1. Iesu be Petero ia durua hoa dalanai gwarume momo ia abia dainai, Petero be dahaka ia karaia?

 PETERO be hanuaboi ibounai ia haoda to gwarume ta ia veria lasi. Iesu be ia dekenai ia gwau: “Dobu kahana dekenai ita lao bona emui reke umui atoa diho, gwarume abia totona.” (Luka 5:4) Ena be Petero ia daradara to Iesu ena hereva ia badinaia. Reke idia negea diho neganai, gwarume momo herea idia veria, bona reke ia darea matamaia. Petero bona ia ida idia haoda taudia idia laloparara hoa karana ta ia vara neganai, “idia hoa bada.” Petero ia gwau: “Lohiabada e, lau amo oi siri, badina lau be kara dika tauna.” (Luka 5:​6-9) Petero ia mamia ia be hegeregere lasi Iesu ida ia noho totona.

2. Dahaka dainai Petero ena haheitalai ita laloa karana be ita ia durua?

² Petero ena hereva be maoro, ia be “kara dika tauna.” Baibel ia hahedinaraia nega haida Petero be ia gwauraia bona karaia gaudia dainai gabeai ia lalohisihisi. Nega haida oi mamia emu kara be Petero bamona, a? Oi hekwarahi noho emu kara ta oi hanamoa, eiava manoka gauna ta oi rakatania totona, a? Bema oibe, Petero ena haheitalai stadilaia karana ese oi ia durua diba. Edena dala ai? Mani inai oi laloa: Bema Iehova ia ura, Petero ena kerere idauidau be Baibel lalonai do ia torea lasi. To, lauma helaga ena hakaua henunai idia torea ita idia hadibaia totona. (2 Tim. 3:​16, 17) Petero ena sivarai ita stadilaia karana ese ita do ia hagoadaia, badina ita laloparara Iehova ia diba ita be goevadae lasi. Iehova ia ura do ita haheauka noho, ena be ita be mai iseda manoka gaudia.

3. Dahaka dainai ita haheauka noho be namo?

 ³ Dahaka dainai ita haheauka noho be namo? Aonega herevana ta ia gwau, Bema gau ta ita karaia loulou, do ita karaia namonamo. Mani haheitalai ta ita laloa: Ta ese gita gadaralaia dalana ia ura dibaia totona, lagani momo lalonai do ia praktis loulou. Unai nega lalonai, kerere momo do ia karaia, to ia praktis loulou neganai, gita do ia gadaralaia namonamo. Ena be gita gadaralaia dalana ia diba namonamo, to nega ta ta kerere do ia karaia. To ia hesiku lasi bona ia praktis noho gita gadaralaia dalana ia hanamoa totona. Unai hegeregerena, ena be iseda manoka gauna ta ita rakatania, to unai kerere ita karaia lou diba. To ita gaukara goada noho ita hanamoa totona. Nega haida ita gwauraia hereva o karaia karana dainai gabeai ita lalohisihisi, to bema ita hesiku lasi, Iehova ese ita do ia durua iseda kerere ita hanamoa totona. (1 Pet. 5:10) Mani Petero ena haheauka karana ita laloa. Ena be Petero be kerere momo ia karaia, to Iesu ese ia hebogahisi henia. Unai ita laloa neganai, ita do ia durua Iehova ita hesiai henia noho totona.

4. Luka 5:​5-10 hegeregerena, Petero ese dahaka hereva be sibona dekenai ia gwauraia, to edena dala ai Iesu ese ia hagoadaia?

⁴ Petero ia gwau ia be “dika tauna” o ia laloa kara dikadia be Baibel ese ia gwauraia lasi. (Luka 5:​5-10 duahia.) To, reana ia be kara dika badadia haida ia karaia. Iesu ia mamia Petero be ia gari, badina reana Petero ia laloa ia be hegeregere lasi. To Iesu ia diba Petero be do ia gini goada noho. Unai dainai, mai hebogahisi ida Iesu be Petero ia hamaoroa do ia “gari lasi.” Iesu ena hereva ese Petero ena mauri ia haidaua momokani. Gabeai, Petero bona ena tadikaka Andrea be edia haoda gaukarana idia rakatania, bona edia mauri ibounai lalonai Mesia murinai idia raka. Unai abia hidi dainai hahenamo idauidau idia davaria.—Mar. 1:​16-18.

