1-2. Iehova ese ita dekenai henia karana ena moale ia atoa dainai, dahaka namo ita davaria?

 IEHOVA ese ita ia karaia neganai, ita dekenai henia karana ena moale ia atoa, bona unai ese abia karana ena moale ia hereaia. (Kara 20:35) Unai ena anina be abia karana ese moale ia havaraia lasi, a? Lasi. Reana ita ibounai ita mamia vadaeni, harihari gauna ta ita abia neganai ita moale. To, ma ta dekenai henia karana ita hahedinaraia neganai ita moale bada. Iehova ese unai dala amo ita ia karaia be mai ena namo. Dahaka dainai?

² Iehova ese ita ia karaia dalana amo ita sibona ita hamoalea diba. Iseda moale ita habadaia totona, dala idauidau ai henia karana ita hahedinaraia. Iehova ese ita ia karaia dalana be namo herea.—Sal. 139:14.

3. Dahaka dainai Baibel ia gwau Iehova be “moale Diravana”?

³ Baibel ese ia hahedinaraia henia karana ese moale ia havaraia, unai dainai ita laloparara Iehova be “moale Diravana.” (1 Tim. 1:11) Iehova be henia karana ia hahedinaraia Tauna hereadaena. Aposetolo Paulo ia gwau Iehova dainai “ita mauri, ita raka loaloa bona ita noho.” (Kara 17:28) Oibe, “harihari gaudia namodia ibounai bona harihari gaudia goevadia ibounai” be Iehova amo idia mai.—Iam. 1:17.

4. Dahaka ese ita do ia durua ita moale noho totona?

⁴ Momokani, reana ita ibounai ita ura henia karana ese ia havaraia moalena ita mamia. Unai ita karaia totona Iehova ena hariharibada karana ita tohotohoa diba. (Efe. 5:1) Inai atikol ai, Iehova ena henia karana do ita stadilaia. Danu do ita itaia, dahaka ita karaia be namo, bema haida be tanikiu karana  idia hahedinaraia lasi. Ita dibaia gaudia ese ita do ia durua, henia karana amo ita abia moalena ita habadaia noho totona.

IEHOVA ENA HARIHARIBADA KARANA ITA TOHOTOHOA

5. Iehova ese ita dekenai dahaka gaudia ia henia?

⁵ Iehova ese edena dala ma haida ai hariharibada karana ia hahedinaraia? Mani inai haheitalai haida ita laloa. Iehova ese iseda dabu gaudia ia henia. Ia ese nega ibounai taga maurina do ia henia lasi, to hanaihanai iseda dabu gaudia ia henia. Hegeregere, ia ese dala ia karaia aniani, dabua bona noho gabuna ita abia totona. (Sal. 4:8; Mat. 6:31-33; 1 Tim. 6:6-8) Iehova ese ita dekenai tauanina durua gaudia ia henia, badina unai be iena maduna, a? Lasi! To dahaka dainai Iehova be unai bamona ia karaia?

6. Mataio 6:25, 26 amo dahaka ita dibaia?

⁶ Iehova be ita ia lalokau henia dainai, iseda dabu gaudia ia henia. Mani Mataio 6:25, 26 ai Iesu ena hereva ita laloa. (Duahia.) Iesu ese havaraia gaudia edia haheitalai ia gaukaralaia. Manu maragidia ia herevalaia neganai, ia gwau: “Idia be uhe idia hadoa lasi, anina idia gogoa lasi bona aniani haboua rumadia ai aniani idia haboua lasi.” To, ma ia gwau: “Emui guba Tamana ese idia ia ubua.” Bena Iesu ia henanadai: “To, umui be idia umui hereaia, ani?” Ena hereva ena anina be dahaka? Iehova ese ia idia tomadiho henia taudia ia laloa bada. Bema Iehova ese animal edia dabu gaudia ia henia, ita abia dae iseda dabu gaudia do ia henia! Iehova be tama lalokauna ta bamona ena ruma bese ia naria.—Sal. 145:16; Mat. 6:32.

