1-2. Ta ia bapatiso murinai dahaka hahenamo idauidau ia abia?

 TA IA bapatiso bona Iehova ena ruma bese lalonai ia vareai neganai ita moale bada. Bapatiso idia abia taudia be salamo torea tauna, Davida ena hereva dekenai idia lalotamona, ia gwau: “Oi [Iehova] abia hidi bona hakaua mai tauna be ia moale, emu dubu helaga ena ariara lalonai ia noho totona.”—Sal. 65:4.

² Iehova ese ena ruma bese lalonai taunimanima ibounai ia hakaua mai lasi. Atikol 9 ai ita herevalaia bamona, Iehova be ia idia ura tura henia taudia ia abia hidi ia kahirakahira idia lao totona. (Iam. 4:8) Iehova dekenai oi gwauhamata bona bapatiso oi abia neganai, ia kahirakahira oi lao, unai be dala hereadaena. Oi bapatiso murinai, ia ese ‘hahenamo be medu bamona do ia bubua diho ela bona emui dabu gaudia ibounai do ia hagugurua momokani.’—Mal. 3:10; Ier. 17:7, 8.

3. Iehova dekenai idia gwauhamata bona idia bapatiso Keristani taudia be dahaka mai anina bada maduna idia abia? (Hadibaia Tauna 5:4, 5)

³ Bapatiso, be Iehova hesiai henia karana ena matamana sibona. Oi bapatiso murinai do oi ura oi gaukara goada emu gwauhamata oi badinaia totona, ena be hahetoho eiava hekwakwanai idauidau do oi davaria. (Hadibaia Tauna 5:4, 5 duahia.) Oi be Iesu ena hahediba tauna dainai, ena hahegani bona haheitalai do oi badinaia. (Mat. 28:19, 20; 1 Pet. 2:21) Inai atikol ese oi do ia durua unai oi karaia totona.

 HAHETOHO BONA HEKWAKWANAI LALONAI IESU MURINAI OI RAKA NOHO

4. Iesu ena hahediba taudia be “hisihisi auna” idia huaia ena anina be dahaka? (Luka 9:23)

⁴ Namo lasi ita laloa, ita bapatiso murinai hekwakwanai do ita davaria lasi. Iesu ese ia hahedinaraia, ena hahediba taudia be “dina ta ta ai” “hisihisi auna” do idia huaia. (Luka 9:23 duahia.) Iesu ia gwau iena murinai idia raka taudia be hanaihanai do idia hisihisi, a? Lasi. Ia hahedinaraia hahenamo idauidau do idia abia, to hekwakwanai do idia davaria. Bona unai hekwakwanai haida be do ia auka momokani.—2 Tim. 3:12.

5. Sibona edia ura idia dadaraia taudia dekenai, Iesu be dahaka hahenamo ia gwauhamatalaia?

⁵ Reana emu ruma bese taudia ese oi idia dagedage henia, eiava moni momo tahua karana bona gau ma haida oi dadaraia Dirava ena Basileia oi atoa guna totona. (Mat. 6:33) Bema unai oi karaia, namona be oi abia dae Iehova totona oi karaia gaudia ia itaia. (Heb. 6:10) Reana emu mauri ai Iesu ena hereva ia guguru, ia gwau: “Egu ladana bona sivarai namona dainai edia ruma, tadikaka, taihu, sinana, tamana, natudia, bona tano idia rakatania taudia be hari inai negai unai gaudia be nega 100 amo do idia abia, ruma, tadikaka, taihu, sinana, natudia bona tano. Bona dagedage danu do idia davaria. Bona do ia mai nega oromana ai mauri hanaihanai do idia abia.” (Mar. 10:29, 30) Momokani, oi abia hahenamo ese oi dadaraia gaudia ia hereaia.—Sal. 37:4.

