1. Aposetolo Paulo be dahaka ia gwau?

APOSETOLO Paulo ia hahedinaraia ia be nega haida ia manoka danu. Ia gwau ena tauanina be ia ‘dika ia lao noho,’ bona ia hekwarahi kara maoromaoro ia karaia totona, bona iena ura hegeregerena ai Iehova ese ena guriguri ia haerelaia lasi. (2 Kor. 4:16; 12:7-9; Roma 7:21-23) Danu, Paulo ena inai taudia idia gwau ia be manoka * tauna. To Paulo be sibona ena kara dika bona ma haida edia hadikaia herevadia dainai ia laloa lasi ia be anina lasi.​—2 Kor. 10:10-12, 17, 18.

2. Korinto Iharuana 12:9, 10 ena hereva bamona, Paulo be dahaka mai anina bada gauna ta ia dibaia?

² Paulo be mai anina bada gauna ta ia dibaia​—taunimanima ta be ia goada diba ena be ia mamia ia manoka eiava ia be anina lasi. (2 Korinto 12:9, 10 duahia.) Iehova ese Paulo ia hamaoroa “oi manoka neganai, egu siahu be oi amo ia hedinarai goevagoeva.” Anina be Iehova ese ena siahu amo Paulo dekenai goada ia henia. Hari, mani ita itaia dahaka dainai iseda inai taudia ese ita idia gwauraia dika neganai do ita lalohisihisi lasi.

3. Dahaka dainai taunimanima ese ita idia hadikaia neganai ita moale?

³ Ita ibounai ita ura lasi ta ese ita ia hadikaia. To, bema iseda inai taudia ese ita idia gwauraia dika bona edia hereva ita lalohisihisilaia,  ita lalomanoka diba. (Aon. 24:10) Iseda inai taudia edia hadikaia herevadia be edena bamona ita laloa be namo? Paulo bamona, ita ‘idia hadikaia to ita moale’ diba. (2 Kor. 12:10) Dahaka dainai? Badina taunimanima ese ita idia hadikaia bona dagedage henia karana ese ia hamomokania ita be Iesu ena hahediba taudia korikoridia. (1 Pet. 4:14) Iesu ia gwau iena murinai idia raka taudia be dagedage do idia davaria. (Ioa. 15:18-20) Keristani taudia ginigunadia edia negai unai bamona ia vara. Unai negai, Grik taudia edia kastom idia badinaia taudia idia laloa Keristani taudia be aonega lasi bona anina lasi taudia. Bona Israela taudia idia laloa Keristani taudia be aposetolo Petero bona Ioane bamona, idia be “sikuli bada lasi bona dagi lasi taudia.” (Kara 4:13) Toana be Keristani taudia be idia manoka; idia be politikol karadia bona ami lalonai idia vareai lasi, bona taunimanima ese idia matauraidia lasi bona idia dadaraia.

4. Keristani taudia ginigunadia be haida ese idia gwauraia dika neganai, dahaka idia karaia?

⁴ Keristani taudia ginigunadia be edia inai taudia edia hadikaia herevadia dainai edia hesiai gaukara idia rakatania, a? Lasi. Hegeregere, aposetolo Petero bona Ioane be Iesu idia badinaia, bona ma haida dekenai iena hahediba herevadia idia harorolaia dainai hisihisi idia davaria neganai idia moale. (Kara 4:18-21; 5:27-29, 40-42) Unai hahediba taudia be gau ta dainai idia hemarai lasi. Ena be taunimanima ese Keristani taudia ginigunadia idia matauraia lasi, to edia gaukara amo taunimanima momo idia durua. Hegeregere, Keristani taudia ginigunadia ese idia torea Baibel bukadia be taunimanima milioni dekenai heduru bona helaro idia henia noho. Bona idia harorolaia Basileiana be hari guba ai ia lohia sibona lasi, to kahirakahira taunimanima ibounai do ia lohiaia. (Mat. 24:14) To, idia ia dagedage henia politikol orea badana be ia moru bona ia boio vaitani, bona unai Keristani taudia be hari guba dekenai king ai idia lao. To, edia inai taudia be idia mase; bona bema idia toreisi lou, idia be idia inai henidia Keristani taudia ese idia lohiaia Basileia henunai do idia noho.​—Apok. 5:10.

