1. Iehoasa, Usaia, bona Iosaia dekenai dahaka ia vara bona dahaka dainai unai be auka?

 SIBONA oi piksaia, oi be natuna maragi o mero matamata sibona, to Dirava ena taunimanima lohiaia totona king ai oi idia halaoa! Emu siahu o dagi be edena bamona do oi gaukaralaia? Baibel lalonai matamata taudia haida be Iuda ena king ai idia lao edia sivarai idia noho. Idia be Iehoasa ena mauri lagani be 7, Usaia be 16 bona Iosaia be 8. Idia dekenai unai be gaukara badana! Ena be ia auka, to Iehova bona ma haida edia heduru amo gau namodia momo idia karaia.

2. Dahaka dainai Iehoasa, Usaia, bona Iosaia edia haheitalai ita stadilaia be namo?

² Ita be king o kwini lasi, to Baibel ese ia herevalaia taudia toi amo mai anina bada gaudia do ita dibaia. Idia ese abia hidi namodia idia karaia, to kereredia idia karaia danu. Edia haheitalai amo do ita itaia dahaka dainai, hebamo namodia ita abia hidi, ita manau bona Iehova kahirakahira ita lao be mai anina bada.

3. King Iehoasa ese Hahelaga Tauna Badana Iehoiada ena hereva dekenai dahaka ia karaia?

³ Iehoasa ena abia hidi namodia tohotohoa. King Iehoasa be ia matamata neganai, abia hidi maorona ia karaia. Ia be tamana lasi natuna, to Hahelaga Tauna Badana Iehoiada ena hakaua hereva ia badinaia. Iehoiada ese ia be ena natuna korikorina bamona ia hadibaia. Unai dainai, Iehoasa be mai aonega ida abia hidi ia karaia, tomadiho goevana ia gunalaia  bona Iehova ia hesiai henia. Danu dala ia karaia Iehova ena dubu helaga idia hanamoa lou totona.—2 Siv. 24:​1, 2, 4, 13, 14.

4. Iehova ena oda herevadia ita ura henia bona badinaia neganai, dahaka namo ia vara? (Aonega Herevadia 2:​1, 10-12)

⁴ Bema emu tama sina o ma ta ese Iehova lalokau henia bona ena taravatu badinaia karana ia hadibaia, unai be harihari gauna hereadaena. (Aonega Herevadia 2:​1, 10-12 duahia.) Tama sina ese dala idauidau ai natudia idia hadibaia diba. Mani taihu Katya ita laloa, ena tamana ese ia durua abia hidi maorona ia karaia totona. Dina ta ta ai tamana ese sikuli dekenai ia abia lao neganai, ia ida dina ena siri idia herevalaia. Katya ia gwau, “unai herevahereva karana ese lau ia durua dina ai idia vara hekwakwanai lau hanaia totona.” To dahaka do oi karaia, bema oi mamia tama sina be Baibel amo idia henia hakaua dalana ese emu ura ia koua? Dahaka ese oi do ia durua edia hereva oi badinaia totona? Taihu Anastasia ia laloatao, ena tama sina be nega idia atoa ia dekenai taravatu haida idia karaia ena badina idia herevalaia totona. Ia gwau: “Lau laloparara idia atoa taravatu be lau idia koua totona lasi, to mai lalokau ida, lau idia gimaia.”

5. Oi karaia karana ese Iehova bona emu tama sina dekenai dahaka do ia havaraia? (Aonega Herevadia 22:6; 23:​15, 24, 25)

⁵ Baibel ena sisiba oi badinaia neganai, emu tama sina do idia moale. Bona mai anina bada gauna be, Dirava do oi hamoalea bona emu hetura karana ia ida be do ia goada ia lao. (Aonega Herevadia 22:6; 23:​15, 24, 25 duahia.) Unai dainai, Iehoasa ia matamata negana ena haheitalai namodia oi tohotohoa be namo, ani?

