1-2. Ta ia bapatiso totona, dahaka ia karaia guna be namo?

 IDIA hanaia lagani faiv lalonai, taunimanima milioni momo idia bapatiso bona Iehova ena Witnes taudia ai idia lao. Idia momo be Keristani ginigunadia edia nega ai ia noho hahediba tauna Timoteo bamona, idia “beibi negana amo,” hereva momokani idia diba. (2 Tim. 3:14, 15) Haida be idia buruka neganai Iehova idia dibaia. Lagani haida gunanai, hahine burukana ta be Baibel ia stadilaia bona ena mauri lagani be 97 neganai, ia bapatiso!

² Bema oi be Baibel stiuden ta eiava Witnes ruma besena amo oi tubu daekau, oi ura bapatiso oi abia, a? Unai be tahua gauna namona! Iehova dekenai emu mauri do oi gwauhamatalaia murinai, do oi bapatiso. Inai atikol ai Dirava dekenai iseda mauri ita gwauhamatalaia karana ena anina do ita herevalaia. Danu oi do ia durua oi gari lasi, emu mauri oi gwauhamatalaia bona oi bapatiso totona.

ISEDA MAURI ITA GWAUHAMATALAIA ENA ANINA BE DAHAKA?

3. Baibel ai Iehova dekenai edia mauri idia gwauhamatalaia taudia haida edia haheitalai mani oi gwauraia.

³ Baibel ai, ta ese ena mauri ia gwauhamatalaia neganai, unai ese ia hahedinaraia ia be Iehova ena gaukara helagana do ia karaia. Hegeregere, Israela taudia be Iehova ena gwauhamata besena. To idia haida be dala hereadaena ai Iehova dekenai edia mauri idia gwauhamatalaia. Hegeregere, Arona ena kwara  kumia dabua ena vaira kahanai, ia diaridiari golo medolo latanai inai hereva ia noho, “gwauhamata ena saini helagana.” Unai golo medolo ese ia hahedinaraia Arona be Iehova ese ia abia hidi dala hereadaena ai ia do ia hesiai henia, unai be Israela taudia edia hahelaga tauna badana ai do ia lao. (Lev. 8:9) Nasiri taudia danu be dala hereadaena ai, Iehova dekenai edia mauri idia gwauhamatalaia. Inai hereva “Nasiri tauna” be Heberu herevana, nazirʹ amo idia abia, ena anina be “Hapararaia Tauna” eiava “Gwauhamatalaia Tauna.” Nasiri taudia ese Mose ena Taravatu lalonai idia totona idia atoa taravatu idia badinaia be namo.—Num. 6:2-8.

4. (a) Iehova dekenai emu mauri oi gwauhamatalaia neganai, dahaka gaudia oi atoa guna? (b) ‘Sibona emu ura oi dadaraia’ ena anina be dahaka? (Laulau itaia danu.)

⁴ Iehova dekenai emu mauri oi gwauhamatalaia neganai, abia hidi oi karaia Iesu Keriso ena hahediba tauna ai oi lao bona emu mauri ai Dirava ena ura do oi atoa guna. Dahaka do oi karaia danu? Iesu ia gwau: “Bema ta ia ura egu murinai ia raka, sibona ena ura ia dadaraia be namo.” (Mat. 16:24) Grik gado ai inai hereva “sibona ena ura ia dadaraia be namo” ena anina ma ta be “sibona totona oi noho lasi.” Iehova dekenai emu mauri oi gwauhamatalaia dainai, namona be ia ura lasi gaudia oi dadaraia. (2 Kor. 5:14, 15) Unai ena anina be, “tauanina ena kara dikadia” hegeregere, matabodaga karadia do oi dadaraia. (Gal. 5:19-21; 1 Kor. 6:18) Unai taravatu oi badinaia dainai emu mauri do ia auka, a? Lasi. Badina Iehova oi lalokau henia bona oi diba ena taravatu oi badinaia karana be emu namo totona. (Sal. 119:97; Isa. 48:17, 18) Tadikaka ta ladana, Nicholas ia gwau: “Iehova ena taravatu be inai bamona oi laloa diba, ia be dibura ruma ena magu bamona oi ia koua oi ura henia gauna oi karaia totona, eiava ia be laiona ena magu bamona dika amo oi ia gimaia.”

