1-2. (a) Iehova be edena dala ai taunimanima ia hereva henia? (b) Inai stadi atikol ai dahaka do ita herevalaia?

IEHOVA ia ura ita ia hereva henia. Idaunegai ia ese peroveta taudia, aneru, bona iena Natuna, Iesu Keriso ia gaukaralaia ita dekenai iena lalohadai ia gwauraia totona. (Amo. 3:7; Gal. 3:19; Apok. 1:1) Hari Dirava be Baibel amo ita ia hereva henia. Baibel amo iena lalohadai ita dibaia bona ia karaia gaudia ita lalopararalaia.

² Iesu be tanobada ai ia noho neganai, Iehova be nega toi guba amo ia hereva henia. Inai stadi ai inai gaudia do ita herevalaia: Iehova ese ia gwauraia herevadia, iena hereva amo do ita dibaia gaudia, bona iena hereva amo do ita abia namo.

3. Mareko 1:9-11 ena hereva bamona, Iesu ena bapatiso negana ai Iehova be dahaka ia gwau, bona edena hereva momokani toi ia hahedinaraia?

³ Mareko 1:9-11 ese Iehova be guba amo ia hereva negana ginigunana ia gwauraia. (Duahia.) Ia gwau: “Oi be egu Natuna, egu lalokau, oi lau lalonamo henia.” Iesu be ena Tamana ena lalokau bona lalonamo herevadia ia kamonai neganai, ia moale bada! Iehova ese Iesu dekenai ia gwauraia herevadia ese mai anina bada gaudia toi ia hahedinaraia. Ginigunana be, Iesu be iena Natuna. Iharuana be, Iehova ese iena Natuna ia lalokau henia. Ihatoina be, Iehova ese iena Natuna ia lalonamo henia. Mani unai mai anina bada hereva momokani ta ta ita herevalaia.

4. Iesu ena bapatiso ese dahaka ia hamomokania?

⁴ “Oi be egu Natuna.” Unai hereva amo Iehova ese ia hahedinaraia iena lalokau Natuna, Iesu be sibona ia henia iena Tamana  ena ura do ia karaia totona. Tanobada ai ia do mai lasi neganai, guba ai Tamana ida ia noho. To, ia bapatiso neganai, Dirava ese lauma helaga amo ia horoa. Unai nega ai, Dirava ese ia hahedinaraia Iesu ia horoa, ena anina be Iesu be guba dekenai ia giroa lou neganai, Dirava ese ia abia hidi King bona Hahelaga Tauna Badana ai do ia lao. (Luka 1:31-33; Heb. 1:8, 9; 2:17) Unai dainai ita laloparara Iesu ia bapatiso neganai, iena Tamana ia gwau: “Oi be egu Natuna.”​—Luka 3:22.

5. Edena dala ai Iehova ena lalokau bona lalonamo karana ita tohotohoa diba?

⁵ “Oi be . . . egu lalokau.” Iehova ena lalokau bona lalonamo herevana ese ita ia durua ma haida hagoadaia daladia ita tahua totona. (Ioa. 5:20) Bema ita ia laloa bada tauna ta be ita karaia kara namodia dainai ita ia hanamoa, unai ese ita do ia hagoadaia. Unai hegeregerena, iseda tadikaka taihu kongrigeisen ai bona ruma bese taudia ita lalokau henidia bona hagoadaia be namo. Bema haida ita hanamoa, edia abidadama ita hagoadaia bona ita durudia Iehova idia hesiai henia noho totona. Tama sina ese edia natudia idia hagoadaia be namo. Bema tama sina be mai lalona ibounai ida edia natudia idia hanamoa bona idia lalodia bada, unai ese edia natudia do ia hagoadaia.

