Haheauka tauna be hahetoho idauidau bona lalohisihisi karadia ia haheaukalaia. Haheauka karana be ta ese ia hahedinaraia kava lasi, to hahetoho idauidau ia haheaukalaia amo unai kara ia hahedinaraia diba. Natu maragidia be raka idia diba totona nega momo idia raka bona idia moru, unai hegeregerena natu badadia be hekwakwanai idia davaria karana ese ia durudia mauri lalonai idia kwalimu totona.

Natudia haida be idia lalohisihisi bema gau ta idia hagugurua lasi, hekwakwanai badana ta idia davaria eiava haida ese idia gwauraia dika. Haida be idia hesiku. To, henunai idia noho mai anina bada herevadia idia lalopararalaia be namo:

• Ita be gau ibounai ita karaia maoromaoro diba lasi.​—Iamesi 3:2.

• Ita ibounai be iseda mauri lalonai hekwakwanai do ita davaria.​—Hadibaia Tauna 9:11.

• Iseda kara ita hanamoa diba bema ta ese iseda kerere ia gwauraia hedinarai.​—Aonega Herevadia 9:9.

Haheauka karana ese emu natuna do ia durua mai gari lasi ida hekwakwanai ia haheaukalaia totona.

Emu natuna ia kerere neganai.

BAIBEL ENA HAKAUA HEREVANA: “Kara maoromaoro tauna, be nega momo do ia moru, to ma do ia toreisi.”​—Aonega Herevadia 24:16.

Emu natuna oi durua ena kerere ia lalopararalaia totona. Hegeregere, dahaka do ia karaia bema sikuli ai ena test ia karaia namonamo lasi? Reana do ia hesiku, bona ia gwau, “Gau ta lau karaia namonamo diba lasi!”

Emu natuna dekenai haheauka karana oi hadibaia totona, namona be oi durua gabeai ena test do ia karaia namonamo dalana ia laloa. Unai amo do ia gaukara goada bona ia lalohisihisi lasi.

Danu, namo lasi emu natuna ena kerere oi hamaoromaoroa. To, ia oi durua sibona ena kerere hamaoromaoroa dalana ia laloa totona. Reana ia oi nanadaia, “Dahaka oi karaia diba unai subject oi lalopararalaia namonamo totona?”

Dika badadia idia vara neganai.

BAIBEL ENA HAKAUA HEREVANA: “Kerukeru umui dekenai do ia vara gauna be umui diba lasi.”​—Iamesi 4:14.

 Mauri be ia idau noho. Reana hari ia taga tauna be kerukeru do ia ogogami; eiava hari ia gorere lasi tauna be kerukeru do ia gorere. Baibel ia gwau: “Heau helulu dekenai, heau haraga taudia be guna lasi, bona tuari lalonai, goada taudia idia kwalimu lasi . . . Badina ibounai ese nega dika idia davaria noho, bona inai dika ia vara kava noho.”​—Hadibaia Tauna 9:11.

Oi be tama eiava sina ta dainai, oi hekwarahi emu natuna oi gimaia totona. To momokani, emu natuna be dika ibounai amo oi gimaia be auka.

Oibe, emu natuna be maragi dainai reana moni gaukara haboioa karana bona moni ena hekwakwanai do ia lalopararalaia namonamo lasi. To, ia oi durua hekwakwanai ma haida ia haheaukalaia totona, hegeregere, turana ta ida edia hetura karana ia dika eiava lalokau tauna ta ia mase. a

Emu natuna be sisiba ia abia neganai.

BAIBEL ENA HAKAUA HEREVANA: “Sisiba oi kamonai henia noho neganai, oi ese dina ta aonega do oi davaria.”​—Aonega Herevadia 19:20.

Sisiba henia karana be ta dagedage henia karana lasi; to ia be ta do ia hadibaia eiava durua ena kara ia hamaoromaoroa totona.

Bema emu natuna oi hadibaia sisiba ia abia dae totona, do umui moale diba. Tama ta ladana John, ia gwau: “Bema natudia be hanaihanai edia kerere idia hamaoromaoroa lasi, gau ta do idia dibaia lasi. Idia be kerere momo do idia karaia bona oi be hanaihanai edia kerere do oi hamaoromaoroa. Unai ese tama sina bona natudia edia mauri ia hadikaia diba.”

Edena dala ai emu natuna oi durua diba sisiba abia karana ena namo ia laloa totona? Bema emu natuna be sikuli ai eiava gabu ma ta ai sisiba ia abia, namo lasi oi gwau ia idia sisiba henia be maoro lasi. To, oi nanadaia:

• “Oi idia sisiba henia ena badina oi lalopararalaia, a?”

• “Edena dala ai emu kara oi hanamoa diba?”

• “Dahaka do oi karaia bema gabeai sisiba oi abia lou?”

Laloatao, sisiba henia karana ese emu natuna do ia durua, hari sibona lasi to ia bada neganai danu.