1. Petero be kahirakahira do ia mase neganai, Iehova ese ia gaukaralaia dahaka ia karaia totona?

 APOSETOLO Petero ia diba ia be kahirakahira do ia mase. Lagani momo lalonai mai abidadama ida, Iesu ia badinaia, haroro teritori matamatadia ia hamatamaia, bona ia be hakaua oreana ena memba tauna ta. Lagani 62-64 C.E. ai, Petero be Iehova ese ia gaukaralaia revareva rua ia torea totona, unai Baibel bukadia be Petero Ginigunana bona Iharuana. Petero ena ura be ia mase neganai, unai revareva ese Keristani taudia do ia durua.—2 Pet. 1:​12-15.

2. Dahaka dainai Petero ese ia torea revareva be nega maorona?

² Petero be unai revareva ia torea negana ai, iena tadikaka be ‘hahetoho idauidau idia lalohisihisilaia.’ (1 Pet. 1:6) Haida be hahediba hereva koikoidia bona kara mirodia be kongrigeisen lalonai idia ura hadibaia. (2 Pet. 2:​1, 2, 14) Kahirakahira Ierusalema ai idia noho Keristani taudia ese “gau ibounai edia dokona” do idia itaia, unai be Roma tuari taudia ese Ierusalema siti do idia hadikaia ore. (1 Pet. 4:7) Momokani, Petero ena revareva ese Keristani taudia ia durua unai nega idia haheaukalaia bona gabeai do idia vara gaudia totona do idia hegaegae. b

3. Dahaka dainai Petero ena revareva ita stadilaia be namo?

 ³ Ena be Petero ese Keristani ginigunadia totona unai revareva ia torea, to unai toretore be Iehova ena Hereva, Baibel ai ia noho danu. Unai dainai ita ese unai revareva amo heduru do ita abia. (Roma 15:4) Ita noholaia tanobada be kara mirodia amo ia honu dainai, ita danu be hahetoho ita davaria, bona Iehova ita hesiai henia totona be mai ena hekwarahi. Bona kahirakahira ita dekenai hisihisi badana ta do ia vara, Ierusalema ai ia vara gauna do ia hereaia. Petero ena revareva rua amo mai anina bada hadibaia herevadia ita abia. Unai ese ita do ia durua, Iehova ena dina ita laloa noho, taunimanima gari henia karana ita hanaia bona ta ta lalokau henia karana ita habadaia. Danu, unai ese elda taudia do ia durua, kongrigeisen tadikaka bona taihu idia durua bona hagoadaia totona.

4. Petero Iharuana 3:​3, 4 ia gwau bamona, dahaka ese iseda abidadama ia hamanokaia diba?

⁴ Ita be Baibel ena peroveta herevadia idia abidadama henia lasi taudia huanai ita noho. Lagani momo lalonai dokona ia mai totona ita naria dainai, iseda inai taudia ese ita idia kirikirilaia. Haida idia gwau, unai dina be do ia mai lasi. (2 Petero 3:​3, 4 duahia.) Bema gaukara turana ta o famili memba ta be unai bamona herevadia ia gwauraia, iseda abidadama do ia manoka diba. Ita durua totona Petero ese gau haida ia herevalaia.

5. Dahaka ese ita do ia durua mai haheauka ida inai nega dokona ita naria totona? (2 Petero 3:​8, 9)

⁵ Haida do idia laloa, Iehova be inai nega dikana ia haorea haraga lasi. Petero ena hereva ese ita dekenai lalohadai maorona do ia henia, Iehova ena lalohadai nega dekenai be taunimanima amo ia idau. (2 Petero 3:​8, 9 duahia.) Iehova dekenai dina tamona be lagani 1,000 bamona. Iehova ia haheauka noho badina ia ura lasi tau ta ia mase. Iena dina ia ginidae neganai, inai nega oromana do ia ore. Unai dainai, bese idauidau ita haroro henidia totona inai nega orena ita gaukaralaia namonamo be hahenamo badana.

