Lau be lagani 1854 ai, St. Paul, Minnesota, U.S.A. ai lau vara. Egu famili be Roman Katolik taudia bona ai be taga bada lasi taudia. Ai ibounai be 5, bona lau be iharuana. Lau be Katolik elementary sikuli lau lao, bona pris durua gaukara lau karaia. To, Baibel dekenai egu diba be maragi. Ena be lau abia dae gau ibounai ia havaraia Diravana ia noho, to egu dubu edia hereva lau abia dae lasi.

Lagani ginigunana William Mitchell College of Law ai lau sikuli noho lalonai, Iehova ena Witnes taudia be egu ruma dekenai idia mai. Egu dabua lau huria noho dainai, unai tau bona hahine be mai hemataurai ida idia gwau gabeai do idia giroa mai. Idia giroa mai neganai, lau be mai egu henanadai rua: “Dahaka dainai tanobada ai taunimanima namodia idia kwalimu lasi?” bona “Dahaka do lau karaia lau moale totona?” Lau ese inai buka, The Truth That Leads to Eternal Life bona New World Translation of the Holy Scriptures, grin gauna lau abia dae. Danu, Baibel stadi lau abia dae. Unai ese lau ia durua gau matamata momo lau lalopararalaia totona. Lau moale bada badina lau dibaia gauna be, Dirava ena Basileia  be tanobada do ia lohiaia gavamanina. Lau itaia taunimanima edia lohia dalana be ia kwalimu lasi, bona tanobada be hisihisi, kara gageva bona dika amo ia honu.

Lagani 1982 ena matamanai, Iehova dekenai egu mauri lau gwauhamatalaia. Bena gabeai, St. Paul Civic Centre dekenai idia karaia “Basileia ena Hereva Momokani” Hebouhebouna ai, lau bapatiso. Wiki ta murinai, Minnesota dekenai lau giroa lou bona loea ta ai do lau lao ena exam lau karaia. October ena matamanai, lau idia hadibaia unai exam dekenai lau kwalimu, anina be loea gaukara lau karaia diba.

Unai “Basileia ena Hereva Momokani” Hebouhebouna ai, Brooklyn Betele amo Mike Richardson lau hedavari henia, bona lau ia hamaoroa hedikwota ai legal ofesi ta idia kehoa. Etiopia eunuko tauna ena hereva Kara 8:36 ai lau laloatao bona sibona lau nanadaia, ‘Dahaka ese lau ia koua Legal Ofesi dekenai lau gaukara totona?’ Vadaeni, Betele gaukara totona aplikeisen lau atoa.

Egu tama sina idia moale lasi badina lau be Iehova ena Witnes tauna ai lau lao. Egu tamana ese lau ia nanadaia Betele ai lau gaukara karana ese edena dala ai egu loea gaukara do ia hanamoa. Lau hamaoroa lau be volantia gaukara do lau karaia. Danu, ia lau hamaoroa hua ta ta ai moni sisina do lau abia, Betele taudia ibounai ese idia abia hegeregerena.

Kota ta ida gwauhamata lau karaia vadaeni dainai, unuseniai lau gaukara guna, bena lagani 1984 ai Brooklyn, New York ena Betele ai lau gaukara matamaia. Legal Ofesi ai lau idia atoa. Kota gaukara amo lau abia diba ese gabeai totona lau ia hegaegaelaia.

November 1983 ai, Jersey City, New Jersey dekenai, Stanley Theater idia hoia. Tadikaka be unai bildin ena paoa bona ranu paipa atoa totona idia ura gavamani amo gwaumaoro idia abia. Tadikaka be gavamani ena ofesa taudia ida idia hebou neganai, idia gwau Stanley Theater be Iehova ena Witnes taudia edia hebouhebou badadia totona do idia gaukaralaia. To unai ese hekwakwanai ta ia havaraia. Siti ena taravatu be tomadiho rumadia be taunimanima idia noho gabudia sibona ai do idia haginia. Stanley Theater be siti ena bisinesi gabuna ai ia noho, unai dainai siti ena ofesa taudia idia ura lasi gwaumaoro idia henia. Tadikaka ese unai disisen dainai idia apil, to kota ese edia apil ia abia dae lasi.

