1-2. Dahaka dainai Samson ena sivarai ita stadilaia be namo?

 INAI ladana Samson oi kamonai neganai, dahaka oi laloa? Reana iena goada bada oi laloa. Unai be momokani. To Samson be abia hidi kererena ia karaia dainai dika bada ia davaria. Ena be unai ia vara, to Iehova ese Samson ia karaia hesiai gaukara ia laloa bada, bona ita durua totona Baibel lalonai ena sivarai ia torea.

² Iehova ese Samson ia abia hidi hoa karadia do ia karaia, iena taunimanima, Israela besena ia durua totona. Samson ia mase bena lagani handred momo murinai, Iehova ena siahu amo Paulo ese abidadama tatau edia ladana be lista ai ia torea neganai, Samson ena ladana ia torea danu. (Heb. 11:​32-34) Samson ena haheitalai ese ita ia hagoadaia nega aukadia ai, Iehova do ita tabekau henia. Inai atikol lalonai, Samson ena haheitalai ese ita ia hagoadaia dalana bona ia amo ita dibaia gaudia do ita herevalaia.

3. Samson be dahaka asainmen ia abia?

³ Samson ia vara neganai, Filistia taudia be Israela besena idia biagua bona dagedage henidia. (Hah. 13:1) Israela taudia idia hahisia bada. Iehova ese Samson ia abia hidi “ia ese Filistia taudia amo Israela taudia do ia hamauria.” (Hah. 13:5) Unai be gaukara aukana ta! Unai hesiai gaukara ia hagugurua  totona, Samson be Iehova dekenai do ia tabekau be namo.

4. Edena dala ai Iehova ese Samson ia durua bona Filistia taudia amo ia ruhaia? (Hahemaoro Taudia 15:​14-16)

⁴ Samson ena tabekau karana bona Iehova ena heduru ia abia dalana mani ita herevalaia. Nega ta Filistia tuari taudia be, Lehi, Iudea ena gabu ta dekenai idia mai Samson idia abia totona. Iuda tatau be idia gari dainai, Filistia taudia dekenai Samson idia henia. Samson ena bese taudia ese varo matamatadia rua amo Samson idia kwatua bona Filistia taudia dekenai idia abia lao. (Hah. 15:​9-13) To, “Iehova ena lauma ese ia hasiahua” dainai, Samson be unai varo amo sibona ia ruhaia. Bena “ia ese doniki tau ena aukina turia matamatana ia davaria” bona ia abia bona Filistia tatau 1,000 ia alaia mase!—Hahemaoro Taudia 15:​14-16 duahia.

5. Edena dala ai Samson ese doniki ena aukina turia ia gaukaralaia karana ese Iehova tabekau henia karana ia hahedinaraia?

⁵ Dahaka dainai Samson be doniki ena aukina turia ia gaukaralaia? Ia be tuari gauna idauna! Samson ia diba, herevana dahaka tuari gauna ia gaukaralaia, to Iehova ese do ia durua Filistia taudia ia halusidia totona. Oibe, unai abidadama tauna be Iehova ena ura ia hagugurua totona, ia dekenai ia noho gauna ia gaukaralaia. Samson ese unai taudia ia halusidia, badina Iehova dekenai ia tabekau.

6. Iseda tiokratik asainmen ita hagugurua totona, Samson amo dahaka ita dibaia?

⁶ Herevana ita karaia hesiai gaukara be auka, to Iehova ese ita dekenai goada do ia henia ita hagugurua totona. Iehova ese ita laloa lasi dalanai ita ia durua diba. Ita diba Iehova be Samson dekenai goada ia henia hegeregerena, ia dekenai ita tabekau neganai, ita do Ia durua Iena ura ita hagugurua totona.—Aon. 16:3.

7. Dahaka haheitalai ese ia hahedinaraia Iehova ena hakaua dalana ita badinaia be gau badana?

⁷ Tiokratik konstraksen gaukarana idia karaia tadikaka taihu momo be Iehova tabekau henia karana idia hahedinaraia. Guna, tadikaka ese Kingdom Hall bona ruma matamatadia ma haida edia palani idia karaia bona  idia haginidia. To, Iehova ena orea be ia bada ia lao noho dainai, senisi haida idia karaia. Gaukara idia gunalaia tadikaka be Iehova ena hakaua dalana idia tahua bona dala matamatadia idia tohoa, hegeregere ruma haida idia hoia bona idia hanamodia. Robert be iseda orea ena tanobada hegegemadai ruma haginia gaukaradia lalonai ia heduru, bona ia gwau: “Matamanai, momo be unai dala matamata idia abia dae haraga lasi.” Ma ia gwau: “Lagani momo lalonai ai badinaia dalana amo ia idau. To tadikaka be unai dala matamata idia abia dae bona ia hedinarai Iehova be unai dala matamata ia hanamoa noho.” Unai ese ia hamomokania Iehova be iena taunimanima ia hakaua noho iena ura idia hagugurua totona. Nega ta ta ai, ita ibounai ese sibona do ita nanadaia, ‘Lau be Iehova ena hakaua dalana lau tahua noho bona senisi haida lau karaia unai amo ia lau hesiai henia namonamo diba, a?’