6. Dahaka dainai bapatiso murinai, “tauanina ena ura” oi dadaraia be namo?

⁶ Bapatiso murinai, “tauanina ena ura” oi dadaraia noho be namo. (1 Ioa. 2:16) Badina oi be Adamu ena goevadae lasi besena amo oi mai. Reana nega haida aposetolo Paulo bamona do oi mamia. Ia gwau: “Egu kudouna ai Dirava ena taravatu lau moalelaia momokani. To lau davaria, egu tauanina lalonai taravatu ma ta ia noho, bona unai taravatu be egu lalona ai ia noho taravatu ia tuari henia, bona inai kara dika ena taravatu ese igui hesiai tauna bamona lau ia hakaua.” (Roma 7:22, 23) Nega haida lalohadai dikadia oi abia dainai do oi lalomanoka. To, Iehova dekenai emu mauri oi gwauhamatalaia karana oi laloa neganai, unai ese oi do ia hagoadaia hahetoho oi dadaraia totona. Oibe, hahetoho oi davaria neganai, emu gwauhamata ese oi do ia durua. Edena dala ai?

7. Edena dala ai emu gwauhamata ese oi do ia durua Iehova oi badinaia noho totona?

⁷ Iehova dekenai emu mauri oi gwauhamatalaia neganai, ia dekenai sibona oi henia. Unai ena anina be Iehova ese ia moalelaia lasi tahua gaudia bona sibona emu ura oi dadaraia. (Mat. 16:24) Unai dainai hahetoho eiava hekwakwanai ta oi davaria neganai, do oi karaia gauna dekenai oi daradara lasi. Iehova oi badinaia totona do oi karaia gauna oi abia hidi vadaeni. Emu lalona oi hadaia Iehova oi hamoalea totona. Unai oi karaia neganai, oi be Iobu oi tohotohoa. Ena be hekwakwanai badadia ia davaria, to mai ura ida ia gwau: “Lau ese egu Dirava do lau badinaia noho ela bona lau mase!”—Iobu 27:5.

8. Edena dala ai emu gwauhamata oi laloa karana ese oi do ia durua hahetoho oi dadaraia totona?

⁸ Guriguri amo Iehova dekenai emu mauri oi gwauhamatalaia karana oi laloa neganai, unai ese oi do ia hagoadaia hahetoho oi dadaraia totona. Hegeregere, ma ta ena adavana do oi hauraia kava, a? Lasi! Iehova dekenai oi gwauhamata vadaeni unai bamona do oi karaia lasi. Bema lalohadai dikadia oi abia lasi, gabeai do oi hekwarahi lasi oi dadaraia  totona. Bona “kara dika taudia edia dala” amo do oi “raka siri.”—Aon. 4:14, 15.

9. Edena dala ai guriguri amo oi karaia gwauhamata ese oi do ia durua Iehova tomadiho henia karana oi atoa guna?

⁹ Bema ta ese ia henia moni gaukara ese emu hebou lao karana ia koua be edena bamona? Do oi daradara lasi, badina abia hidi oi karaia vadaeni, unai bamona moni gaukara do oi abia dae lasi. Unai dainai, unai hahetoho do oi hanaia diba bona Iehova ena ura oi atoa guna. Iesu ese ena Tamana ia hamoalea karana ita laloa dobu neganai, unai ese ita do ia durua mai gari lasi ida bona karaharaga Dirava ese ia moalelaia lasi gaudia do ita dadaraia.—Mat. 4:10; Ioa. 8:29.

10. Edena dala ai Iehova ese oi do ia durua oi bapatiso murinai, Iesu ena murinai oi raka noho totona?

¹⁰ Hekwakwanai bona hahetoho oi davaria neganai, unai ese dala ia kehoa Iesu ena murinai oi raka noho totona. Unai oi karaia neganai, oi abia dae Iehova ese oi do ia durua. Baibel ia gwau: “Dirava be ena hereva ia badinaia, ia ese umui do ia rakatania lasi emui goada ia hereaia hedibagani umui davaria totona, to hedibagani idia vara neganai, ia ese umui do ia durua umui haheauka totona.”—1 Kor. 10:13.