5. (a) Edena dala ai Iehova dekenai emu mauri oi gwauhamatalaia diba? (b) Gwauhamata bona bapatiso edia idau be dahaka? (Laulau itaia danu.)

 ⁵ Edena dala ai Iehova dekenai emu mauri oi gwauhamatalaia diba? Guriguri amo Iehova dekenai oi gwauhamata ia sibona do oi tomadiho henia bona emu mauri ai iena ura do oi atoa guna. Momokani, oi be Iehova dekenai oi gwauhamata ia do oi lalokau henia “mai emu kudouna ibounai, mai emu mauri ibounai, mai emu lalona ibounai, bona mai emu goada ibounai ida.” (Mar. 12:30) Iehova dekenai emu mauri oi gwauhamatalaia karana be hehuni ai oi karaia, unai be oi bona Iehova huanai. To, oi bapatiso neganai taunimanima vairanai oi hahedinaraia, oi be emu mauri oi gwauhamatalaia. Iehova dekenai oi karaia gwauhamata be abia hidi badana. Bona namona be emu gwauhamata oi badinaia, badina Iehova ia ura unai bamona oi karaia.—Had. 5:4, 5.

DAHAKA DAINAI IEHOVA DEKENAI EMU MAURI OI GWAUHAMATALAIA?

6. Dahaka ese ta ia hagoadaia, Iehova dekenai ena mauri ia gwauhamatalaia totona?

⁶ Iehova dekenai emu mauri oi gwauhamatalaia ena badina badana be ia oi lalokau henia. Emu lalokau be hemami ta sibona lasi. To Iehova ena “diba maoromaoro” bona ena ura oi dibaia dainai, emu lalokau ia dekenai oi hagoadaia. (Kol. 1:9) Baibel oi stadilaia dainai, oi abia dae (1) Iehova be ia noho momokani, (2) Baibel be iena hereva bona (3) ena orea ia gaukaralaia ena ura ia hagugurua totona.

7. Iehova dekenai iseda mauri ita gwauhamatalaia totona, dahaka do ita karaia guna?

⁷ Iehova dekenai edia mauri idia gwauhamatalaia taudia be Baibel ena hereva badadia idia diba be namo bona unai idia badinaia. Bona idia gaukara goada idia dibaia gaudia be ma haida dekenai idia hadibaia. (Mat. 28: 19, 20) Danu, Iehova dekenai edia lalokau ia goada bona idia ura ia sibona idia tomadiho henia. Oi be unai bamona oi karaia, a? Iehova oi lalokau henia dainai, emu mauri oi gwauhamatalaia bona bapatiso oi abia. To unai oi karaia lasi emu stadi tauna eiava emu tama sina oi hamoalea totona, eiava emu turadia be unai idia karaia dainai oi ura idia oi tohotohoa.

8. Edena dala ai tanikiu karana ese oi ia durua, Iehova dekenai emu mauri oi gwauhamatalaia? (Salamo 116:12-14)

⁸ Iehova ese oi totona ia karaia gaudia ibounai oi laloa neganai, do oi ura emu tanikiu karana oi hahedinaraia bona ia dekenai emu mauri oi gwauhamatalaia. (Salamo 116:12-14 duahia) Baibel ese Iehova ia gwauraia, “harihari gaudia namodia ibounai bona harihari gaudia goevadia ibounai” ia Henia Tauna. (Iam. 1:17) Ia henia harihari gauna hereadaena be iena Natuna, Iesu ena boubou gauna. Mani oi laloa, mauri davana ese dala ia kehoa Iehova oi tura henia totona. Bona ia ese oi dekenai mauri hanaihanai ena helaro ia henia. (1 Ioa. 4:9, 10, 19) Iehova ese oi totona ia hahedinaraia lalokauna bona ia henia hahenamo idauidau dainai, emu tanikiu karana oi hahedinaraia totona emu mauri oi gwauhamatalaia. (Deu. 16:17; 2 Kor. 5:15) Mauri Moalelaia Hanaihanai! bukana ena leseni 46 point 4 ai, unai tanikiu karana ia herevalaia bona 3 minit vidio ladana, Emu Harihari Gaudia be Dirava Dekenai Oi Henia ia hahedinaraia.