6. Edena dala ai Iehova ena dina do ita “laloa noho”? (2 Petero 3:​11, 12)

⁶ Petero ese ita ia hagoadaia Iehova ena dina do ita “laloa noho.” (2 Petero 3:​11, 12 duahia.) Edena dala ai? Bema hegeregere, dina ta ta ai, tanobada matamata ai do idia vara hahenamo ita lalodia dobu. Sibona oi piksaia, oi be hodahoda goevana oi hahodi, aniani namodia oi ania, emu lalokau mase taudia oi welkam henidia, bona idaunegai taudia dekenai Baibel ena peroveta herevadia idia guguru karana oi hadibaia. Unai bamona ita karaia neganai Iehova ena dina do ita laloa noho bona ita ia gimaia, unai amo ita diba inai nega dokona be ia mai kahirakahira. Vaira nega ai do idia vara ‘gaudia ita diba vadaeni’ dainai, taunimanima edia lalohadai koikoi ese ita do ia “hakaua kerere” lasi.—2 Pet. 3:17.

7. Taunimanima gari henia karana ese dahaka ia havaraia diba?

⁷ Iehova ena dina ita laloa noho karana ese ita do ia hagoadaia haida dekenai sivarai namona ita harorolaia totona. To, nega haida gari dainai unai ita karaia lasi. Dahaka dainai? Nega haida ita be taunimanima dainai ita gari. Petero dekenai unai ia vara danu. Iesu idia dogoatao hanuaboina ai, Petero be ia gari dainai ia hahedinaraia lasi ia be Iesu ena hahediba tauna ta, bona nega toi ia gwau, Iesu ia diba lasi. (Mat. 26:​69-75) To gabeai, mai lalogoada  ida ia gwau: “Taunimanima ese idia gari henia gauna do umui gari henia lasi, bona umui lalohekwarahilaia lasi.” (1 Pet. 3:14) Petero ena hereva ese ita ia hagoadaia taunimanima ita gari henia lasi.

8. Dahaka ese ita ia durua taunimanima gari henia karana ita hanaia totona? (1 Petero 3:15)

⁸ Dahaka ese ita ia durua diba taunimanima gari henia karana ita hanaia totona? Petero ia gwau: “Emui kudouna ai umui abia dae Keriso be Lohiabada bona ia be helaga.” (1 Petero 3:15 duahia.) Anina be iseda Lohiabada bona King, Iesu Keriso ena gaukara bona siahu do ita laloa dobu. Bema haida dekenai sivarai namona harorolaia totona dala ia kehoa, to oi gari, namona be iseda King do oi laloatao. Ia be guba ai ia lohia noho bona aneru milioni momo ese ia idia hagegea karana oi piksaia. Inai oi laloa, “Dirava ese ia dekenai siahu ia henia, guba bona tanobada gaudia ibounai ia biagua totona.” Bona ia be ‘dina iboudiai ita ida do ia noho ela bona inai nega oromana ena dokona.’ (Mat. 28:​18-20) Petero be ita ia hagoadaia ‘nega ibounai do ita noho hegaegae’ iseda abidadama ita herevalaia totona. Oi ura gaukara gabunai, sikuli eiava gabu ma ta ai oi haroro, a? Unai oi karaia negana do oi laloa guna, bena do oi herevalaia gaudia oi hegaegaelaia. Lalogoada totona oi guriguri, oi abia dae Iehova ese oi do ia durua gari karana oi hanaia totona.—Kara 4:29.

9. Edena dala ai nega ta, Petero be lalokau ia hahedinaraia lasi? (Laulau itaia danu.)

⁹ Petero ese lalokau hahedinaraia dalana ia dibaia. Iesu ida ia noho neganai, Iesu ia gwau: “Umui dekenai taravatu matamata lau henia inai: Do umui lalokau heheni. Lau ese umui lau lalokau henia hegeregerena, umui danu do umui lalokau heheni.” (Ioa. 13:34) Ena be Petero be unai ia diba, to gabeai Iuda Keristani taudia ia gari henia dainai, Iuda lasi tadikaka taihu ida ia aniani hebou lasi. Aposetolo Paulo ese Petero ia gwauraia “kara koikoi” tauna. (Gal. 2:​11-14) Petero be unai sisiba ia abia dae bona ena kara ia hamaoromaoroa. Iena revareva rua lalonai ia gwau, namo lasi iseda tadikaka taihu lalokau henia karana be hemami ta sibona, to iseda kara amo ita hahedinaraia be namo.