IESU ENA MURINAI OI RAKA NOHO DALANA

11. Iesu murinai oi raka noho totona dala namona ta be dahaka? (Laulau itaia danu.)

¹¹ Iesu be mai kudouna ibounai ida Iehova ia hesiai henia, bona guriguri amo Iehova kahirakahira ia lao. (Luka 6:12) Oi bapatiso bona Iesu murinai oi raka noho totona, dala namona ta be Iehova kahirakahira dekenai oi do ia veria mai gaudia oi karaia. Baibel ia gwau: “Hari ita goada hegeregerena, unai dala tamona ai do ita raka namonamo noho.”  (Fili. 3:16) Nega ta ta ai, edia hesiai gaukara idia habadaia tadikaka taihu edia ekspiriens do oi kamonai. Reana Basileia Evanelia Sikuli eiava pablisa momo lasi gabuna dekenai idia lao. Bema emu noho dalana be hegeregere, unai bamona tahua gauna ta oi atoa diba. Iehova ena taunimanima be mai ura ida dala idauidau ai edia haroro gaukara idia habadaia. (Kara 16:9) To, hari, oi hegeregere lasi unai oi karaia be edena bamona? Namo lasi sibona oi laloa maragi, to gau badana be oi haheauka noho. (Mat. 10:22) Namona be oi laloatao emu goada bona noho dalana hegeregerena, Iehova totona oi karaia gauna ia moalelaia. Bona unai be dala namona, oi bapatiso bena Iesu ena murinai oi raka noho.—Sal. 26:1.

12-13. Dahaka do oi karaia bema emu ura be ia maragi ia lao? (1 Korinto 9:16, 17) (Maua ladana “ Heau Helulu Lalonai Oi Noho” itaia.)

¹² Dahaka do oi karaia, bema oi mamia mai kudouna ibounai ida oi guriguri lasi, eiava hari emu haroro gaukara oi moalelaia lasi? Bema hari emu Baibel duahiduahi oi moalelaia lasi be edena bamona? Bema oi bapatiso murinai unai bamona oi mamia, namo lasi oi laloa Iehova be ena lauma helaga amo oi do ia durua lasi. Ita be goevadae lasi taudia dainai, nega haida iseda hemami be idia idau. Bema oi itaia emu ura ia maragi ia lao, aposetolo Paulo ena haheitalai oi laloa. Ena be ia ura Iesu ia tohotohoa, to ia diba nega haida ena ura do ia goada lasi unai ia karaia totona. (1 Korinto 9:16, 17 duahia.) Ia gwau: “Herevana bema unai be egu ura dainai lau karaia lasi, to lau dekenai idia henia maduna lau do karaia noho.” Anina be, Paulo ese ena lalona ia hadaia ena haroro gaukara ia hagugurua totona ena be nega haida ena ura ia maragi.

 ¹³ Unai hegeregerena, namo lasi oi abia hemami dainai, abia hidi oi karaia. Namona be emu lalona oi hadaia kara maorona oi karaia totona, ena be oi ura lasi unai oi karaia. Bema kara maorona oi karaia noho, unai ese emu hemami do ia hanamoa. Danu oi bapatiso bona Iesu murinai oi raka noho totona, sediual namona oi karaia hegeregere, sibona emu stadi, guriguri, hebou lao karana, bona haroro gaukara oi goadalaia. Emu tadikaka taihu idia itaia mai haheauka ida Iehova oi hesiai henia neganai, unai ese idia do ia hagoadaia.—1 Tes. 5:11.

