Tanobada ai idia vara hekwakwanai dainai taunimanima be idia gorere bona daradoko. Hekwakwanai idia davaria taudia idia laloa gau namona ta do ia vara lasi. Dahaka idia karaia?

• Haida idia ura lasi vaira negana idia laloa.

• Haida idia ura lasi edia hekwakwanai idia laloa momo dainai, idia inuinu kekero o drag dikadia idia abia.

• Haida idia laloa idia mauri noho be anina lasi, bona idia mase be namo.

• Reana hekwakwanai haida be nega sisina sibona idia vara bona idia ore haraga bona hahenamo oi davaria.

• Ena be unai hekwakwanai ia ore lasi to gau haida oi karaia diba oi haheaukalaia totona.

• Baibel be helaro korikorina ia henia, taunimanima ese idia davaria hekwakwanai do ia haorea momokani.

Baibel ia gwau: “Kerukeru totona umui lalohekwarahi lasi, badina kerukeru danu be mai ena lalohekwarahi gaudia. Hari dina sibona ena lalohekwarahi gaudia umui laloa.”​—Mataio 6:34.

Dina ta ena metau sibona oi laloa. Namo lasi kerukeru ena lalohekwarahi ese hari dina oi karaia diba gaudia ia koua.

Idia do vara lasi hekwakwanai oi laloa momo neganai, emu lalohekwarahi do oi habadaia bona vaira nega ai do idia vara gau namodia do oi laloa lasi.

Salamo torea tauna be Dirava ia guriguri henia, ia gwau: “Emu hereva be egu aena ena lamepa, bona egu dala ena diari.” (Salamo 119:105) Mani ita itaia edena dala ai Dirava ena Hereva, Baibel, be unai bamona:

Hanuaboi diburana ai, lamepa ese ita ia durua iseda aena atoa gabuna ita itaia totona. Unai hegeregerena, bema hari ita ura disisen badana ta ita karaia, Baibel ena aonega herevadia ese ita idia durua diba.

Lamepa ese iseda raka dalana ia hadiaria, unai amo vaira kahana ita itaia diba. Unai hegeregerena, Baibel ese vaira nega totona helaro namona ia hahedinaraia.