GWAUHAMATA BONA BAPATISO TOTONA OI HEGEREGERE, A?

9. Dahaka dainai emu mauri oi gwauhamatalaia totona, ma haida ida sibona oi hahegeregerea lasi?

⁹ Reana do oi mamia oi hegeregere lasi emu mauri oi gwauhamatalaia bona bapatiso totona. Bona reana emu mauri ai senisi haida do oi karaia, unai amo Iehova ena taravatu oi badinaia diba, eiava oi ura emu abidadama oi hagoadaia guna. (Kol. 2:6, 7) Momokani, Baibel stiuden taudia ibounai edia laloparara dalana be idauidau, bona ena be matamata taudia haida be uru tamona, to haida sibona be edia mauri idia gwauhamatalaia bona bapatiso idia abia. Namona be ma haida ida sibona oi hahegeregerea lasi, to do oi karaia senisi oi laloa.—Gal. 6:4, 5.

10. Dahaka do oi karaia bema oi laloparara oi hegeregere lasi emu mauri oi gwauhamatalaia bona oi bapatiso totona? (Maua ladana “ Hereva Momokani ai Idia Tubu Daekau Taudia” itaia danu.)

¹⁰ Ena be oi laloparara oi hegeregere lasi Iehova dekenai emu mauri oi gwauhamatalaia totona, to namona be unai tahua gauna oi atoa. Iehova ena heduru totona oi guriguri, unai amo oi do ia durua emu mauri ai senisi haida oi karaia totona. (Fili. 2:13; 3:16) Namona be oi abia dae emu guriguri do ia kamonai bona oi do ia durua.—1 Ioa. 5:14.

DAHAKA DAINAI HAIDA IDIA GARI?

11. Edena dala ai Iehova ese ita do ia durua ia ita badinaia noho totona?

¹¹ Haida be idia hegeregere edia mauri idia gwauhamatalaia bona bapatiso idia abia totona, to unai idia karaia lasi. Reana idia gari, namo lasi idia bapatiso murinai, kara dika badana ta idia karaia bona do idia atoa siri. Bema oi be unai badina dainai oi gari, namona be oi abia dae Iehova ese oi do ia durua, “ena dala hegeregerena ai do [oi] raka bona gau ibounai dekenai ia do [oi] hamoalea.” (Kol. 1:10) Danu, goada do ia henia kara maorona oi karaia totona. Iehova ese unai do ia karaia, momo ia durua hegeregerena. (1 Kor. 10:13) Unai badina dainai, Keristani kongrigeisen ai taunimanima haida sibona be orea amo idia atoa siri. Oibe, Iehova ese ena taunimanima ia durua ia idia badinaia noho totona.

12. Edena dala ai kara dika ita dadaraia diba?

 ¹² Goevadae lasi taudia ibounai be hahetoho idia davaria, kara dika idia karaia totona. (Iam. 1:14) To hahetoho oi davaria neganai, namona be abia hidi oi karaia kara dika do oi karaia eiava lasi. Momokani, oi badinaia mauri dalana be oi sibona ese oi biagua. Haida idia gwau, iseda hemami bona ita karaia gaudia ita biagua diba lasi, to unai be koikoi, iseda ura dikadia ita biagua diba. Unai dainai ena be hahetoho oi davaria, to abia hidi oi karaia diba kara maorona oi karaia totona. Oi do ia durua gaudia haida be, hanaihanai oi guriguri, Dirava ena Hereva oi stadilaia, Keristani heboudia dekenai oi lao bona ma haida dekenai oi abia dae gaudia oi herevalaia. Hanaihanai unai gaudia oi karaia neganai, Iehova dekenai emu abidadama do oi hagoadaia noho. Bona laloatao, Iehova ese oi do ia durua unai oi karaia totona.—Gal. 5:16.

13. Iosepa be dahaka haheitalai namona ia hahedinaraia?

¹³ Bema hahetoho oi do davaria lasi lalonai abia hidi oi karaia, do ia auka lasi emu gwauhamata oi badinaia totona. Baibel ese ia hahedinaraia haida be unai bamona idia karaia, ena be idia goevadae lasi. Hegeregere, Potifara ena adavana ese Iosepa ia tohoa loulou. To, Iosepa ia diba, dahaka do ia karaia. Baibel ese ita ia hadibaia, unai kara ia “dadaraia” bona ia gwau: “Edena bamona inai dika badana do lau karaia bona Dirava vairanai lau kara dika?” (Gen. 39:8-10) Momokani, unai hahine ese ia do tohoa lasi neganai, Iosepa ia diba vadaeni, dahaka do ia karaia. Unai ese ia durua hahetoho ia davaria neganai, kara maorona ia karaia.

