1. Iehova ena orea lalonai ita noho dainai, dahaka hahenamo haida ita moalelaia?

 INAI dina gabedia ai, Iehova ena orea lalonai ita noho be hahenamo badana. Hari tanobada ai mauri be ia auka ia lao, to Iehova ese tadikaka taihu ia henia ita idia durua totona. (Sal. 133:1) Iehova ese ita ia durua iseda ruma bese lalonai moale ia noho totona. (Efe. 5:33–6:1) Bona ia ese aonega ia henia iseda lalohekwarahi ita haheaukalaia bona lalomaino ita abia totona.

2. Dahaka ita karaia be namo bona dahaka dainai?

² Namona be ita gaukara goada mai abidadama ida Iehova ita hesiai henia noho totona. Dahaka dainai? Badina reana ma haida edia kara o hereva dainai ita lalohisihisi diba. Danu, bema kerere ita karaia loulou ita lalomanoka diba. Namona be mai haheauka ida Iehova ita hesiai henia, (1) ena be tadikaka o taihu ta ese ita ia hahisia, (2) iseda adavana ena kara dainai ita lalohisihisi, eiava (3) sibona iseda kerere dainai ita lalomanoka. Inai atikol ai unai gaudia toi do ita herevalaia. Danu Baibel ese ia herevalaia abidadama taudia edia sivarai do ita dibaia.

OI HAHEAUKA NOHO ENA BE TADIKAKA O TAIHU TA ESE OI IA HAHISIA

3. Iehova ena taunimanima be dahaka hekwakwanai idia davaria?

³ Hekwakwanai. Iseda tadikaka o taihu ta ena kara ese ita ia habadua diba. Haida be ita idia hahemaraia eiava idia laloa namonamo lasi dainai, ita idia kara namo henia lasi. Elda taudia danu be nega haida idia kerere. Unai bamona hekwakwanai dainai, reana ta be do ia daradara bema inai be Dirava ena  orea. Unai dainai tadikaka taihu ida “lalotamona” ai Iehova do ia hesiai henia lasi, bona reana ia idia hahisia taudia do ia bamoa lasi bona hebou lao henia karana do ia hadokoa. (Sef. 3:9) Unai be aonega karana, a? Mani Baibel ai unai bamona hekwakwanai ia davaria tauna ta ena haheitalai ita herevalaia.

4. Aposetolo Paulo be dahaka hekwakwanai haida ia davaria?

⁴ Baibel ena haheitalai. Aposetolo Paulo ia diba ena Keristani tadikaka taihu be goevadae lasi taudia. Hegeregere, kongrigeisen ia bamoa bona daudau lasi idia haida ese ia idia laloa kerere, idia gwau ia be hahediba tauna ta lasi. (Kara 9:26) Gabeai, taunimanima haida ese ena ladana hadikaia herevadia idia gwauraia dainai, ma haida ese ia idia trast henia lasi. (2 Kor. 10:10) Paulo ia itaia Petero ese abia hidi kererena ia karaia bona reana unai ese ma haida ia hahekwakwanaia. (Gal. 2:11, 12) Bona Paulo be ena turana namona ta, Mareko ese ia habadua. (Kara 15:37, 38) Reana Paulo be abia hidi ia karaia diba ia idia habadua taudia do ia bamoa lasi. To, ena tadikaka taihu dekenai lalohadai maorona ia abia bona mai abidadama ida Iehova ia hesiai henia. Dahaka ese Paulo ia durua ia haheauka totona?

5. Dahaka ese Paulo ia durua ena tadikaka taihu dekenai ia hesiku haraga lasi totona? (Kolose 3:13, 14) (Laulau itaia danu.)

⁵ Paulo ese ena tadikaka taihu ia lalokau henia. Ia ese ma haida ia lalokau henia dainai, edia kerere ia laloa lasi, to edia kara namodia sibona ia laloa. Bona lalokau ese Paulo ia durua sibona ese ia torea herevadia, Kolose 3:13, 14 ai ia badinaia. (Duahia.) Mani Paulo ese Mareko ia kara henia dalana ita laloa. Ena be Paulo ena misinari laolao ginigunana ai Mareko ese ia rakatania, to Paulo ia badu noho lasi. Gabeai, Paulo be Kolose kongrigeisen dekenai revareva ia siaia neganai, Mareko ia hanamoa badina ia ese Paulo ia “durua bona hagoadaia bada.” (Kol. 4:10, 11) Paulo be Roma ena dibura ruma ai ia noho neganai, ia noinoi Mareko do ia lao bona ia do ia durua. (2 Tim. 4:11) Momokani, Paulo be ena tadikakadia dekenai ia hesiku haraga lasi. Ia amo dahaka ita dibaia?

