Haida idia gwau, mobael fon idia gaukaralaia momo natudia be . . .

• fon idia rakatania diba lasi.

• dagedage idia davaria, o idia ese ma haida idia dagedage henia.

• ena be idia ura lasi, to ponografi laulaudia idia itaia.

IDIA RAKATANIA DIBA LASI

Intanet ai idia atoa gadara be ita idia biagua totona idia karaia. Buka ta ia gwau: “Fon ai idia atoa apps idia karaia ita be fon ita rakatania lasi totona.” Bema apps ita raraia momo, unai apps idia hahedinaraia kampani be moni momo do ia abia.

INAI OI LALOA: Emu natuna be fon ia rakatania diba lasi, a? Edena dala ai oi durua diba ena nega ia gaukaralaia namonamo totona? ​—⁠EFESO 5:15, 16.

DAGEDAGE KARANA

Natudia haida be fon ai idia hereva auka, hereva miro idia gwauraia bona haida edia hemami idia laloa lasi. Unai ese dagedage karana ia havaraia.

Natudia be social media ai dagedage karadia idia karaia, badina idia ura momo ese ia do idia itaia. Eiava natu ta ia lalohisihisi bona ia mamia haida ese idia dadaraia, badina pati ta dekenai idia boiria lasi.

INAI OI LALOA: Emu natuna be mai hemataurai ida fon ai ta ia hereva henia, a? (Efeso 4:31) Ena turadia ese pati ta dekenai idia boiria lasi neganai, ia lalohisihisi, a?

PONOGRAFI

Intanet ai ponografi laulau be momo herea bona natudia ese idia itaia danu. Tama sina ese software ta idia gaukaralaia diba natudia edia fon ai unai gaudia idia koua totona. To namona be idia diba, gau ibounai idia koua diba lasi.

Ponografi laulau o teks mesiji itaia o siaia karana (sexting) be gavamani ese ia taravatua, ia be kara dika badana. Bema natuna ta be natudia ma haida edia matabodaga laulaudia ia itaia o siaia, pulisi ese ia idia dogoatao diba.

INAI OI LALOA: Edena dala ai emu natuna oi durua diba, ponografi laulau o teks mesiji ia dadaraia totona?​—⁠EFESO 5:3,4.

NATUDIA OI HADIBAIA

Momokani, natudia be fon gaukaralaia dalana idia diba momo, to idia ita hakaua be maoro. Buka ta ia gwau, natuna dekenai fon oi henia, to bema ia dekenai gaukaralaia dala maorona oi hadibaia lasi, “unai be kerere. Unai be hegeregere oi hamaoroa sinavai lalonai do ia paudobi, to nahu oi hadibaia lasi.”

Oi ura badinaia herevana oi makaia, o oiemu lalohadai oi torea.

• Egu natuna lau hadibaia fon dekenai haida ia matauraia totona

• Haida ese egu natuna idia dadaraia neganai, ia do lau hagoadaia

• Bema mai dalana, iena fon dekenai ponografi do lau koua

• Nega ta ta egu natuna ena fon do lau sekea

• Egu natuna ese dina ta ta ai fon ia gaukaralaia ena hora do lau abia hidi

• Hanuaboi ai fon be ena daiutu lalonai do ia abia vareai lasi

• Aniani negana ai fon do ai gaukaralaia lasi