1. Iehova ena abidadama hesiai taudia be dahaka lalohadai idia abia?

 ITA MOALE badina Iehova ese ena taunimanima be orea ta bamona ia lalonamo henia! Baibel ia gwau: “Iehova be ena taunimanima dekenai ia moale.” (Sal. 149:4) To haida idia daradara, bema ‘Iehova be idia dekenai ia moale eiava lasi?’ Baibel ai, Iehova ena abidadama hesiai taudia momo be unai bamona lalohadai idia abia danu.—1 Sam. 1:6-10; Iobu 29:2, 4; Sal. 51:11.

2. Iehova be daika ia lalonamo henia?

² Baibel ese ia hahedinaraia, goevadae lasi taudia be Iehova ese ia lalonamo henia diba. Edena dala ai? Namona be Iesu Keriso ita abidadama henia bona bapatiso ita abia. (Ioa. 3:16) Unai amo ma haida vairanai ita hahedinaraia, iseda kara dika amo ita helalo-kerehai bona Dirava dekenai ita gwauhamata iena ura do ita karaia. (Kara 2:38; 3:19) Unai gaudia ita karaia bona Iehova ena turana ai ita lao neganai, ia moale bada. Ita gaukara goada iseda gwauhamata ita badinaia neganai, Iehova ena lalonamo ita abia bona iena turana namodia ai ita lao.—Sal. 25:14.

3. Edena henanadai toi do ita herevalaia?

³ Dahaka dainai, haida idia mamia Dirava be idia ia lalonamo henia lasi? Edena dala ai ita diba Iehova be ita ia lalonamo henia? Bona edena dala ai Keristani tauna ta ia abia dae diba Dirava ena lalonamo ia abia?

 DAHAKA DAINAI HAIDA IDIA LALOA IEHOVA BE IDIA IA LALONAMO HENIA LASI

4-5. Ena be ita mamia ita be anina lasi, to dahaka ita abia dae diba?

⁴ Ita haida be ita maragi negana amo sibona ita laloa maragi. (Sal. 88:15) Tadikaka ta ladana, Adrián ia gwau: “Lau mamia lau be anina lasi. Lau maragi neganai lau laloatao, do lau guriguri bona lau gwau, egu famili be paradaiso lalonai do idia noho. Ena be lau laloa lau hegeregere lasi unuseniai do lau noho.” Tony, be Witnes lasi ruma besena lalonai ia tubu daekau, ia gwau: “Egu tama sina be lau idia hamaoroa lasi lau idia lalokau henia eiava lau dekenai idia moale. Unai dainai lau mamia gau ta lau karaia diba lasi idia lau hamoalea totona.”

⁵ Bema nega haida ita mamia ita be anina lasi, namona be ita laloatao Iehova ese ita ia veria mai ia dekenai. (Ioa. 6:44) Ita sibona dekenai ita itaia lasi kara namodia ia itaia bona iseda kudouna ia diba. (1 Sam. 16:7; 2 Siv. 6:30) Unai dainai, ita abia dae Iehova be ita ia laloa bada.—1 Ioa. 3:19, 20.

6. Aposetolo Paulo be ena kara dika gunadia dainai, dahaka ia laloa?

⁶ Ita momo be hereva momokani ita do dibaia lasi neganai, ita karaia gaudia dainai ita hemarai. (1 Pet. 4:3) Iehova ena abidadama hesiai taudia haida be reana edia manoka gaudia idia haheaukalaia noho. Oi be edena bamona? Emu kudouna ese oi ia kota henia, a? Bema oibe, namona be oi diba Iehova ena abidadama hesiai taudia haida be unai bamona idia mamia danu. Hegeregere, aposetolo Paulo be ena kara gunadia ia laloa neganai ia lalohisihisi. (Roma 7:24) Oibe, Paulo be ena kara dikadia amo ia helalo-kerehai bona ia bapatiso. To sibona ia gwauraia, ‘aposetolo taudia ibounai huanai ia be maragi herea’ bona kara dika taudia amo ia be “dika momokani.”—1 Kor. 15:9; 1 Tim. 1:15.