6-7. Dahaka ese ita do ia durua iseda tadikaka taihu ita lalokau henia noho, ena be nega haida ita idia hahisia? (1 Ioane 4:7)

⁶ Ita dibaia gauna. Iehova ia ura iseda tadikaka taihu dekenai lalokau do ita hahedinaraia noho. (1 Ioane 4:7 duahia.) Ta ese ita ia hahisia neganai, namo lasi ita laloa ia ura unai ia karaia, to namona be ita diba ia danu ia  hekwarahi Baibel ena hakaua herevadia ia badinaia totona. (Aon. 12:18) Dirava ese ena abidadama hesiai taudia ia lalokau henia, ena be nega haida kerere idia karaia. Ia be iseda turana namona bona ita do ia badu henia hanaihanai lasi. (Sal. 103:9) Iseda Guba Tamana ita tohotohoa bona ma haida edia dika ita gwauatao be mai anina bada!—Efe. 4:32–5:1.

⁷ Laloatao, dokona ia kahirakahira lalonai, namona be iseda tadikaka taihu ida ita noho. Ita diba dagedage karana be do ia bada momokani. Bona reana iseda abidadama dainai dibura ruma ai ita do idia atoa. Bema unai ia vara, do ita ura iseda tadikaka taihu ese ita idia durua. (Aon. 17:17) Spain ai elda ta ladana Josep a dekenai, ia vara gauna mani ita laloa. Ia bona tadikaka ma haida be edia gini siri karana dainai, dibura ruma ai idia atodia. Ia gwau: “Dibura ruma dekenai ai noho hebou dainai, nega haida emai kara amo ta ta ai hahisia. Unai dainai, namona be ta ta emai kara ai haheaukalaia bona dika ai gwauatao. Unai ese ai ia durua mai lalotamona ida ai noho. Bona Witnes lasi taudia amo, ta ta ai gimaia diba. Nega ta egu imana lau haberoa bona idia kumia dainai, gaukara haida lau karaia diba lasi. To tadikaka ese egu dabua idia huria bona dala ma haida ai lau idia naria. Edia lalokau karana lau mamia momokani.” Oibe, badina namodia dainai, ta ta iseda hekwakwanai ita hamaoromaoroa be namo!

EMU ADAVANA ESE OI IA HABADUA NEGANAI, OI HAHEAUKA

8. Headava taudia be dahaka hekwakwanai idia davaria?

⁸ Hekwakwanai. Headava taudia ibounai be mai edia hekwakwanai. Baibel ese ia hahedinaraia goevagoeva, headava taudia ibounai be edia “tauanina ai hisihisi do idia abia.” (1 Kor. 7:28) Dahaka dainai? Badina headava tau bona hahine be goevadae lasi bona edia kara be idauidau, danu idia ura henia gaudia bona idia ura lasi gaudia be idau. Bona reana idia tubu daekau dalana bona edia kastom be idau. Danu idia headava murinai, ta ta dekenai idia dibaia lasi karadia do idia hedinarai. Unai bamona gaudia ese hekwakwanai ia havaraia diba. Unai dainai idia ta ta edia kara dainai hekwakwanai ia vara bona idia hamaoromaoroa diba, to ta ta idia bleim. Bona do idia laloa idia parara o divos be namo. To, unai ese edia hekwakwanai do ia hamaoromaoroa, a? b Mani Baibel ai ena headava ia haheaukalaia hahinena ta ena haheitalai ita herevalaia.

9. Abigaila be dahaka hekwakwanai ia davaria?

⁹ Baibel ena haheitalai. Abigaila be Nabala ia adavaia bona Baibel ia gwau, ia be kara auka tauna bona ena kara be dika. (1 Sam. 25:3) Reana Abigaila ia hekwarahi unai bamona tauna ida ia noho totona. Dala ia kehoa Abigaila be ena headava ia hadokoa diba, a? Oibe, badina ena tau ese Davida, Israela ena king ai do ia lao tauna, bona ena tatau ia gwau dika henia neganai, Davida ia ura Nabala ia hamasea. (1 Sam. 25:9-13) Reana Abigaila ia heau boio diba, unai amo Davida ese Nabala do ia hamasea. To Abigaila be unai bamona ia karaia lasi, ia ese Davida ia noia Nabala do ia hamasea lasi. (1 Sam. 25:23-27) Dahaka dainai unai bamona ia karaia?

