STADI ATIKOL 37
ANE 118 ‘Emai Abidadama Oi Habadaia’
Revareva ta ese Ita ia Durua Diba, mai Abidadama Ida Ita Haheauka Ela Bona Dokona
“Matamana amo ita abia abidadama ita dogoatao auka ela bona dokona.”—HEB. 3:14.
STADI ENA BADINA
Paulo ese Heberu taudia totona ia torea revareva amo ita do ia durua, inai nega oromana dokona ai ita haheauka noho ela bona dokona.
1-2. (a) Aposetolo Paulo ese Heberu taudia ia tore henia neganai, edia mauri be edena bamona? (b) Dahaka dainai unai revareva ese idia ia durua bada?
IESU ia mase murinai, Ierusalema bona Iudea ai idia noho Heberu Keristani taudia be hekwakwanai momo idia davaria. Keristani kongrigeisen ia matamaia bona daudau lasi murinai, Keristani taudia be dagedage bada idia davaria. (Kara 8:1) Lagani 20 bamona murinai, hitolo bona ogogami maurina dainai idia hisihisi. (Kara 11:27-30) To lagani 61 C.E. bamona ai, Keristani taudia be dagedage bada idia davaria lasi. Unai nega lalonai, Dirava ena lauma helaga amo aposetolo Paulo ese idia dekenai revareva ta ia torea. Unai revareva be nega korikori ai idia abia, badina idia ia durua vaira nega ai do idia vara gaudia totona idia hegaegae.
2 Heberu Keristani taudia be nega korikori ai unai revareva idia abia, badina idia moalelaia noho maino be do ia ore. Paulo ese hakaua hereva namodia ia henia unai amo idia do ia durua kahirakahira do idia davaria hisihisi idia haheaukalaia totona. Iesu ese ia perovetalaia, Ierusalema do idia hadikaia ore negana, be ia kahirakahira. (Luka 21:20) Oibe, Paulo bona Iudea ai idia noho Keristani taudia be unai dika do ia vara negana idia diba lasi. To unai Keristani taudia be unai nega idia naria noho lalonai, edia abidadama bona haheauka karana idia hagoadaia diba.—Heb. 10:25; 12:1, 2.
3. Dahaka dainai Heberu bukana be hari Keristani taudia ese idia laloa bada be namo?
3 Kahirakahira hisihisi badana do ita davaria, unai be Heberu Keristani taudia ese idia davaria hisihisi do ia hereaia. (Mat. 24:21; Apok. 16:14, 16) Unai dainai, mani Iehova ese unai Keristani taudia dekenai ia henia hakaua herevadia haida ita herevalaia, unai ese ita do ia durua danu.
“ITA HEKWARAHI NOHO LO TAUDIA AI ITA LAO”
4. Iuda Keristani taudia be dahaka hekwakwanai idia davaria? (Laulau itaia danu.)
4 Keristani taudia ai idia lao Iuda taudia be senisi badadia idia karaia be namo, bona unai be mai ena hekwarahi. Guna, Iuda taudia be Iehova ese ia abia hidi besena. Lagani momo lalonai Ierusalema be mai anina bada gabuna, badina Iehova ese ia abia hidi King be unuseniai ia lohia. Bona tomadiho goevana be unuseni ia noho. Abidadama Iuda taudia ibounai ese Mose ena Taravatu idia badinaia, edia dubu gunalaia taudia ese idia hadibaia hegeregerena. Bona idia ania gaudia, kopina utua karana, bona idau bese taudia kara henia dalana totona taravatu idia atoa. To Iesu ia mase murinai, Iehova ese Iuda taudia edia boubou karadia ia abia dae lasi. Unai dainai Iuda taudia dekenai ia auka, idia badinaia Taravatu idia rakatania totona. (Heb. 10:1, 4, 10) Danu lo Keristani taudia, hegeregere aposetolo Petero, be ia hekwarahi unai dala matamatana ia badinaia totona. (Kara 10:9-14; Gal. 2:11-14) Keristani taudia be unai dala matamatana idia badinaia dainai, Iuda ena dubu gunalaia taudia ese idia dagedage henidia.
Keristani taudia ese hereva momokani idia badinaia, bona Iuda tomadiho taudia edia lalohadai koikoidia idia dadaraia be namo (Paragraf 4-5 itaia)
5. Dahaka dainai Keristani taudia do idia gima be namo?
5 Iuda Keristani taudia be orea rua ese idia dagedage henia. Iuda ena tomadiho gunalaia taudia ese Heberu Keristani taudia idia dagedage henia, badina Iuda tomadihona idia rakatania. Danu, kongrigeisen lalonai haida idia gwau, Keristani taudia ese Mose ena Taravatu idia badinaia be namo, unai amo dagedage do idia davaria lasi. (Gal. 6:12) Dahaka ese abidadama Keristani taudia do ia durua, Iehova idia abidadama henia totona?