10. Dahaka ese “mai momokani ida tadikaka lalokau henia karana” ia havaraia? (1 Petero 1:22)

¹⁰ Petero ia gwau, “mai momokani ida tadikaka lalokau henia karana ita hahedinaraia” be namo. (1 Petero 1:22 duahia.) Unai bamona lalokau karana be “hereva momokani badinaia karana” dainai ia vara. Unai hereva momokani ta be “Dirava be taunimanima edia toana ia laloa lasi.” (Kara 10:​34, 35) Bema kongrigeisen lalonai haida sibona dekenai lalokau ita hahedinaraia noho, ita be Iesu ena oda herevana ita badinaia lasi. Momokani, vaia haida ita diba namonamo, to ma haida lasi, Iesu ia karaia bamona. (Ioa. 13:23; 20:2) To Petero ese ita ia hadibaia lou, namona be ita hekwarahi “tadikaka oreana ibounai [ita] lalokau henia,” badina idia be iseda ruma bese.—1 Pet. 2:17.

11. “Kudouna ibounai ida umui lalokau heheni” ena anina be dahaka?

¹¹ Petero ia gwau “kudouna ibounai ida umui lalokau heheni.” Unai hereva ena anina be, lalokau do ita hahedinaraia ena be ita dekenai unai be auka. Haheitalai, bema tadikaka ta ese dala haida ai ita ia habadua o hahisia, dahaka do ita karaia? Reana do ita ura ta ena dika davana ita henia, to lalokau ita hahedinaraia lasi. To Petero be Iesu amo ia diba, ta ena kara dika haloua karana ese Dirava ia hamoalea lasi. (Ioa. 18:​10, 11) Petero ia gwau: “Bema ta ese umui ia kara dika henia eiava ia hereva dika henia, ena davana umui henia lasi. To namona be umui kara namo henia.” (1 Pet. 3:9) Ta ta lalokau henia bada karana ese ita do ia hagoadaia, ena be ta ese ita ia hahisia, to kara namo do ita hahedinaraia.

12. (a) Lalokau henia bada karana ese ita ia hagoadaia dahaka ita karaia totona? (b) Inai vidio Maino Karana ese Hahenamo Ia Mailaia ese ia hahedinaraia bamona dahaka oi ura karaia?

¹² Petero be ena revareva ginigunana lalonai, inai hereva “lalokau henia bada” ia gaukaralaia. Unai bamona lalokau karana ese kara dika haida sibona ia gwauatao lasi, to “kara dika momo ia gwauatao.” (1 Pet. 4:8) Reana Petero ia laloatao, lagani momo gunanai Iesu be ia dekenai gwauatao karana ia hadibaia. Unai negai, Petero be ena tadikaka ena dika be “nega 7” do ia gwauatao ia herevalaia neganai, ia laloa unai be hebogahisi karana. To Iesu ese ia, bona ita ia hadibaia dika gwauatao karana be “nega 77,” anina be hetoana lasi. (Mat. 18:​21, 22) Bema unai sisiba badinaia totona be auka, oi lalohisihisi lasi! Iehova ena hesiai taudia ibounai be goevadae lasi, nega haida ia auka dika idia gwauatao totona. Mai anina bada gauna be hari kara haida oi karaia, emu tadikaka ena dika oi gwauatao bona maino umui karaia. c

13. Dahaka dainai elda taudia be tadikaka bona taihu idia naria namonamo totona idia hekwarahi?

¹³ Iesu ia toreisi lou murinai ia gwauraia herevana be Petero ia laloaboio lasi: “Lauegu mamoe natudia oi naria.” (Ioa. 21:16) Bema oi be elda ta, unai hereva be oi totona danu. Elda tauna do ia hekwarahi nega ia atoa, unai mai anina bada asainmen ia karaia totona. Elda taudia ese edia famili be tauanina bona hemami dalanai idia naria, danu do idia durudia Iehova kahirakahira idia lao totona. Danu haroro gaukara idia gunalaia bona kongrigeisen heboudia, sekit, bona hebouhebou badadia totona idia hegaegae. Idia haida be Hospital Liesen Komiti, eiava Local Design/Konstraksen Dipatmen gaukarana idia karaia. Momokani, elda taudia idia bisi bada.

