1. Dahaka dainai momo be ta idia trast lasi karana dekenai ita hoa lasi?

 SATANI ena tanobada ai idia noho taudia idia diba lasi daika do idia trast. Badina nega momo bisinesi taudia, politikol oreadia, bona tomadiho gunalaia taudia edia kara dainai idia lalohisihisi. Momo idia laloa edia turadia, neiba, bona edia famili taudia idia trast diba lasi. Unai kara dekenai ita hoa lasi be namo. Badina Baibel ia peroveta: “Dina gabedia ai . . . taunimanima be . . . ma haida do idia badinaia lasi, . . . ladana do idia hadikaia, . . . edia turadia edia mauri hadikaia dalana do idia karaia.” Unai ena anina be taunimanima ese Satani ena kara idia tohotohoa, ia be inai nega oromana ena dirava bona ita trast diba lasi.​—2 Tim. 3:1-4; 2 Kor. 4:4.

2. (a) Daika ita abidadama henia momokani be namo? (b) Haida be dahaka idia laloa?

² To, ita be Keristani taudia dainai ita diba Iehova ita abidadama henia momokani. (Ier. 17:7, 8) Ita abia dae momokani ia ese ita ia lalokau henia bona ena turadia “do [ia] rakatania lasi.” (Sal. 9:10) Danu Keriso Iesu ita abidadama henia, badina ita totona ena mauri ia henia. (1 Pet. 3:18) Bona ita dekenai idia vara gaudia amo ita laloparara Baibel ese hakaua hereva namodia ia henia. (2 Tim. 3:16, 17) Ita diba momokani Iehova, Iesu, bona Baibel, ita abidadama henia be namo. To reana haida idia laloa nega ibounai kongrigeisen dekenai tadikaka bona taihu do idia trast eiava lasi. Bema haere be oibe, dahaka dainai idia ita trast be namo?

3. Dahaka hahenamo badana ita abia? (Mareko 10:29, 30)

³ Iehova ese ita ia abia hidi, Ia idia tomadiho henia ruma besena lalonai ita noho totona. Unai be hahenamo badana ta, bona namo ia havaraia! (Mareko 10:29, 30 duahia.) Tanobada  hegegemadai, tadikaka bona taihu be ita hegeregerena Iehova idia lalokau henia, bona idia gaukara goada Iena taravatu idia badinaia totona. Ena be iseda gado, bese, bona dabua ena toana be idauidau, to nega ginigunana idia ita hedavari henia neganai, idia ita lalokau henia. Bona ita ura bada idia ida iseda guba Tamana ita hanamoa bona tomadiho henia.​—Sal. 133:1.

4. Dahaka dainai iseda tadikaka taihu ida lalotamona ai ita noho be namo?

⁴ Hari be nega namona iseda tadikaka taihu ida lalotamona ai ita noho totona. Nega haida, ita idia durua iseda abidadama ia tohoa gaudia ita haheaukalaia totona. (Roma 15:1; Gal. 6:2) Danu ita idia hagoadaia Iehova ita hesiai henia bona tura henia noho totona. (1 Tes. 5:11; Heb. 10:23-25) Bema iseda inai tauna Satani Diabolo bona ena taunimanima ita dadaraia totona tadikaka bona taihu ese ita idia durua lasi, dahaka hemami do ita abia? Kahirakahira Satani bona ia biagua taudia ese Dirava ena hesiai taudia do idia tuari henia. To unai nega ai do ita moale bada, badina iseda tadikaka bona taihu be ita do idia durua!

5. Dahaka dainai haida dekenai ia auka tadikaka bona taihu idia trast totona?

⁵ To, haida dekenai ia auka tadikaka bona taihu idia trast totona, badina reana edia hunia herevana be ma haida dekenai idia gwauraia eiava gwauhamata idia badinaia lasi. Eiava reana kongrigeisen ai ta ena hereva o kara ese idia ia hahisia bada. Bema unai ia vara, ia auka ma haida ita trast totona. Dahaka ese ita do ia durua iseda tadikaka taihu ita trast noho totona?