7. Edena dala ma ta ai, Iehova ena hariharibada karana ita tohotohoa diba? (Laulau itaia danu.)

⁷ Iehova bamona, mai lalokau ida ma haida edia dabu gaudia ita henia diba. Hegeregere, oi diba tadikaka eiava taihu ta be aniani eiava dabua ia ura, a? Iehova ese oi ia gaukaralaia diba, ia oi durua totona. Momo idia diba, Iehova ena taunimanima be disasta ia vara neganai, hariharibada karana idia hahedinaraia. Hegeregere, COVID-19 negana ai, tadikaka bona taihu ese aniani, dabua, bona gau ma haida be idia dabu taudia dekenai idia henia. Danu, momo be kontribiusen amo tanobada hegegemadai gaukarana idia durua. Unai moni ese disasta ia vara gabudia ai tadikaka taihu ia durua. Unai hariharibada karana idia hahedinaraia tadikaka taihu be Heberu 13:16  ena hereva idia badinaia, ia gwau: “Umui laloaboio lasi, kara namodia do umui karaia noho bona ma haida ida emui kohu do umui haria, badina Dirava ese unai bamona boubou karadia ia moalelaia.”

8. Edena dala haida ai, Iehova ena goada amo namo ita davaria? (Filipi 2:13)

⁸ Iehova ese goada ia henia. Iehova be mai moale ida ena abidadama hesiai taudia dekenai, ia ore diba lasi goadana ia henia. (Filipi 2:13 duahia.) Nega ta Iehova dekenai oi guriguri, goada do ia henia bona hedibagani eiava hekwakwanai badana ta oi haheaukalaia totona, a? Eiava reana oi guriguri, goada do ia henia bona dina ta ena gaukara oi karaia totona. Emu guriguri ena haere oi abia neganai, aposetolo Paulo ena hereva ida oi lalotamona diba, ia gwau: “Badina lau dekenai siahu ia henia tauna amo goada lau abia gau ibounai lau karaia totona.”—Fili. 4:13.

9. Edena dala ai, Iehova ese ena goada ia gaukaralaia dalana ita tohotohoa diba? (Laulau itaia danu.)

⁹ Momokani, iseda goada be mai ena hetoana, bona ma haida dekenai Iehova ese ia henia goadana ita henia diba lasi. To, iseda goada ita gaukaralaia ma haida ita durua karana amo, Iehova ita tohotohoa diba. Hegeregere, buruka eiava idia gorere tadikaka taihu totona, ruma gaukaradia ita karaia eiava sitoa dekenai ita lao. Bema ita hegeregere, Kingdom Hall hagoevaia eiava hanamoa totona ita durua diba. Unai dala idauidau ai, iseda goada ita gaukaralaia neganai, Iehova idia tomadiho henia taudia ia durua.

10. Edena dala ai, iseda hereva ese ma haida ia durua diba?

¹⁰ Danu laloatao, oi gwauraia herevadia be mai edia siahu. Emu hanamoa herevana ese do ia durua tadikaka eiava taihu ta oi laloa, a? Heduru ia ura tadikaka eiava taihu ta oi diba, a? Bema oibe, unai tauna oi hamaoroa ia oi laloa bada. Ia oi vadivadi henia, oi rini henia, eiava kadi, email, o meseij oi siaia diba. Do oi gwauraia herevana oi laloa momo lasi. Emu kudouna amo oi gwauraia hereva kwadogina ese emu tadikaka ia durua, dina ta lalonai ena abidadama ia hagoadaia eiava ena hekwakwanai lalonai, lalohadai maorona do ia abia.—Aon. 12:25; Efe. 4:29.

11. Edena dala ai Iehova ese ena aonega ia gaukaralaia?

¹¹ Iehova ese aonega ia henia. Hahediba tauna Iamesi ia gwau: “Bema umui ta ena aonega be hegeregere lasi, namona be Dirava dekenai ia noinoi noho, bona Dirava ese ia dekenai do ia henia, badina ia be ibounai dekenai mai hariharibada ida ia henia, bona edia kerere ia tahua lasi.” (Iam. 1:5; ftn.) Unai ese ia hahedinaraia, Iehova be ena aonega ia hunia  lasi. Ia be mai hariharibada ida henia karana ia hahedinaraia. Danu, Iamesi ia gwau Iehova be aonega ia henia neganai, ita ia ‘gwau henia lasi’ eiava ‘iseda kerere ia tahua lasi.’ Bona iena hakaua dalana totona ita noinoi neganai, ia ura lasi iseda hemami ia dika. To ia ura unai totona ita noinoi.—Aon. 2:1-6.

