Sikuli ena trip ta dekenai memero haida ese stiuden merona ta idia reipia. Idia ibounai be Canada ena ladana bada sikuli ta dekenai idia lao. Unai hekwakwanai murinai, Leonard Stern be Ottawa Citizen niuspepa dekenai ia gwau: “Ena be matamata taudia edia diba be bada, edukeisen namona idia abia, bona mai edia moni momo to kara dikadia idia karaia.”

Stern ma ia gwau: “Tama sina idia laloa edia natudia dekenai kara maorona bona kererena dibaia karana idia hadibaia be mai anina bada. To danu, toana be tama sina momo idia laloa gau badana be edia natudia be sikuli ai idia kwalimu bona moni gaukara namona idia abia, unai amo moni momo idia haboua diba.”

Momokani, sikuli ita lao be gau badana. To tanobada ena edukeisen namona ese ura kereredia bona lalohadai dikadia dadaraia karana do ia hadibaia lasi. Vadaeni, edeseniai edukeisen hereadaena ita abia diba unai amo ita ia durua taunimanima namodia ai ita lao totona?

Baibel be hevarivari (mirror) ta bamona. Baibel ita duahia neganai, iseda diba bona goada ena hetoana bona iseda manoka gaudia ita dibaia. (Iamesi 1:23-25) To, unai sibona lasi, Baibel be gau momo ia karaia diba. Ita ia durua iseda mauri ita haidaua, unai amo maino bona lalotamona karadia ita hahedinaraia diba. Unai kara haida be, kara namo, hebogahisi, boga-auka, sibona biagua karana, bona lalokau. To, lalokau be “taunimanima ia hatamonaia gauna hereadaena.” (Kolose 3:14) Dahaka dainai lalokau be mai anina bada? Baibel ese unai kara ia herevalaia dalana mani ita itaia.

• “Lalokau be ia boga-auka, bona ia hebogahisi. Lalokau be ia mama lasi, ia heagi lasi, bona ia hekokoroku lasi. Lalokau be dala kererena ai ia kara lasi, ia be sibona ena namo ia tahua lasi, bona ia badu haraga lasi. Bona ia be ta ena kerere ia laloatao noho lasi. Lalokau be kara maoromaoro lasi karana [kara dika] ia moalelaia lasi, to hereva momokani ia moalelaia. Lalokau be gau ibounai dekenai ia gini goada, . . . bona gau ibounai ia haheaukalaia. Lalokau be ia ore diba lasi.”​—⁠1 Korinto 13:4-8.

• “Mai ena lalokau tauna ese ena dekena tauna ia kara dika henia lasi.”​​—⁠Roma 13:10.

• “Gau badana be do umui lalokau heheni momokani, badina lalokau ese kara dika momo ia koua.”​—⁠1 Petero 4:8.

Oi idia lalokau henia taudia huanai oi noho neganai, emu hemami be edena bamona? Oi gari lasi, a? Lalomaino oi abia, a? Oibe, oi diba emu namo idia laloa bada bona oi do idia hahisia lasi.

Danu, lalokau dainai taunimanima be ma haida edia namo idia laloa bona edia mauri idia haidaua. Hegeregere, tau ta ladana George be ena tubuna ia vara neganai, ia ura bada ena tubuna mero ia rosia bona naria. To George be kuku ania momo tauna dainai, ena ravana tauna ia ura lasi beibi badinai kuku do ia ania. George be dahaka ia karaia? Herevana ia be lagani 50 lalonai kuku ia ania, to ena tubuna mero ia laloa dainai kuku ania karana ia rakatania. Oibe, unai be lalokau karana!

 Lalokau be ita dibaia karana ta. Tama sina be idia gaukara goada edia natudia dekenai lalokau karana idia hadibaia totona. Edia natudia idia ubua bona gimaia bona idia lalohisihisi eiava idia gorere neganai, idia durudia. Tama sina namodia be edia natudia ida idia herevahereva bona idia hadibadia namonamo. Danu, edia natudia idia matahakani henia, bona idia dekenai maoro bona kerere ena hakaua herevadia idia hadibaia. Tama sina namodia be haheitalai namona idia hahedinaraia, unai amo edia natudia ese edia haheitalai idia tohotohoa.

To madi, tama sina haida be edia maduna idia huaia lasi. Unai ese ia hahedinaraia edia natudia be taunimanima dikadia ai do idia lao, a? Lasi! Badina taunimanima badadia momo, ena be idia haida be dagedage ruma besedia lalonai idia tubu daekau, to edia mauri idia haidaua bona taunimanima namodia ai idia lao. Atikol ma ta ai do ita itaia, idia haida be edia mauri idia haidaua ena be haida idia laloa unai idia karaia diba lasi!