10. Dahaka ese Abigaila ia hagoadaia ena headava lalonai ia haheauka totona?

 ¹⁰ Abigaila be Iehova ia lalokau henia bona headava ena taravatu ia matauraia. Dirava ese headava ginigunana ia havaraia neganai, Adamu bona Heva dekenai ia gwauraia herevana be Abigaila ia diba. (Gen. 2:24) Abigaila ia diba Iehova dekenai headava be helaga. Ia ura Dirava ia hamoalea, bona unai ese ia hagoadaia kara ta do ia karaia ena ruma bese bona adavana ia hamauria totona. Kara haraga Abigaila ese Davida ia koua, unai amo Nabala ia alaia lasi. Danu, mai ura ida sori herevana ia gwauraia ena be kerere ta ia karaia lasi. Momokani, Iehova ese unai gari lasi bona sibona ena namo ia laloa lasi hahinena ia lalokau henia. Headava tau bona hahine be Abigaila amo dahaka idia dibaia?

11. (a) Iehova ia ura headava taudia be dahaka do idia karaia? (Efeso 5:33) (b) Carmen ese ena headava ia gimaia dalana dekenai dahaka oi dibaia? (Laulau itaia danu.)

¹¹ Ita dibaia gauna. Iehova ia ura headava tau bona hahine idia noho hebou, ena be ta ena kara be auka. Bema headava taudia idia gaukara goada edia hekwakwanai idia hamaoromaoroa bona ta ta dekenai sibona ena namo laloa lasi lalokauna bona hemataurai idia hahedinaraia, Dirava do ia moale. (Efeso 5:33 duahia.) Mani Carmen ena haheitalai ita laloa. Ia headava bona lagani 6 murinai, Iehova ena Witnes taudia ida Baibel ia stadilaia bona gabeai ia bapatiso. Carmen ia gwau: “Egu tau be lau dekenai ia moale lasi. Nega momo ia ida lau noho lasi, to hebou dekenai lau lao bona egu lalona lau hadaia Iehova lau hesiai henia dainai ia badu. Lau do ia hereva auka henia bona ia gwau, lau do ia rakatania.” To Carmen be ena headava lalonai haheauka karana ia hahedinaraia. Lagani 50 lalonai, ia gaukara goada ena adavana ia lalokau henia bona matauraia totona. Ma ia gwau: “Lagani idia hanaia lalonai, egu adavana ena hemami lau lalopararalaia bona mai gado namo ida lau hereva henia. Lau diba Iehova dekenai headava be helaga dainai, lau gaukara goada egu headava lau gimaia totona. Egu adavana lau rakatania lasi badina Iehova lau lalokau henia.” c Bema emu headava lalonai hekwakwanai oi davaria, namona be oi abia dae Iehova ese oi do ia durua oi haheauka totona.

SIBONA ISEDA KERERE DAINAI ITA LALOMANOKA NEGANAI, ITA HAHEAUKA

12. Dahaka ia vara bema kara dika badana ta ita karaia?

¹² Hekwakwanai. Kara dika badana ta ita karaia neganai, do ita lalomanoka. Baibel ia  gwau, iseda kara dika dainai, ita ‘lalometau bona daradoko’ diba. (Sal. 34:18) Tadikaka ta ladana Albert be lagani momo lalonai, ia gaukara goada hesiai tauna ai ia lao totona. To kara dika badana ta ia karaia bona ia laloparara Iehova ia habadua. Ia gwau: “Lau karaia karana dainai egu lalomamina ia dika momokani, bona lau lalohisihisi. Lau tai bona Iehova dekenai lau guriguri. Unai negai lau laloatao, lau mamia Dirava ese egu guriguri do ia kamonai lou lasi. Dahaka dainai? Badina ena lalona lau hahisia.” Bema kara dika ta ita karaia reana do ita lalohisihisi, badina do ita laloa Iehova ese ita ia dadaraia bona iseda hesiai gaukara be anina lasi. (Sal. 38:4) Bema oi be unai bamona oi mamia, mani Baibel ai abidadama tauna ta ita laloa ena be kara dika badana ta ia karaia, to mai haheauka ida Iehova ia hesiai henia.

