Oi abia dae iseda maino, noho namo bona vaira nega maurina idia hadikaia hekwakwanai idauidau be taunimanima ese idia hamaoromaoroa diba, a? Iseda hekwakwanai idauidau ita hamaoromaoroa totona, namona be idia vara ena badina ita tahua.

Mani inai haheitalai oi laloa. Tau ta ladana Tom be ia gorere bona gabeai ia mase. Dahaka dainai ia mase? Tom ia do mase lasi neganai ia idia abia lao hospital ena doketa ia gwau, “Ia gorere matamaia neganai, ta be iena gorere ena badina ia tahua lasi.” Toana be guna Tom idia sekea doketa taudia be ia dekenai muramura sibona idia henia ia namo totona.

Taunimanima be unai dala hegeregerena idia ura tanobada ena hekwakwanai idia hamaoromaoroa, a? Hegeregere, taravatu utua karadia idia hamaragia totona, gavamani be taravatu momo idia atoa, gabu momo ai sekiuriti kamera idia atoa, bona pulisi edia gaukara idia hagoadaia. Herevana unai gaudia be mai edia heduru, to hekwakwanai idia vara ena badina idia koua diba lasi. Momokani, taunimanima edia kara ese edia lalohadai, hemami, bona edia ura gauna ia hahedinaraia.

South America tanona ta ai ia noho ogogami tauna Daniel, ia gwau: “Guna mauri namona ai noholaia. Ai be henaohenao taudia dekenai ai gari lasi. To hari emai taoni eiava hanua ai maino be lasi. Ogogami maurina ia bada noho dainai unai ese taunimanima edia kara ia hahedinaraia​​—⁠idia mataganigani bona ma haida idia matauraia lasi eiava edia kohu idia laloa bada lasi.”

Middle East ai ia noho tauna ta ladana Elias, be tuari amo ia heau bona gabeai Baibel ia stadilaia. Elias ia gwau: “Egu siti ai memero matamatadia momo be edia famili bona politikol tomadiho oreadia ese idia hamaorodia tuari lalonai idia vareai, bena do idia gwauraidia kwalimu taudia. Idia edia inai taudia danu be edia matamata taudia dekenai unai hereva tamona idia gwauraia! Unai gaudia ibounai amo lau itaia taunimanima idia lohiaia taudia abidadama henia karana ese dika bada ia havaraia.”

Baibel ia gwau:

• “Taunimanima . . . be maragi negana dekena amo, edia laloa be dika.”​​—⁠Genese 8:21.

• “Taunimanima edia kudouna be mai koikoi bada, bona mai dika rohoroho danu. Daika ese kudouna ena dala ia diba?”​​—⁠Ieremia 17:9.

• “Kudouna amo idia mai gaudia be lalohadai dikadia, ala-ala, . . . matabodaga karadia, henaohenao, hereva koikoi.”​​—Mataio 15:19.

Taunimanima ese ma haida hahisia karadia be idia koua diba lasi. Momokani, unai kara idauidau be idia bada idia lao noho, atikol ginigunana ese ia herevalaia hekwakwanai bamona. (2 Timoteo 3:1-5) Bona unai ia vara noho, herevana hari taunimanima be mai edia diba bada bona dala momo idia noho ma haida idia hereva henia totona! To, dahaka dainai tanobada be maino bona gabu namona ai ita halaoa diba lasi? Taunimanima be idia hegeregere lasi unai idia karaia totona, a? Unai do ia vara diba, a?

Ena be dala haida ai taunimanima edia kara dika ita hanamoa diba, to do ita hegeregere lasi tanobada be noho namo gabuna ai ita halaoa totona. Dahaka dainai? Badina iseda diba bona goada be mai ena hetoana.

Hereva momokani be inai: “Taunimanima ta lasi ese iena mauri ia biagua noho.” (Ieremia 10:23)  Oibe, Dirava ese ita ia havaraia neganai, ia ese ita dekenai maoro ia henia lasi ita sibona eiava taunimanima ma haida ita lohiaia totona, eiava ranu o speis dekenai ita noho totona!

Mani inai oi laloa: Taunimanima do idia ura ma haida ese idia hadibadia edena mauri dalana idia badinaia eiava edena kara namodia idia badinaia, a? Eiava do idia ura lasi ma haida ese inai bamona gaudia, hegeregere, natuna hamasea karana, taravatu utua taudia hamasea karana (capital punishment) eiava natudia sisiba henia karana dekenai heduru herevadia idia henia. Unai gaudia ese taunimanima idia hapararaia. Ena be idia vara gaudia ita abia dae be auka, to Baibel ena hereva be momokani. Iseda diba be hegeregere lasi bona ita be maoro lasi taunimanima ita lohiaia totona. Vadaeni, edeseniai heduru ita abia diba?

Haere maorona be iseda Havaraia Tauna amo ita abia diba. Badina ia ese ita ia havaraia! Danu, ena be haida idia laloa ita ia laloa lasi, to ia ese ita ia laloaboio diba lasi. Momokani, Baibel ese ia hahedinaraia ia ese ita ia laloa bada. Unai buka idau hereana ita lalopararalaia neganai, sibona iseda mauri do ita lalopararalaia namonamo danu. Bona do ita laloparara dahaka dainai histori lalonai taunimanima be hisihisi idauidau idia davaria. Unai dainai German ena diba bada tauna ta ia gwau, “taunimanima bona gavamani taudia be histori lalonai ia vara gauna amo gau ta idia dibaia lasi, badina edia kara idia haidaua lasi.”

Iesu, Dirava ena natuna ia gwau “tau ta ese ia karaia kara namodia ese idia hamomokania ia be aonega tauna.” (Luka 7:35) Unai aonega ena haheitalai be Salamo 146:3 ai, ia gwau: “King taudia do umui abidadama henia lasi, badina taunimanima ese umui do idia hamauria diba lasi.” Unai sisiba namona ese ita ia durua do idia vara diba lasi gaudia ita abidadama henia lasi totona. North America ena dagedage siti ta ai ia noho tauna, Kenneth ia gwau: “Politikol taudia ta ta idia gwauhamata hekwakwanai do idia hamaoromaoroa, to idia karaia diba lasi. Hanaihanai edia gwauhamata idia hagugurua lasi karana ese ia hahedinaraia Baibel ena hereva be momokani bona maoromaoro.”

Matamanai ita herevalaia tauna Daniel ia gwau: “Dina ta ta ai lau laloparara, taunimanima be hegeregere lasi ma haida idia lohiaia totona. . . . Emu banika dekenai moni momo idia noho eiava investment haida oi karaia ese ia hahedinaraia lasi, emu vaira nega maurina do oi moalelaia. Lau itaia taunimanima momo be gabeai idia lalohisihisi bada.”

Baibel ese ita ia durua do idia vara diba lasi gaudia ita abidadama henia lasi totona. Danu, ita dekenai vaira negai do ita abia helaro namona ia henia.