Betele ai lau gaukara ena wiki ginigunana ai, orea ese gavamani be gwaumaoro ia henia lasi ena keis be distrik kota dekenai idia abia  lao. Guna lau be St. Paul, Minnesota ena distrik kota ai lagani rua lau gaukara dainai, unai bamona keis idia karaia dalana lau diba. Orea ena loea ta ia gwau, Stanley Theater be taunimanima ese idia moalelaia karadia hegeregere muvi, miusiki konseti bona unai bamona gaudia totona idia gaukaralaia. To, dahaka dainai tomadiho totona ai gaukaralaia be mai ena taravatu? Distrik kota be unai ia lalohadailaia murinai, ia gwau Jersey City be aiemai maoro tomadiho karana dekenai ia matauraia lasi. Kota ese gavamani ia oda henia gwaumaoro do idia henia. Unai amo lau itaia Iehova ese ena orea ia hanamoa badina kota ese gwaumaoro idia henia ena gaukara idia habadaia totona. Lau moale badina lau be unai gaukara lalonai lau noho.

Tadikaka ese Stanley Theater hanamoa gaukara badana idia hamatamaia bena lagani ta murinai, September 8, 1985 ai, Gilead Sikuli ena klas 79 edia gradueisen be unuseniai idia karaia. Legal ofesi ai ma haida ida lau gaukara hebou karana lau moalelaia bada, guna Betele ai lau do mai lasi neganai lau karaia loea gaukara ena moale ia hanaia. Lau diba lasi Iehova be lau dekenai hahenamo momo do ia henia.

Lagani 1980 lalodiai, doketa bona hospital momo be Witnes taudia edia noinoi rara lasi medikol heduru totona idia matauraia lasi. Rogorogo hahine be hekwakwanai badadia idia davaria, badina diadi idia gwau hahine be mai edia maoro lasi rara abia karana idia koua totona. Diadi idia gwau bema hahine be rara ia abia lasi, ia mase diba bena beibi be sinana lasi.

December 29, 1988 ai, Taihu Denise Nicoleau be natuna mero ia havaraia murinai, rara bada ia halusia. Ena hemoglobin ia diho 5.0 bona ena doketa ese ia noia gwaumaoro do ia henia rara ia henia hanai totona. Taihu Nicoleau be gwaumaoro ia henia lasi. Daba ai, hospital taudia idia ura kota amo gwaumaoro idia abia, unai amo nesi taudia ese taihu dekenai rara do idia henia. Diadi ese taihu Nicoleau eiava ena adavana edia hereva ia kamonai lasi, bona ia hadibadia lasi hospital dekenai gwaumaoro ia henia vadaeni taihu dekenai rara idia henia totona.

Friday, December 30 ai, nesi taudia ese taihu Nicoleau dekenai rara idia henia, ena be ena adavana bona bese taudia haida ese idia koudia. Unai hanuaboi ai, ena bese taudia haida bona elda ta eiava rua be pulisi ese idia dogoatao, badina idia be Taihu Nicoleau ena bedi idia hagegea bona nesi taudia idia koua rara idia henia lasi totona.  Saturday dabai, December 31 ai, New York City bona Long Island edia niuspepa, TV bona reidio be unai sivarai idia halasia.

Monday dabai, lau be diadi tauna, Milton Mollen lau hereva henia. Lau ese unai keis ena sivarai lau gwauraia bona lau hamaoroa unai diadi ta be keis ena kota ia karaia lasi, to rara henia hanai ena oda ia sainia kava. Diadi Mollen ese lau ia nanadaia adorahi ai iena ofesi dekenai do lau lao bona unai keis ena sivarai bona taravatu do ai kikilaia. Unai hanuaboi ai, egu ovasia, Philip Brumley ese lau ia bamoa bona Diadi Mollen ena ofesi dekenai ai lao. Diadi ese hospital ena loea ia boiria mai danu. Ai hepapahuahu. Unai nega ai, Tadikaka Brumley be ena noutbuk dekenai inai hereva, “oi hereva auka lasi” ia torea, lau itaia totona. Unai be sisiba namona badina lau be mai badu ida hospital ena loea ena hereva lau hepapahuahulaia.

Hora ta murinai, Diadi Mollen ia gwau, kerukeru dabai aiemai keis be do idia karaia guna. Diadi Mollen ena ofesi ai rakatania neganai, ia gwau kerukeru hospital ena loea be mai ena “gaukara metauna.” Anina be hospital ena loea be do ia hekwarahi Taihu Nicoleau idia doria rara ia abia hanai karana be taravatu hegeregerena ia hamomokania totona. Lau mamia Iehova be lau ia hadibaia kota dekenai do ai kwalimu. Unai ese lau ia durua lau manau totona, badina Iehova be ai ia gaukaralaia iena ura ai karaia totona.