5. Petero be gari karana ia hanaia bona Iesu ena hereva ia abia dae dainai, dahaka hahenamo ia abia?

⁵ Petero be Keriso murinai ia raka neganai, gau namodia momo ia itaia. Ia itaia Iesu ese gorere ia hanamoa, demoni ia luludia bona mase taudia ia hatoreaisi lou. b (Mat. 8:​14-17; Mar. 5:​37, 41, 42) Danu, Petero be matahanai ta lalonai ia itaia, vaira nega ai Iesu be Dirava ena Basileia lalonai King bamona do ia lohia. Unai matahanai ia laloaboio lasi. (Mar. 9:​1-8; 2 Pet. 1:​16-18) Oibe, bema Petero be Iesu ia bamoa lasi, unai gaudia do ia itaia lasi. Reana ia moale bada badina ena lalohadai kereredia  ese ia idia koua lasi dainai unai hahenamo ia itaia!

6. Petero be maoromaoro ena manoka gaudia ia hanaia, a? Herevalaia.

⁶ Ena be Petero ese unai gaudia ia itaia bona kamonai to iena manoka gaudia dainai ia hekwarahi. Haheitalai haida mani ita laloa. Baibel ena peroveta herevadia hegeregerena, Iesu be hisihisi do ia abia bona do ia mase dalana ia herevalaia neganai, Petero ese ia gwau henia. (Mar. 8:​31-33) Petero bona aposetolo taudia ma haida be daika ia bada idia hepapahuahulaia loulou. (Mar. 9:​33, 34) Iesu idia do hamasea lasi hanuaboi ginigabena ai, Petero ese tau ta ena taiana ia utua oho. (Ioa. 18:10) Unai hanuaboi tamona lalonai, Petero ia gari matamaia bona nega toi ia gwau iena turana Iesu ia diba lasi. (Mar. 14:​66-72) Petero be unai dainai ia tai dikadika.—Mat. 26:75.

7. Iesu ena toreisi lou murinai, Petero be dahaka hahenamo ia abia?

⁷ Iesu be Petero dekenai ia hesiku lasi. Ia be mase amo ia toreisi lou murinai, ia ura Petero be ia dekenai ena lalokau do ia hamomokania. Iesu ese Petero ia hamaoroa mai manau ida iena mamoe do ia naria. (Ioa. 21:​15-17) Petero be mai moale ida unai gaukara ia abia dae. Pentekoste dinana ai, ia be Ierusalema ai ia noho bona ia danu be lauma helaga ese ia horoa taudia ginigunadia.

8. Antioka ai, Petero be dahaka kerere badana ia karaia?

⁸ Petero be horoa Keristani tauna ai ia lao murinai, iena manoka gaudia dainai ia do hekwarahi noho. Lagani 36 C.E ai, Iuda lasi tauna Korenelio be lauma helaga ese ia horoa neganai Petero be ia noho, unai ese ia hahedinaraia “Dirava be taunimanima edia toana ia laloa lasi” bona Iuda lasi taudia be Keristani kongrigeisen idia bamoa diba. (Kara 10:​34, 44, 45) Unai murinai Petero be Iuda lasi taudia ida ia aniani hebou, herevana guna unai ia karaia lasi. (Gal. 2:12) To Iuda Keristani taudia ma haida idia laloa, namo lasi Iuda taudia bona Iuda lasi taudia idia aniani hebou. Unai lalohadai idia abia taudia be Antioka dekenai idia mai neganai, Petero be Iuda lasi taudia ida ia aniani hebou karana ia hadokoa, toana be ia gari badina Iuda Keristani taudia do idia badu. Aposetolo Paulo ese unai ia itaia bona taunimanima vairanai Petero ia gwau henia. (Gal. 2:​13, 14) Ena be Petero ia kerere, to iena hesiai gaukara ia rakatania lasi. Dahaka ese ia durua?

