“HELARO BE. . . ISEDA ABIDADAMA IA HAGOADAIA GAUNA BADANA.” Buka ta ia gwau: “Bema vaira nega ena helaro ita laloa, do ita laloa lasi ita be sibona ita noho o ta be ita do ia durua lasi, bona gau ta dekenai do ita gari lasi.”

Baibel be ita abidadama henia gaudia momo ia herevalaia sibona lasi, to ita ia hadibaia ita naria namonamo bona gwauhamata koikoi idia gwauraia taudia do ita dadaraia. Salamo 146:3 ia gwau, “King taudia do umui abidadama henia lasi, badina taunimanima ese umui do idia hamauria diba lasi.” Ena be taunimanima idia gwau ita do idia hamauria to idia ita abidadama henia lasi, to aonega karana be ita ia Havaraia Diravana ita abidadama henia, badina ia be mai ena siahu ena gwauhamta iboundia ia hagugura totona. Ia be ita dekenai dahaka ia gwauhamtalaidia? Haida be inai.

KARA DIKA DO IA ORE; KARA MAOROMAORO TAUDIA BE HANAIHANAI MAINO AI DO IDIA NOHO: Salamo 37:10, 11 ia gwau: “Nega daudau lasi lalonai kara dika taudia do idia ore . . . To manau taudia ese noho gabuna tano do idia abia, do idia helai namonamo, mai moale bona mai maino danu.” Bona siri 29 ia gwau: “Kara maoromaoro taudia . . . do idia noho ela bona hanaihanai” inai tanobada dekenai.

TUARI DO IA HADOKOA: “Tuari be Dirava ese ia hadokoa noho, tanobada kahana ibounai dekenai. Ia ese peva ia makohia noho, bona io be ia ese ia hakwaidua noho. Kariota be ia ese lahi dekenai ia gabua noho.”​—⁠Salamo 46:8, 9.

GORERE, HISIHISI, O MASE DO IDIA ORE: “Dirava ena palai rumana be taunimanima ida ia noho. . . Ia ese mata ranu ibounai be edia matana amo do ia dahua oho, bona mase be do ia ore, bona lalohisihisi, taitai, bona hisihisi danu be do idia ore.”​—⁠Apokalupo 21:3, 4.

TAUNIMANIMA IBOUNAI TOTONA ANIANI BE MOMO HEREA: “Namona be koni momo herea, be tano dekenai do ia vara namonamo. Namona be ororo gabudia danu dekenai, uiti bona aniani avadia do idia tubu namonamo.”​—⁠Salamo 72:16.

KERISO ENA BASILEIA​—⁠TANOBADA GAVAMANI TAMONA ENA LOHIA MAORONA: “Badana ese siahu bona mataurai bona dagi bada be [Iesu Keriso] dekenai ia henia, bese ibounai bona iduhu ibounai bona gado ibounai taudia ese iena hesiai gaukara do idia karaia. Iena siahu be do ia noho hanaihanai, bona iena basileia be do ia doko diba lasi.”​—⁠Daniela 7:14.

Edena bamona ita diba unai gwauhamta be do idia guguru? Tanobada ai ia noho neganai, Iesu be taunimanima vairanai ia hamomokani ia be Dirava ese ia abia hidi King. Badina ia ese gorere ia haorea, ogogami taudia ia ubua, bona mase taudia ia hatorea isi lou. Bona gau badana ma ta be iena hahediba herevadia, hegeregere ena hakaua herevadia ese taunimanima ia durua mai maino bona lalotamona ida idia noho totona. Ma danu, Iesu be vaira negana ai bona tanobada oromana dokona ai do idia vara gaudia ia perovetalaia.

Iesu ia peroveta nega dokona ai taunimanima be maino ai do idia noho lasi bona do idia noho namonamo lasi, to “inai nega oromana ena dokona ena toana” ia herevalaia gaudia be, tanobada ibounai dekenai tuari, hitolo bada, daihanai goreredia bona tano mareremarere badadia do idia vara. (Mataio 24:3, 7: Luka 21:10, 11; Apokalupo 6:3-8) Iesu ma ia gwau: “kara dika be do ia bada dainai, taunimanima momo edia lalokau be do ia keru.”​—⁠Mataio 24:12.

Baibel torea tauna ta ia gwau unai kara be dala idauidau ai do idia hedinarai. Timoteo iharuana 3:1-5 ese ia hahedinaraia “dina gabediai” taunimanima momo be sibodia do idia laloa bada, moni, bona moale karadia do idia ura henia bada. Do idia hekokoroku bona dagedage. Ruma bese lalonai lalokau be lasi bona natudia be tama sina do idia kamonai henia lasi. Tomadiho ena kara koikoidia be gabu ibounai dekenai do ia bada ia lao.

Unai dika badadia ese ia hahedinaraia inai tanobada ena dokona be ia kahirakahira. Unai ese ia hamomokania danu Basileia ena lohia negana be ia kahirakahira. Momokani, Iesu be dina gabediai ena peroveta herevana lalonai inai hagoadaia herevana ia gwauraia: “Basileia ena sivarai namona be tanobada ibounai dekenai do idia harorolaia, unai amo bese ibounai ese idia kamonaia diba, unai murinai dokona be do ia ginidae.”​—⁠Mataio 24:14.

Unai sivarai namona be hadibaia herevana ta idia kara dika taudia dekenai, bona helaro ia henia kara maoromaoro taudia dekenai, unai ese idia ia hagoadaia badina unai gwauhamata ena hahenamo be do idia vara momokani. Oi ura unai hahenamodia dekenai diba ma haida oi abia? Bema oibe, mani inai magasin ena murinai kahana oi itaia.