1. Iesu be kahirakahira dahaka do ia karaia?

 ITA NOHO negana ai senisi badadia do idia vara! Kahirakahira, Iesu ese idia mauri noho taudia ta ta do ia hahemaoro henia. Iesu ia hahedinaraia unai hahemaoro negana ia do ginidae lasi neganai, “toa” haida do idia vara, unai ese ena noho negana bona “tanobada ena dokona” do ia hahedinaraia. (Mat. 24:3) Unai peroveta herevadia be Mataio karoa 24 bona 25 bona Mareko karoa 13 bona Luka karoa 21 ai idia noho.

2. Inai atikol ai dahaka do ita herevalaia bona dahaka dainai unai ese ita do ia durua?

² Iesu ese parabole toi ia gaukaralaia ita ia durua do ita hegaegae totona, unai be ita dekenai hadibaia herevadia. Unai parabole toi be mamoe bona nanigosi, aonega bona kavakava kekenidia bona talent. Unai parabole amo do ita itaia, ta be ena kara hegeregerena hahemaoro do ia abia. Inai atikol ai unai parabole bona ita dibaia gaudia do ita herevalaia. Hari ita ese mamoe bona nanigosi edia parabole do ita herevalaia guna.

MAMOE BONA NANIGOSI ENA PARABOLE

3. Edena nega ai, Iesu ese taunimanima do ia hahemaoro henia?

³ Iesu ia gwau, taunimanima be sivarai namona idia kamonai bona ena horoa tadikaka idia durua dalana hegeregerena hahemaoro do idia abia. (Mat. 25:31-46) “Hisihisi badana” lalonai, Aramagedono do lasi neganai, unai taudia do ia hahemaoro  henia. (Mat. 24:21) Mamoe naria tauna ese mamoe be nanigosi amo ia hapararaia hegeregerena, Iesu ese horoa taudia edia hakaua dalana idia badinaia taudia be idia badinaia lasi taudia amo do ia hapararaia.

4. Isaia 11:3, 4 hegeregerena dahaka dainai ita diba, Iesu be mai momokani ida taunimanima do ia hahemaoro henia? (ena laulau itaia danu.)

⁴ Baibel ia gwau, Iesu be Iehova totona taunimanima ia hahemaoro henia neganai, mai momokani ida unai do ia karaia. (Isaia 11:3, 4 duahia.) Ia be taunimanima ese idia karaia gaudia, edia lalohadai, idia gwauraia gaudia bona ena horoa tadikakadia idia kara henia dalana ia itaia. (Mat. 12:36, 37; 25:40) Iesu do ia diba daika ese iena horoa tadikaka bona edia gaukara ia durua. a Bona mamoe bamona taudia ese Keriso idia durua dala badana ta be haroro gaukara idia karaia. Unai heduru idia henia taudia be “kara maoromaoro taudia” bamona do ia hahemaoro henia bona idia be tanobada ai mauri hanaihanai do idia abia. (Mat. 25:46; Apok. 7:16, 17) Badinaia karana idia hahedinaraia taudia be unai hahenamo badana do idia abia! Hisihisi badana lalonai bona murinai, idia abidadama taudia edia ladana be “mauri bukana” lalonai do ia noho.—Apok. 20:15.

5. Mamoe bona nanigosi parabolena amo dahaka ita dibaia bona unai ese daidia do ia durua?

⁵ Oi hamomokania oi be abidadama bona badinaia karana oi hahedinaraia. Iesu ese ia gwauraia mamoe bona nanigosi ena parabole be tanobada helarona idia abia taudia totona. Edia abidadama idia hahedinaraia dalana be haroro gaukara lalonai, Keriso ena tadikaka idia durua bona hesiai tauna mai ena kamonai bona mai ena aonega ena hakaua dalana idia badinaia. (Mat. 24:45) To guba helarona idia abia taudia ese unai parabole ena sisiba herevana idia badinaia danu be namo. Dahaka dainai? Badina Iesu ese edia kara, hereva bona lalohadai ia itaia danu. Unai dainai abidadama karana idia hahedinaraia be namo. Momokani, Iesu ese parabole rua ai ia henia hadibaia herevadia be horoa taudia totona. Danu unai parabole be Mataio karoa 25 lalonai ia noho. Mani aonega bona kavakava kekenidia ena parabole ita herevalaia.

