Iesu ese Lohiabada Ena Anibou dinana ia hamatamaia neganai, ena hahediba taudia 70 idia noho lasi, unai dainai namo lasi ita laloa Iesu ese idia ia lalonamo henia lasi eiava ia idia rakatania. Unai nega ai, Iesu ia ura ena aposetolo taudia ida ia noho.

Iesu ese unai taudia 12 bona 70 ia lalonamo henia. Ia ese ena hahediba taudia ibounai amo tatau 12 ia abia hidi guna, bona ia gwauraidia aposetolo taudia. (Luka 6:12-16) Iesu be Galilea ai ia noho neganai, “aposetolo taudia 12 ia haboua” bona “ia siaidia lao Dirava ena Basileia do idia harorolaia bona gorere taudia do idia hanamoa.” (Luka 9:1-6) Gabeai, Iudea dekenai ia noho neganai, ia ese “taunimanima 70 ma haida ia abia hidi bona rua rua ia siaia.” (Luka 9:51; 10:1) Unai dainai, Iesu ena hahediba taudia be gabu ta ta dekenai idia noho bona ia idia harorolaia.

Iesu ena hahediba taudia ai idia lao Iuda taudia be lagani ta ta ai, edia ruma bese ida Pasova ariana idia karaia. (Eso. 12:6-11, 17-20) Ena mase dinana ia kahirakahira lalonai, Iesu be ena aposetolo taudia ida Ierusalema dekenai idia lao. To Pasova ariana totona ia ese Iudea, Galilea, bona Perea ai idia noho hahediba taudia ia boiria lasi. Momokani, unai nega ai Iesu ia ura ena aposetolo taudia ida ia noho. Bona idia ia hamaoroa: “Hisihisi lau do abia lasi neganai, lau ura bada inai Pasova ita ania hebou.”—Luka 22:15.

Iesu be badina maorona dainai unai bamona ia karaia. Iesu be unai negai kahirakahira, “Dirava ena Mamoe Natuna, . . . tanobada taudia edia kara dika kokia tauna” bamona do ia mase. (Ioa. 1:29) Ia be Ierusalema ai do ia mase, guna unuseniai Dirava totona boubou gaudia idia karaia. Israela taudia ese Pasova dinana ai mamoe idia ania, unai amo Iehova ese Aigupito amo idia ia hamauria karana idia laloatao. To Iesu ena mauri ia bouboulaia gauna ese unai ia hereaia. Ia ese taunimanima be kara dika bona mase amo ia ruhaia. (1 Kor. 5:7, 8) Iesu ena boubou gauna dainai, aposetolo taudia 12 be Keristani kongrigeisen ena badina ai idia lao. (Efe. 2:20-22) Hoa gauna be, siti helagana Ierusalema matamata ena ‘badina nadidia be 12’ bona idia latanai “Mamoe Natuna ena aposetolo taudia 12 edia ladana idia noho.” (Apok. 21:10-14) Oibe, unai aposetolo taudia be Dirava ena ura hagugurua totona, mai anina bada gaukarana do idia karaia. Unai dainai ita laloparara, Pasova ginigabena ai Iesu ia ura ena aposetolo taudia ida do ia noho bona Lohiabada Ena Anibou do idia karaia.

Unai hahediba taudia 70 bona ma haida be unai anibou ai Iesu ida idia noho lasi. To, idia abidadama hahediba taudia ibounai be Lohiabada Ena Anibou amo namo do idia davaria. Gabeai horoa Keristani taudia ai idia lao taudia ibounai be basileia ta ena gwaubou ena kahana ta ai do idia lao, unai be Iesu ena hanuaboi ginigabena ai ena aposetolo taudia dekenai ia gwauraia.—Luka 22:29, 30.