ITA IBOUNAI ita ura ma haida ese ita be inai bamona idia laloa: Ita be taunimanima namodia. To, hari inai tanobada ai kara namo hahedinaraia totona be mai ena hekwarahi. Taunimanima momo be ‘kara namodia idia ura henia lasi.’ (2 Tim. 3:3) Bona idia sibona be taravatu idia atoa dainai idia ese ‘dika idia gwauraia namo, bona namo idia gwauraia dika.’ (Isa. 5:20) Danu, nega momo ita hekwarahi kara namodia ita hahedinaraia totona badina iseda kara gunadia ita laloa bona ita diba ita be goevadae lasi taudia. Unai dainai, lagani momo ai Iehova ia hesiai henia hahinena ta, Anne * ena hemami ita lalopararalaia diba. Ia gwau: “Lau laloa lau be kara namodia do lau hahedinaraia diba lasi.”

To, moale gauna be ita ibounai ese kara namodia ita hahedinaraia diba! Unai kara be Dirava ena lauma helaga ena huahua ta bona lauma helaga ena siahu be bada dainai, gau ta ese ita do ia koua lasi kara namodia ita hahedinaraia totona. Kara namo ena anina bona unai kara ita hahedinaraia daladia mani ita herevalaia.

Kara namo ena anina be kara dikadia o kara mirodia dadaraia karana. Hegeregere, kara namo tauna be Dirava ena taravatu ia badinaia bona kara maoromaoro sibona ia karaia. Kara namodia idia hahedinaraia taudia amo unai kara ena namo ita itaia. Bona kara namo tauna be hanaihanai ma haida durua daladia ia tahua bona idia totona gau namodia ia karaia.

Taunimanima haida be edia ruma bese lalonai o edia turadia dekenai kara namodia idia hahedinaraia neganai, reana unai oi itaia, to unai ese ia hahedinaraia unai kara be nega tamona sibona do idia hahedinaraia, a? Momokani, ita ibounai be goevadae lasi bona nega haida ia auka kara namodia ita hahedinaraia totona. Baibel ia gwau: “Kara maoromaoro tauna ta tanobada dekenai, be kara namo sibona ia karaia noho, a? Lasi momokani, ibounai ese nega haida kara dika do idia karaia diba.” (Had. 7:20) Aposetolo Paulo be mai momokani ida ia gwau: “Lau diba egu tauanina lalonai, namo ta ia noho lasi.” (Roma 7:18) Unai dainai kara namo ita hahedinaraia totona, Iehova amo heduru ita abia be namo.

Iehova Dirava be kara namodia hahedinaraia ena taravatu ia atoa. Baibel ia gwau: “Oi be namo, bona oiemu kara danu be namo. Oiemu taravatu mani lau dekenai do oi hadibaia.” (Sal. 119:68) Unai siri ai Iehova ena kara namodia be dala rua ai ia hedinarai. Mani unai dala rua ita herevalaia.

Iehova be namo. Kara namo be Iehova ena kara badana ta. Iehova ese Mose ia hereva henia dalana mani ita laloa, ia gwau: “Lauegu kara namona ibounai be oi dekenai do lau hedinaraia.” Iehova ena hairai bona ena kara namona be Mose ena vairanai ia hedinarai neganai, Mose be inai hereva ia kamonai: “Iehova, Iehova, ia be hebogahisi Diravana, ia badu haraga lasi, ena lalokau be bada herea bona nega ibounai ena hereva ia hamomokania. Uru tausen momo dekenai lalokau ia hahedinaraia, kerere bona kara dika ia gwauatao, to ia ese kerere tauna do ia panisia momokani.” (Eso. 33:19; 34:6, 7) Unai ese ia hahedinaraia goevagoeva Iehova be dala idauidau ai kara namodia ia hahedinaraia diba. Herevana kara namodia hahedinaraia karana dekenai Iesu be haheitalai hereadaena, to ia sibona ese inai hereva ia gwauraia, ia gwau: “Tau ta be ia namo lasi, to tamona sibona, Dirava unai.”​—Luka 18:19.