5. Ioane 15:19 ena hereva bamona, dahaka dainai taunimanima idia laloa Iehova ena Witnes taudia be anina lasi taudia?

⁵ Hari, taunimanima idia laloa ita Iehova ena Witnes taudia be aonega lasi bona manoka taudia bona ita idia kirikirilaia. Dahaka dainai? Badina ita be manau bona maino taudia, bona kamonai karana ita hahedinaraia. Bona tanobada taudia edia kara ita tohotohoa lasi. To tanobada taudia ese hekokoroku, heagi bona gwau-edeede taudia idia ura henidia. Danu, ita be politikol karadia ita durua lasi bona tano ta ena ami lalonai ita vareai lasi. Ita be tanobada taudia amo ita idau, unai dainai idia laloa ita be anina lasi taudia.​—Ioane 15:19 duahia; Roma 12:2.

6. Iehova ese ena taunimanima ia durua edena gaukara badana idia karaia totona?

⁶ Herevana tanobada taudia ese ita be edena bamoa idia laloa, to Iehova be ita ia durua noho gaukara badadia ita karaia totona. Ia ese tanobada hegegemadai ita karaia noho haroro gaukarana ia hagugurua noho. Hari, Iena hesiai taudia ese gado idauidau ai idia hahanaia magasin be tano momo ai idia hariharilaia noho, bona Baibel amo taunimanima milioni momo idia durua edia mauri idia hanamoa totona. Iehova ita hanamoa be namo, badina taunimanima ese idia laloa bada lasi taudia ia gaukaralaia noho unai gaukara badana idia hagugurua totona. To ita ta ta be edena bamona? Iehova ese ita ia durua diba ita goada totona, a? Bema oibe, dahaka ita karaia diba iena heduru ita abia totona? Mani  aposetolo Paulo ena haheitalai amo do ita dibaia gaudia toi ita herevalaia.

7. Paulo ena haheitalai amo ita dibaia gauna ta be dahaka?

⁷ Paulo ena haheitalai amo ita dibaia gauna ta be inai: Iehova oi hesiai henia totona sibona emu goada eiava diba dekenai oi tabekau lasi. Paulo be ena noho dalana bona ena diba dainai momo ese idia ura henia, unai dainai reana Paulo be do ia hekokoroku eiava sibona ena diba dekenai do ia tabekau. Ia be Roma ena provinsi ta ena siti badana ladana Taso dekenai ia tubu daekau. Taso be taga gabuna bona unuseniai iunivesiti ta ia noho. Paulo be diba bada tauna​—ia be unai negai ia noho Iuda edia gunalaia tauna ta ladana, Gamaliela ese ia hadibaia. (Kara 5:34; 22:3) Bona guna Iuda taudia huanai, Paulo be lada bada tauna ta. Ia gwau: “Iuda tomadihona lalonai lau goada lau lao, bona egu bese taudia huanai lau be egu mauri lagani tamona taudia bamona lasi.” (Gal. 1:13, 14; Kara 26:4) To, Paulo be sibona ena diba dekenai ia tabekau lasi.

8. (a) Filipi 3:8 ena hereva bamona, Paulo ese taunimanima idia laloa bada gaudia be edena bamona ia laloa? (b) Dahaka dainai ‘ena be ia manoka to ia moale’?

⁸ Paulo be mai moale ida taunimanima ese idia laloa bada gaudia ia dadaraia. Oibe, ia laloparara inai tanobada amo guna ia abia hahenamo be “momoru sibona.” (Filipi 3:8 duahia.) Paulo be Keriso ena murinai ia raka dainai hekwakwanai momo ia davaria. Iena bese taudia ese idia inai henia. (Kara 23:12-14) Bona iena bese taudia, Roma taudia unai, ese idia botaia bona dibura ruma ai idia atoa. (Kara 16:19-24, 37) Danu, ia laloparara ia be goevadae lasi bona kara maoromaoro ia badinaia be auka. (Roma 7:21-25) To, ena inai taudia edia kara eiava sibona ena manoka gaudia dainai ena hesiai gaukara ia rakatania lasi. Oibe, ‘ena be ia manoka to ia moale.’ Dahaka dainai? Badina ia manoka neganai, ia itaia iena mauri lalonai Dirava ese ena siahu amo ia durua.​—2 Kor. 4:7; 12:10.

9. (a) Tanobada taudia be dahaka gaudia idia laloa bada? (b) Bema ita dekenai unai gaudia be lasi, lalohadai maorona be dahaka?

