1-2. (a) Paulo be edeseniai ia noho bona dahaka dainai Efeso taudia dekenai revareva ia torea? (b) Dahaka henanadai do ita herevalaia?

 APOSETOLO Paulo be Roma ena ruma ta dekenai idia hadiburaia neganai, ia ura ena tadikaka taihu ia hagoadaia. Idia ia vadivadi henia diba lasi dainai, revareva amo idia ia tore henia. Bona unai revareva ta be lagani 60 eiava 61 C.E. bamona ai, Efeso taudia dekenai ia torea.—Efe. 1:1; 4:1.

² Paulo be kahirakahira lagani 10 gunanai, Efeso dekenai ia noho sisina bona sivarai namona ia harorolaia bona hadibaia. (Kara 19:1, 8-10; 20:20, 21) Ena tadikaka taihu ia lalokau henia bona ia ura idia ia durua Iehova idia abidadama henia noho totona. To dahaka dainai horoa Keristani taudia ia hereva henia neganai, dibura bona diari ia herevalaia? Bona Keristani taudia ibounai be ia torea herevana amo dahaka idia dibaia? Mani inai henanadai edia haere ita herevalaia.

DIBURA AMO IA LAO DIARI

3. Paulo be Efeso taudia dekenai ia torea revareva lalonai, dahaka hereva ia gaukaralaia?

³ Paulo be Efeso Keristani taudia ia tore henia neganai, ia gwau: “Guna umui be dibura lalonai, to hari umui be diari lalonai umui noho.” (Efe. 5:8) Paulo ese inai hereva dibura bona diari ia gaukaralaia, Efeso taudia edia kara idia haidaua dalana ia herevalaia totona. Mani ita itaia dahaka dainai Paulo ia gwau, Efeso taudia be “guna dibura lalonai” idia noho.

4. Edena dala ai Efeso taudia be tomadiho koikoi idia badinaia?

 ⁴ Tomadiho koikoi. Paulo ese ia tore henia Efeso taudia be guna hereva momokani idia do diba lasi neganai, tomadiho koikoi edia hahediba herevadia idia abia dae bona meamea karadia idia karaia. Efeso ena siti ai dirava hahinena Atemis ena dubu ia noho, unai nega ai taunimanima momo idia laloa unai dubu idia haginia dalana be namo herea. Bona taunimanima be unai dubu dekenai idia lao kaivakuku idia tomadiho henia totona. Ima gaukara idia karaia taudia be kaivakuku idia karaia bona hoihoilaia neganai, moni bada idia abia. (Kara 19:23-27, ftn.) Danu, Efeso ena siti ai idia noho taudia momo be meamea karadia idia karaia.—Kara 19:19.

5. Edena dala ai Efeso taudia be matabodaga karadia idia badinaia?

⁵ Matabodaga karadia. Efeso ai taunimanima edia kara be bodaga bona edia kara dainai idia hemarai lasi. Siti ena moale gabudia bona tomadiho edia moale karadia lalonai, matabodaga karadia idia herevalaia. (Efe. 5:3) Bona idia momo be “idia hemarai lasi,” unai hereva ena anina be, “hisihisi idia mamia lasi.” (Efe. 4:17-19) Efeso taudia be Iehova ena taravatu maoro bona kerere idia do diba lasi neganai, kerere idia karaia to edia lalomamina ese idia ia kota henia lasi. Unai dainai Paulo ia gwau, “edia lalona be ia dibura, bona Dirava ena amo ia mai mauri amo idia daudau.”

6. Dahaka dainai Paulo ia gwau, Efeso taudia be ‘hari diari lalonai idia noho’?

⁶ To, Efeso taudia haida be dibura amo idia raka siri. Paulo ena revareva lalonai ia gwau, ‘hari idia be diari lalonai idia noho, badina idia be Lohiabada ena.’ (Efe. 5:8) Idia be Iehova ena Hereva idia badinaia bona unai be hegeregere, diari ese idia ia hakaua. (Sal. 119:105) Idia ese tomadiho koikoi edia hahediba herevadia bona matabodaga karadia idia dadaraia. Danu, ‘Dirava idia tohotohoa’ bona idia gaukara goada Iehova idia tomadiho henia bona hamoalea totona.—Efe. 5:1.

7. Edena dala ai ita be Efeso Keristani taudia momo hegeregerena?

 ⁷ Unai hegeregerena, hereva momokani ita do diba lasi neganai, tomadiho koikoi bona matabodaga mauri dalana ita badinaia. Ita haida be tomadiho koikoi edia dina badadia ita moalelaia, bona matabodaga maurina ita noholaia. To Iehova ena taravatu maoro bona kerere ita dibaia neganai, senisi ita karaia. Bona Iehova ese ia ura henia dalana ita badinaia matamaia. Unai dainai hahenamo momo ita moalelaia. (Isa. 48:17) To, ita dadaraia gaudia amo ita noho daudau totona, ita hekwarahi bona ‘diari natudia bamona ita raka noho.’ Edena dala ai unai ita karaia diba?