 Iehova ena kara be namo. Dirava ena kara namo be ia karaia gaudia ibounai lalonai ia hedinarai. Baibel ia gwau: “[Iehova] ena kara be namo, taunimanima ibounai dekenai. Ia karaia gaudia ibounai dekenai iena bogahisihisi ia henia.” (Sal. 145:9) Iehova be taunimanima edia toana ia laloa lasi bona unai be iena kara namona ta, unai dainai idia dekenai mauri bona edia mauri durua gaudia ia henia. (Kara 14:17) Danu iena kara namo ia hedinarai dalana ta be iseda kara dika ia gwauatao. Salamo torea tauna ia gwau: “Iehova e, oi be namo bona oi noho hegaegae dika oi gwauatao totona.” (Sal. 86:5, NWT) Oibe, ita abia dae momokani “Iehova be ia idia badinaia taudia dekenai gau namodia ia henia noho.”​—Sal. 84:11.

Iehova be ena toana hegeregerena ita ia havaraia, anina be taunimanima namodia ai ita lao diba bona kara namodia do ita hahedinaraia. (Gen. 1:27) Baibel ese ita ia hagoadaia ‘kara namo karaia dalana do ita tahua’ noho. (Isa. 1:17) To, edena dala ai unai do ita karaia? Dala toi mani ita herevalaia.

Dala ginigunana be, lauma helaga ena heduru totona ita guriguri, badina unai ese Keristani taudia ia durua diba kara namodia idia hahedinaraia totona. (Gal. 5:22) Oibe, Dirava ena lauma helaga ese ita ia durua diba kara namo ita ura henia bona kara dika ita inai henia totona. (Roma 12:9) Baibel ese ia hahedinaraia Iehova be ita do ia durua unai amo ‘kara namodia bona hereva namodia ibounai lalonai do ita gini goada.’​—2 Tes. 2:16, 17.

Dala iharuana be, Dirava ena hakaua henunai idia torea Hereva ita duahia be namo. Unai ita karaia neganai, Iehova ese ita do ia hadibaia unai amo kara namodia hahedinaraia dalana do ita diba bona ita do ia durua ‘kara namodia ibounai do ita karaia diba, mai kwalimu danu.’ (Aon. 2:9; 2 Tim. 3:17) Iseda kudouna be dava bada gaudia amo ia honu maua ta bamona. Baibel ita duahia bona laloa dobu neganai, gau namodia be iseda kudouna ai ita atoa. Unai be hegeregere dava bada gaudia amo ia honu maua lalonai gau namodia sibona ita atoa be namo, badina ita diba unai ese ita do ia durua.​—Luka 6:45; Efe. 5:9.

Dala ihatoina be, namona be ita gaukara goada ‘haheitalai namodia ita tohotohoa’ totona. (3 Ioa. 11) Baibel ai idia noho haheitalai momo ita tohotohoa diba. Oibe, Iehova bona Iesu be haheitalai hereadaedia. To, kara namodia idia hahedinaraia taudia haida edia haheitalai ita itaia diba. Hegeregere idia rua be Tabita bona Banaba. (Kara 9:36; 11:22-24) Bema Baibel ai edia haheitalai namodia oi duahia, unai ese oi do ia durua. Emu stadi lalonai, idia ese haida idia durua daladia oi laloa. Emu ruma bese o kongrigeisen ai ma haida oi durua daladia idauidau oi laloa. Tabita bona Banaba be haida idia durua dainai taunimanima namodia ai idia lao bona idia abia hahenamo mani oi  laloa. Oi danu, unai bamona oi karaia neganai hahenamo do oi abia.

Hari inai negai, kara namodia idia hahedinaraia taudia edia haheitalai ita laloa danu. Hegeregere, kongrigeisen ai idia gaukara goada bona ‘kara namodia idia ura henia’ elda taudia, edia haheitalai ita laloa. Danu, abidadama goada taihu momo ita laloaboio lasi badina idia danu “ese kara namodia idia hadibaia” noho. (Tito 1:8; 2:3) Taihu ta ladana Roslyn ia gwau: “Egu turana be dala idauidau ia gaukaralaia kongrigeisen ai ma haida ia durua bona hagoadaia totona. Edia noho dalana ia laloa bona idia dekenai harihari gaudia ia henia o dala ma haida ai idia ia durua. Lau laloa ia be taihu namona.”