⁹ Bema ita ura Iehova amo goada ita abia, namo lasi ita laloa eda tauanina ia goada, sikuli  namona ita lao, hanua namona amo ita mai, eiava ita taga dainai Iehova ese ita do ia laloa bada. Iehova ese ita ia gaukaralaia totona, unai gaudia be anina lasi. Momokani, Dirava ena taunimanima momo be ‘aonega taudia, siahu taudia, eiava ladana bada taudia’ lasi. To, Iehova be “tanobada ena manoka gaudia” ia abia hidi ena hesiai gaukara idia karaia totona. (1 Kor. 1:26, 27) Unai dainai, ena be oi dekenai paragraf ena matamanai ita herevalaia gaudia be lasi, to namo lasi unai ese oi ia koua Iehova oi hesiai henia totona. To, namona be lalohadai maorona oi abia, bona do oi itaia Iehova ese oi dekenai goada do ia henia. Hegeregere, bema oi abia dae gaudia dainai oi idia gwauraia dika taudia oi gari henia, namona be Iehova oi guriguri henia. Unai amo oi dekenai goada do ia henia, mai gari lasi ida emu abidadama oi gwauraia hedinarai totona. (Efe. 6:19, 20) Bema oi be gorere badana ta oi haheaukalaia noho, namona be Iehova oi noia oi dekenai goada ia henia, iena hesiai gaukara oi karaia noho totona. Nega ta ta ai Iehova ese oi ia durua dalana oi itaia neganai, emu abidadama do ia goada ia lao.

10. Dahaka dainai Heberu 11:32-34 ese ia herevalaia taudia edia sivarai ita stadilaia be namo?

¹⁰ Paulo be Toretore Helagadia ia stadilaia namonamo. Bona Dirava ena Hereva ese ia sivarailaia taudia edia ekspiriens amo diba ia abia. Paulo be Heberu Keristani taudia ia tore henia neganai, ia hadibadia namona be Iehova ena abidadama hesiai taudia edia haheitalai namodia idia tohotohoa. (Heberu 11:32-34 duahia.) Unai hesiai tauna ta, King Davida mani ita laloa. Ia be ena inai taudia sibona ese idia dagedage henia lasi, to guna iena tura namodia ese idia inai henia danu. Davida ena sivarai ita laloa neganai, do ita laloparara dahaka dainai Paulo be Davida ena sivarai ia laloa dobu karana amo goada ia abia. Edena dala ai Paulo ita tohotohoa diba?

11. Dahaka dainai toana be Davida ia manoka? (Rau 1 ena laulau itaia.)

¹¹ Goliata be tuari tauna goadana dainai ia laloa Davida be goada lasi. Goliata ese Davida ia itaia neganai ia kirikirilaia, badina “ia ura lasi uhau sibona danu do ia heatu.” Danu, Goliata be tau badana, mai ena tuari kohudia, bona tuari ia diba namonamo. To, Davida be tuari ia diba lasi merona, bona ia dekenai tuari kohudia be lasi. To, Davida ese ena manoka gauna be ena goada gauna ai ia halaoa. Bona Iehova ena siahu dekenai ia tabekau dainai, ena inai tauna ia halusia.​—1 Sam. 17:41-45, 50.

12. Davida be dahaka hahetoho ma haida ia haheaukalaia?

¹² Davida be tohoa gauna ma ta ia davaria bona unai ese ia hamanokaia diba. Davida be mai ena lalona ibounai ida Saulo, Iehova ese ia abia hidi Israela ena king, ia hesiai henia. Matamanai, King Saulo ese Davida ia matauraia. To gabeai, Saulo ia hekokoroku dainai Davida ia mama henia. Saulo ese Davida ia kara auka henia, bona ia ura ia hamasea.​—1 Sam. 18:6-9, 29; 19:9-11.

13. Davida be King Saulo ese ia kara auka henia neganai dahaka ia karaia?

¹³ Herevana King Saulo ese Davida ia matauraia lasi, to Davida be Iehova ese ia abia hidi king ia matauraia noho. (1 Sam. 24:6) Davida be Saulo ese ia karaia gau dikadia dainai Iehova dekenai bleim ia henia lasi. To, Iehova dekenai ia tabekau unai amo goada ia henia, unai hahetoho badana ia haheaukalaia totona.​—Sal. 18:1.

14. Edena dala ai aposetolo Paulo ena hekwakwanai be Davida ena hekwakwanai bamona?

¹⁴ Aposetolo Paulo danu be Davida bamona. Paulo ena inai taudia edia siahu be bada. Iena  negai idia noho lohia taudia momo ese ia idia inai henia. Nega momo ia idia botaia bona dibura ruma dekenai idia atoa. Davida bamona, Paulo be ena turadia ese idia dagedage henia. Keristani kongrigeisen taudia haida ese idia inai henia danu. (2 Kor. 12:11; Fili. 3:18) To, Paulo idia inai henia taudia ibounai idia kwalimu lasi. Edena dala ai? Ia ese haroro gaukara ia goadalaia noho ena be dagedage ia davaria. Mai momokani ida ena tadikaka taihu ia kara henidia ena be iena lalona idia hahisia. Bona mai anina bada gauna be, ena mauri ibounai lalonai Dirava ia badinaia ela bona ia mase. (2 Tim. 4:8) Unai hekwakwanai badadia ia hanaia badina Iehova dekenai ia tabekau, to sibona ena goada dekenai ia tabekau lasi.