DIBURA AMO RAKA SIRI

8. Efeso 5:3-5 hegeregerena, Efeso taudia ese dahaka idia dadaraia be namo?

⁸ Efeso 5:3-5 duahia. Efeso taudia be matabodaga karadia amo idia raka siri totona, Iehova ese ia moalelaia lasi karadia bona kara mirodia herevalaia karana idia dadaraia be namo. Paulo ese Efeso taudia ia hadibaia unai bamona karadia do idia rakatania, bema idia ura “Keriso bona Dirava edia Basileia lalonai” ahuna idia abia.

9. Dahaka dainai matabodaga karana do ia havaraia gaudia ita dadaraia be namo?

⁹ Ita danu namona be ita gaukara goada, ‘anina lasi dibura karadia ita karaia lasi’ totona. (Efe. 5:11) Momokani, bema ta be matabodaga karadia ia itaia, kamonai bona herevalaia, do ia auka lasi kara dika ia karaia totona. (Gen. 3:6; Iam. 1:14, 15) Tano ta ai, tadikaka haida be social media ai grup ta idia karaia bona ta ta dekenai meseij idia siaia. Matamanai, idia momo be Iehova bona hereva momokani idia herevalaia. To metairametaira, Iehova ese ia moalelaia lasi gaudia idia herevalaia. Bona matabodaga karana idia herevalaia momo. Gabeai, unai tadikaka haida idia gwau, kara mirodia idia herevalaia dainai, matabodaga karadia idia karaia.

10. Satani ese edena dala ai ita ia koia? (Efeso 5:6)

¹⁰ Satani bona ena tanobada ese ita idia koia bona idia ura ita abia dae, Iehova ese ia gwauraia matabodaga bona kara mirodia be kerere lasi. (2 Pet. 2:19) Unai kara dekenai ita hoa lasi! Diabolo ese ia gaukaralaia aonega dalana ta be taunimanima dekenai daradara ia havaraia, unai amo maoro bona kerere edia idau do idia diba lasi. (Isa. 5:20; 2 Kor. 4:4) Unai dainai, muvi, TV program bona websait ai, Iehova ena taravatu idia utua karadia momo idia hahedinaraia! Satani ia ura ita ia koia bona do ita laloa tanobada ena kara mirodia bona matabodaga maurina be kerere lasi, ita moalelaia diba, bona dika ta do ia havaraia lasi.—Efeso 5:6 duahia.

11. Edena dala ai Angela ena ekspiriens amo ita diba Efeso 5:7 ena sisiba ita badinaia be namo? (Laulau itaia danu.)

¹¹ Satani ia ura Iehova ena taravatu idia badinaia lasi taudia ita bamoa. Unai dainai, Paulo ese Efeso taudia ia hamaoroa, “namo lasi” Dirava ese ia inai henia karadia idia karaia taudia idia tura henia. (Efe. 5:7) Namona be ita laloatao ita be idaunegai idia noho Efeso taudia bamona lasi. Hari ita bamoa turadia sibona lasi, to social media ai tura henia taudia dekenai ita naria namonamo. Asia ai ia noho taihu Angela, a ia gwau social media ese dika bada ia havaraia diba. Ia gwau: “Metairametaira emu laloa dalana ia haidaua diba. Daudau lasi murinai, Baibel ena hakaua herevadia idia matauraia lasi taudia lau bamoa  bona lau laloa unai be kerere lasi. Gabeai, lau laloa Iehova ese ia moalelaia lasi mauri dalana lau badinaia be kerere lasi.” To elda taudia haida be mai lalokau ida Angela idia durua gau haida ia hamaoromaoroa totona. Ia gwau: “Hari lau be lauma gaudia lau laloa bada, to social media ai idia noho gaudia lasi.”

12. Dahaka ese ita do ia durua Iehova ena taravatu maoro bona kerere ita badinaia noho totona?

¹² Tanobada taudia idia laloa matabodaga karadia be kerere lasi, to namona be ita gaukara goada unai lalohadai ita dadaraia. Ita diba unai be maoro lasi. (Efe. 4:19, 20) Danu sibona ita nanadaia: ‘Lau gaukara goada Iehova ena kara maoromaoro taravatudia idia badinaia lasi gaukara turadia, sikuli turadia, eiava ma haida lau dadaraia totona, a? Mai gari lasi ida Iehova ena taravatu lau badinaia ena be ma haida ese lau do idia kirikirilaia, a?’ Bona 2 Timoteo 2:20-22 hegeregerena, Keristani kongrigeisen lalonai iseda turadia ita abia hidi namonamo. Namona be ita laloatao, haida be ita do idia durua lasi mai abidadama ida Iehova ita hesiai henia noho totona.