Iehova ese iena taunimanima ia hagoadaia ‘kara namo do idia tahua’ totona. (Amo. 5:14) Unai bamona ita karaia neganai, unai ese ita do ia hagoadaia Iehova ese ia moalelaia kara namodia do ita ura henia bona unai kara namodia do ita hahedinaraia noho.

Namo lasi ita laloa kara namodia ita hahedinaraia ena anina be, ma haida hamoalea karadia ita karaia o idia dekenai dava bada harihari gaudia ita henia. Mani inai haheitalai ita laloa: Artist ta be laulau ta ia penia totona, ia be maka maragimaragi mai edia kala idauidau ia atoa laulau namo hereana ta ia penia totona. Unai hegeregerena, kara maragidia amo dala idauidau ai haida ita durua neganai ita be kara namodia ita hahedinaraia.

Baibel ese ita ia hagoadaia, kara namodia hahedinaraia totona ita “noho hegaegae” be namo. (2 Tim. 2:21; Tito 3:1) Namona be ma haida durua daladia ita tahua ‘kara namodia do ita karaia idia ita hagoadaia totona.’ (Roma 15:2) Anina be, haida be gau haida dekenai idia dabu bona bema ita dekenai unai gaudia idia noho vadaeni idia dekenai ita henia diba. (Aon. 3:27) Reana iseda ruma dekenai ta ita boiria mai ita ida ia aniani hebou eiava ita hagoadaia heheni diba. Bema ita kamonai ta be ia gorere, reana ia dekenai kadi ta ita siaia, ia ita vadivadi henia o ia ita rini henia. Oibe, dala idauidau ita tahua ta ta ita hagoadaia totona bona ‘hereva namodia ita gwauraia, unai amo iseda hereva idia kamonai taudia do ita hagoadaia.’​—Efe. 4:29.

Iehova bamona, ita ura taunimanima ibounai dekenai kara namodia ita hahedinaraia. Unai dainai idia ita kara henia neganai edia toana ita laloa lasi. Unai ita hahedinaraia dala hereadaena be taunimanima ibounai dekenai Basileia ena sivarai namona ita harorolaia. Iesu ese ita ia hamaoroa, namona be ita idia inai henia taudia dekenai kara namodia ita hahedinaraia. (Luka 6:27) Ma haida dekenai hebogahisi karana bona kara namodia hahedinaraia totona “taravatu be lasi.” (Gal. 5:22, 23) Herevana dagedage eiava hahetoho ita davaria to iseda kara namodia ese hereva momokani dekenai ma haida do ia veria mai bona Dirava do idia hanamoa.​—1 Pet. 3:16, 17.

Baibel ia gwau: “To kara namo tauna be ena kara dainai davana namona ia abia.” (Aon. 14:14, NWT) Unai hahenamo haida be dahaka? Bema ma haida dekenai kara namodia ita hahedinaraia, idia ese ita dekenai kara namodia do idia hahedinaraia danu. (Aon. 14:22) Bona herevana haida be ita dekenai kara namodia idia hahedinaraia lasi, to iseda kara namodia ese idia do ia durua edia kara do idia haidaua bona ita do idia kara namo henia.​—Roma 12:20.

Kara namodia ita hahedinaraia neganai namo do ita davaria. Tadikaka bona taihu momo dekenai unai bamona ia vara. Nancy ena ekspiriens mani ita laloa. Ia gwau: “Lau matamata neganai, kara dikadia bona hemataurai lasi karadia lau karaia. To Iehova ese ia moalelaia kara namodia lau dibaia bona badinaia neganai, lau moale. Hari ma haida dekenai kara namodia lau hahedinaraia.”

Kara namodia ita hahedinaraia neganai Iehova ia moale. Herevana ma haida be iseda kara namodia idia itaia lasi, to Iehova be unai ia itaia. Ia be iseda kara bona lalohadai namodia ia diba. (Efe. 6:7, 8) Edena dala ai? Baibel ia gwau: “Iehova ese tau namona ia lalonamo henia.” (Aon. 12:2, NWT) Unai dainai namona be kara namodia ita hahedinaraia noho. Iehova be inai bamona ia gwauhamata, “kara namo idia karaia taudia ibounai ese hairai, hemataurai, bona maino do idia davaria.”​—Roma 2:10.