“Inai uru taudia be teknoloji matamatadia, saiens bona moni davaria daladia idauidau idia moalelaia . . . Ena be ita dekenai gau ibounai idia noho mauri namona ita moalelaia totona, to kahirakahira iseda tanobada do ita hadikaia.”​​—⁠The Global Risks Report 2018, World Economic Forum.

DAHAKA DAINAI DIBA BADA TAUDIA MOMO BE TANOBADA BONA ISEDA VAIRA NEGA MAURINA IDIA LALOA MOMO? ITA DAVARIA HEKWAKWANAI HAIDA MANI ITA LALOA.

• INTANET AMO HENAOHENAO KARANA: The Australian niuspepa ia gwau: “Hari intanet be ia dika ia lao noho. Ia be matabodaga, bully, ma haida habadua meseij idia atoa taudia bona hackers ese idia gaukaralaia momo. Henaohenao taudia ese koikoi dalanai ma ta ena ladana bona infomeisen idia gaukaralaia karana be ia bada ia lao noho . . . Intanet ese taunimanima dekenai gau ma ta ia hadibaia​​—⁠unai be dagedage bona ma ta hahisia karana.”

• MONI ENA HEKWAKWANAI: Orea ta, Oxfam International ena ripoti ese ia hahedinaraia, taga bada taudia eit edia moni bona kohu be ia hegeregere tanobada ai idia noho ogogami taudia 3.6 bilioni totona. Unai ripoti ia gwau: “Taga taudia be moni bona kohu momo idia abia noho, to unai idia abia totona idia ese ogogami taudia idia gaukaralaia, unai ogogami taudia momo be hahine.” Haida idia laloa inai hekwakwanai ia bada ia lao dainai, dika bada do ia havaraia.

• HEIRIHEIRI BONA DAGEDAGE: Lagani 2018 ai, United Nations Refugee Agency ena ripoti ta ia gwau: “Ai itaia hari inai negai edia gabu idia rakatania bona gabu ma ta idia lao taudia edia namba be ia bada daekau.” Taunimanima 68 milioni mai kahana be heiriheiri bona dagedage karana dainai edia hanua idia rakatania. Ripoti ma ia gwau, “Taunimanima tamona be sekeni rua lalonai haida ese idia dagedage henia dainai ena hanua ia rakatania.”

• TANOBADA HADIKAIA KARADIA: Lagani 2018 ena Global Risks ripoti ia gwau, “animal bona tubutubu gaudia momo be idia ore haraga, hodahoda bona davara idia dika dainai taunimanima edia helt ia hadikaia.” Danu, tano haida ai insect idauidau be idia ore noho. Idia ese tubutubu gaudia edia tubu dalana idia durua dainai, saiens taudia idia gwau iseda tanobada be do ia dika.” Danu kone nadidia (coral reef) be idia dika noho. Saiens taudia idia laloa lagani 30 gunanai kone nadidia momo be idia dika.

Ita ese tanobada ai noho namo ita havaraia diba, a? Haida idia laloa taunimanima ese diba ma haida idia abia be namo. To edena bamona diba ese taunimanima edia lalohadai bona kara ia haidaua diba? Atikol ma haida ese unai henanadai do idia haerelaidia.