Ma Haida Matauraia Karana Dekenai Dahaka Ia Vara?

PLAY

MA HAIDA ITA MATAURAIA BE MAI ANINA BADA ENA BADINA

Ma haida matauraia karana ese badu ia koua bona hekwakwanai do ia habadaia lasi.

Baibel ena aonega sisiba ia gwau: “Mai manau ida ia haere tauna ese badu ia koua, to lalona hahisia hereva ese badu ia havaraia.” (Aonega Herevadia 15:1) Hemataurai lasi hereva bona karadia ese dika ia havaraia, kerosini ese lahi ia habadaia bamona.
Iesu ia gwau: “Kudouna ai idia honu gaudia be uduna ese ia gwauraia.” (Mataio 12:34) Bema idau bese taudia, iduhu, tano bona noho dala idauidau taudia dekenai hemataurai lasi herevadia ita gwauraia, unai ese iseda lalohadai idia dekenai ia hahedinaraia.

Vanegai ena ripoti ai, tano 28 lalonai taunimanima 32,000 amo, 65 pesen idia gwau hari inai negai momo be hemataurai karana idia hahedinaraia lasi.

EDENA DALA AI MA HAIDA OI MATAURAIA DIBA?

Sikuli eiava gaukara gabuna ai taunimanima ibounai oi matauraia, herevana edia lalohadai be oiemu amo ia idau. Do umui lalotamona diba gaudia oi laloa. Unai ese oi do ia durua idia oi gwauraia dika lasi.

“Ma haida hahemaoro henia karana umui hadokoa, vadaeni Dirava ese umui do ia hahemaoro henia lasi.”—Mataio 7:1.

Oi ura haida ese oi idia kara namo henia hegeregerena, idia dekenai unai bamona oi karaia. Bema ma haida oi laloa bona idia oi kara namo henia, idia danu be oi dekenai unai bamona do idia karaia.

“Umui ura taunimanima ese umui idia kara henia hegeregerena, idia dekenai unai bamona do umui karaia.”—Luka 6:31.

Dika oi gwauatao. Reana haida ese idia karaia o gwauraia gauna be oi hahisia totona idia karaia lasi, bona edia kara dika do oi gwauatao.

“Laloa namonamo tauna ese ena badu ia hamaragia, bona bema oi ia habadua tauna ena dika oi laloaboio, unai be kara namo hereana.”—Aonega Herevadia 19:11.

EDENA DALA AI IEHOVA ENA WITNES TAUDIA ESE HEMATAURAI KARANA IDIA HAHEDINARAIA?

Iehova ena Witnes taudia be edia komiuniti bona gaukara gabudia ai, haida matauraia karana idia hahedinaraia.

Ai ese Baibel ena hereva ai hadibaia, davana lasi taunimanima ibounai dekenai, to idia ai doria lasi Baibel amo ai dibaia gaudia o emai lalohadai idia abia dae totona. To ai ese Baibel ena sisiba ai badinaia, unai amo “mai manau bona hemataurai bada ida” taunimanima ai hereva henidia.—1 Petero 3:15; 2 Timoteo 2:24.

Taunimanima idauidau inai henia karana ai dadaraia bona Baibel ena hahediba herevadia idia ura dibaia mauri dala idauidau taudia be emai kongrigeisen heboudia dekenai ai welkam henia. ‘Taunimanima idauidau ibounai ai matauraia’ bona edia kara ai haheaukalaia.—1 Petero 2:17, New International Version.

Gavamani edia siahu ai matauraia badina idia henunai ai noho. (Roma 13:1) Taravatu ai badinaia bona takisi moni ai henia. Ena be politikol karadia lalonai ai vareai lasi, to haida edia disisen politikol gaudia dekenai ai matauraia.

NOGA!