9. Ioane 6:​68, 69 ese edena dala ai Petero ena badinaia karana ia herevalaia?

⁹ Petero ia ura lasi Iesu ia badinaia karana be gau ta ese ia hadikaia. Nega ta ai, Iesu ia gwauraia gaudia be ena hahediba taudia ese idia lalopararalaia lasi neganai, Petero be badinaia karana ia do hahedinaraia noho. (Ioane 6:​68, 69 duahia.) Momo be Iesu ena hereva ena anina idia tahua lasi, to ia idia rakatania. To Petero be unai ia karaia lasi. Ia laloparara “mauri hanaihanai herevadia be [Iesu] amo idia mai.”

10. Iesu be Petero dekenai dahaka ia diba? (Laulau itaia danu.)

¹⁰ Iesu be Petero ia rakatania lasi. Iesu be tanobada ai ena hanuaboi ginigabena ai, ia diba Petero bona aposetolo taudia ma haida ese ia do idia rakatania. To Iesu ia gwau, Petero be do ia helalo-kerehai bona ena abidadama ai do ia gini goada. (Luka 22:​31, 32) Iesu ia laloparara “lalona be ia ura, to tauanina be ia manoka.” (Mar. 14:38) Unai dainai, ena be Petero ia gwau Iesu ia diba lasi, to Iesu be iena aposetolo tauna dekenai ia hesiku lasi. Iesu ia toreisi lou murinai, Petero dekenai ia hedinarai —unai negai Petero be sibona ia noho. (Mar. 16:7; Luka 24:34; 1 Kor. 15:5) Mani oi laloa, unai ese Petero ia hagoadaia momokani!

11. Edena dala ai Iesu be Petero dekenai ia hahedinaraia, Iehova ese ia do ia durua?

¹¹ Iesu ese Petero ia hamaoroa, Iehova be ia do ia durua. Iesu ia toreisi lou murinai, Petero bona aposetolo taudia ma haida ia durua bona hoa dalanai gwarume momo idia veria. (Ioa. 21:​4-6) Unai ese ia hamomokania Iehova be Petero ena dabu gaudia do ia henia. Reana, aposetolo taudia be Iesu ena hereva idia laloatao, ia gwau Iehova ena ‘Basileia idia tahua guna’ taudia edia dabu gaudia do ia henia. (Mat. 6:33) Unai hereva hegeregerena, Petero be haroro gaukara ia atoa guna, to haoda gaukarana lasi. Pentekoste 33 C.E. ai, mai gari lasi ida ia haroro bona taunimanima tausen momo ia durua sivarai namona idia abia dae totona. (Kara 2:​14, 37-41) Gabeai, ia ese Samaria bona Iuda lasi taudia ia durua Keriso idia abia dae totona. (Kara 8:​14-17; 10:​44-48) Oibe, Iehova ese dala idauna ai Petero ia gaukaralaia taunimanima idauidau ia durua bona kongrigeisen lalonai ia abia vareai.

12. Petero ena haheitalai ese edena dala ai ita ia durua, bema ita be manoka gauna ta dainai ita hekwarahi noho?

¹² Hesiai gaukara ita karaia noho totona Iehova ese ita ia durua diba. To do ita hekwarahi, bema nega daudau lalonai iseda manoka gauna ta ita haheaukalaia noho. Nega haida, reana ita laloa iseda manoka gaudia ese Petero ena ia hanaia. To Iehova ese ita dekenai goada ia henia diba, unai amo do ita hesiku lasi. (Sal. 94:​17-19) Hegeregere, tadikaka ta be hereva momokani ia do diba lasi neganai, lagani momo lalonai tatau be tatau ida idia mahuta hebou maurina ia noholaia. Unai mauri dalana ia dadaraia vaitani, bona ena mauri ai Baibel ena taravatu ia badinaia. To, nega haida unai lalohadai kereredia ia abia. Dahaka ese ia durua ia hesiku lasi totona? Ia gwau: “Iehova ese ita dekenai goada ia henia.” Ma ia gwau: “Iehova ena lauma amo . . . , lau laloparara hereva momokani ena mauri dalana ai ita raka [noho] diba . . . Herevana mai egu kara dika, to Iehova ese lau ia do gaukaralaia noho bona lau dekenai goada ia henia.”