8. Nega ta Samson be ia ranu mase momokani neganai, dahaka ia karaia?

⁸ Reana Samson ese ia karaia hoa karadia haida edia sivarai oi duahia vadaeni. Samson sibona ese laiona ta ia alaia mase bona gabeai Asakelona dekenai Filistia tatau 30 ia alaia mase. (Hah. 14:​5, 6, 19) Samson ia diba Iehova ena heduru sibona amo unai gaudia ia karaia diba. Hegeregere, nega ta Samson be Filistia taudia 1,000 ia alaia mase murinai, ia ranu mase. Dahaka ia karaia? Ia sibona ese ranu ia tahua lasi, to Iehova ena heduru totona ia noinoi.—Hah. 15:18.

9. Samson be heduru totona ia noinoi neganai, Iehova be dahaka ia karaia? (Hahemaoro Taudia 15:19 bona futnout)

⁹ Iehova be Samson ena noinoi ia kamonai bona hoa dalanai ranu lohilohi ia havaraia. Samson be unai “ranu ia inua neganai, ena goada ia giroa lou bona ena tauanina ia goada.” (Hahemaoro Taudia 15:19 bona futnout duahia.) Unai ranu lohilohi be lagani momo lalonai ia noho, ela bona peroveta tauna Samuela ese Hahemaoro Tauna bukana ia torea. Israela taudia ese unai ranu lohilohi idia itaia neganai, idia laloatao Iehova ena abidadama hesiai taudia be nega aukadia idia davaria neganai, ena heduru dekenai idia tabekau diba.

10. Iehova ese ita ia durua totona, dahaka ita karaia be namo? (Laulau itaia danu.)

¹⁰ Herevana ita be mai iseda diba, aonega, o dahaka hesiai gaukara ita hagugurua, to namona be Iehova ena heduru ita tahua. Namona be ita manau bona ita abia dae Iehova dekenai ita tabekau neganai, iseda hesiai gaukara ita hagugurua diba. Samson be Iehova ese ia henia ranu ia inua neganai, goada ia abia. Samson hegeregerena, ita goada totona, namona be Iehova ena heduru ita abia dae.—Mat. 11:28.

11. Edena dala ai Iehova ena heduru ita abia diba? Haheitalai herevalaia.

¹¹ Mani Russia tadikaka Aleksey ita laloa, ia be dagedage bada ia haheaukalaia noho. Dahaka ese ia durua unai hahetoho aukana ia haheaukalaia totona? Ia bona ena adavana be hanaihanai Baibel idia stadilaia bona tomadiho karadia idia karaia. Ia gwau: “Lau hekwarahi sibona egu stadi bona dina ta ta ena Baibel duahiduahi lau karaia totona. Daba ibounai egu adavana bona lau be dina siri ai herevalaia bona Iehova dekenai ai guriguri hebou.” Edia haheitalai amo dahaka ita dibaia? Namo lasi sibona dekenai ita tabekau, to Iehova dekenai ita tabekau be namo. Edena dala ai unai ita karaia diba? Namona be  hanaihanai sibona iseda Baibel stadi bona tomadiho karadia ita karaia, unai amo iseda abidadama do ita hagoadaia. Bena Iehova ese ita do ia durua ia ita hesiai henia noho totona. Ia ese Samson ia hagoadaia hegeregerena, ita do ia hagoadaia danu.

12. Samson be dahaka abia hidi kererena ia karaia, bona edena dala ai iena hetura karana Delila ida be idau?

¹² Samson be goevadae lasi tauna ita bamona, unai dainai abia hidi kereredia ia karaia. Ia karaia abia hidi ta ese dika bada ia havaraia. Samson be lagani momo lalonai hahemaoro gaukarana ia karaia murinai, “Soreke Koura ai ia noho kekeni ladana, Delila, ia ura henia.” (Hah. 16:4) Guna, Samson be Filistia hahinena ta ida ia maoheni, to “unai be Iehova amo badina Dirava ia ura unai amo Filistia taudia do ia tuari henia.” Gabeai, Filistia ena siti ta ladana Gasa ai, Samson be ariara hahinena ena ruma ai ia noho. Unai nega ai Iehova ese Samson ia hasiahua unai siti ena magu ena iduara ia huaia oho, unai amo edia inai taudia idia vareai diba. (Hah. 14:​1-4; 16:​1-3) To Delila be idau, badina ia be Israela hahinena.

13. Delila be Samson dekenai dahaka ia karaia?

¹³ Delila be Samson ena mase dalana ia karaia totona, Filistia taudia amo moni bada ia abia dae. Samson be Delila ia lalokau henia bada dainai, ena palani ia lalopararalaia lasi. Delila be Samson ena goada ena badina ia ura diba dainai ia henanadai loulou, ela bona Samson ia hesiku bona ia hamaoroa. Madi, Samson be abia hidi kererena ia karaia dainai, iena goada ia haboioa bona nega sisina lalonai Iehova ena hahenamo ia haboioa danu.—Hah. 16:​16-20.