6. Edena dala ai lalokau ese ita ia durua iseda trast karana ita hagoadaia totona? (1 Korinto 13:4-8)

⁶ Lalokau dainai ta ita trast diba. Korinto Ginigunana karoa 13 ese lalokau be dala idauidau ai ia herevalaia, unai ese ita ia durua ma haida  ita trast noho totona. (1 Korinto 13:4-8 duahia.) Hegeregere, siri 4 ia gwau “lalokau be ia haheauka bona ia hebogahisi.” Ena be Iehova ena vairanai kara dika ita karaia, to ia haheauka. Unai dainai, bema iseda tadikaka o taihu edia hereva o kara amo ita idia habadua o hahisia, namona be ita haheauka. Siri 5 ia gwau: “Lalokau be . . . ia badu haraga lasi. Bona ia be ta ena kerere ia laloatao noho lasi.” Bema ‘kerere ita laloatao noho,’ anina be, iseda tadikaka bona taihu ese ita idia hahisia karadia ita laloa loulou. Hadibaia Tauna 7:9 ia gwau ‘ita badu haraga lasi’ be namo. Efeso 4:26 dekenai idia noho herevadia ita badinaia be mai ena namo, ia gwau: “Dina ia do diho lasi neganai, emui badu ia ore be namo”!

7. Edena dala ai Mataio 7:1-5 ena hakaua herevana ese ita ia durua, ma haida ita trast noho totona?

⁷ Iehova ese iseda tadikaka bona taihu ia laloa hegeregerena idia ita laloa neganai, idia dekenai iseda trast karana ita hagoadaia diba. Dirava ese idia ia lalokau henia bona edia kerere ia laloatao lasi. Bona ita danu be unai bamona ita karaia be namo. (Sal. 130:3) Tadikaka bona taihu edia kerere ita laloa lasi, to ita hekwarahi edia kara namodia ita itaia bona idia karaia diba gau namodia ita laloa. (Mataio 7:1-5 duahia.) Namona be ita abia dae idia ura lasi ita idia hahisia, badina lalokau be “gau ibounai ia abidadama henia.” (1 Kor. 13:7) Unai siri ia gwau lasi Iehova ia ura badina kereredia dainai ma haida ita trast, to ia ura idia ita trast badina idia be kara momokani taudia. *

8. Edena dala ai tadikaka taihu oi trast diba?

⁸ Trast karana be hemataurai karana bamona, bona ita hekwarahi unai kara ita hahedinaraia totona. Edena dala ai tadikaka taihu oi trast diba? Idia oi diba namonamo. Kongrigeisen heboudia ai idia ida oi herevahereva. Dala oi karaia idia ida oi haroro hebou totona. Idia dekenai oi haheauka, bona nega oi henia unai amo idia hahedinaraia idia oi trast diba. Matamanai, oi dibaia noho tauna dekenai reana emu lalohadai o hemami ibounai do oi herevalaia lasi. Idia oi diba namonamo neganai, reana do oi ura idia dekenai emu hemami ibounai oi herevalaia. (Luka 16:10) To bema emu tadikaka dekenai oi gwauraia gaudia be ma haida ia hamaoroa, dahaka do oi karaia? Ia ida emu hetura karana oi hadokoa haraga lasi. To, nega oi henia be namo. Namo lasi ma haida edia kara ese oi ia koua, emu tadikaka bona taihu oi trast noho totona. Mani Iehova ena hesiai taudia momo edia haheitalai ita laloa, ena be haida ese idia hahisia, to ma haida dekenai idia trast noho.

9. (a) Ena be Iehova ena hesiai taudia haida be idia kerere, to edena dala ai Hana be Iehova ena dala ia badinaia noho? (b) Edena dala ai, Hana ena haheitalai ese oi ia durua Iehova ena dala oi badinaia noho totona? (Laulau itaia.)

⁹ Kongrigeisen lalonai maduna ia abia tadikaka ta ena kara dainai oi lalohisihisi, a? Bema oibe, Hana ena haheitalai ese oi do ia durua. Unai nega ai, Israela dekenai Hahelaga Tauna Badana Eli be Iehova tomadiho henia karana ia gunalaia. To iena ruma bese taudia be haheitalai namona idia hahedinaraia lasi. Iena natudia memero, hahelaga gaukara idia karaia taudia unai, be hemarai kara dikadia idia karaia, to edia tamana ese idia ia hamaoromaoroa lasi. Iehova ese maoromaoro Eli be ena hahelaga gaukarana amo ia kokia lasi. Ena be Eli be hahelaga tauna badana, to Hana be dubu helaga dekenai ena tomadiho karana ia rakatania lasi. Eli ese Hana ia itaia mai lalohisihisi ida ia guriguri noho neganai, ia laloa Hana be ia kekero.  Bona hamomokania gaudia ia tahua lasi, to lalohisihisi bada hahinena ia gwauraia dika. (1 Sam. 1:12-16) Ena be Hana dekenai unai gaudia idia vara, to ia gwauhamata bema natuna mero ta ia havaraia, dubu helaga dekenai do ia abia lao bona Eli henunai do ia gaukara. (1 Sam. 1:11) Ta ese Eli ena natudia memero edia kara do ia hamaoromaoroa, a? Oibe, bona Iehova ese nega maorona ai kara ta ia karaia. (1 Sam. 4:17) Danu, Dirava ese Hana ia hanamoa bona natuna mero ta ia henia, ena ladana be Samuela.​—1 Sam. 1:17-20.