6. Paulo ese ena tadikaka taihu ia hagoadaia dahaka idia karaia totona? (Heberu 5:14–6:1)
6 Paulo ena revareva ai, Heberu Keristani taudia ia hagoadaia Dirava ena Hereva idia stadilaia bona laloa dobu totona. (Heberu 5:14–6:1 duahia.) Ia ese Heberu toretoredia amo ena tadikaka dekenai, Keristani tomadiho dalana ese Iuda tomadiho dalana ia hereaia ena badina ia herevalaia. a Paulo ese Keristani taudia ia hagoadaia, Toretore Helagadia amo Hereva momokani do idia diba bona lalopararalaia, unai amo hahediba hereva koikoidia idia dadaraia diba.
7. Hari, dahaka hahetoho haida ita davaria?
7 Hari danu, Iehova ena kara maoromaoro taravatudia idia dadaraia bona hereva koikoi idia halasia taudia ese ita idia inai henia. Taunimanima haida idia gwau, Iehova ena Witnes Taudia be idia maoro lasi, badina mahuta hebou karana dekenai Baibel ena taravatu idia badinaia. Bona idia gwau ita be ma haida ita laloa maragi. Tanobada taudia edia kara bona lalohadai be ia dika momokani, badina Iehova ena laloa dalana idia badinaia lasi. (Aon. 17:15) Unai dainai lalohadai kereredia ita diba bona dadaraia be mai anina bada. Namo lasi iseda inai taudia ese ita idia koia, Iehova hesiai henia karana ita rakatania totona.—Heb. 13:9.
8. Dahaka ita karaia diba lo taudia ai ita lao totona?
8 Paulo ese Heberu Keristani taudia ia hamaoroa, do idia hekwarahi noho lo taudia ai idia lao totona, bona ita danu unai bamona ita karaia be namo. Anina be Baibel ita stadilaia, unai amo Iehova do ita dibaia bona ena lalohadai do ita lalopararalaia. Ena be iseda mauri ita gwauhamatalaia bona ita bapatiso vadaeni, to unai ita karaia noho be namo. Ena be nega daudau hereva momokani lalonai ita noho, to hanaihanai Dirava ena hereva ita duahia bona stadilaia be namo. (Sal. 1:2) Hanaihanai Baibel ita stadilaia neganai, unai ese iseda abidadama do ia hagoadaia. Paulo ese Heberu Keristani taudia ia hamaoroa unai kara idia hahedinaraia totona.—Heb. 11:1, 6.
“ABIDADAMA DAINAI ISEDA MAURI DO ITA HABOIOA LASI”
9. Dahaka dainai Heberu Keristani taudia edia abidadama ia goada be namo?
9 Heberu Keristani taudia be, Iudea ai do ia vara hisihisi badana amo idia roho mauri totona, edia abidadama idia hagoadaia be namo. (Heb. 10:37-39) Iesu ese ena murinai idia raka taudia ia hadibaia, Ierusalema be tuari taudia ese idia hagegea neganai, ororo dekenai idia heau lao be namo. Unai hadibaia herevana be Keristani taudia ibounai totona, ena be Ierusalema ena siti eiava Iudea hanuadia ai idia noho. (Luka 21:20-24) Nega momo tuari taudia idia mai neganai, siti ena murimuri ai idia noho taudia be siti lalonai idia vareai, badina ena magu ese idia ia gimaia diba. Toana be ororo dekenai do idia heau lao karana be lalohadai namona lasi, unai dainai Iesu ena hadibaia herevana idia badinaia totona edia abidadama do idia hagoadaia be namo.
10. Keristani taudia edia abidadama ia goada neganai dahaka do idia karaia? (Heberu 13:17)
10 Danu, Iesu ese kongrigeisen do idia gunalaia tadikaka ia abia hidi, bona Heberu Keristani taudia ese unai tadikaka idia abidadama henia be namo. Unai gunalaia taudia ese, kongrigeisen do idia heau mauri negana bona unai idia karaia dalana totona hakaua herevadia idia henia. (Heberu 13:17 duahia.) Aposetolo Paulo ese ena tadikaka bona taihu ia hamaoroa ‘edia hakaua taudia do idia kamonai henia.’ Ena hereva anina be elda taudia do idia kamonai henia sibona lasi, to idia abidadama henidia danu be namo. Unai dainai hisihisi badana ia do matamaia lasi neganai, Heberu Keristani taudia ese edia hakaua taudia dekenai, edia abidadama do idia hagoadaia. Bema Keristani taudia be nega namodia ai hakaua taudia edia hereva idia kamonai, do ia auka lasi nega aukadia ai unai bamona idia karaia totona.
