1. Ioane Ihatoina 3, 4 ena hereva bamona, dahaka ese ita ia hamoalea?

MANI oi laloa aposetolo Ioane be ia moale bada, badina ia kamonai ia ese ia durua bona hereva momokani idia dibaia taudia be Iehova idia hesiai henia noho. Unai abidadama Keristani taudia be hekwakwanai momo idia davaria, bona Ioane be ia hekwarahi edia abidadama ia hagoadaia totona, badina idia be iena natudia bamona. Unai hegeregerena, ita moale badina iseda natudia eiava ita durudia hereva momokani idia dibaia taudia be Iehova dekenai edia mauri idia gwauhamatalaia bona ia idia hesiai henia noho.​—3 Ioane 3, 4 duahia.

2. Dahaka dainai Ioane ese revareva toi ia torea?

² Lagani 98 C.E. ai, Ioane be reana Efeso ai eiava kahirakahira ia noho. Reana ia be Patamo motumotu amo idia ruhaia neganai unuseni ia lao. Unai negai, Iehova ena lauma helaga ena siahu amo revareva toi ia torea. Unai revareva ia torea ena badina be, idia goada Keristani taudia do ia durua Iesu idia abidadama henia noho, bona hereva momokani lalonai idia raka noho totona.

3. Edena henanadai do ita haerelaidia?

³ Ioane be ia mauri noho aposetolo ginigabena, bona ia lalohekwarahi badina hahediba koikoi taudia be kongrigeisen taudia idia hakaua kerere noho. * (1 Ioa. 2:18, 19, 26) Unai aposteit taudia idia gwau Dirava idia diba, to idia ese Iehova ena taravatu idia badinaia lasi. Mani Ioane ese lauma helaga ena siahu amo ia henia sisiba ita itaia. Inai atikol ai ita ese henanadai toi do ita haerelaia: Hereva momokani lalonai ita raka ena anina be dahaka? Dahaka hekwakwanai do ita davaria?  Bona edena dala ai ta ta ita durua hereva momokani lalonai ita noho totona?

4. Ioane Ginigunana 2:3-6, bona Ioane Iharuana 4, 6 edia hereva bamona, hereva momokani lalonai ita raka ena anina be dahaka?

⁴ Hereva momokani lalonai ita raka totona, namona be hereva momokani, Dirava ena Hereva, Baibel lalonai ia noho gauna ita dibaia. Danu, namona be Iehova ena ‘taravatu ita badinaia.’ (1 Ioane 2:3-6; 2 Ioane 4, 6 duahia.) Iehova kamonai henia karana dekenai Iesu be haheitalai namona. Unai dainai Iehova ita kamonai henia dala namona ta be Iesu ena haheitalai ita tohotohoa.​—Ioa. 8:29; 1 Pet. 2:21.

5. Dahaka ita abia dae momokani be namo?

⁵ Hereva momokani lalonai ita raka noho totona, namona be ita abia dae Iehova be momokani Diravana, bona Baibel lalonai ia gwauraia gaudia ibounai be momokani. Namona be ita abia dae momokani Iesu be Dirava ese ia gwauhamatalaia Mesia. Inai negai, momo idia abia dae lasi, Dirava ese Iesu ia horoa iena Basileia ena King ai ia lao totona. Ioane ia gwau, “koikoi taudia momo” ese edia abidadama Iehova bona Iesu dekenai ia goada momokani lasi taudia idia hakaua kerere diba. (2 Ioa. 7-11) Ioane ia gwau: “Bema tau ta ia gwau Iesu be Keriso lasi, unai tauna be koikoi tauna, ani?” (1 Ioa. 2:22) Ma haida ese ita idia koia lasi totona, Dirava ena Hereva ita stadilaia be namo. Unai bamona ita karaia neganai, Iehova bona Iesu do ita dibaia namonamo. (Ioa. 17:3) Bena do ita abia dae ita be hereva momokani ita davaria.