“DIARI NATUDIA BAMONA,” UMUI RAKA

13. “Diari natudia bamona do [ita] raka noho” ena anina be dahaka? (Efeso 5:7-9)

¹³ Paulo ese Efeso Keristani taudia ia hagodaia dibura do idia dadaraia sibona lasi, to ‘diari natudia bamona do idia raka noho.’ (Efeso 5:7-9 duahia.) Unai ena anina be dahaka? Anina be, hanaihanai Keristani taudia momokanidia bamona ita kara. Unai ita karaia dalana ta be, Baibel bona iseda Baibel pablikeisen ita duahia bona stadilaia namonamo. Danu Iesu Keriso, “tanobada ena diari,” ena haheitalai bona hadibaia dalana ita stadilaia namonamo be mai anina bada.—Ioa. 8:12; Aon. 6:23.

14. Edena dala ai lauma helaga ese ita ia durua diba?

¹⁴ Danu, Dirava ena lauma helaga ena heduru ita abia be namo, unai amo “diari natudia bamona” do ita raka. Dahaka dainai? Badina inai matabodaga tanobadana lalonai ita goeva noho be mai ena hekwarahi. (1 Tes. 4:3-5, 7, 8) Lauma helaga ese ita do ia durua  Dirava ena lalohadai idia badinaia lasi taudia edia lalohadai ita dadaraia. Danu ita do ia durua “namo gaudia idauidau bona kara maoromaoro” ita hahedinaraia totona.—Efe. 5:9.

15. Edena dala ai lauma helaga ita abia diba? (Efeso 5:19, 20)

¹⁵ Lauma helaga ita abia dalana ta be ita guriguri. Iesu ia gwau, Iehova ese “lauma helaga be idia noinoi taudia dekenai do ia henia.” (Luka 11:13) Bona Keristani heboudia dekenai Iehova ita hanamoa hebou neganai, lauma helaga ita abia. (Efeso 5:19, 20 duahia.) Iehova ena lauma helaga ese ita do ia durua Ia moalelaia dalana ita badinaia totona.

16. Dahaka ese ita do idia durua abia hidi namodia ita karaia totona? (Efeso 5:10, 17)

¹⁶ Abia hidi badana ta ita ura karaia neganai, namona be “Iehova ena ura [ita] lalopararalaia” bena unai ita badinaia. (Efeso 5:10, 17 duahia.) Bema ita davaria Baibel ena hakaua herevadia be iseda hekwakwanai do ia hamaoromaoroa, ita be Dirava ena lalohadai ita tahua noho. Bena unai hakaua herevadia ita badinaia neganai, abia hidi namodia do ita karaia.

17. Edena dala ai iseda nega ita gaukaralaia namonamo diba? (Efeso 5:15, 16) (Laulau itaia danu.)

¹⁷ Paulo ese Efeso Keristani taudia ia sisiba henia edia nega do idia gaukaralaia namonamo. (Efeso 5:15, 16 duahia.) “Dika Tauna,” Satani ia ura inai tanobada gaudia dekenai ita bisi bada, unai amo ita be nega lasi Dirava ita hesiai henia totona. (1 Ioa. 5:19) Keristani tauna ta ese ena moni, edukeisen bona moni gaukara do ia laloa dainai, ia be nega lasi Iehova ia hesiai henia totona. Bema unai bamona ia karaia, ia hahedinaraia ia be Iehova idia hesiai henia lasi taudia edia lalohadai ia badinaia noho. Momokani, unai bamona gaudia ita karaia be kerere lasi, to namo lasi iseda mauri ai unai gaudia ita atoa guna. “Diari natudia bamona” ita raka totona,  ‘iseda nega do ita gaukaralaia namonamo.’

18. Donald be ena nega ia gaukaralaia namonamo totona, dahaka ia karaia?

¹⁸ Dala idauidau oi tahua Iehova oi hesiai henia totona. South Africa ai ia noho tadikaka Donald, be unai bamona ia karaia. Ia gwau: “Egu noho dalana lau laloa namonamo bona Iehova lau guriguri henia, egu haroro gaukara lau habadaia totona. Iehova lau noia do lau abia moni gaukara ese lau do ia koua lasi egu haroro gaukara lau habadaia totona. Bona Iehova ena heduru amo moni gaukara namona ta lau davaria. Unai dainai, lau bona egu adavana be ful-taim hesiai gaukara ai hamatamaia.”

19. Edena dala ai “diari natudia bamona” ita raka’ noho diba?

¹⁹ Paulo ena revareva ese Efeso taudia ia durua Iehova idia badinaia noho totona. Bona unai sisiba herevana ese ita ia durua danu. Ita dibaia bamona, ita do ia durua iseda moale karadia bona ita bamoa taudia ita abia hidi namonamo totona. Danu ita ia durua hereva momokani ena diari ai ita raka noho totona, hanaihanai Baibel ita stadilaia be namo. Bona lauma helaga ena namo ia herevalaia, unai ese ita do ia durua kara namodia ita hahedinaraia totona. Paulo ese ia torea revareva ita badinaia neganai, unai ese ita do ia durua Iehova ena lalohadai hegeregerena, abia hidi maorodia do ita karaia. Bema unai gaudia ita karaia, inai tanobada ena dibura do ita dadaraia bona diari lalonai do ita noho!