6. Iehova be dahaka ia diba momokani?

⁶ “Oi lau lalonamo henia.” Unai hereva ese ia hahedinaraia Iehova ia diba momokani Iesu be ena Tamana ena ura do ia karaia. Unai hegeregerena ita danu ita diba momokani Iesu ese Iehova ena gwauhamata ibounai do ia hagugurua. (2 Kor. 1:20) Iesu ena haheitalai ita laloa neganai, mai iseda ura ida ia amo diba do ita abia bona ena haheitalai do ita tohotohoa. Iehova ia diba Iesu be iena ura do ia karaia, unai hegeregerena ia diba iena  hesiai taudia be iena Natuna amo diba do idia abia noho.​—1 Pet. 2:21.

7. Mataio 17:1-5 ena hereva bamona, Iehova be edena nega ai Iesu ia hereva henia bona dahaka ia gwau?

⁷ Mataio 17:1-5 duahia. Iehova ese guba amo nega iharuana Iesu ia hereva henia, unai nega ai Iesu ena “toana ia idau.” Iesu ese Petero, Iamesi, bona Ioane ia boiria ia ida ororo ta dekenai idia lao totona. Unuseniai idia noho neganai matahanai ta idia itaia. Iesu ena vairana bona ena dabua be idia diaridiari. Matahanai lalonai idia noho tatau rua ese Mose bona Elia idia laulaulaia, bona idia ruaosi be Iesu ida ena mase bona toreisi lou idia herevalaia noho. Ena be aposetolo taudia toi idia “mahuta” to idia noga neganai, Iesu bona unai tatau rua idia itaia. (Luka 9:29-32) Bena idia itaia noho lalonai ori ta ese idia ia koua bona gado ta idia kamonai​—unai be Dirava ena gadona! Iesu ia bapatiso neganai, Iehova be iena Natuna ia lalokau henia bona iena lalonamo hahedinaraia totona, ia gwau: “Inai be egu Natuna, egu lalokau, ia lau lalonamo henia.” Unai nega ai Iehova be ma ia gwau: “Iena hereva umui kamonai.”

8. Matahanai ese edena dala ai Iesu bona ena hahediba taudia ia hagoadaia?

⁸ Unai matahanai ese ia hahedinaraia Iesu be Dirava ena Basileia ena King ai do ia lao. Oibe, unai ese Keriso ia hagoadaia ena be ia diba ia do idia hahisia bona hamasea, to ia haheauka. Danu unai ese ena hahediba taudia edia abidadama ia hagoadaia do idia davaria hedibagani idia haheaukalaia totona. Bona unai ese idia ia durua gabeai do idia karaia gaukara idia hagugurua totona. Lagani 30 idia ore murinai, aposetolo Petero be unai matahanai ia laloatao noho.​—2 Pet. 1:16-18.

9. Iesu ese ena hahediba taudia dekenai edena mai anina bada sisiba ia henia?

⁹ “Iena hereva umui kamonai.” Unai ese ia hahedinaraia Iehova ia ura iena Natuna ena hereva ita kamonai bona badinaia. Iesu be tanobada ai ia noho neganai dahaka ia gwau? Ia ese mai anina bada gaudia momo ia gwauraia! Hegeregere, mai lalokau ida iena hahediba taudia dekenai sivarai namona harorolaia dalana ia hadibaia, bona idia ia hadibaia loulou idia gima noho totona. (Mat. 24:42; 28:19, 20) Iesu ese idia ia hagoadaia idia gima noho be namo bona idia hesiku lasi. (Luka 13:24) Iena hahediba taudia ia hagoadaia idia ta ta idia lalokau henia, idia lalotamona, bona iena hahegani idia badinaia. (Ioa. 15:10, 12, 13) Iesu ese ena hahediba taudia dekenai ia henia sisiba be mai anina bada! Hari iseda nega ai unai be mai anina bada danu.

10-11. Edena dala ai ita hahedinaraia ita be Iesu ita kamonai henia noho?

¹⁰ Iesu ia gwau: “Hereva momokani ena kahanai idia noho taudia ibounai ese egu gadona idia kamonai.” (Ioa. 18:37) Iesu ena hereva ita badinaia dalana ta be inai: ‘Ta ta iseda kara do ita haheaukalaia noho bona mai kudouna ibounai ida do ita gwauatao heheni.’ (Kol. 3:13; Luka 17:3, 4) Bona danu “nega namodia bona nega dikadia ai” sivarai namona ita harorolaia neganai, ita be iena hereva ita badinaia noho.​—2 Tim. 4:2.