10. Ena be haida ese King Davida idia dadaraia, to edena dala ai ma haida ia trast noho?

¹⁰ Emu turana namona ta ese oi ia dadaraia, a? Bema oibe, King Davida ena sivarai mani oi laloa. Iena turana ta ena ladana be Ahitopela. To Davida ena natuna Abesaloma ia ura ena tamana ena king dagi ia abia neganai, Ahitopela be Abesaloma ena gwau-edeede karana ia durua. Davida ia lalohisihisi bada badina ena natuna bona ena turana namona be ia idia dadaraia! To, unai ese Davida ia koua lasi ma haida ia trast totona. Ia ese ena turana ma ta, Husai, unai gwau-edeede karana ia durua lasi tauna dekenai ena trast karana ia hahedinaraia noho. Badina namodia dainai Davida be Husai ia trast. Husai be tura namona, badina ena be ena mauri ia haboioa diba to Davida ia durua.​—2 Sam. 17:1-16.

11. Edena dala ai Nabala ena hesiai tauna be trast karana ia hahedinaraia?

¹¹ Nabala ena hesiai tauna ta ena haheitalai mani ita laloa danu. Davida bona ena tuari tatau ese Israela tauna Nabala ena hesiai taudia idia gimaia. Daudau lasi murinai, Davida ese taga tauna Nabala ia noia iena tatau totona aniani ia henia. Nabala ese unai noinoi ia dadaraia neganai, Davida ia badu dikadika bona ia ura Nabala ena ruma bese lalonai tatau ibounai ia hamasea. Hesiai tauna ta ese unai sivarai be Nabala ena adavana, Abigaila, dekenai ia herevalaia. Unai hesiai tauna be Nabala ena ruma bese lalonai ia noho, bona ia diba Abigaila ese ia do ia hamauria. Ia be ena mauri totona ia heau diba, to unai ia karaia lasi badina ia abia dae Abigaila ese unai hekwakwanai do ia hamaoromaoroa. Danu ia abia dae momo idia diba Abigaila be mai aonega ida ia kara hahinena. Gabeai ia vara gauna ese  ia hahedinaraia, unai hesiai tauna be badina namodia dainai Abigaila dekenai trast karana ia hahedinaraia. Abigaila be mai gari lasi ida kara ta ia karaia, Davida ena palani ia koua totona. (1 Sam. 25:2-35) Ia abia dae Davida be mai laloa maoromaoro ida kara ta do ia karaia.

12. Ena be Iesu ena hahediba taudia be kerere idia karaia, to edena dala ai idia ia abidadama henia?

¹² Ena be hahediba taudia be kerere idia karaia, to Iesu ese idia ia abidadama henia. (Ioa. 15:15, 16) Iamesi bona Ioane be Iesu idia noia Basileia lalonai dagi badana do idia abia neganai, Iesu ese Iehova idia hesiai henia ena badina ia henanadailaia lasi eiava aposetolo taudia ai idia lao ena hahenamo ia kokia lasi. (Mar. 10:35-40) Gabeai, Iesu idia dogoatao hanuaboina ai, ena hahediba taudia ibounai ese ia idia rakatania. (Mat. 26:56) To, Iesu be idia ia abidadama henia noho. Ena be ia diba idia be goevadae lasi taudia, to “idia ia lalokau henia ela bona ia mase.” (Ioa. 13:1) Iesu ia toreisi lou murinai, ena aposetolo taudia 11 dekenai gaukara badana ta ia henia, unai be hahediba taudia halaoa gaukarana do idia gunalaia bona iena mamoe do idia naria. (Mat. 28:19, 20; Ioa. 21:15-17) Iesu be badina namodia dainai unai goevadae lasi tatau ia abidadama henia. Idia ibounai be mai abidadama ida hesiai gaukara idia karaia ela bona idia mase. Momokani, Hana, Davida, Nabala ena hesiai tauna, Abigaila, bona Iesu edia haheitalai ese ita idia durua, goevadae lasi taudia ita trast noho totona.

13. Dahaka dainai ia auka ma haida ita trast totona?

¹³ Oi be tadikaka ta oi trast dainai emu hunia herevadia oi gwauraia, to gabeai oi kamonai ia ese ma haida dekenai unai gaudia ia herevalaia, a? Unai ese lalohisihisi bada ia havaraia diba. Nega ta, taihu ta be elda ta dekenai ena hekwakwanai ia herevalaia. Murina dinana ai, unai elda ena adavana be taihu hagoadaia totona ia rini, unai ese ia hahedinaraia elda ese ena adavana dekenai unai hunia herevana ia gwauraia. Oibe, taihu dekenai ia auka unai elda ia trast totona. To, taihu be kara maorona ia karaia bona heduru ia tahua. Ia vara gauna be elda ma ta dekenai ia gwauraia, bona unai elda ese ia durua elda taudia ia trast totona.