6. Iehoasa be daidia edia sisiba ia kamonai henia matamaia, bona dahaka ia vara? (2 Sivarai 24:​17, 18)

⁶ Iehoasa ena abia hidi kereredia amo diba abia. Iehoiada ia mase murinai, Iehoasa ese hebamo dikadia ia abia hidi. (2 Sivarai 24:​17, 18 duahia.) Ia be Iehova idia lalokau henia lasi Iuda lohia taudia ia kamonai henidia. Iehoasa ese idia ia bamoa lasi be namo, ani? (Aon. 1:10) To unai tura dikadia edia sisiba ia kamonai henia. Bona Iehoasa ena kasin Sekaraia be ia hamaoromaoroa totona sisiba ia henia neganai, Iehoasa ese ia hamasea. (2 Siv. 24:​20, 21; Mat. 23:35) Unai be kerere badana bona kavakava karana! Matamanai Iehoasa be abia hidi maorodia ia karaia, to gabeai aposteit bona ala-ala tauna ai ia lao. Bena iena hesiai taudia ese idia alaia. (2 Siv. 24:​22-25) Bema Iehova bona ia idia  lalokau henia taudia ia kamonai henia, dika do ia davaria lasi. Unai sivarai amo dahaka oi dibaia?

7. Edena bamona turadia do oi abia hidi? (Laulau itaia danu.)

⁷ Iehoasa ena abia hidi kererena amo ita diba, tura namodia do ita abia hidi, idia ese ita do idia hagoadaia—unai bamona turadia be Iehova idia lalokau henia bona idia ura ia idia hamoalea. Namo lasi mauri lagani tamona taudia sibona ita bamoa. Laloatao, Iehoasa ena turana Iehoiada ena mauri lagani be bada. Turadia oi abia hidi neganai sibona oi nanadaia: ‘Lau idia hagoadaia egu abidadama Iehova dekenai ia goada totona, a? Lau idia durua Dirava ena taravatu lau badinaia totona, a? Iehova bona Baibel ena hereva momokani idia ura herevalaia, a? Dirava ena taravatu idia matauraia, a? Lau idia durua totona sisiba idia henia, a?’ (Aon. 27:​5, 6, 17) Bema Iehova idia lalokau henia lasi, oi tura henidia lasi. To bema emu turadia be Iehova idia lalokau henia taudia, hanaihanai oi do idia durua.—Aon. 13:20.

8. Social media ita gaukaralaia neganai, dahaka ita laloatao be namo?

⁸ Social media be dala namona ta famili bona turadia ida ita herevahereva totona. To, taunimanima momo be unai idia gaukaralaia sibona idia abia isi, bona idia hoia eiava karaia gaudia edia laulau o vidio idia atoa. Bema social media oi gaukaralaia, sibona oi nanadaia: ‘Lau ura ma haida ese lau do idia hanamoa totona, a? Lau ura ma haida lau durua, eiava sibona lau ura abia isi? Social media idia gaukaralaia taudia ese egu lalohadai, hereva bona kara namodia do idia hadikaia, a?’ Tadikaka Nathan Knorr, guna ia be Hakaua Oreana ena memba ta be inai sisiba ia henia: “Namo lasi taunimanima oi hamoalea. Bema unai oi karaia ta do oi hamoalea lasi. To Iehova oi hamoalea, bona Iehova idia lalokau henia taudia ibounai do idia moale.”

9. Iehova ese Usaia ia durua dahaka ia karaia totona? (2 Sivarai 26:​1-5)

⁹ Usaia ena abia hidi namodia oi tohotohoa. King Usaia be ia matamata neganai ia manau. “Dirava momokanina gari henia karana” ia dibaia. Ena mauri lagani ibounai 68 lalodiai, Iehova ese ia hanamoa. (2 Sivarai 26:​1-5 duahia.) Usaia be ena bese idia inai henia taudia momo ia halusia bona Ierusalema ia gimaia namonamo. (2 Siv. 26:​6-15) Oibe, Usaia be Iehova ena heduru dainai ia moale bada.—Had. 3:​12, 13.

10. Usaia dekenai dahaka gaudia idia vara?

¹⁰ Usaia ena abia hidi kereredia amo diba abia. King Usaia be haida dekenai hakaua hereva henia karana dekenai ia manada. Unai dainai ia laloa ia ura karaia gaudia be do ia karaia diba, a? Dina ta Usaia be mai hekokoroku ida, Iehova ena dubu helaga lalonai ia vareai, boubou patana latanai bonana namo muramura ia gabua totona, to unai be king edia gaukara lasi. (2 Siv. 26:​16-18) Hahelaga Tauna Badana Asaraia ia ura Usaia ia hamaoromaoroa neganai, Usaia ia badu dikadika. Madi, Usaia be ena abidadama karana ia hadikaia bona lepera gorerena ia abia. (2 Siv. 26:​19-21) Bema ia manau, unai dika be ia dekenai do ia vara lasi!