AONEGA BONA KAVAKAVA KEKENIDIA ENA PARABOLE

6. Edena dala ai rami-hebou kekenidia 5 be aonega karana idia hahedinaraia? (Mataio 25:6-10)

⁶ Aonega bona kavakava kekenidia ena parabole lalonai, Iesu be rami-hebou kekenidia 10 ia herevalaia, idia be headava matamata tauna hedavari henia totona idia lao. (Mat. 25:1-4) Idia ibounai idia ura headava matamata tauna idia bamoa bona headava aria dekenai idia lao. Iesu ese 5 ia gwauraia “aonega kekenidia,” bona ma 5 ia gwauraia “kavakava kekenidia.” Aonega rami-hebou kekenidia be idia hegaegae bona idia gima noho. Bona edia lalona idia hadaia headava matamata tauna idia naria totona, ena be hanuaboi momokani do ia ginidae. Unai dainai lamepa mai edia oela idia abia mai, unai amo dibura lalonai diari ia henia diba. Danu, oela ma haida idia abia kau, unai amo bema headava matamata tauna ia mai haraga lasi, edia lamepa do ia ara noho. (Mataio 25:6-10 duahia.) Headava matamata tauna ia ginidae neganai, aonega rami-hebou kekenidia be ia ida headava ariana dekenai idia vareai. Unai hegeregerena, horoa Keristani taudia be idia gima bona abidadama noho ela bona Keriso ia ginidae neganai, edia ahuna do idia abia, unai be  guba Basileia lalonai, headava matamata tauna, Iesu do idia bamoa. b (Apok. 7:1-3) To, kavakava rami-hebou kekenidia 5 be edena bamona?

7. Kavakava rami-hebou kekenidia 5 dekenai dahaka ia vara, bona dahaka dainai?

⁷ Headava matamata tauna ia ginidae neganai, aonega rami-hebou kekenidia be idia hegaegae, to kavakava kekenidia be idia hegaegae lasi. Edia lamepa be kahirakahira do ia bodo bona oela ma haida idia abia kau lasi. Idia kamonai, headava matamata tauna be kahirakahira do ia ginidae neganai, oela ma haida hoia totona idia lao. Bona headava matamata tauna ia ginidae neganai, unai kavakava kekenidia be idia do giroa mai lasi. To unai nega ai, “idia hegaegae rami-hebou kekenidia be ia danu headava aria lalonai idia vareai, bona iduara ia koua.” (Mat. 25:10) Gabeai kavakava kekenidia idia giroa lou bona idia ura vareai neganai, headava matamata tauna ese idia ia hamaoroa: “Umui lau diba lasi.” (Mat. 25:11, 12) Unai kavakava kekenidia be headava matamata tauna ena mai totona idia hegaegae lasi. Horoa taudia be unai parabole amo dahaka idia dibaia?

8-9. Horoa taudia be rami-hebou kekenidia ena parabole amo dahaka idia dibaia? (Laulau itaia danu.)

⁸ Oi hamomokania oi hegaegae bona oi gima noho. Iesu be ia gwau lasi horoa taudia be mai edia orea idaudia rua, ta be ia hegaegae do ia naria ela bona inai nega oromana ena dokona bona ta be unai bamona do ia karaia lasi. To, Iesu be idia dekenai do ia vara gauna ia herevalaia, bema idia hegaegae lasi mai abidadama ida do idia naria lasi ela bona dokona. Bona edia ahuna do idia abia lasi. (Ioa. 14:3, 4) Unai be mai anina bada! Ena be iseda helaro be guba eiava tanobada ai, to namona be ita ibounai ese unai hadibaia herevana ita badinaia. Namona be ita ta ta ita gima noho bona hegaegae, unai amo do ita haheauka noho ela bona dokona.—Mat. 24:13.

⁹ Iesu ese rami-hebou kekenidia ena parabole  amo ia hahedinaraia, ita hegaegae bona gima noho be namo, unai murinai talent parabolena ia herevalaia. Unai parabole ese gaukara goada karana ia herevalaia.