12. Edena dala idauidau ai, ita dibaia gaudia be ma haida dekenai ita hadibaia?

¹² Ita be edena bamona? Iehova ita tohotohoa bona ita dibaia gaudia be ma haida dekenai ita hadibaia, a? (Sal. 32:8) Iehova ena taunimanima be dala idauidau ai ma haida idia hadibaia. Hegeregere, nega momo ita ese haroro gaukara ai ma haida ita treinia. Elda taudia be mai haheauka ida hesiai taudia bona bapatiso tadikaka idia durua, kongrigeisen lalonai, edia asainmen idia karaia totona. Konstraksen bona hanamoa gaukarana idia diba momo tadikaka taihu, be ma haida idia treinia tomadiho rumadia idia haginia totona.

13. Edena dala ai Iehova ese ena aonega ia henia dalana ita tohotohoa diba?

¹³ Ma haida dekenai treinini oi henia neganai, Iehova oi tohotohoa. Laloatao, Ia be mai moale ida ma haida dekenai ena aonega ia henia. Unai dainai, ita ura ita dibaia gaudia be ma haida ita hadibaia. Namo lasi ita dibaia gaudia ita hunia, badina ita laloa, ita hadibaia tauna ese iseda asainmen do ia abia. Bona namo lasi ita gwau: ‘Ta be lau ia treinia lasi! Rakatania sibona do ia hadibaia.’ Iehova ena taunimanima be unai bamona idia laloa lasi be namo. To, mai moale ida ita gaukara goada ita dibaia gaudia be ma haida ita hadibaia. (1 Tes. 2:8) Ita ura, “idia danu be do idia hegeregere ma haida idia hadibaia totona.” (2 Tim. 2:1, 2) Bema ta ta dekenai ita dibaia gaudia ita hadibaia, ita ibounai be aonega do ita abia bona do ita moale.

BEMA TAUNIMANIMA ESE ITA IDIA TANIKIU HENIA LASI

14. Hariharibada karana ita hahedinaraia neganai, momo be dahaka idia karaia?

¹⁴ Iseda tadikaka bona taihu dekenai hariharibada karana ita hahedinaraia neganai, nega momo ita idia tanikiu henia. Reana kadi ta amo edia tanikiu herevana idia siaia eiava dala ma ta amo unai idia karaia. (Kol. 3:15) Unai bamona tanikiu herevadia ita abia neganai ita moale.

15. Haida ese tanikiu karana idia hahedinaraia lasi neganai, dahaka ita laloatao be namo?

¹⁵ Momokani, nega haida ta ita durua neganai, tanikiu karana ia hahedinaraia lasi. Nega haida, iseda goada, nega, eiava kohu ita gaukaralaia ta ita durua totona, to unai murinai ita laloa, ita durua tauna be iseda hekwarahi ia laloa bada eiava lasi. Bema unai ia vara, edena dala ai ita moale noho eiava do ita badu lasi? Inai atikol ena siri badana, Kara 20:35 ena hereva oi laloatao. Ta ese ita ia tanikiu henia karana be moale ena badina lasi. Abia hidi ita karaia diba, henia karana ita moalelaia noho, ena be haida ese ita idia tanikiu henia lasi. Edena dala ai? Mani inai dala haida ita laloa.

16. Henia karana ita hahedinaraia neganai, dahaka ita laloa bada be namo?

¹⁶ Iehova tohotohoa karana oi laloa bada. Ia ese taunimanima dekenai gau namodia ia henia, ena be tanikiu karana idia hahedinaraia eiava lasi. (Mat. 5:43-48) Iehova ia gwauhamata, henia karana ita hahedinaraia neganai, ‘davana abia totona ita laloa lasi,’ unai amo iseda “ahuna do ia bada.” (Luka 6:35) Unai dainai, namo lasi oi badu, bema taunimanima be oi idia tanikiu henia lasi. Mai moale ida ma haida totona oi karaia gau namodia dainai, Iehova ese oi do ia hanamoa.—Aon. 19:17; 2 Kor. 9:7.