¹¹ Iesu ia gwau: “Lauegu mamoe ese egu gadona idia kamonai.” (Ioa. 10:27) Keriso ena hahediba taudia be iena gadona idia kamonai sibona lasi, to iena hereva idia badinaia danu. Idia be “mauri ena lalohekwarahi” dainai idia lalometau lasi. (Luka 21:34) Herevana nega haida hekwakwanai idia vara, to edia mauri lalonai Iesu ena hahegani badinaia karana be mai anina bada. Iseda tadikaka taihu momo be hahetoho idauidau idia davaria bona idia  haheaukalaia, hegeregere dagedage, ogogami, bona disasta badadia. Ena be idia dekenai unai idia vara, to Iehova idia abidadama henia noho. Iesu ese idia dekenai inai gwauhamata herevana ia gwauraia, ia gwau: “Lauegu taravatu ia abia dae bona ia badinaia tauna be lau ia lalokau henia. Bona lau ia lalokau henia tauna be egu Tamana ese do ia lalokau henia bona lau ese ia do lau lalokau henia.”​—Ioa. 14:21.

12. Edena dala ma ta ai ita hahedinaraia ita be Iesu ita kamonai henia?

¹² Iesu ita kamonai henia dalana ma ta be, ia ese ia abia hidi hakaua taudia ita kamonai henidia. (Heb. 13:7, 17) Lagani gunadia ai Dirava ena orea ese senisi momo ia karaia, hegeregere haroro gaukara durua totona tulu idauidau idia halasia, iseda wiki ena hebou dalana idia haidaua, bona iseda Kingdom Hall haginia, hanamoa bona naria daladia idia hahedinaraia. Unai dala matamatadia ita moalelaia! Bema ita gaukara goada nega korikori ai idia henia hakaua daladia ita badinaia, Iehova ese ita do ia hanamoa.

13. Iesu ita kamonai henia ena namo be dahaka?

¹³ Iesu ese ita dekenai ia hadibaia gaudia ita badinaia neganai, namo do ita davaria. Iesu ia gwauhamata iena hahediba taudia ese iena hadibaia dalana amo namo do idia abia. Ia gwau: “Goada matamata do umui davaria. Lauegu huaia auna be ia namo, bona umui lau noia do umui huaia gauna be ia metau lasi.” (Mat. 11:28-30) Dirava ena Hereva lalonai Evanelia bukadia foa ese Iesu ena mauri bona haroro gaukara ia sivarailaia, unai ese ita ia durua bona ita dekenai aonega ia henia. (Sal. 19:7; 23:3) Iesu ia gwau: “Dirava ena hereva idia kamonai bona badinaia taudia be idia moale!”​—Luka 11:28.

14-15. (a) Ioane 12:27, 28 ena hereva bamona, edena nega ihatoina ai Iehova be guba amo Iesu ia hereva henia? (b) Dahaka dainai Iehova ena hereva ese Iesu ia hagoadaia bada?

¹⁴ Ioane 12:27, 28 duahia. Ioane ena Evanelia bukana ese Iehova be guba amo Iesu ia hereva henia negana ihatoina ia sivarailaia. Iesu ena mase dinana ia kahirakahira neganai, ia be Ierusalema ai Pasova aria ginigabena ia karaia. Unai nega ai ia gwau: “Lau lalohekwarahi bada.” Bena ia guriguri ia gwau: “Tamagu e, emu ladana oi hanamoa.” Unai murinai guba amo ena Tamana ia hereva, ia gwau: “Unai ladana lau hanamoa vadaeni bona do lau hanamoa lou.”

