Hamomokania gaudia ese idia hahedinaraia Iesu be lagani 29 C.E. ai ia bapatiso neganai, Hahelaga Tauna Badana ai ia lao. Edena dala ai unai ita diba? Iesu ia bapatiso neganai, ia be Dirava ena “ura” ena boubou patana ai sibona ia henia. (Gal. 1:4; Heb. 10:5-10) Unai boubou patana be Iesu ia bapatiso negana amo ia gini dainai, Iehova ena lauma dubuna badana​—mauri davalaia boubouna totona idia hegaegaelaia Iehova tomadiho henia karana goevana​—be reana unai negai ia matamaia danu. Lauma dubuna badana lalonai unai boubou patana be mai anina bada.​—Mat. 3:16, 17; Heb. 5:4-6.

Lauma dubuna badana ia noho vadaeni dainai, hahelaga tauna badana ta ese gaukara ia naria be namo. Unai ia vara totona, Iehova ese Iesu be “lauma helaga amo ia horoa bona siahu ia henia.” (Kara 10:37, 38; Mar. 1:9-11) To, edena dala ai ita diba momokani, Iesu ia do mase lasi bona toreisi lou lasi neganai, ia be Iehova ese ia abia hidi Hahelaga Tauna Badana ai ia lao totona? Mose ena Taravatu henunai, Arona bona ia murinai idia mai hahelaga taudia edia haheitalai ese ita do idia durua unai henanadai ita haerelaia totona.

Mose ena Taravatu hegeregerena, hahelaga tauna sibona be palai dubuna ena Helaga Herea gabuna lalonai do ia vareai bona, gabeai dubu helaga ena Helaga Herea gabuna lalonai do ia vareai. Keten ta ese Helaga Herea gabuna be Helaga gabuna amo ia hapararaia. Hahelaga tauna be Kara Dika ena Davana Karaia Dinana sibona ai, unai keten ia kehoa bona ia vareai. (Heb. 9:1-3, 6, 7) Arona bona ia murinai idia mai taudia be palai dubuna ena ‘keten idia do hanaia’ lasi lalonai, idia abidia hidi, hahelaga taudia ai idia lao totona. Unai hegeregerena, Iesu ia do mase lasi lalonai Iehova ese ia abia hidi, lauma dubuna badana ena Hahelaga Tauna Badana ai do ia lao, bena unai murinai “keten” ia hanaia, unai be “iena tauanina” bona guba maurina ia abia. (Heb. 10:20) Unai dainai aposetolo Paulo ia gwau Iesu be “hahelaga tauna badana” bamona do ia mai bona “palai ruma badana bona hereadaena dekenai ia vareai, unai palai ruma be taunimanima ese edia imana amo idia karaia lasi” bona “guba lalonai ia vareai.”​—Heb. 9:11, 24.

Gau ta ese ia hahedinaraia lasi edena negai gwaubou matamatana idia karaia bona edena negai ia gaukara matamaia. Dahaka dainai? Iesu be guba dekenai ia daekau bona ita totona iena mauri goevadaena, ia bouboulaia gauna ia henia neganai, ia ese unai gwaubou matamatana ia hamomokania. Unai dala tamona amo ia ese gwaubou matamatana ia haginia bona ena gaukara ia hamatamaia. Unai ia vara totona, dala haida idia badinaia.

Ginigunana be, Iesu be Iehova ena vairanai ia gini; iharuana be, Iehova dekenai ena mauri davalaia boubouna ia henia; bona ihatoina be, Iehova ese Iesu ia bouboulaia rarana ia abia dae. Unai dala idia do badinaia lasi neganai, gwaubou matamatana be ia do gaukara lasi.

Baibel ai Iehova ese Iesu ena boubou gauna ia abia dae negana ia herevalaia lasi. Unai dainai gwaubou matamatana idia haginia bona ena gaukara ia hamatamaia ena nega korikorina ita gwauraia diba lasi. To, ita diba Iesu be Pentekoste dinana ia kahirakahira bona dina ten idia do noho lalonai, guba dekenai ia daekau. (Kara 1:3) Unai nega kwadogina lalonai, Iesu ese ena mauri davalaia boubouna be Iehova dekenai ia henia, bona ia abia dae. (Heb. 9:12) Pentekoste dinana ai idia vara gaudia ese unai ia hamomokania. (Kara 2:1-4, 32, 33) Unai gwaubou matamatana be ia gini vadaeni bona ia gaukara matamaia.

Ita dibaia gauna be, Iehova ese Iesu ia bouboulaia rarana ia abia dae murinai, unai gwaubou matamatana be idia haginia bona ia gaukara matamaia. Bena, gwaubou matamatana ia gaukara matamaia, bona Iesu be ena Hahelaga Tauna Badana bona Medieita ai ia lao.​—Heb. 7:25; 8:1-3, 6; 9:13-15.