14. Dahaka ese tadikaka ta ia durua, ma haida dekenai ena trast karana ia hagoadaia lou totona?

¹⁴ Nega daudau lalonai, tadikaka ta be elda rua dekenai ia badu bona ia mamia idia ia trast diba lasi. To, ia matauraia bada tadikaka ese ia gwauraia herevana ia laloa matamaia. Unai mai anina bada herevana be inai: “Iseda inai tauna be Satani, to iseda tadikaka taihu lasi.” Tadikaka ese unai hereva ia laloa dobu, ia gurigurilaia, bona gabeai unai elda rua ida maino ia karaia.

15. Dahaka dainai ia auka ta ita trast lou totona? Haheitalai gwauraia.

¹⁵ Kongrigeisen dekenai hahenamo ta oi haboioa, a? Unai ese lalohisihisi bada ia havaraia diba. Lagani 1930 lalonai, Nazi Germany dekenai iseda gaukara idia taravatua neganai, Grete bona ena sinana be abidadama Witnes taudia. Grete be ena tadikaka taihu totona Gima Kohorona ena kopi ta ta ia taipia karana ia moalelaia. To tadikaka idia kamonai Grete ena tamana be hereva momokani ia inai henia neganai, Grete idia hadibaia unai gaukara do ia karaia lasi, badina idia gari ena tamana ese kongrigeisen ena infomeisen be dagedage taudia dekenai do ia henia. Grete dekenai hekwakwanai ma haida idia vara danu. Tanobada Tuarina Iharuana ia vara noho lalonai, tadikaka ese Grete bona ena sinana dekenai magasin edia kopi idia henia lasi bona dala dekenai idia hedavari henia neganai, idia hereva henia lasi. Unai ese Grete ia hahisia bada dainai, nega daudau lalonai ena tadikaka edia dika ia gwauatao lasi bona idia ia  trast lou lasi. To, nega ia lao noho lalonai, ia laloparara Iehova ese edia dika ia gwauatao vadaeni, unai dainai idia ia gwauatao danu be namo. *

16. Dahaka dainai ita gaukara goada iseda tadikaka taihu ita trast totona?

¹⁶ Bema tadikaka o taihu ta ese ia karaia gauna dainai oi lalohisihisi bada, namona be ia dekenai emu trast karana oi hagoadaia lou. Reana unai be mai ena hekwarahi, to namo do ia havaraia. Inai haheitalai ita laloa, bema aniani ta ese iseda bogana ia hahisia, reana ita ania gaudia dekenai do ita naria namonamo. To, unai ese ita ia koua lasi ita aniani totona. Unai hegeregerena, namo lasi ta ena kara dainai iseda tadikaka taihu dekenai iseda trast karana ita hamanokaia. Iseda tadikaka taihu dekenai iseda trast karana ita hagoadaia lou neganai, do ita moale bada bona unai ese ita do ia durua kongrigeisen lalonai trast karana ita hagoadaia totona.

17. Dahaka dainai trast karana be mai anina bada, bona atikol 38 ai dahaka do ita herevalaia?

¹⁷ Satani ena tanobada ai, momo be trast karana idia hahedinaraia lasi. To iseda tadikaka taihu ita trast diba, badina idia ita lalokau henia bona ita idia lalokau henia. Unai bamona trast karana ese hari moale bona lalotamona ia havaraia bona vaira nega ai hisihisi bada ia vara neganai, unai trast karana ese ita do ia gimaia. Bema ta ese oi ia hahisia bona ia oi trast henia lou lasi, dahaka do oi karaia? Namona be Iehova ena laloa dalana oi abia, Baibel ena hakaua herevadia oi badinaia, emu tadikaka taihu oi lalokau henia noho, bona Baibel ai idia noho taudia edia haheitalai amo diba oi abia. Iseda hemami idia hadikaia gaudia ita haheaukalaia bona ma haida ita trast lou diba. Unai bamona ita karaia neganai, “tadikaka korikori bamona ta ta idia kara henia” tura namodia momo do ita davaria. (Aon. 18:24) Ita ese ma haida ita trast sibona be hegeregere lasi, to idia ese ita idia trast danu be namo. Atikol 38 ai, iseda tadikaka bona taihu ese ita idia trast diba dalana do ita herevalaia.