 ¹⁵ Iesu ia lalohekwarahi bada badina iena maduna be, ia ura iena Tamana ena ladana do ia hanamoa. Unai dainai Iehova ia badinaia ela bona ia mase. Iesu ia laloparara ia be hisihisi bada do ia abia bona do idia hamasea. (Mat. 26:38) Herevana ia dekenai unai do ia vara, to mai anina bada gauna be ena Tamana ena ladana ia hanamoa. Taunimanima ese ia idia gwauraia Dirava ena ladana hadikaia tauna, unai dainai ia lalohekwarahi badina ia ura lasi ena mase ese Dirava ena ladana ia hadikaia. Momokani, Iehova ena hereva ese Iesu ia hagoadaia! Ia diba momokani ia ese Iehova ena ladana do ia hanamoa. Iena Tamana ese ia gwauraia herevadia ese ia hagoadaia momokani ia davaria hisihisi ia haheaukalaia totona. Ena be unai nega ai Iesu sibona ese iena Tamana ena hereva ia lalopararalaia, to Iehova ia ura ia gwauraia herevadia be ita ibounai ese ita laloa bada be namo.​—Ioa. 12:29, 30.

16. Ma haida ese Dirava ena ladana idia hadikaia neganai, dahaka dainai ita lalohekwarahi lasi?

¹⁶ Iesu ia karaia bamona, ita danu ita lalohekwarahi badina ita ura lasi haida ese Iehova ena ladana idia hadikaia. Iesu dekenai ia vara bamona, reana ma haida ese ita idia dagedage henia. Eiava Dirava ena ladana idia hadikaia taudia ese sivarai koikoidia amo ita idia gwauraia dika. Unai sivarai koikoidia ese Iehova ena ladana bona iena orea ia hadikaia dalana ita laloa. Unai bamona negadia ai Iehova ena hereva ese ita ia hagoadaia bada. Unai dainai,  namo lasi ita lalohekwarahi momo. Ita diba momokani “Dirava ena maino, laloparara ibounai ia hereaia gauna, ese [iseda] kudouna bona lalona do ia gimaia, Keriso Iesu amo.” (Fili. 4:6, 7) Iehova be hanaihanai iena ladana do ia hanamoa. Iena Basileia amo ia ese Satani bona inai tanobada dikana ese Iena hesiai taudia dekenai idia havaraia dika ibounai do ia haorea vaitani.​—Sal. 94:22, 23; Isa. 65:17.

17. Isaia 30:21 ena hereva bamona, hari iseda negai Iehova be edena dala ai ita ia hereva henia?

¹⁷ Iehova be hari ita ia hereva henia noho. (Isaia 30:21 duahia.) Momokani, Dirava be maoromaoro guba amo ita ia hereva henia lasi. To ia ese ita dekenai iena Hereva Baibel ia henia ita ia hadibaia totona. Danu, Iehova ena lauma helaga ena heduru amo hesiai tauna “mai ena kamonai bona mai ena kara maoromaoro” ia gaukaralaia Iena hesiai taudia dekenai aniani ia henia noho totona. (Luka 12:42) Iseda abidadama hagoadaia totona, idia printaia pablikeisen idauidau bona iseda websait ai idia noho gaudia, hegeregere vidio bona idia rekodia pablikeisen idauidau ita abia!

18. Edena dala ai Iehova ena hereva ese emu abidadama ia hagoadaia?

¹⁸ Iesu be tanobada ai ia noho neganai Iehova ese guba amo ia dekenai ia gwauraia herevadia mani ita laloatao! Dirava ena Hereva, Baibel ese ita ia hagoadaia, bona ita abia dae momokani Iehova ese Satani bona inai tanobada dikana ese ia havaraia dika ibounai do ia haorea. Namona be iseda lalona ita hadaia Iehova ena gadona ita kamonai henia noho totona. Bema unai bamona ita karaia, unai ese ita do ia durua hari bona vaira nega ai do ita davaria hekwakwanai idauidau ita haheaukalaia totona. Baibel ese ita ia hagoadaia, ia gwau: “Umui haheauka noho be namo, unai amo Dirava ese ia gwauhamatalaia gauna do umui abia. To Dirava ena ura umui karaia guna be namo.”​—Heb. 10:36.