TALENT ENA PARABOLE

10. Edena dala ai hesiai taudia rua be edia abidadama karana idia hahedinaraia? (Mataio 25:19-23)

¹⁰ Inai parabole lalonai, Iesu ia gwau hesiai taudia rua be edia biaguna idia abidadama henia, to ma ta be unai bamona ia karaia lasi. (Mat. 25:14-18) Hesiai taudia rua be abidadama karana idia hahedinaraia. Bona idia gaukara goada edia biaguna ena moni idia habadaia totona. Edia biaguna be gabu daudau ai ia do lao lasi neganai, ena hesiai taudia ta ta dekenai talent ia henia, unai be moni badana. Hesiai taudia rua be idia gaukara goada bona unai moni idia gaukaralaia namonamo. Dahaka ia vara? Edia biaguna ia giroa lou neganai, hesiai taudia rua be ena moni idia habadaia. Edia biaguna ese idia ia hanamoa bona ‘ia ida idia moale hebou.’ (Mataio 25:19-23 duahia.) To hesiai tauna ihatoina be edena bamona? Ena biaguna ese ia henia moni dekenai dahaka ia karaia?

11. “Lahedo” hesiai tauna dekenai dahaka ia vara bona dahaka dainai?

¹¹ Hesiai tauna ihatoina be talent ta ia abia, to ia be “lahedo tauna.” Ena biaguna ia ura unai talent do ia gaukaralaia namonamo. To ia ese tano dekenai ia guria. Ena biaguna ia giroa lou neganai, unai hesiai tauna be ia abia talent ia henia lou. Unai hesiai tauna ena kara be namo lasi. Ia ese ena biaguna ena moni a habadaia lasi bona sori herevana ia gwauraia lasi, to ena biaguna ia gwauraia “biaguna aukana.” Unai dainai ena biaguna ena lalonamo ia abia lasi. Danu, unai hesiai tauna amo talent idia abia bona ena biaguna ese ena ruma amo ia negea raka-lasi.—Mat. 25:24, 26-30.

12. Abidadama hesiai taudia be daidia idia laulaulaia?

¹² Unai abidadama hesiai taudia rua be abidadama horoa Keristani taudia idia laulaulaia. Edia biaguna, Iesu, ese idia ia boiria ‘ia ida do idia moale hebou totona.’ Edia guba ahuna do idia abia, unai be toreisi lou  ginigunana. (Mat. 25:21, 23; Apok. 20:5b) To lahedo hesiai tauna ena haheitalai ese horoa taudia dekenai gau ta ia hadibaia. Edena dala ai?

13-14. Horoa taudia be talent parabolena amo dahaka idia dibaia? (Laulau itaia danu.)

¹³ Umui hamomokania umui be gaukara goada taudia. Talent bona rami-hebou kekenidia ena parabole ai, Iesu ia gwau lasi horoa tadikaka be lahedo taudia ai do idia lao. To idia dekenai do ia vara gauna ia gwauraia, bema mai ura ida idia gaukara lasi. ‘Dirava ese idia ia boiria bona idia ia abia hidi karana do idia hamomokania’ lasi, bona gwaumaoro do idia abia lasi guba Basileia lalonai idia vareai totona.—2 Pet. 1:10.

¹⁴ Rami-hebou kekenidia bona talent parabolena amo ia hahedinaraia horoa Keristani taudia idia hegaegae, idia gima noho, bona idia gaukara goada be namo. To, Iesu be horoa taudia dekenai hadibaia hereva ma ta ia gwauraia, a? Oibe unai ia karaia! Bona unai hadibaia herevana be Mataio 24:40, 41 ai ia noho.

DAIKA DO IDIA “ABIA LAO”?

15-16. Edena dala ai, Mataio 24:40, 41 ese ia hahedinaraia horoa taudia idia gima noho be namo?

¹⁵ Iesu ese parabole toi ia do herevalaia lasi neganai, ia ese horoa taudia edia hahemaoro ginigabena ai, do ia abia hidi taudia ia herevalaia. Ia ese uma ai idia gaukara tatau rua bona witi idia moia hahine rua ia herevalaia. Tatau rua be gaukara tamona idia karaia bona hahine rua be gaukara tamona idia karaia, to Iesu ia gwau ta do idia “abia lao bona ma ta do idia rakatania.” (Mataio 24:40, 41 duahia.) Bena ia ese ena murinai idia raka taudia ia hamaoroa: “Unai dainai umui gima noho, badina umui diba lasi edena dina ai emui Lohiabada do ia mai.” (Mat. 24:42) Iesu ese rami-hebou kekenidia ena parabole ia herevalaia murinai, unai hereva ia gwauraia. (Mat. 25:13) Unai hereva edia anina be idia hegeregere, a? Toana be idia hegeregere. Kara momokani bona idia abidadama horoa taudia sibona be Iesu ese guba Basileiana lalonai do ia “abia lao.”—Ioa. 14:3.