17. Henia karana ita hahedinaraia ena badina badana be dahaka? (Luka 14:12-14)

 ¹⁷ Iehova ena henia karana ita tohotohoa totona, Luka 14:12-14 ai Iesu ena hereva ita badinaia diba. (Duahia.) Ma haida dekenai heabidae bona hariharibada karana ita hahedinaraia neganai, unai idia haloua karana be kerere lasi. To, bema nega momo ma haida dekenai henia karana ita hahedinaraia, badina ita ura ita dekenai gau ta idia henia lou be edena bamona? Bema unai ia vara, Iesu ena hereva ita badinaia diba. Ia hegeregere lasi iseda heabidae karana ia haloua tauna dekenai, henia karana ita hahedinaraia. Bena do ita moale, badina Iehova ita tohotohoa. Danu, unai ese ita do ia durua ita moale noho totona, ena be haida ese tanikiu karana idia hahedinaraia lasi.

18. Dahaka ita karaia lasi be namo bona dahaka dainai?

¹⁸ Namo lasi ma haida dekenai lalohadai kererena oi abia. (1 Kor. 13:7) Bema haida be ita idia tanikiu henia lasi, sibona ita nanadaia: ‘Ia be tanikiu karana ia laloa lasi, eiava ia laloaboio unai kara ia hahedinaraia totona, a?’ Eiava reana badina ma haida dainai tanikiu karana ia hahedinaraia lasi. Haida be idia totona ita karaia gauna idia laloa bada, to ia auka tanikiu karana idia hahedinaraia totona. Haida be guna heduru idia henia, to hari idia hegeregere lasi, unai dainai idia hemarai heduru idia abia totona. Bema iseda tadikaka taihu ita lalokau henia bada, lalohadai kererena do ita abia lasi, to mai moale ida idia dekenai henia karana do ita hahedinaraia noho.—Efe. 4:2.

19-20. Dahaka dainai henia karana ita hahedinaraia neganai, haheauka be mai ena namo? (Laulau itaia danu.)

¹⁹ Oi haheauka. Harihari bada karana dekenai, King Solomona ia gwau: “Emu paraoa be ranu latanai oi negea, badina dina momo murinai do oi itaia lou.” (Had. 11:1) Unai hereva ese ia hahedinaraia, haida be “dina momo murinai” iseda hariharibada karana do idia haloua. Mani ekspiriens ta ita laloa.

 ²⁰ Lagani momo gunanai, sekit naria tadikaka ta ena adavana ese bapatiso matamata taihu ta dekenai revareva ia torea, bona ia durua ena abidadama ia hagoadaia noho totona. Lagani 8 murinai, unai taihu be revareva ia haloua bona ia gwau: “Inai oi diba lasi, to lau ura oi lau hamaoroa lagani haida gunanai, oi ese lau oi durua bada.” Ma ia gwau: “[Emu revareva] be namo herea, to oi torea siri ese egu kudouna ia hamarerea bona lau laloaboio diba lasi.” a Ia davaria hekwakwanai haida ia herevalaia murinai, taihu ia gwau: “Nega haida lau hesiku bona lau ura Iehova hesiai henia karana lau rakatania. To oi torea siri lau laloatao bona unai ese lau ia hagoadaia, Iehova lau hesiai . . . henia noho totona.” Danu ia gwau: “Unai lagani 8 lalonai gau ta ese lau ia durua lasi, to emu revareva bona siri ese lau ia hagoadaia.” Mani oi laloa, “dina momo murinai”sekit naria tauna ena adavana be unai revareva ia abia neganai, ia moale bada! Ita danu be reana, ta dekenai gau namona ta ita karaia bona nega daudau murinai, ena tanikiu karana ia hahedinaraia.

21. Dahaka dainai emu lalona oi hadaia Iehova ena hariharibada karana oi tohotohoa totona?

²¹ Matamanai ita herevalaia bamona, Iehova ese ita ia karaia neganai henia karana ena moale ia atoa. Ena be abia karana ita moalelaia, to henia karana ese moale bada ia havaraia. Ita hegeregere iseda tadikaka taihu ita durua neganai iseda hemami ia namo. Bona ita dekenai tanikiu karana idia hahedinaraia neganai ita moale. Ita kara namo henia tauna be tanikiu karana ia hahedinaraia eiava lasi, to ita moale badina kara maorona ita karaia. Laloaboio lasi, emu henia karana dainai, “Iehova ese oi dekenai do ia henia gauna ese unai do ia hereaia.” (2 Siv. 25:9) Iehova ena henia karana ita hereaia diba lasi! Bona Iehova ese ita ia hanamoa neganai, unai be namo herea. Unai dainai iseda lalona ita hadaia, hanaihanai iseda hariharibada bada guba Tamana ita tohotohoa totona.