noho hanaihanai totona!

20. Lagani 1,000 Lohia Negana lalonai, dahaka hadibaia gaukara badana do ia vara? (Rau 1 ena laulau itaia.)

²⁰ Lagani 1,000 Lohia Negana be moale negana, ani? Unai negai Dirava ena taunimanima ese tanobada dekenai hadibaia gaukara badana do idia karaia. To, unai negai Dirava ese kara maoromaoro bona kara maoromaoro lasi taudia edia kara do ia tahua namonamo danu. (Isa. 26:9; Kara 17:31) Unai hadibaia gaukarana be edena bamona do ia vara? Stadi atikol 40 ese ita do ia durua, unai hadibaia gaukarana ita lalopararalaia bona laloa bada totona.