6. Keristani matamata taudia ese idia davaria hekwakwanai ta be dahaka?

⁶ Namona be Keristani taudia ibounai idia naria namonamo, namo lasi taunimanima edia lalohadai ese idia hakaudia kerere. (1 Ioa. 2:26) Keristani matamata taudia be unai tarapu dekenai idia naria namonamo. Mauri lagani 25 French taihu ta, Alexia * ia gwau: “Sikuli dekenai, evolusen bona taunimanima edia lalohadai lau dibaia, bona unai gaudia dainai hereva momokani lau daradaralaia. Nega haida unai lalohadai ese egu lalona ia veria. To, lau laloa Baibel ia hadibaia gaudia lau dadaraia bona egu tisa ia gwauraia gaudia ibounai lau abia dae sibona be maoro lasi.” Alexia  ese inai buka, Life​—How Did It Get Here? By Evolution or by Creation? ia stadilaia. Wiki haida lalonai ena daradara gaudia ibounai idia ore. Alexia ia gwau: “Lau sibona ese lau hamomokania Baibel lalonai hereva momokani ia noho. Bona lau laloparara Baibel ena hakaua herevadia badinaia karana ese lau dekenai moale bona maino do ia havaraia.”

7. Dahaka ita dadaraia be namo, bona dahaka dainai?

⁷ Keristani taudia ibounai, matamata bona buruka, ese mauri dala rua badinaia karana idia dadaraia be namo. Ioane ia hahedinaraia, hereva momokani lalonai ita raka bona matabodaga maurina ita noholaia be maoro lasi. (1 Ioa. 1:6) Bema ita ura hari bona vaira negai Iehova ena lalonamo ita abia, namona be ita laloatao Iehova be ita karaia gaudia ibounai ia itaia. Momokani, ena be hunia dekenai ita karaia gaudia be taunimanima ese idia itaia lasi, to Iehova dekenai gau ibounai be idia hedinarai bona ia itaia diba.​—Heb. 4:13.

8. Dahaka ita dadaraia be namo?

⁸ Tanobada taudia ese kara dika idia laloa dalana ita dadaraia be namo. Aposetolo Ioane ia gwau: “Bema ita gwau: “Ita dekenai kara dika be lasi,” ita be sibona ita koia noho.” (1 Ioa. 1:8) Ioane ena negai, aposteit taudia idia gwau ta be mai ena ura ida kara dika ia karaia bona Dirava do ia tura henia noho diba. Hari, ita be unai bamona lalohadai idia abia dae taudia huanai ita noho. Momo idia gwau Dirava idia abidadama henia, to Iehova ese kara dika ia laloa dalana idia abia dae lasi, bema unai be mahuta hebou karana ia herevalaia. Iehova ia gwau kara haida be kerere, to unai taudia idia gwau bema ta ia ura unai kara haida ia karaia, ia be kerere lasi.

9. Matamata taudia ese Baibel ena sisiba idia badinaia neganai dahaka namo idia davaria?

⁹ Keristani matamata taudia be edia sikuli eiava gaukara turadia ese do idia doria matabodaga karadia idia abia dae totona. Aleksandar dekenai unai ia vara. Ia gwau: “Kekeni haida  be lau idia doria ai mahuta hebou totona. Idia gwau lau be gelfren lasi dainai reana lau be geligeli.” Bema oi dekenai unai bamona hahetoho ia vara, namona be oi laloatao bema Baibel amo oi dibaia gaudia oi badinaia, ma haida ese oi do idia matauraia, emu helt do ia namo, do oi lalohisihisi lasi, bona emu hetura karana Iehova ida do ia goada. Bona hahetoho oi hanaia negadia ta ta ai, do ia auka lasi kara maoromaoro oi badinaia totona. Namona be oi laloatao, inai tanobada ena lalohadai mahuta hebou karana dekenai be Satani amo ia mai. Unai dainai, tanobada taudia edia lalohadai oi dadaraia neganai, oi ese ‘Dika Tauna oi halusia’ unai.​—1 Ioa. 2:14.