11. Dahaka karadia ese do ia hahedinaraia ita manau? (Laulau itaia danu.)

¹¹ Usaia ena goada ia bada neganai, ia dekenai goada bona hahenamo ia henia Tauna, Iehova, ia laloaboio. Dahaka ita dibaia? Namona be hanaihanai ita laloatao, iseda mauri bona hesiai gaukara ai ita moalelaidia hahenamo ibounai be Iehova amo idia mai. Namo lasi ita hagugurua gaudia dainai ita hekokoroku,  to hanamoa ibounai be Iehova dekenai do ita henia. b (1 Kor. 4:7) Namona be ita manau, bona ita abia dae ita be goevadae lasi taudia bona sisiba ita ura henia. Tadikaka ta ena mauri lagani be 60 bamona, ia gwau: “Lau dibaia gauna be, bema haida ese egu kerere idia gwauraia hedinarai, namo lasi lau lalohisihisi o lau lalomanoka. Nega haida kerere lau karaia bona lau idia sisiba henia neganai, lau hekwarahi unai lau hanamoa bona Iehova lau hesiai henia noho.” Momokani, Iehova ita gari henia bona sibona ita hamanaua neganai, iseda mauri be do ia namo.—Aon. 22:4.

12. Iosaia ia matamata neganai, edena dala ai Iehova kahirakahira ia lao? (2 Sivarai 34:​1-3)

¹² Iosaia ena abia hidi namodia oi tohotohoa. Iosaia ena mauri lagani be 16 neganai, Iehova kahirakahira ia lao matamaia. Ia ura Iehova ia dibaia bona iena ura do ia karaia. To, unai king matamata ena mauri be ia auka. Unai negai, tomadiho koikoi be ia bada dainai namona be mai gari lasi ida tomadiho goevana totona do ia gaukara. Oibe, unai ia karaia. Iosaia ena mauri lagani be 20 ia do abia lasi neganai, ena bese huanai tomadiho koikoi ia kokia matamaia.—2 Sivarai 34:​1-3 duahia.

13. Iehova dekenai iseda mauri ita gwauhamatalaia karana ese dahaka namo ia havaraia?

¹³ Ena be oi be matamata sibona, abia hidi oi karaia diba Iosaia bamona Iehova oi tahua bona iena kara namodia oi dibaia. Unai kara namodia ese oi do ia durua ia dekenai emu mauri oi gwauhamatalaia totona. Edena dala ai unai ese emu mauri do ia durua? Luke ena mauri lagani be 14 neganai, ia bapatiso. Ia gwau: “Inai nega amo, egu mauri lalonai Iehova hesiai henia karana do lau atoa guna bona ia lau hamoalea be namo.” (Mar. 12:30) Bema unai bamona oi karaia hahenamo do oi abia.

14. Matamata taudia haida ese King Iosaia ena haheitalai idia tohotohoa karana herevalaia.

¹⁴ Iehova ia hesiai henia matamata tauna be dahaka hahetoho ia davaria diba? Johan ena mauri lagani be 12 neganai ia bapatiso, bona sikuli ai ena turadia ese idia doria elektronik kuku eiava vaping ia gaukaralaia totona. Johan  be unai ia dadaraia totona, sibona ia hadibaia, vaping ese ena helt bona hetura karana Iehova ida ia hadikaia diba. Rachel ena mauri lagani be 14 neganai ia bapatiso, sikuli ai idia vara hahetoho ia hanaia dalana ia herevalaia. Ia gwau: “Lau ura lau itaia gaudia ese lau idia durua Baibel bona Iehova lau laloa totona. Hegeregere, histori leseni lau abia neganai, Baibel sivarai ta o peroveta herevana ta lau laloatao. Eiava sikuli ai ma ta ida lau herevahereva neganai, ia dekenai lau hahedinaraia diba siri namona ta lau laloatao.” Reana oi davaria hahetoho be King Iosaia ese ia davaria hahetoho amo idia idau, to ia hegeregerena, oi aonega bona Dirava oi badinaia diba. Emu matamata negana ai hahetoho oi hanaia karana ese oi do ia durua, vaira laganidia ai do idia vara hekwakwanai oi hanaia diba.