7. Iseda kara dika gunadia ita laloa neganai, dahaka ita laloatao be namo?

⁷ Iseda guba Tamana ia gwauhamata bema ita helalo-kerehai iseda dika do ia gwauatao. (Sal. 86:5) Unai dainai bema iseda kara dika amo ita helalo-kerehai momokani, ita abia dae diba iseda dika do ia gwauatao.—Kol. 2:13.

8-9. Edena dala ai ita karaia gaudia dekenai Iehova ia moale lasi lalohadaina ita dadaraia?

⁸ Ita ibounai ita ura gau ibounai ita karaia Iehova ita hesiai henia totona. To, haida idia mamia idia karaia gaudia be hegeregere lasi Iehova ena lalonamo idia abia totona. Taihu ta ladana Amanda, ia gwau: “Hanaihanai lau laloa Iehova lau hesiai henia totona gau momo lau karaia be namo. Unai dainai nega momo lau gaukara goada ena be egu goada be hegeregere lasi. Lau ura karaia gaudia lau ‘hagugurua lasi’ neganai, lau laloa Iehova be lau dekenai ia moale lasi, sibona dekenai lau moale lasi bamona.”

⁹ Edena dala ai ita karaia gaudia dekenai Iehova ia moale lasi lalohadaina ita dadaraia? Namona be ita laloatao, Iehova be ita ia doria lasi gau momo ita karaia totona. Mai ura ida Ia totona ita karaia gaudia ibounai ia laloa bada. Danu, Baibel ai mai kudouna ibounai ida Iehova idia hesiai henia taudia edia haheitalai ita laloa. Hegeregere Paulo ita laloa. Lagani momo lalonai ia gaukara goada, gabu daudau ia lao bona kongrigeisen momo ia hamatamaia. To, ena noho dalana ia idau bona haroro gaukara ia karaia momo lasi neganai, Dirava be ia dekenai moale lasi, a? Lasi. Ia karaia diba gauna ia karaia bona Iehova ese ia hanamoa. (Kara 28:30, 31) Unai hegeregerena, Iehova totona ita karaia gaudia be nega  haida do idia idau. To ia dekenai mai anina bada gauna be, ia ita hesiai henia ena badina. Mani Iehova ese ia hahedinaraia ita ia lalonamo henia daladia haida ita herevalaia.

EDENA DALA AI IEHOVA ESE IA HAHEDINARAIA ITA IA LALONAMO HENIA?

10. Edena dala ai ita “kamonai” Iehova be ita ia lalonamo henia? (Ioane 16:27)

¹⁰ Ita dekenai Baibel ia henia. Iehova be ena taunimanima dekenai lalokau ia hahedinaraia bona idia ia lalonamo henia. Siri haida ese idia hahedinaraia nega rua Iehova ese Iesu ia hamaoroa, ia be Ena lalokau Natuna bona ia lalonamo henia. (Mat. 3:17; 17:5) Oi ura kamonai Iehova be oi ia lalonamo henia, a? Iehova be guba amo ita ia hereva henia lasi, to Baibel amo. Evanelia bukadia ai Iesu ena hereva ita duahia neganai, unai be hegeregere Iehova ena gadona ita “kamonai,” bona ia gwau ita ia lalonamo henia. (Ioane 16:27 duahia.) Iesu ese ena Tamana ena kara ia tohotohoa namonamo. Unai dainai, Iesu ese goevadae lasi abidadama hesiai taudia ia lalonamo henia ena sivarai ita duahia neganai, ita laloa diba Iehova be ita dekenai unai hereva ia gwauraia.—Ioa. 15:9, 15.

11. Dahaka dainai hisihisi ita davaria neganai, ita gwau lasi Dirava be ita ia lalonamo henia lasi? (Iamesi 1:12)

¹¹ Iseda ura gaudia ia henia. Iehova ia ura bada ita ia durua, bona iseda dabu gaudia ia henia. Nega haida Iehova be ita davaria hisihisi do ia koua lasi, kara maoromaoro tauna Iobu dekenai ia karaia bamona. (Iobu 1:8-11) Hahetoho ita davaria neganai, unai ese ia hahedinaraia lasi Dirava be ita ia lalonamo henia lasi. To, unai ese dala ia kehoa Dirava dekenai iseda lalokau ita hahedinaraia bona ia ita abidadama henia. (Iamesi 1:12 duahia.) Danu hahetoho lalonai, iena lalokau do ita mamia bona ita do ia durua ita haheauka totona.