Unai hanuaboi ibounai lalonai ai gaukara, daba ai kota dekenai do ai herevalaia gaudia ai hegaegaelaia totona. Kota rumana be Brooklyn Betele kahirakahira, unai dainai aiemai Legal Ofesi taudia momo be unuseni idia raka lao. Diadi taudia foa be aiemai hereva idia kamonai murinai, Taihu Nicoleau dekenai rara idia henia hanai ena oda idia haidaua. Kota badana be Taihu Nicoleau ena kahana ai idia gini, bona idia gwau ta ese gorere tauna ena hereva ia kamonai lasi bona oda ia sainia, be taunimanima ta ena maoro matauraia lasi karana.

Daudau lasi murinai New York City ena kota badana momokani ia hamomokania Taihu Nicoleau be mai ena maoro rara lasi medikol heduru ia abia totona. Kota badana ese keis foa lalonai rara lasi medikol heduru abia totona edia gwaumaoro idia henia, bona unai be keis ginigunana. Lau moale badina lau be unai gaukara lalonai lau heduru. (Maua itaia: “ Suprim Kota ai Ita Kwalimu  Keis.”) Betele ai loea ma haida ida lau gaukara hebou keis haida hegeregere divos, daika ese natudia do ia abia, tano bona ruma haginia edia taravatu.

Nega ginigunana egu adavana Dawn lau hedavari henia neganai, ia be divos hahinena bona ena natudia toi ia naria. Ia be moni gaukara ia karaia bona ia painia danu. Iena mauri be ia auka, to lau hoa badina ia ura dikadika Iehova ia hesiai henia. Lagani 1992 ai, New York City dekenai, “Diari Loalaia Taudia” ena Distrik Hebouhebou ai lao, bona lau nanadaia lau ura ia lau tura henia. Lagani ta murinai ai headava. Egu adavana be Iehova ia atoa guna bona moale hahinena, bona lau mamia ia be harihari gauna Iehova amo. Ai ruaosi emai mauri ibounai lalonai, Dawn be lau dekenai kara namo ia hahedinaraia.​—Aon. 31:12.

Ai headava neganai, iena natudia edia mauri lagani be 11, 13 bona 16. Lau ura lau be tamana namona ai do lau lao, unai dainai ubua tamana (stepparent) ena maduna idia herevalaia pablikeisen momo lau duahia namonamo bona edia sisiba ibounai lau badinaia. Lagani idia hanaia lalonai lau hekwarahi sisina, to lau moale badina Dawn ena natudia ese lau be edia tamana bamona idia abia dae, idia lalokau henia bona idia abidadama henia. Emai natudia edia turadia ai abia dae emai ruma dekenai bona ruma be moale matamata taudia ese idia hahonua karana ai moalelaia.

Lagani 2013 ai, lau bona Dawn be Wisconsin dekenai ai lao emai tama sina burukadia ai naria totona. To lau hoa badina egu Betele hesiai gaukara be ia doko lasi. Lau idia boiria volantia gaukara do lau karaia bona kota gaukaradia dekenai orea do lau durua noho.

September 2018 ai, lau davaria lau ura hereva gwauraia neganai, lau huahua momo. Emai doketa ese lau ia sekea, to unai ia vara ena badina ta ia davaria lasi. Gabeai, January 2019 ai, doketa ma ta ia gwau, reana lau be gorere idauna ta lau abia bona nega ia hanaia lalonai unai gorere ese egu tauanina ibounai do ia hadikaia.

Dina toi murinai, lau ura henia spot lau gadara noho lalonai, lau moru bona egu imana idibana (wrist) ia makohi. Egu mauri ibounai lalonai unai spot lau gadara bona lau manada. Unai nega amo lau diba egu masolo edia gaukara dalana lau biagua diba lasi. Lau hoa badina unai gorere be ia bada ia lao haraga. Egu hereva, loaloa bona aniani hadonoa dalana ia auka.

Lau moale bada badina egu loea gaukarana amo lau ese Iehova ena orea lau durua diba. Bona lau moale badina magasin haida totona atikol momo lau torea bona doketa, loea bona diadi taudia ese idia duahia. Danu tanobada hegegemadai tok lau henia, bona lau hahedinaraia Iehova ena taunimanima be mai edia maoro rara lasi opereisen bona medikol heduru idia abia hidi totona. To, Luka 17:10 ena hereva hegeregerena: ‘Lau be anina lasi hesiai tauna sibona. Lau karaia gaukarana be egu maduna.’