14. Dahaka ese elda taudia ia durua diba mamoe idia naria namonamo totona? (1 Petero 5:​1-4)

¹⁴ Petero ese ia ida idia gaukara hebou elda taudia ia hagoadaia ia gwau: “Dirava ena mamoe oreana do umui . . . naria.” (1 Petero 5:​1-4 duahia.) Bema oi be elda ta, ai diba emu tadikaka bona taihu oi lalokau henidia bona oi ura idia do oi naridia. To, reana nega haida oi mamia oi bisi bada eiava emu goada ia ore dainai, emu asainmen oi hagugurua lasi. Dahaka oi karaia be namo? Iehova dekenai emu lalohekwarahi oi gwauraia hedinarai. Petero ia gwau: “Bema ta be hesiai gaukara ia karaia diba, namona be Dirava ese ia henia goadana dekenai ia tabekau, unai hesiai gaukara ia karaia totona.” (1 Pet. 4:11) Emu tadikaka bona taihu ese idia davaria hekwakwanai idauidau be inai nega ai do idia ore lasi. To laloatao, “mamoe naria tauna badana” Iesu Keriso ese idia karaia diba lasi gaudia dekenai idia ia durua diba. Hari bona tanobada matamata ai danu unai ia karaia diba. Dirava ese elda taudia ia noia edia tadikaka idia lalokau henia, naridia, bona “mamoe oreana dekenai haheitalai namona” do idia hahedinaraia.

15. Elda ta ese edena dala ai, mamoe ia naria? (Laulau itaia danu.)

¹⁵ Lagani momo elda gaukarana ia karaia tadikaka, William ia laloparara mamoe naria gaukarana be mai anina bada. COVID-19 pendemik ia matamaia negana ai, ia bona ena elda tadikaka ma haida ese wiki ta ta ai, edia grup taudia ta ta idia rini henidia. Ia gwau: “Tadikaka  momo be sibona ruma ai idia noho dainai, karaharaga lalohadai idauidau idia abia diba.” Tadikaka o taihu ta be ena hekwakwanai ia herevalaia neganai, William be edia lalohadai ia kamonai namonamo. Nega momo, iseda websait ena vidio ia gaukaralaia ena tadikaka o taihu ia hagoadaia totona. Ia gwau: “Mamoe naria gaukarana be mai anina bada hari negai. Ita gaukara goada taunimanima ita durua Iehova idia diba totona; unai hegeregerena, mamoe naria gaukarana ita karaia be namo, Iehova ena mamoe ita durudia hereva momokani lalonai idia noho totona.”

16. Edena dala haida ai, Petero ena revareva amo ita dibaia gaudia ita badinaia diba?

¹⁶ Inai stadi ai, Petero ena revareva rua amo ita dibaia gaudia haida sibona ita herevalaia. Reana inai leseni amo gau ta oi dibaia bona oi ura unai oi badinaia. Hegeregere, reana oi ura tanobada matamata ai do idia vara hahenamo oi lalodia dobu, a? Tahua gauna oi atoa, gaukara, sikuli o dala ma haida ai do oi haroro, a? Emu lalokau tadikaka bona taihu dekenai habadaia daladia haida oi itaia vadaeni, a? Elda taudia e, emui lalona umui hadaia vadaeni Iehova ena mamoe be mai ura ida umui naridia totona, a? Dahaka gaudia do umui hanamoa be umui sibona umui diba, to namo lasi umui lalomanoka. “Lohiabada be namo,” bona ita do ia durua. (1 Pet. 2:3) Petero be ita ia hagoadaia: “Dirava ese emui treinini do ia hagugurua. . . . Bona ia ese umui do ia hagoadaia, unai amo emui abidadama be do ia goada, bona umui do ia haginia goada.”—1 Pet. 5:10.

17. Bema Iehova ese ita ia treinia karana ita abia dae, dahaka namo ita abia?

¹⁷ Nega ta Petero ia mamia ia be hegeregere lasi Dirava ena Natuna ida ia noho totona. (Luka 5:8) To Iehova bona Iesu edia heduru dainai, Petero ia gaukara goada Keriso murinai ia raka totona. Unai dainai Petero be ia hegeregere “iseda Lohiabada bona Hamauria Tauna, Iesu Keriso, ena noho hanaihanai Basileia lalonai” ia vareai totona. (2 Pet. 1:11) Unai be ahuna hereana! Bema Petero bamona oi gaukara goada bona Iehova ese oi ia treinia karana oi abia dae, oi danu be mauri hanaihanai ena ahuna do oi abia. Emu ‘abidadama dainai mai moale ida hahemauri do oi abia.’—1 Pet. 1:9.