12. Dmitrii ena ekspiriens amo dahaka ita dibaia?

¹² Asia ai tadikaka ta ladana, Dmitrii dekenai ia vara gauna mani ita laloa. Ena gaukara ia haboioa bona hua momo lalonai gaukara ta ia davaria lasi. Unai dainai abia hidi ia karaia ena haroro gaukara do ia habadaia, bona Iehova dekenai ia tabekau. Hua momo idia hanaia, bona moni gaukara ta ia do davaria lasi. Bena gorere badana ta ia abia bona bedi dekenai ia hekure sibona. Ia laloa ia be adavana bona tama namona lasi, bona ia laloa reana Iehova ena lalonamo ia abia lasi. Bena adorahi  ta ai ena natuna kekeni be pepa ta dekenai, Isaia 30:15 ena hereva ia torea: “Bema umui manau bona lau umui abidadama henia, do umui goada.” Bena ena tamana ena bedi badinai ia abia lao bona ia gwau, “Dadi, oi lalohisihisi neganai, inai siri oi laloatao.” Dmitrii ia laloparara Iehova ena heduru dainai ena famili be mai edia aniani, dabua bona noho gabuna. Ia gwau, “do lau karaia gauna be, lau manau bona Dirava lau abidadama henia.” Bema oi be unai bamona hahetoho oi davaria, namona be oi diba Iehova be oi ia laloa bada bona oi do ia durua oi haheauka totona.

13. Iehova be daidia ia gaukaralaia ita dekenai iena lalonamo ia hahedinaraia totona, bona edena dala ai?

¹³ Tadikaka taihu amo. Iehova ese tadikaka taihu amo ia hahedinaraia ita ia lalonamo henia. Hegeregere, ma haida ia gaukaralaia nega maorona ai ita idia hagoadaia totona. Asia ai taihu ta ese hekwakwanai badana ia davaria neganai, unai ia mamia. Ena moni gaukara ia haboioa bona gorere badana ta ia abia. Bena ena adavana be kara dika badana ta ia karaia bona ena elda maduna ia haboioa. Ia gwau: “Lau daradara dahaka dainai unai gaudia idia vara. Lau laloa reana kerere ta lau karaia dainai Iehova ena lalonamo lau abia lasi.” Iseda taihu be Iehova ia noia ia do ia hagoadaia totona. Edena dala ai Iehova ese unai ia karaia? Taihu ia gwau: “Egu kongrigeisen ena elda taudia be lau idia hereva henia bona lau idia hamaoroa Iehova be lau ia lalokau henia.” Gabeai, Iehova ena heduru totona ia noinoi lou. Ia gwau: “Unai dina tamona ai egu kongrigeisen tadikaka taihu amo revareva ta lau abia. Edia hagoadaia herevadia lau duahia lalonai, lau mamia Iehova be lau ia kamonai henia.” Oibe, nega momo Iehova ena lalonamo be ma haida edia hagoadaia herevadia amo ita abia.—Sal. 10:17.

14. Edena dala ma ta ai Iehova be ita ia lalonamo henia?

 ¹⁴ Danu Iehova ese ita ia lalonamo henia dalana ta be, nega maorona ai tadikaka taihu ia gaukaralaia ita idia sisiba henia totona. Hegeregere, aposetolo edia negai, Iehova ese aposetolo Paulo ia gaukaralaia iena tadikaka taihu dekenai revareva 14 ia torea. Unai revareva lalonai mai lalokau ida idia dekenai sisiba aukana ia henia. Dahaka dainai Iehova ese Paulo ia gaukaralaia, unai bamona sisiba herevadia ia torea? Iehova be tamana namona, bona “ia lalokau henia” natudia ia matahakani henia. (Aon. 3:11, 12) Unai dainai bema ta be Baibel ena hereva amo ita ia sisiba henia, unai ese ia hahedinaraia Dirava be ita ia lalonamo henia. (Heb. 12:6) Edena dala ma haida ai ita diba Iehova be ita ia lalonamo henia?