14. Samson ese Delila ia abidadama henia dainai, dahaka dika ia davaria?

 ¹⁴ Samson be Iehova ia abidadama henia lasi, to Delila ia abidadama henia dainai dika bada ia davaria. Filistia taudia ese Samson idia dogoatao bona matana idia hakepulua. Gasa dekenai dibura ruma ai idia atoa, guna ia ese unai siti ena iduara ia kokidia, to hari unuseniai ia be witi moia tauna ai idia halaoa. Filistia taudia ese edia aria ta ai Samson idia abia lao. Idia ese edia dirava Dagona dekenai boubou gauna badana idia karaia, badina idia gwau ia ese Samson be edia imana dekenai ia atoa. Samson be dibura ruma amo idia abia lao unai aria dekenai taunimanima ia “hamoalea,” eiava ia idia hevasehalaia totona.—Hah. 16:​21-25.

15. Edena dala ai Samson ia hahedinaraia Iehova ia tabekau henia lou? (Hahemaoro Taudia 16:​28-30) (Laulau itaia danu.)

¹⁵ Samson be kerere badana ia karaia, to Iehova ia do hesiai henia noho. Iehova ena ura dainai, dala ia tahua Filistia taudia ia tuari henia totona. (Hahemaoro Taudia 16:​28-30 duahia.) Samson ese Iehova ia noia: “Filistia taudia . . . edia davana do lau henia.” Iehova ese Samson ena noinoi ia kamonai bona goada bada ia henia. Unai dainai, Samson ese Filistia taudia momo herea be unai nega ai ia hamasedia.

16. Samson ia karaia kerere amo dahaka ita dibaia?

¹⁶ Samson be ia karaia kerere dainai hisihisi momo ia davaria, to Iehova ena ura ia do karaia noho. Ena be kerere ta ita karaia dainai sisiba aukana ita abia o iseda hahenamo ita haboioa, to namona be Iehova ena ura ita karaia noho. Laloatao, Iehova be ia noho hegaegae ita ia gwauatao totona. (Sal. 103:​8-10) Ena be kerere ita karaia, to Samson dekenai ia karaia bamona, Iehova ese ita dekenai goada do ia henia iena ura ita karaia totona.

17-18. Michael ena haheitalai ese edena dala ai oi ia hagoadaia? (Laulau itaia danu.)

¹⁷ Mani Michael ena sivarai ita laloa. Iehova ena hesiai gaukara dekenai ia bisi bada, ia be hesiai tauna bona regula painia gaukara ia karaia. To, kerere ta ia karaia dainai, kongrigeisen lalonai iena maduna ia haboioa. Ia gwau: “Hesiai gaukara ai lau bisi bada herea. To unai hekwakwanai ia vara neganai, lau mamia Iehova ena hesiai gaukara ta lau karaia diba lasi. Lau laloa lasi Iehova ese lau do ia rakatania, to lau daradara bema egu hetura karana ia ida  be do ia goada lou eiava kongrigeisen lalonai hesiai gaukara do lau karaia lou.”

¹⁸ Ita moale badina Michael be ia hesiku lasi. Ia gwau: “Egu kudouna amo Iehova lau guriguri henia, Baibel lau stadilaia bona laloa dobu karana amo egu hetura karana Iehova ida lau hagoadaia lou. “ Daudau lasi murinai, Michael ese kongrigeisen lalonai iena maduna ia abia lou. Hari ia be elda ta bona regula painia gaukara ia karaia. Ia gwau: “Elda taudia ese lau idia durua bona hagoadaia karana amo lau laloparara Iehova be lau ia do lalokau henia. Mai lalomamina goevana ida kongrigeisen lalonai hesiai gaukara lau karaia diba. Inai ekspiriens ese lau ia hadibaia bema ta be ia helaro-kerehai momokani, Iehova ese iena dika do ia gwauatao.” Ita abia dae momokani, ena be kerere haida ita karaia to bema iseda kerere ita hamaoromaoroa bona Iehova dekenai ita tabekau noho, ia ese ita do ia gaukaralaia bona hanamoa danu.—Sal. 86:5; Aon. 28:13.   

19. Samson ena haheitalai ese edena dala ai oi ia hagoadaia?

¹⁹ Inai atikol lalonai, Samson ena mauri ai idia vara gaudia haida ita herevalaia. Ia be goevadae tauna lasi bona ena be Delila ese ia koia bona kerere ia karaia, to Iehova ia hesiai henia goadagoada noho. Bona Iehova be Samson ia gaukaralaia noho hoa karadia ia karaia totona. Bona Iehova ia laloa Samson be abidadama goada tauna dainai, Heberu karoa 11 dekenai abidadama taudia edia lista ai ena ladana ia torea. Ita moale badina ita be lalokau guba Tamana ita hesiai henia, ita manoka negadiai, ia ura ita ia hagoadaia! Samson bamona Iehova do ita noia: “Plis lau oi laloatao, bona Dirava e, plis inai nega tamona lau dekenai goada oi henia.”—Hah. 16:28.