14. Edena dala ai kara dika ita dadaraia diba?

¹⁴ Edena dala ai Iosepa ena haheitalai oi tohotohoa diba? Hari, hahetoho oi do davaria lasi neganai, do oi karaia abia hidi oi laloa. Danu, namona be Iehova ese ia inai henia gaudia do oi dadaraia haraga dalana oi diba, bona unai gaudia oi laloa lasi. (Sal. 97:10; 119:165) Unai amo hahetoho oi davaria neganai, kara dika do oi karaia lasi. Badina oi diba vadaeni dahaka do oi karaia.

15. Edena dala ai ta ese “mai momokani ida” Iehova ia tahua diba? (Heberu 11:6)

¹⁵ Reana oi diba hereva momokani oi davaria bona oi ura mai kudouna ibounai ida Iehova oi hesiai henia, to oi mamia oi do hegeregere lasi emu mauri oi gwauhamatalaia bona oi bapatiso totona. King Davida ena haheitalai oi tohotohoa diba. Guriguri amo Iehova oi noia: “Dirava e, egu kudouna oi tahua namonamo  bona lau laloa gaudia oi dibaia. Egu lalona oi sekea, bona egu lalohekwarahi gaudia oi dibaia. Lau oi sekea namonamo, namo lasi egu lalona ai dika gauna ta ia noho, bona mauri hanaihanai dalana dekenai lau oi hakaua.” (Sal. 139:23, 24) Iehova ese “mai momokani ida ia idia tahua” taudia ia hanamoa. Bona unai oi karaia totona, namona be oi gaukara goada emu mauri oi gwauhamatalaia bona bapatiso oi abia.—Heberu 11:6 duahia.

IEHOVA KAHIRAKAHIRA OI LAO

16-17. Edena dala ai hereva momokani lalonai idia tubu daekau natudia be Iehova ese ia kahirakahira ia veria mai? (Ioane 6:44)

¹⁶ Iesu ia gwau iena hahediba taudia be Iehova ese ia veria mai. (Ioane 6:44 duahia.) Unai be hoa gauna, bona oi dekenai ia vara dalana mani oi laloa. Iehova be taunimanima ta ta dekenai gau namona ta ia itaia bona ia dekenai idia ia veria mai. Bona Ia ese idia ta ta be iena “dava bada kohuna bamona” ia laloa. (Deu. 7:6.) Bona oi danu be unai bamona ia laloa.

¹⁷ Reana oi danu be hereva momokani lalonai oi tubu daekau mero o kekeni matamata ta. Bona do oi mamia emu tama sina dainai Iehova oi hesiai henia. To Baibel ia gwau: “Dirava kahirakahira umui lao, bona ia be umui kahirakahira do ia mai.” (Iam. 4:8; 1 Siv. 28:9) Dala oi tahua Iehova kahirakahira oi lao neganai, ia be oi kahirakahira do ia mai. Iehova ia laloa lasi oi be orea ena kahana ta sibona. Ia ese taunimanima ta ta ia veria mai, hereva momokani lalonai idia tubu daekau taudia danu. Ta be dala ia tahua Iehova kahirakahira ia lao neganai, Iamesi 4:8 hegeregerena, Iehova be ia kahirakahira do ia mai.—2 Tesalonika 2:13 hahegeregerea.

18. Atikol 10 ai dahaka do ita herevalaia? (Salamo 40:8)

¹⁸ Iehova dekenai emu mauri oi gwauhamatalaia bona oi bapatiso neganai, oi be Iesu ena kara oi tohotohoa. Ia be mai ura ida ena Tamana ese ia noia gaudia ibounai ia karaia. (Salamo 40:8 duahia; Heb. 10:7) Atikol 10 ai, bapatiso murinai mai abidadama ida Iehova ita hesiai henia noho dalana do ita herevalaia.