15. Iseda tahua gauna be dahaka, bona edena dala ai ita hagugurua diba?

¹⁵ Oi be emu sikuli turadia, gaukara turadia, eiava Witnes lasi ruma bese taudia edia hadikaia herevadia bona dagedage karadia oi haheaukalaia noho, a? Kongrigeisen ai ta ese oi ia kara auka henia, a? Bema oibe, mani Davida bona Paulo edia haheitalai oi laloa. Oi ese “kara namo amo dika oi halusia noho” diba. (Roma 12:21) Taunimanima ese ita idia dagedage henia neganai Davida ese Goliata ia heatu henia bamona idia ita heatu henia lasi. To, iseda tahua gauna be taunimanima ita durua Iehova bona Baibel dekenai diba idia abia karana amo dika ita halusia diba. Unai oi karaia totona, taunimanima edia henanadai be Baibel amo oi haerelaia, oi idia dagedage henia taudia oi matauraia, bona taunimanima ibounai, oi idia inai henia taudia danu, oi kara namo henidia.​—Mat. 5:44; 1 Pet. 3:15-17.

16-17. Paulo be dahaka ia laloaboio lasi?

¹⁶ Aposetolo Paulo be Keriso ena hahediba tauna ta ai ia do lao lasi neganai, ia be hemataurai lasi tau matamata ta, bona Iesu ena murinai idia raka taudia ia dagedage henia. (Kara 7:58; 1 Tim. 1:13) Iesu sibona ese Paulo (unai negai ena ladana be Saulo) ia koua, Keristani kongrigeisen ia hahisia lasi totona. Iesu be guba amo Paulo ia hereva henia bona ena matana ia hakepulua. Paulo ena matana idia namo lou totona, ia be guna ia dagedage  henia taudia amo heduru ia tahua. Paulo be mai manau ida hahediba tauna ta ladana Anania ena heduru ia abia dae bona ena matana idia namo.​—Kara 9:3-9, 17, 18.

¹⁷ Gabeai, Paulo be Keristani kongrigeisen lalonai maduna momo ia huaia, to ia ese Damaseko dalana ai Iesu amo ia dibaia gauna ia laloaboio lasi. Paulo be ia manau noho, bona mai moale ida ena tadikaka taihu edia heduru ia abia dae. Ia gwau idia ese ia “idia durua bona hagoadaia bada.”​—Kol. 4:10, 11.

18. Dahaka dainai nega haida ita ura lasi ma haida edia heduru ita abia dae?

¹⁸ Paulo ena sivarai amo dahaka ita dibaia? Iehova ena taunimanima ita bamoa matamaia neganai, reana ma haida edia heduru ita abia dae, badina ita laloparara iseda diba be maragi bona gau momo ita do dibaia noho. (1 Kor. 3:1, 2) To, hari be edena bamona? Bema ita be lagani daudau lalonai Iehova ita hesiai henia bona iseda ekspiriens be bada, reana do ita ura lasi vanegai sibona hereva momokani lalonai ia vareai tauna ena heduru ita abia dae. To, Iehova be nega momo iseda tadikaka taihu ia gaukaralaia ita idia hagoadaia totona. (Roma 1:11, 12) Bema ita ura Iehova amo goada ita abia, namona be iseda tadikaka bona taihu edia heduru ita abia dae.

19. Dahaka dainai Paulo ia kwalimu?

¹⁹ Paulo be Keristani tauna ai ia lao murinai gaukara namodia haida ia karaia. Dahaka dainai? Badina ia dibaia gauna be ta ia kwalimu totona ena hanua, goada, edukeisen, eiava moni momo be anina lasi. To, bema ia manau bona Iehova dekenai ia tabekau, gaukara momo ia karaia diba. Namona be ita ibounai ese inai dala toi amo Paulo ita tohotohoa: (1) Iehova dekenai ita tabekau, (2) Baibel ese ia sivarailaia taudia amo diba ita abia, bona (3) iseda tadikaka taihu edia heduru ita abia dae. Bena, ena be ita manoka, to Iehova ese ita dekenai goada do ia henia!