11. Dahaka dainai hari Keristani taudia edia abidadama idia hagoadaia be namo?
11 Heberu Keristani taudia bamona ita abidadama danu be namo. Hari momo idia abia dae lasi, inai nega oromana ena dokona be ia mai kahirakahira noho, to ita be unai ita abia dae dainai ita idia hevasehalaia. (2 Pet. 3:3, 4) Ena be Baibel ese hisihisi badana ai do idia vara gaudia ia herevalaia, to gau momo ita diba lasi. Namona be ita abia dae momokani, inai nega oromana ena dokona be nega korikori ai do ia ginidae bona Iehova ese ita do ia naria.—Hab. 2:3.
12. Dahaka ese ita do ia durua hisihisi badana amo ita roho mauri totona?
12 Danu, namona be Iehova ese “hesiai tauna mai ena kamonai bona mai ena aonega” amo, ita ia hakaua dalana ita abidadama henia. (Mat. 24:45) Roma tuari taudia ese Ierusalema idia hagegea neganai, Heberu Keristani taudia be hakaua herevadia idia abia, unai hegeregerena hisihisi badana ia matamaia neganai, iseda mauri gimaia totona, hakaua herevadia do ita abia. Hari be nega namona Iehova ena orea lalonai ita idia gunalaia taudia amo, ita abia hakaua herevadia ita abidadama henia. Bema hari edia hakaua herevadia ita badinaia lasi, hisihisi badana lalonai do ia auka edia hereva ita badinaia totona.
13. Dahaka dainai Heberu 13:5 ai ia noho sisiba herevana be mai anina bada?
13 Heberu Keristani taudia be do idia heau mauri ena hadibaia herevana idia naria noho lalonai, namona be kohu momo lasi maurina idia noholaia bona “moni idia ura henia dikadika lasi.” (Heberu 13:5 duahia.) Idia haida be hitolo bona ogogami maurina idia noholaia. (Heb. 10:32-34) Ena be guna sivarai namona totona mai ura ida nega aukadia idia haheaukalaia, to gabeai haida be sibona idia naria totona, kohu momo tahua karana idia laloa matamaia. To Ierusalema idia hadikaia neganai moni ese idia do ia hamauria lasi. (Iam. 5:3) Momokani, do ia auka kohu idia ura henia taudia idia heau mauri totona, badina edia ruma bona kohu idia laloa bada.
14. Edena dala ai abidadama goadana ese ita do ia durua, kohu momo tahua karana dekenai abia hidi maorona ita karaia totona?
14 Bema ita abia dae momokani inai nega oromana ena dokona be ia mai kahirakahira noho, unai ese ita do ia hagoadaia kohu momo tahua karana ita dadaraia totona. Taunimanima ese “edia siliva be dala dekenai do idia negea” badina do idia laloparara, “Iehova ena badu dinana ai edia siliva eiava golo ese idia do ia hamauria lasi.” (Ese. 7:19) Namona be moni momo tahua karana ita laloa bada lasi, to abia hidi maorona ita karaia, kohu momo lasi maurina ita noholaia, unai amo Iehova do ita hesiai henia noho. Hegeregere, namo lasi abitorehai momo ita karaia eiava nega bada ita haorea, iseda kohu ita naria karana totona. Danu, namo lasi ita dekenai idia noho kohu be mai anina bada gaudia ai ita halaoa. (Mat. 6:19, 24) Inai nega oromana ena dokona ita naria noho lalonai, kohu momo tahua karana bona gau ma haida ese iseda abidadama do ia tohoa.
“UMUI HAHEAUKA NOHO BE NAMO”
15. Dahaka dainai Heberu Keristani taudia idia haheauka be namo?
15 Iudea ai Heberu Keristani taudia be Iehova hesiai henia totona idia haheauka be namo, badina kahirakahira hekwakwanai do idia davaria. (Heb. 10:36) Ena be Heberu Keristani taudia haida be guna dagedage bada idia davaria, to idia momo be maino negana ai Keristani tomadihona idia abia dae. Unai dainai, Paulo ese idia ia hamaoroa do idia davaria dagedage karadia dainai idia hegaegae, bona Iesu bamona do idia abidadama noho ena be edia mauri do idia haboioa. (Heb. 12:4) Keristani taudia edia namba ia bada daekau dainai, Iuda taudia momo be idia badu dikadika bona idia dagedage henidia. Lagani haida gunanai, Paulo be Ierusalema lalonai ia haroro noho neganai, hutuma ese ia idia dagedage henia. Iuda taudia 40 mai kahana be “gwauhamata metauna idia karaia, do idia aniani bona inuinu lasi ela bona Paulo idia alaia.” (Kara 22:22; 23:12-14) Ena be taunimanima ese Keristani taudia do idia inai henia bona dagedage henia, to namona be edia tomadiho bona sivarai namona harorolaia karana idia hadokoa lasi, bona edia abidadama idia hagoadaia noho.