“UMUI TAHUA NOHO . . . UMUI HAMOMOKANIA NOHO”

14. Hanaihanai dahaka gaudia oi sekea, bona dahaka dainai? (2 Korinto 13:5)

¹⁴ Oi bapatiso murinai namona be nega ibounai sibona oi sekea. (2 Korinto 13:5 duahia.) Nega ta ta ai emu mauri ai oi karaia gaudia oi sekea, bema oi be hanaihanai oi guriguri, emu Baibel duahiduahi oi karaia, hebou oi lao, bona haroro gaukara oi karaia. Dala oi tahua unai gaudia oi moalelaia bona edia namo oi laloa. Hegeregere sibona oi nanadaia: ‘Ma haida dekenai Baibel ena hereva badadia lau gwauraia diba, a? Dala lau tahua egu haroro gaukara lau moalelaia totona, a? Egu guriguri ese ia hahedinaraia mai kudouna ibounai ida Iehova dekenai lau tabekau, a? Hanaihanai Keristani heboudia dekenai lau lao, a? Edena dala ai hebou dekenai egu kamonai bona haere karana lau hanamoa diba?’

15-16. Tadikaka ta ese hahetoho ia dadaraia karana dekenai dahaka oi dibaia?

¹⁵ Danu emu manoka gaudia oi diba be mai anina bada. Tadikaka ta ladana Robert ese unai ia hahedinaraia, ia gwau: “Egu mauri lagani be 20 neganai, pat-taim moni gaukara lau karaia. Dina ta gaukara murinai, egu gaukara turana ese lau ia boiria ena ruma dekenai lau lao totona. Unai hahine ia gwau ita ruaosi sibona do ita noho bona ‘unai nega do ita moalelaia.’ Matamanai, haere maorona lau henia lasi, to gabeai lau gwau lasi bona ena badina lau herevalaia.” Robert ese unai hedibagani ia dadaraia, bona unai be kara namona. To gabeai, ia vara gauna ia laloa lou, bona ia laloparara bema matamanai kara maorona ia karaia. Ia gwau: “Unai hahine ena noinoi lau dadaraia haraga lasi, Iosepa ese Potifara ena hahine ia dadaraia bamona.  (Gen. 39:7-9) Momokani, lau hoa badina unai noinoi lau dadaraia be ia auka. Ia vara gauna ese lau ia durua egu hetura karana Iehova ida lau hagoadaia totona.”

¹⁶ Robert bamona sibona oi sekea neganai, unai ese oi do ia durua. Ena be hahetoho oi dadaraia, to sibona oi nanadaia, ‘Hahetoho lau dadaraia haraga eiava lasi?’ Bema oi itaia emu kara ta oi hanamoa be namo, oi lalomanoka lasi. Namona be oi moale badina emu manoka gauna oi diba. Iehova dekenai unai oi gurigurilaia bona oi do ia hagoadaia gaudia oi karaia.—Sal. 139:23, 24.

17. Edena dala ai Robert ese Iehova ena ladana ia hanamoa?

¹⁷ Robert ena ekspiriens amo gau ma ta ita dibaia. Ia gwau: “Egu gaukara turana ena noinoi lau dadaraia murinai, lau ia hamaoroa, ‘Oi kwalimu vadaeni!’ Bona lau nanadaia ena hereva ena anina be dahaka. Ia gwau ena turana, guna ia be Witnes kekenina ese ia hamaoroa, Witnes natudia ibounai be dala ia kehoa neganai hehuni ai kara kererena idia karaia diba. Unai dainai ena turana ia hamaoroa lau do ia tohoa. Unai lau diba neganai, lau moale bada badina Iehova ena ladana lau hanamoa.”

18. Oi bapatiso murinai, emu lalona oi hadaia dahaka do oi karaia? (Maua ladana “ Do Oi Moalelaia Atikol Haida” itaia.)

¹⁸ Iehova dekenai emu mauri oi gwauhamatalaia bona oi bapatiso neganai, oi hahedinaraia oi ura iena ladana oi hahelagaia, ena be dahaka do ia vara. Bona namona be oi abia dae Iehova be oi davaria hahetoho bona oi dadaraia hedibagani ia diba. Ia oi badinaia totona oi karaia gaudia do ia hanamoa. Namona be oi diba ena lauma helaga amo oi do ia hagoadaia unai oi karaia totona. (Luka 11:11-13) Iehova ena heduru amo do oi hegeregere, Iesu ena murinai oi raka noho totona.