15. Dahaka ese Iosaia ia durua mai abidadama ida hesiai gaukara ia karaia totona? (2 Sivarai 34:​14, 18-21)

¹⁵ King Iosaia, ena mauri lagani be 26 neganai, dubu helaga ia hanamoa matamaia. Unai gaukara idia karaia lalonai, Hahelaga tauna Hilekaia ese “Iehova ena Taravatu bukana ia davaria, unai buka be Dirava ese Mose dekenai ia henia.” Bona taravatu idia duahia bona King ese ia kamonai neganai, unai hegeregerena ia badinaia. (2 Sivarai 34:​14, 18-21 duahia.) Hanaihanai oi ura Baibel oi duahia, a? Oi moalelaia noho, a? Oi do ia durua Baibel siridia oi laloatao noho, a? Matamanai ita herevalaia tadikaka Luke, be ia davaria point namodia be nouti buka ai ia torea. Oi laloa unai bamona oi karaia neganai, oi do ia durua siri o point haida do oi laloatao, a? Baibel ena hereva oi dibaia bona ura henia neganai, emu ura Iehova hesiai henia karana dekenai be do ia goada. Bona King Iosaia bamona, Dirava ena Hereva ese oi do ia hagoadaia kara ta oi karaia totona.

16. Dahaka dainai Iosaia be kara dika ia karaia bona dahaka ita dibaia?

¹⁶ Iosaia ena abia hidi kereredia amo diba abia. Iosaia ena mauri lagani be 39 neganai,  kara dika ia karaia bona ia mase. Iehova ena heduru ia noia lasi to sibona dekenai ia tabekau. (2 Siv. 35:​20-25) Ita dibaia gauna be inai. Herevana iseda mauri lagani be bada o maragi, eiava nega daudau Baibel ita stadilaia, to namona be Iehova kahirakahira ita lao noho. Anina be iena heduru totona do ita guriguri, iena Hereva ita stadilaia, bona lo Keristani taudia edia sisiba ita abia dae. Unai amo kerere do ita hanaia bona do ita moale.—Iam. 1:25.

17. Iuda ena king toi edia sivarai amo dahaka ita dibaia?

¹⁷ Matamata negana be nega namona badina gau namodia momo oi karaia diba. Matamata taudia hegeregere, Iehoasa, Usaia, bona Iosaia edia sivarai ese ia hahedinaraia, umui matamata taudia ese mai aonega ida abia hidi umui karaia bona Iehova hamoalea mauri dalana umui badinaia diba. Momokani, iseda abia hidi ese namo eiava dika ia havaraia diba. To unai king edia haheitalai namodia ita tohotohoa, bona edia kara dikadia ita badinaia lasi. Unai amo iseda mauri ita moalelaia diba.

18. Dahaka Baibel haheitalai ese ia hahedinaraia mauri oi moalelaia diba? (Laulau itaia danu.)

¹⁸ Baibel lalonai matamata taudia haida be Iehova kahirakahira idia lao, ia lalonamo henidia, bona edia mauri idia moalelaia ena sivarai idia noho. Idia ta be Davida, ia matamata neganai, Dirava ia tura henia bona gabeai, king namona ai ia lao. Ena be nega haida Davida be kerere ia karaia, to Dirava ese iena abidadama karana ia laloa bada. (1 Ki. 3:6; 9:​4, 5; 14:8) Davida ena mauri bona mai abidadama ida Iehova ia hesiai henia ena sivarai umui stadilaia karana ese umui do ia hagoadaia. Eiava, stadi projek ta oi karaia diba Mareko o Timoteo edia haheitalai oi laloa totona. Do oi itaia edia matamata negana amo Dirava ese idia ia lalonamo henia bona idia moale.

19. Dahaka do oi karaia emu mauri oi moalelaia totona?

¹⁹ Hari emui mauri umui gaukaralaia namonamo, unai amo nega vaira ai do umui moale. Iehova dekenai oi tabekau bona sibona emu diba oi tabekau henia lasi karana amo oi hahedinaraia, Ia ese emu raka dalana do ia hakaua. (Aon. 20:24) Unai amo emu mauri ai do oi moale bona hahenamo do oi abia. Laloatao, Iehova be ia totona oi karaia gaudia ia laloa bada. Iseda lalokau guba Tamana hesiai henia karana be mauri namona davaria dalana.