1-2. Dahaka dainai Iehova idia tomadiho henia taudia be idia moale? (Iamesi 1:22-25)

 IEHOVA bona ena lalokau Natuna idia ura ita moale. Salamo 119:2 ia torea tauna, ia gwau: “Iena hadibaia herevadia idia badinaia taudia be idia moale, idia be mai kudouna ibounai ida ia idia tahua.” Danu, Iesu ia gwau: “Dirava ena hereva idia kamonai bona badinaia taudia be idia moale!”—Luka 11:28.

² Iehova idia tomadiho henia taudia be idia moale. Dahaka dainai? Unai ena badina be momo, to mai anina bada gauna be hanaihanai Dirava ena Hereva ita duahia bona ita gaukara goada ita dibaia gaudia ita badinaia totona.—Iamesi 1:22-25 duahia.

3. Dirava ena Hereva amo ita duahia gaudia ita badinaia neganai, dahaka namo ita abia?

³ “Hereva badinaia taudia ai ita lao” neganai, dala momo ai namo ita abia. Hegeregere, Dirava ena Hereva amo ita dibaia gaudia ita badinaia neganai, Iehova ita hamoalea bona unai ese ita ia hamoalea danu. (Had. 12:13) Dirava ena Hereva amo ita duahia gaudia ita badinaia neganai, unai ese iseda ruma bese maurina bona iseda hetura karana tadikaka taihu ida ia hagoadaia. Reana emu mauri ai unai ia vara. Danu, Iehova ena taravatu idia badinaia lasi taudia ese idia davaria hekwakwanai momo ita davaria lasi. Oibe, King Davida ena hereva dekenai ita lalotamona. Iena ane lalonai, Iehova ena taravatu, ena oda herevadia, bona hahemaoro karadia ia herevalaia  murinai, ia gwau: ‘Unai gaudia ia badinaia neganai, ahuna namona ia abia.’—Sal. 19:7-11.

4. Dahaka dainai Dirava ena Hereva badinaia karana be mai ena hekwarahi?

⁴ Momokani, Dirava ena Hereva ita badinaia karana be mai ena hekwarahi. Ena be ita bisi, to namona be nega ita atoa Baibel ita duahia, unai amo Iehova ena ura do ita lalopararalaia. Unai dainai hanaihanai Baibel ita duahia totona, ita do ia durua gaudia haida mani ita herevalaia. Danu, ita duahia gaudia ita laloa totona, ita do ia durua gaudia bona iseda mauri lalonai ita badinaia daladia do ita herevalaia.

NEGA ATOA DIRAVA ENA HEREVA OI DUAHIA

5. Edena maduna idauidau dekenai nega bada oi gaukaralaia?

⁵ Iehova ena taunimanima momo be idia bisi bada. Ita be nega bada ita gaukaralaia, maduna idauidau ita huaia totona. Hegeregere, ita momo be moni gaukara ita karaia ita sibona bona iseda ruma bese ita naria totona. (1 Tim. 5:8) Keristani taudia momo be gorere bona buruka taudia idia naria. Bona ita ibounai danu iseda helt ita naria be namo. Danu, kongrigeisen asainmen idauidau ita karaia. Mai anina bada gauna ta be ita gaukara goada sivarai namona ita harorolaia totona. Ena be unai maduna idauidau oi huaia, to edena dala ai nega oi atoa diba, dina ta ta ai Baibel oi duahia, oi laloa dobu bona oi badinaia totona?

6. Dahaka dainai Baibel duahiduahi ita karaia be namo? (Laulau itaia danu.)

⁶ Ita Keristani taudia dekenai, Baibel duahiduahi karana be ‘mai anina bada gauna’ ta, unai dainai ita karaia be namo. (Fili. 1:10) Ia moale tauna totona, salamo torea tauna ia gwau: “Ia be Iehova ena taravatu dekenai ia moale, bona dina bona hanuaboi ai Dirava ena taravatu be gado maragi ai ia duahia.” (Sal. 1:1, 2) Unai ese ia hahedinaraia, namona be nega ita atoa Baibel ita duahia totona. Baibel oi duahia totona, oi dekenai edena  nega be namo? Ita ta ta dekenai unai henanadai ena haere be idauidau. To gau badana be hanaihanai Baibel ita duahia negana ta ita abia hidi. Tadikaka ta ladana Victor, ia gwau: “Daba kahanai Baibel duahia karana lau ura henia. Ena be lau ura lasi daba momokani ai lau noga, to unai nega ai gau momo lau karaia lasi dainai, gau tamona lau laloa diba.” Reana oi danu be unai bamona oi karaia? Sibona oi nanadaia, ‘Edena be nega namona Baibel lau duahia totona?’