13. Kara 4:​13, 29, 31 bamona, edena dala ai Petero ena haheitalai ita tohotohoa diba? (Laulau itaia danu.)

¹³ Ita itaia bamona, Petero be nega momo  taunimanima ia gari henia. To ia gari lasi totona ia guriguri bona lalogoada ia abia. (Kara 4:​13, 29, 31 duahia.) Ita danu be gari karana ita hanaia diba. Mani Nazi Germany ai ia noho tadikaka matamata ladana Horst ita laloa. Sikuli gabunai ia idia doria loulou dainai, nega haida inai hereva, “Hitler ese ai do ia hamauria!” ia gwauraia. To Horst ena tama sina be ia idia gwau henia lasi, to ia ida idia guriguri, Iehova idia noia unai amo lalogoada do ia henia. Tama sina edia heduru bona Iehova tabekau henia karana dainai, Horst be ia ginigoada diba. Gabeai ia gwau, “Iehova be nega ta lau ia rakatania lasi.” c

14. Edena dala ai mamoe naria taudia ese lalomanoka tauna idia hagoadaia diba?

¹⁴ Iehova bona Iesu be ita do idia rakatania lasi. Ena be Petero ia gwau Keriso ia diba lasi, to gabeai mai anina bada abia hidi ia karaia. Keriso ena hahediba tauna bamona do ia noho eiava unai do ia rakatania? Iesu be Iehova ia noia Petero ena abidadama do ia manoka lasi. Iesu be Petero dekenai unai guriguri ia herevalaia, bona ia gwau ia diba Petero ese ena tadikaka do ia hagoadaia. (Luka 22:​31, 32) Petero be Iesu ena hereva ia laloatao bona unai ese ia hagoadaia bada! Mai anina bada abia hidi ta ita ura karaia neganai, Iehova ese mamoe naria taudia ia gaukaralaia diba iseda abidadama idia hagoadaia totona. (Efe. 4:​8, 11) Lagani momo elda gaukara ia karaia tadikaka ladana Paul be unai bamona hagoadaia hereva ia henia. Haida ia hagoadaia neganai idia ia hamaoroa, Iehova ese hereva momokani dekenai idia ia veria mai dalana idia laloa totona. Bena ia hamaorodia Iehova ena noho hanaihanai lalokauna dainai umui dekenai do ia hesiku lasi. Dokonai ia gwau:  “Lau itaia lalomanoka taudia momo be Iehova ena heduru dainai idia do goada noho.”

15. Edena dala ai Petero bona Horst edia haheitalai ese Mataio 6:33 ena hereva ia hamomokania?

¹⁵ Iehova ese Petero bona aposetolo taudia ma haida ia durua hegeregerena, ia ese iseda dabu gaudia do ia henia bema iseda mauri ai hesiai gaukara ita atoa guna. (Mat. 6:33) Tanobada Tuarina Iharuana murinai, matamanai ita herevalaia tadikaka Horst be painia gaukarana ia lalohadailaia. Ia be ogogami, bona ia daradara bema ia abia moni sisina be do ia hegeregere iena ful-taim haroro gaukara do ia durua totona. Dahaka do ia karaia? Ena lalona ia hadaia, Iehova do ia tohoa. Ia ura itaia bema Iehova ese ena dabu gaudia do ia henia. Sekit vadivadi ena wiki ibounai lalonai haroro gaukara ia karaia. Wiki ena dokonai, ia hoa badina sekit naria tauna ese ia dekenai envelop ta mai ena moni ia henia. To Horst ia hamaoroa lasi daika ese unai ia henia. Unai moni be hegeregere momokani, hua haida lalonai ena painia gaukarana durua totona. Unai harihari gauna amo, Horst ia abia dae Iehova ese ia do ia naria. Iena mauri ibounai lalonai Basileia ia atoa guna.—Mal. 3:10.

16. Dahaka dainai Petero ena haheitalai bona ena revareva ita dibaia be namo?

¹⁶ Petero ia moale badina Iesu ese ia rakatania lasi, ena be Iesu ia hamaoroa ia do ia rakatania. Keriso ese Petero ia durua abidadama aposetolo tauna ai ia lao totona bona Keristani taudia dekenai ia be haheitalai namona. Unai hadibaia gaukarana amo leseni namodia momo ita dibaia. Petero ese Keristani kongrigeisen ginigunadia dekenai ia siaia revareva rua lalonai, unai ia herevalaia bona hari Baibel lalonai unai ia noho. Stadi atikol 41 lalonai unai hadibaia hereva ma haida bona edena dala ai do ita badinaia, do ita herevalaia.