13. Aposetolo Petero be kara dika badana ia do karaia lasi neganai, edena kerere ma haida ia karaia?

¹³ Baibel ena haheitalai. Iesu ena hanuaboi ginigabena ai, aposetolo Petero be kerere momo ia karaia, unai dainai gabeai kara dika badana ia karaia. Matamanai, Petero ia laloa ena abidadama be goada bona ia laloa ena be aposetolo taudia ma haida ese Iesu do idia rakatania, to ia be unai do ia karaia lasi. (Mar. 14:27-29) Gabeai, Getesemane umana ai, Petero be gima noho karana ia hahedinaraia lasi. (Mar. 14:32, 37-41) Bena hutuma be mai edia tuari kaia ida idia mai bona Iesu idia ura dogoatao neganai, Petero ia heau. (Mar. 14:50) Dokonai, nega toi ia gwau Iesu ia diba lasi, bona unai koikoi herevana totona, ia gwauhamata danu. (Mar. 14:66-71) Petero ia laloparara kara dika badana ia karaia neganai, ena hemami be edena bamona? Ia lalohisihisi bada bona ia tai dikadika. (Mar. 14:72) Hora haida murinai, iena turana, Iesu idia hamasea neganai, mani Petero ena hisihisi oi laloa. Reana ia mamia ia be anina lasi!

14. Dahaka ese Petero ia durua mai haheauka ida Iehova ia hesiai henia totona? ( ena laulau itaia.)

¹⁴ Badina haida dainai Petero be mai haheauka ida Iehova ia hesiai henia. Sibona ia noho lasi, to hahediba taudia ma haida dekenai ia lao bona ia idia hagoadaia. (Luka 24:33) Danu, Iesu ia toreisi lou murinai, Petero dekenai ia hedinarai badina ia ura do ia hagoadaia. (Luka 24:34; 1 Kor. 15:5) Gabeai, Iesu be Petero ena kerere dainai ia gwau henia lasi, to ia hamaoroa maduna badadia do ia abia. (Ioa. 21:15-17) Petero ia diba kara dika badana ia karaia, to ia gaukara goada kara maorona ia karaia totona. Dahaka dainai? Badina  ia diba ena Biaguna, Iesu, ese ia lalokau henia. Bona hanaihanai Petero be ena tadikakadia ese idia hagoadaia. Petero ena haheitalai amo dahaka ita dibaia?

15. Iehova ia ura dahaka ita abia dae? (Salamo 86:5; Roma 8:38, 39) (Laulau itaia danu.)

¹⁵ Ita dibaia gauna. Iehova ia ura ita abia dae ita ia lalokau henia bona iseda dika do ia gwauatao. (Salamo 86:5; Roma 8:38, 39 duahia.) Kara dika ta ita karaia neganai, ita hemarai. Bona vaia unai hemami do ita abia. To namo lasi ita laloa Iehova be ita ia lalokau henia lasi bona iseda dika do ia gwauatao lasi. Namona be heduru ita abia haraga. Albert, matamanai ita herevalaia tadikaka, ia gwau: “Sibona egu goada dekenai lau tabekau dainai, hahetoho lau davaria neganai, kara dika lau karaia.” Bona ia laloparara elda taudia ia hereva henia be namo. Ia gwau: “Unai lau karaia neganai, Iehova ena lalokau lau mamia. Bona lau mamia elda taudia danu be lau idia lalokau henia. Idia ese lau idia durua dainai lau abia dae Iehova ese lau ia rakatania lasi.” Ita danu, namona be ita abia dae Iehova ese ita ia lalokau henia bona iseda kara dika amo ita helalo-kerehai neganai, iseda dika do ia gwauatao. (1 Ioa. 1:8, 9) Unai ese ita ia durua kerere ta ita karaia neganai, ita hesiku lasi to Iehova ita hesiai henia noho.

16. Dahaka dainai emu lalona oi hadaia mai haheauka ida Iehova oi hesiai henia totona?

¹⁶ Inai dina gabedia lalonai, Iehova be ia ita hesiai henia karana ia laloa bada. Iena heduru amo ita haheauka diba, ena be ita lalomanoka. Iseda tadikaka taihu ita lalokau henia noho bona edia dika ita gwauatao, ena be ita idia hahisia. Namona be headava lalonai hekwakwanai ita hamaoromaoroa, unai amo ita hahedinaraia Dirava ita lalokau henia bona headava ita matauraia. Bona kara dika badana ta ita karaia neganai, namona be Iehova ena heduru ita tahua, iena lalokau bona dika gwauatao karana ita abia dae, bona ia ita hesiai henia noho. Ita abia dae Iehova ese ita do ia hanamoa noho, bema “ita hesiku lasi kara namodia ita karaia noho totona.”—Gal. 6:9.