10. Edena dala ai 1 Ioane 1:9 ese ita ia durua, mai lalomamina goevana ida Iehova ita hesiai henia totona?

¹⁰ Ita abia dae Iehova sibona ia gwau diba edena kara be kara dika. Bona ita hekwarahi kara dika ita karaia lasi totona. To ita kara dika neganai, guriguri amo Iehova dekenai iseda dika ita gwauraia hedinarai. (1 Ioane 1:9 duahia.) Bona kara dika badana ta ita karaia neganai, Iehova ese ia abia hidi elda taudia edia heduru ita tahua be namo. (Iam. 5:14-16) To, namo lasi guna ita karaia kara dika dainai ita lalohisihisi. Dahaka dainai? Badina iseda lalokau Tamana ese ena Natuna ia henia mauri davalaia boubouna bamona, unai amo iseda kara dika ia gwauatao diba. Iehova ia gwau helalo-kerehai taudia edia dika ia gwauatao neganai, unai do ia karaia momokani. Unai dainai gau ta ese ita do ia koua lasi mai lalomamina goevana ida Iehova ita hesiai henia totona.​—1 Ioa. 2:1, 2, 12; 3:19, 20.

11. Edena dala ai iseda abidadama idia hadikaia diba hahediba herevadia amo sibona do ita gimaia?

¹¹ Aposteit hahediba herevadia ita dadaraia be namo. Keristani kongrigeisen ia matamaia negana amo, Diabolo be koikoi taudia momo ia gaukaralaia noho Dirava ena hesiai taudia edia abidadama ia hamanokaia totona. Unai  dainai, hereva momokani bona koikoi herevadia edia idau ita diba be namo. * Iseda inai taudia be Intanet eiava social media idia gaukaralaia diba, iseda abidadama Iehova dekenai idia hamanokaia bona tadikaka taihu lalokau henia karana idia hadikaia. Unai koikoi herevadia oi abia dae lasi, badina idia be Satani amo idia mai!​—1 Ioa. 4:1, 6; Apok. 12:9.

12. Dahaka dainai ita dibaia hereva momokanidia ita laloa bada be namo?

¹² Satani ena hahetoho ita dadaraia totona, namona be Iesu bona Iehova ese Iesu ia gaukaralaia ena ura ia hagugurua dalana ita abidadama henia. Danu, Iehova ese ena orea gunalaia totona ia abia hidi taudia ita abidadama henia. (Mat. 24:45-47) Baibel ita stadilaia karana amo iseda abidadama ita hagoadaia. Bena iseda abidadama be do ia goada, au ta ena ramuna be tano lalonai ia diho momokani bamona. Paulo be Kolose kongrigeisen ia tore henidia neganai unai bamona haheitalai ta ia gaukaralaia. Ia gwau: “Keriso Iesu, iseda Lohiabada umui abia dae hegeregerena, ia ida do umui raka hebou noho. Au ena ramuna ia goada hegeregerena, namona be Iesu lalonai do umui gini goada bona emui abidadama lalonai do umui goada noho.” (Kol. 2:6, 7) Bema iseda abidadama hagoadaia totona ita gaukara goada, Satani bona ena durua taudia ese ita idia koua diba lasi, hereva momokani lalonai ita raka noho totona.​—2 Ioa. 8, 9.

13. Dahaka ita abia dae, bona dahaka dainai?

¹³ Namona be ita abia dae tanobada taudia ese ita do idia inai henia. (1 Ioa. 3:13) Ioane ese ita ia hadibaia “tanobada ibounai be Dika Tauna ena siahu lalonai ia noho.” (1 Ioa. 5:19) Inai tanobada ena dokona ia kahirakahira noho lalonai, Satani ena badu be ia bada ia lao noho. (Apok. 12:12) Ia be hunia dalana ai ita ia tohoa noho, hegeregere matabodaga karadia eiava aposteit taudia edia koikoi herevadia ia gaukaralaia. Ia ese dagedage karadia ia gaukaralaia danu. Satani ia diba ena nega be kwadogi dainai ia ura iseda haroro gaukara ia koua bona iseda abidadama ia hamanokaia. Ita hoa lasi badina tano haida dekenai iseda gaukara ibounai eiava ena kahana haida idia taravatua. To, unai tano dekenai idia noho tadikaka taihu be idia haheauka noho. Idia hahedinaraia herevana Satani be dahaka ia karaia, to ita kwalimu diba!