16. Edena dala ai Heberu taudia ese idia abia revareva be ita ia durua, dagedage karana dekenai lalohadai maorona ita abia totona? (Heberu 12:7)
16 Dahaka ese Heberu Keristani taudia do ia durua, idia davaria dagedage idia haheaukalaia totona? Paulo ia diba Keristani taudia be idia davaria hahetoho dainai, lalohadai maorona idia abia be namo. Ia hahedinaraia Keristani taudia be hahetoho ta idia davaria neganai, Dirava ese unai do ia gaukaralaia idia ia treinia totona. (Heberu 12:7 duahia.) Unai bamona treinini ese ta do ia durua, ena Keristani karadia ia hanamoa totona. Heberu Keristani taudia ese hahetoho haheaukalaia karana ena namo idia laloa neganai, unai ese idia ia durua idia haheauka totona.—Heb. 12:11.
17. Paulo be hahetoho haheaukalaia karana dekenai dahaka ia dibaia?
17 Paulo ese Heberu Keristani taudia ia hagoadaia, mai ura ida hahetoho idia haheaukalaia totona. Ia ese dagedage haheaukalaia karana dekenai sisiba namodia ia henia. Ia danu be guna Keristani taudia ia dagedage henia dainai, ia diba hisihisi do idia davaria. Danu dagedage haheaukalaia dalana ia diba, badina Keristani tauna ta ai ia lao murinai dagedage momo ia davaria. (2 Kor. 11:23-25) Unai dainai, Paulo ia diba dahaka ese idia do ia durua idia haheauka totona. Ia ese Keristani taudia ia hadibaia hahetoho idia davaria neganai, Iehova dekenai idia tabekau be namo. Paulo be mai goada ida ia gwau: “Iehova be egu durua tauna; Lau be do lau gari lasi.”—Heb. 13:6.
18. Vaira nega ai, ita ibounai dekenai dahaka do ia vara, bona edena dala ai unai nega totona ia hegaegae diba?
18 Hari iseda tadikaka taihu haida be dagedage idia haheaukalaia noho. Idia dekenai lalokau ita hahedinaraia dalana ta be, idia totona ita guriguri bona nega haida edia dabu gaudia ita henia diba. (Heb. 10:33) To Baibel ia gwau, “Keriso ida idia hakapua bona idia ura Dirava badinaia karana idia hahedinaraia taudia ibounai be dagedage do idia davaria danu.” (2 Tim. 3:12) Unai dainai, namona be ita ibounai ese do ita davaria nega aukadia totona ita hegaegae. Namona be hari Iehova dekenai ita abidadama momokani, bona ita abia dae ita do ia durua, hahetoho ita haheaukalaia totona. Nega maorona ai, Iehova ese ena abidadama hesiai taudia edia hisihisi ibounai do ia kokia.—2 Tes. 1:7, 8.
19. Dahaka gaudia ese ita do idia durua hisihisi badana totona ita hegaegae? (Laulau itaia danu.)
19 Momokani, Paulo ese Heberu taudia dekenai ia torea revareva amo Keristani taudia ginigunadia ia durua, hisihisi badana totona do idia hegaegae. Paulo ese ena tadikaka taihu ia hagoadaia, Dirava ena Hereva do idia stadilaia namonamo bona lalopararalaia totona. Unai bamona idia karaia neganai, hahediba hereva koikoidia do idia diba bona dadaraia, unai amo edia abidadama ia gimaia. Danu, idia ia durua edia abidadama do idia hagoadaia noho, unai amo Iesu bona gunalaia taudia edia hakaua herevadia do idia badinaia haraga. Bona Keristani taudia ia durua hahetoho idia davaria neganai, lalohadai maorona do idia abia bona unai ese dala ia kehoa, edia lalokau Tamana amo treinini idia abia, unai amo edia haheauka karana do ia goada. Ita danu be unai sisiba namona ita badinaia be namo. Unai amo mai abidadama ida do ita haheauka noho ela bona dokona.—Heb. 3:14.
Abidadama Keristani taudia be idia haheauka dainai hahenamo idia abia. Iudea amo idia heau mauri murinai, edia hebou karana idia hadokoa lasi. Unai amo dahaka ita dibaia? (Paragraf 19 itaia)
ANE 126 Noga Noho, Boga-auka, Gini Goada
a Unai karoa tamona lalonai, Paulo be nega 7 bamona Heberu Revarevadia ia gaukaralaia, unai amo ia hahedinaraia Keristani tomadiho dalana ese Iuda tomadiho dalana ia hereaia.—Heb. 1:5-13.