OI DUAHIA GAUDIA OI LALOA

7-8. Dahaka ese ita ia koua diba, ita duahia gauna amo namo ita abia totona? Haheitalai gwauraia.

⁷ Momokani, ena be gau momo ita duahia, to reana ena anina ita lalopararalaia lasi. Gau ta oi duahia bona daudau lasi murinai, oi duahia gauna oi laloaboio, a? Ita ibounai dekenai unai ia vara. Baibel ita duahia neganai, unai ia vara diba. Hegeregere, abia hidi ita karaia dina ta ai Baibel ena karoa haida ita duahia. Unai be namo herea. Namona be tahua gaudia ita atoa bona ita gaukara goada ita badinaia totona. (1 Kor. 9:26) To, Baibel duahiduahi amo namo ita abia totona gau ma haida ita karaia be namo.

⁸ Mani inai haheitalai ita laloa: Tubutubu gaudia idia mauri totona, ranu idia abia be namo. To bema nega kwadogina lalonai, medu bada herea ia diho, tano be do ia paripari momokani. Unai ia vara neganai, namo ta do ia havaraia lasi. Namona be nega bada lalonai tano ese ranu ia abia, unai amo tubutubu gaudia do ia durua. Unai hegeregerena, namona be Baibel ita duahia haragaharaga lasi, badina unai bamona ita karaia neganai, ita duahia gauna do ita laloatao lasi bona badinaia lasi.—Iam. 1:24.

9. Dahaka ita karaia be namo, bema ita itaia Baibel ita duahia haragaharaga?

⁹ Oi be nega haida Baibel oi duahia haragaharaga, a? Dahaka oi karaia be namo? Oi duahia metairametaira. Nega oi atoa oi duahia noho eiava oi duahia vadaeni gauna oi laloa totona. Bona namona be auka lasi dalanai oi karaia. Reana abia hidi oi karaia emu stadi negana oi halataia totona, unai amo oi duahia  gaudia do oi laloa dobu. Eiava abia hidi oi karaia, siri haida do oi duahia, unai amo nega bada lalonai oi duahia gaudia do oi laloa dobu. Matamanai ita herevalaia tadikaka, Victor ia gwau: “Egu Baibel duahiduahi ai, karoa tamona lau duahia, bona daba momokani ai egu Baibel duahiduahi lau karaia dainai, dina ibounai lalonai lau duahia gaudia lau laloa lou diba.” Ena be edena dala oi gaukaralaia, to gau badana be Baibel oi duahia metairametaira, unai amo oi duahia gaudia oi laloatao diba.—Sal. 119:97; maua ladana, “ Inai Henanadai ta ta Oi Laloa” itaia.

10. Oi duahia gaudia oi badinaia dalana ena haheitalai ta gwauraia. (1 Tesalonika 5:17, 18)

¹⁰ Baibel siri haida oi duahia neganai, do oi badinaia daladia oi laloa. Baibel ena kahana ta oi duahia neganai, sibona oi nanadaia, ‘Edena dala ai lau duahia gauna be hari eiava vaira negai lau badinaia diba?’ Hegeregere, emu Baibel duahiduahi lalonai, 1 Tesalonika 5:17, 18 oi duahia. (Duahia.) Unai siri rua oi duahia murinai, nega hida oi guriguri eiava emu guriguri dalana oi laloa. Danu, oi moalelaia gaudia oi laloa diba. Reana emu lalona oi hadaia oi dekenai idia vara gau namodia toi dainai Iehova do oi tanikiu henia. Miniti haida lalonai unai bamona oi karaia neganai, oi be Dirava ena Hereva oi kamonai bona oi badinaia. Mani oi laloa bema dina ta ta ai, Baibel ena kahana haida oi duahia bona unai dala tamona oi badinaia, unai ese oi do ia durua bada! Momokani, oi be Dirava ena Hereva badinaia tauna ai do oi lao. To bema gau momo do oi hanamoa, dahaka oi karaia be namo?

OI HAGUGURUA DIBA TAHUA GAUDIA ATOA

11. Dahaka dainai nega haida do oi hesiku? Haheitalai ta gwauraia.

¹¹ Baibel oi duahia neganai, reana nega haida do oi hesiku badina oi laloparara gau momo oi hamaoromaoroa be namo. Mani inai haheitalai ita laloa, nega ta emu Baibel duahiduahi lalonai, ma haida sibona ura henia karana ena sisiba oi duahia. (Iam. 2:1-8) Bona oi itaia ma haida kara henia dalana oi hanamoa diba, unai dainai senisi haida oi karaia. Unai be namo herea! Bena murina dinana ai, oi duahia siri haida ese idia hahedinaraia, emu hereva dalana oi naria namonamo be gau badana. (Iam. 3:1-12) Oi laloparara nega haida emu hereva ese ta ia hagoadaia lasi. Unai dainai emu lalona oi hadaia ma haida hagoadaia herevadia do oi gwauraia. Bena dina ihatoina ai, emu Baibel duahiduahi lalonai tanobada taudia tura henia karana ena sisiba oi duahia. (Iam. 4:4-12) Oi laloparara, namona be oi duahia, itaia bona kamonai gaudia dekenai oi naria namonamo. Dina  ihahanina ai do oi mamia oi hegeregere lasi unai senisi ibounai oi karaia totona.