IEHOVA ENA LALONAMO ITA ABIA DALADIA MA HAIDA

15. Iehova be daika dekenai ena lauma helaga ia henia, bona dahaka dainai unai ese ita ia hagoadaia?

¹⁵ Iehova be ia lalonamo henia taudia dekenai ena lauma helaga ia henia. (Mat. 12:18) Sibona ita nanadaia diba, ‘Lauma helaga ese ia havaraia kara namodia lau hahedinaraia, a?’ Iehova oi dibaia murinai ma haida dekenai haheauka karana oi hahedinaraia, a? Oibe, lauma helaga ena huahua oi hahedinaraia neganai, unai ese ia hahedinaraia Iehova ena lalonamo oi abia!—Maua ladana “ Lauma Helaga Ena Huahua be . . . ” itaia.

16. Iehova be daika ia gaukaralaia sivarai namona ia harorolaia, bona unai dainai emu hemami be edena bamona? (1 Tesalonika 2:4)

¹⁶ Iehova ese ia lalonamo henia taudia dekenai sivarai namona harorolaia gaukarana ia henia. (1 Tesalonika 2:4 duahia.) Taihu ta ladana Jocelyn, be ma haida dekenai sivarai namona ia harorolaia dainai ia davaria namo ita laloa. Dina ta, Jocelyn be mahuta amo ia noga neganai ia lalohekwarahi bada. Ia gwau: “Egu goada ia ore bona lau mamia lau be anina lasi. To, lau be painia gaukara lau karaia, bona unai be egu haroro negana. Unai dainai lau guriguri bona lau lao haroro.” Unai daba ai Jocelyn ese Mary ia hedavari henia, ia be kamonai hahinena bona Baibel stadi ia abia dae. Hua haida murinai Mary ia gwau, Dirava ena heduru totona ia guriguri lalonai, Jocelyn be iena iduara dekenai ia pidipidi. Unai ekspiriens amo Jocelyn be gau ta ia dibaia, ia gwau, “Lau mamia Iehova be lau ia hamaoroa, ‘Oi lau lalonamo henia.’” Momokani,  taunimanima momo be ita harorolaia sivaraina do idia abia dae lasi. To namona be ita diba, ita gaukara goada sivarai namona ita harorolaia neganai, unai ese Iehova ia hamoalea.

17. Vicky ena hereva amo, mauri davana dekenai dahaka oi dibaia? (Salamo 5:12)

¹⁷ Iehova ese mauri davana be ia lalonamo henia taudia dekenai ia hahedinaraia. (1 Tim. 2:5, 6) To bema ita laloa Iehova be ita ia lalonamo henia lasi, ena be mauri davana ita abidadama henia bona ita bapatiso vadaeni, be edena bamona? Laloatao, hanaihanai iseda hemami dekenai ita tabekau lasi, to Iehova ita abidadama henia. Mauri davana idia abidadama henia taudia ia gwauraia kara maoromaoro taudia bona ia gwauhamata idia do ia hanamoa. (Salamo 5:12 duahia; Roma 3:26) Taihu ta ladana Vicky be mauri davana ia laloa dobu bona unai ese ia durua. Ia gwau: “Iehova be nega daudau lalonai lau dekenai ia haheauka. . . . To, unai be hegeregere ia dekenai lau gwau: ‘Lau be emu lalokau lau do mamia lasi. Emu Natuna ena boubou gauna be egu dika ibounai ia kokia diba lasi.’” Mauri davana ia laloa dobu dainai, Iehova ena lalokau ia mamia. Ita danu, unai mauri davana ita laloa dobu neganai Iehova ena lalokau do ita diba bona do ita mamia ita ia lalonamo henia.

18. Hanaihanai iseda guba Tamana ita lalokau henia neganai, dahaka do ita abia dae?

¹⁸ Ena be ita gaukara goada inai atikol ai ita dibaia gaudia ita badinaia totona, to nega haida do ita lalomanoka bona ita daradara bema Iehova be ita ia lalonamo henia. Bema unai ia vara, laloatao, Iehova be “Ia idia lalokau henia noho taudia” ia lalonamo henia. (Iam. 1:12) Unai dainai hanaihanai Iehova kahirakahira oi noho bona oi ia lalonamo henia daladia oi diba be namo. Bona laloatao, Iehova “be ita ta ta amo ia noho daudau lasi.”—Kara 17:27.