14. Iseda tadikaka taihu ita durua hereva momokani lalonai idia noho dalana ta be dahaka?

¹⁴ Iseda tadikaka taihu ita durua hereva momokani lalonai idia noho totona, namona be hebogahisi karana ita hahedinaraia. (1 Ioa. 3:10, 11, 16-18) Namona be ta ta ita lalokau henia, nega namodia sibona ai lasi to hekwakwanai negadiai danu. Hegeregere, ta oi diba vanegai sibona ena lalokau tauna ta ia mase bona ta ese ia hagoadaia bona dala ma haida ai ia durua be namo, a? Eiava oi kamonai iseda tadikaka taihu haida be disasta dekenai edia kohu idia haboioa, bona edia Kingdom Hall eiava ruma haginia lou totona heduru idia abia be namo, a? Iseda lalokau bona hebogahisi be hereva sibona amo ita gwauraia lasi, to mai anina bada gauna be iseda kara amo tadikaka taihu dekenai ita hahedinaraia.

15. Ioane Ginigunana 4:7, 8 ena hereva bamona, dahaka ita karaia be namo?

¹⁵ Ita lalokau heheni neganai ita hahedinaraia iseda lalokau guba Tamana ita tohotohoa unai. (1 Ioane 4:7, 8 duahia.) Lalokau ita hahedinaraia dalana ta be ta ta do ita gwauatao. Hegeregere, reana ta ese ita ia habadua to gabeai ita dekenai sori herevana do ia gwauraia.  Ia ita lalokau henia dainai ena dika ita gwauatao bona ita laloaboio. (Kol. 3:13) Tadikaka ta ladana Aldo be ia badu, badina ia kamonai ia matauraia tadikaka ta ese iena hanua taudia ia gwauraia dika. Danu, ia gwau, “Hanaihanai Iehova lau guriguri henia lau ia durua unai tadikaka lau lalodika henia lasi totona.” To, Aldo be gau ma ta ia karaia danu. Ia ese unai tadikaka ia noia idia haroro hebou totona. Idia ruaosi idia gaukara hebou neganai, Aldo ese unai tadikaka dekenai ia hahedinaraia, ia gwauraia herevana ese ena lalona ia hahisia. Aldo ia gwau: “Unai tadikaka ia kamonai, iena hereva ese egu lalona ia hahisia neganai, sori herevana ia gwauraia. Iena gadona regena amo lau diba, ia be ia gwauraia herevana dainai ia lalohisihisi. Unai murinai tura namodia ai ai lao bona emai hekwakwanai ai laloa lou lasi.”

16-17. Iseda lalona ita hadaia dahaka ita karaia totona?

¹⁶ Aposetolo Ioane be ena tadikaka taihu edia Dirava tura henia karana ia laloa bada, bona unai hemami be lauma helaga ena siahu amo ia torea revareva toi lalonai ia noho. Ita moale bada badina Ioane bamona, horoa tatau bona hahine haida be Keriso ida guba dekenai do idia lohia!​—1 Ioa. 2:27.

¹⁷ Namona be ita herevalaia vadaeni sisiba namodia ita laloa bada. Bona iseda lalona ita hadaia hereva momokani lalonai do ita raka noho, anina be iseda mauri ibounai lalonai Iehova ita badinaia. Dirava ena Hereva ita stadilaia bona ita abidadama henia. Iseda abidadama Iesu dekenai ita hagoadaia. Taunimanima edia lalohadai bona aposteit hahediba herevadia ita dadaraia. Mauri dala rua badinaia karana bona kara dika karaia urana ita dadaraia. Iehova ena kara maoromaoro taravatudia ita badinaia. Danu, namona be ita idia hahisia taudia edia dika ita gwauatao bona heduru idia ura taudia ita durua, unai amo iseda tadikaka taihu ita durua idia goada noho totona. Bena, herevana hekwakwanai ita davaria, to hereva momokani lalonai do ita raka noho.