12. Bema emu Baibel duahiduahi ese ia hahedinaraia senisi haida do oi karaia, dahaka dainai oi lalohisihisi lasi be namo? (Futnout itaia danu.)

¹² Bema senisi haida do oi karaia eiava gau haida do oi hamaoromaoroa, oi lalomanoka lasi. Unai ese ia hahedinaraia oi manau bona lalohadai maorona oi abia. Ia manau bona ia kara momokani tauna be Baibel ia duahia neganai, do ia hamaoromaoroa gaudia ia laloa. a Danu laloatao, “mauri matamata” oi atoa karana be nega ibounai do oi badinaia. (Kol. 3:10.) Dahaka ese oi do ia durua Dirava ena Hereva badinaia tauna ai oi lao totona?

13. Edena dala namona ta amo oi duahia gaudia oi badinaia diba? (Laulau itaia danu.)

¹³ Namo lasi oi duahia gaudia ibounai be nega tamona oi badinaia, to ta eiava rua oi badinaia diba. (Aon. 11:2) Mani inai oi tohoa, lista ta dekenai do oi badinaia diba gaudia oi torea, bena idia amo ta eiava rua oi abia hidi bona unai oi badinaia guna, bena gabeai ma haida oi tohoa diba. Edena do oi tohoa guna?

14. Edena tahua gaudia do oi hagugurua guna?

¹⁴ Abia hidi oi karaia auka lasi tahua gauna ta oi hagugurua totona. Eiava oi ura hanamoa karana ta oi abia hidi diba. Bena iseda pablikeisen, hegeregere Watch Tower Publications Index eiava Research Guide for Jehovah’s Witnesses amo tahua gaukara oi karaia. Iehova dekenai emu tahua gauna oi gurigurilaia bona oi noia, ‘oi dekenai ura bona goada ia henia ia ura henia gaudia oi karaia totona.’ (Fili. 2:13) Bena oi dibaia gauna oi badinaia. Emu tahua gauna ginigunana oi  hagugurua neganai, unai ese oi do ia hagoadaia emu tahua gauna ma ta oi hagugurua totona. Momokani, senisi ta oi karaia eiava emu Keristani kara ta oi hanamoa neganai, do ia auka lasi senisi ma haida oi karaia totona.

DIRAVA ENA HEREVA BE EMUI ‘LALONAI IA GAUKARA NOHO’ BE NAMO

15. Edena dala ai Iehova ena taunimanima be Baibel idia duahia taudia momo amo idia idau? (1 Tesalonika 2:13)

¹⁵ Taunimanima momo idia gwau nega momo Baibel idia duahia. To Baibel ena hereva idia abidadama henia, a? Edia mauri ai Baibel ena hahediba herevadia idia badinaia bona senisi idia karaia, a? Lasi. Taunimanima momo be Baibel ena sisiba idia badinaia lasi. To Iehova ena taunimanima ese Baibel idia laloa dalana be idau momokani! Keristani ginigunadia bamona ita abia dae, Baibel be “Dirava ena Hereva.” Bona ita gaukara goada iseda mauri ai Baibel ena sisiba ita badinaia totona.—1 Tesalonika 2:13 duahia.

16. Dahaka ese ita ia durua diba Hereva badinaia taudia ai ita lao totona?

¹⁶ Nega haida ia auka Dirava ena Hereva ita duahia bona iseda mauri ai ita badinaia totona. Reana ita hekwarahi nega ita atoa Baibel ita duahia totona. Eiava Baibel ita duahia haragaharaga bona ita duahia gauna ita laloa dobu lasi. Eiava ita mamia gau momo ita hamaoromaoroa be namo unai dainai ita hesiku. Ena be unai ia vara, to Iehova ena heduru amo unai koua gauna oi hanaia diba. Namona be iseda lalona ita hadaia iena heduru ita abia dae, unai amo ita be Hereva ita kamonai sibona lasi to karana ta ita karaia danu. Oibe, nega ibounai Dirava ena Hereva ita duahia bona iseda mauri ai ita badinaia neganai, do ita moale bada.—Iam. 1:25.