¹⁶ Umui hamomokania umui gima noho. Iehova ida edia hetura karana idia gimaia lasi horoa taudia be Dirava ena “abia hidi taudia” ida do idia haboua lasi. (Mat. 24:31) Bona tanobada ai, mauri hanaihanai helarona idia abia taudia ibounai ese edia abidadama idia hagoadaia bona idia gima noho be namo.

17. Dahaka dainai Iehova ese ena lauma helaga amo horoa taudia ia abia hidi negana ita laloa momo lasi be namo?

¹⁷ Iehova ita diba namonamo dainai, iena hahemaoro karana ita abidadama henia. Unai dainai ita laloa momo lasi bema hari, Iehova ese abidadama taudia ma haida ia horoa. c Iesu ese 5 oklok bamona ai, vain umana dekenai idia gaukara taudia edia haheitalai ia gwauraia karana ita laloa lou. (Mat. 20:1-16) Daba ai idia gaukara matamaia taudia bona dina ai idia gaukara taudia edia davana be tamona. Unai hegeregerena, ena be edena nega ai Iehova ese horoa taudia ia abia hidi, to guba ai ahuna namona do idia abia bema idia abidadama noho.

HADIBAIA HEREVADIA OI LALOA BADA

18-19. Ita herevalaia parabole toi amo dahaka ita dibaia?

¹⁸ Dahaka gaudia ita herevalaia vadaeni? Tanobada ai mauri hanaihanai helarona do idia abia taudia be mamoe bona nanigosi parabolena amo idia diba, hari bona do ia vara hisihisi badana lalonai, mai abidadama ida Iehova idia badinaia noho be namo. Unai nega ai,  Iesu ese abidadama taudia do ia hahemaoro henia bona do idia hegeregere “mauri hanaihanai” idia abia totona.—Mat. 25:46.

¹⁹ Danu, ita ese parabole rua ita herevalaia, unai be hadibaia herevana horoa taudia totona. Iesu ena parabole rami-hebou kekenidia amo, 5 be idia hamomokania idia be aonega kekenidia. Idia hegaegae bona idia gima noho, unai amo headava matamata tauna ia ginidae haraga lasi to idia naria diba. To kavakava rami-hebou kekenidia be idia hegaegae lasi. Unai dainai headava matamata tauna ese idia ia dadaraia bona ena headava aria lalonai idia vareai lasi. Ita danu, namona be ita hegaegae bona naria noho ela bona Iesu ese inai nega oromana ia haorea, ena be unai ia vara totona nega daudau do ita naria. Danu, Iesu ena talent parabolena ai idia gaukara goada abidadama hesiai taudia rua ita herevalaia, edia biaguna totona idia gaukara goada bona ena lalonamo idia abia. To ia lahedo hesiai tauna ia dadaraia. Unai amo dahaka ita dibaia? Namona be Iehova ena hesiai gaukara lalonai ita bisi noho ela bona dokona. Bona Iesu ese horoa taudia be guba dekenai ia “abia lao” totona idia gima noho dalana ita herevalaia. Idia be mai ura ida Iesu ida guba ai do idia “noho karana” idia naria noho. Aramagedono tuarina murinai, idia be mamoe natuna ena headava lalonai, Iesu ena adavana bamona do idia lao.—2 Tes. 2:1; Apok. 19:9.

20. Iehova be ena hadibaia herevadia idia badinaia taudia totona dahaka do ia karaia?

²⁰ Ena be hahemaoro dinana be ia mai haraga noho, to ita gari lasi be namo. Bema ita abidadama noho, iseda lalokau guba Tamana ese ita dekenai “taunimanima edia siahu ia hereaia gauna” do ia henia, unai amo “taunimanima ena Natuna ena vairanai do [ita] gini diba.” (2 Kor. 4:7; Luka 21:36) Ena be iseda helaro be guba ai eiava tanobada ai, to iseda Tamana do ita hamoalea bema Iesu ena parabole amo ita abia hadibaia herevadia ita badinaia. Iehova ena hebogahisi hereadaena dainai, iseda ladana be mauri bukana ai ‘do idia torea.’—Dan. 12:1; Apok. 3:5.